Јеремја кими ҹәсарәтли ол

“Рәбби ҝөзлә, гүввәтли ол вә үрәјин ҹәсарәтли олсун; бәли, Рәбби ҝөзлә” (МӘЗМУР 27:14).

1. Јеһованын Шаһидләри һансы бол хејир-дуалары дадырлар?

ЈЕҺОВАНЫН ШАҺИДЛӘРИ руһани Ҹәннәтдә јашајырлар (Ишаја 11:6-9). Онлар, бу гәдәр һәјәҹанлы дүнјада јашајараг, Јеһова Аллаһла вә бир-бирләри илә сүлһә малик олан һәмиманлыларынын әһатәсиндә надир руһани мүһитдән һәзз алырлар (Мәзмур 29:11; Ишаја 54:13). Онларын руһани Ҹәннәти ҝенишләнмәкдәдир. ‘Аллаһын ирадәсини ҹанла-башла јеринә јетирән’ һәр бир кәс бу Ҹәннәтин ҝенишләнмәсинә көмәк едир (Ефеслиләрә 6:6). Онлар буну неҹә едирләр? Мүгәддәс Китаб принсипләри әсасында јашајараг вә башгаларыны да бу ҹүр давранмаға өјрәдәрәк, онлары бу Ҹәннәтин бол хејир-дуаларындан фајдаланмаға дә’вәт едирләр (Матта 28:19, 20; Јәһја 15:8).

2, 3. Исанын һәгиги давамчылары нәләрә таб ҝәтирмәли олурлар?

² Лакин бизим руһани Ҹәннәтдә јашамағымыз о демәк дејил ки, биз чәтинликләрә таб ҝәтирмәли олмуруг. Биз һәлә дә гејри-камиллијин, ағыр хәстәликләрин, гоҹалығын ҝәтирдији аҹылардан әзијјәт чәкир вә нәһајәтдә өлүрүк. Бундан әлавә, “ахыр ҝүнләр” һаггындакы пејғәмбәрликләрин јеринә јетдијини ҝөрүрүк (2 Тимотејә 3:1). Мүһарибәләр, ҹинајәт, хәстәликләр, аҹлыг вә диҝәр ҹидди бәлалар бүтүн инсанлара кәдәр ҝәтирир вә Јеһованын Шаһидләри дә бундан мүдафиә олунмајыблар (Марк 13:3-10; Лука 21:10, 11).

³ Бүтүн бунлардан әлавә, биз чох ҝөзәл билирик ки, руһани Ҹәннәтимизин мүлајим атмосфериндән кәнарда гаршыдурмаларын сојуг күләкләри әсир. Иса давамчыларыны хәбәрдар етмишди: “Һалбуки дүнјадан дејилсиниз, Мән сизи дүнјадан сечдим; бунун үчүн дүнја сизә нифрәт едир. Мәним сизә сөјләдијим сөзү хатырлајын: “Гул ағасындан үстүн дејилдир”. Әҝәр Мәни тә’гиб етдиләрсә, сизи дә тә’гиб едәҹәкләр” (Јәһја 15:18-21). Буҝүнкү вәзијјәт дә фәргли дејил. Инсанларын әксәријјәти бизим дини бахышларымызы баша дүшмүр вә ја онлара һөрмәт етмир. Бә’зиләри бизи тәнгид едир, әлә салыр вә ја һәтта, Исанын хәбәрдарлыг етдији кими, бизә нифрәт едирләр (Матта 10:22). Чох вахт күтләви информасија васитәләриндә бизим барәмиздә јалан вә мәкрли бөһтан јајырлар (Мәзмур 109:1-3). Бәли, һамымыз чәтин шәраитләрлә гаршылашыр вә бә’зиләримиз руһдан дүшә биләрик. Белә исә неҹә таб ҝәтирә биләрик?

4. Таб ҝәтирмәк үчүн көмәји һарада ахтармаг лазымдыр?

⁴ Јеһова бизә көмәк едәҹәк. Аллаһдан илһам алмыш мәзмурчу јазырды: “Салеһин дәрдләри чохдур; фәгәт Рәбб һамысындан ону азад едәр” (Мәзмур 34:19; 1 Коринфлиләрә 10:13). Бир чохумуз тәсдиг едә биләр ки, Јеһоваја бүтүнлүклә бел бағлајанда, О, һәр бир чәтинлијә таб ҝәтирмәјимиз үчүн ҝүҹ верир. Аллаһа мәһәббәтимиз вә гаршымыза гојулан севинҹ — үмидсизлик вә горху һиссләри илә мүбаризә апармагда бизә көмәк едир (Ибраниләрә 12:2). Беләликлә, чәтинликләрә бахмајараг, мөһкәм дурмаға давам едирик.

Аллаһын Кәламы Јеремјаны мөһкәмләндирирди

5, 6. а) Јеһованын чәтинликләрә таб ҝәтирмәји баҹаран садиг хидмәтчиләринин нүмунәләрини ҝөстәрин. б) Аллаһ Јеремјаны пејғәмбәр олмаға чағыранда, о неҹә реаксија ҝөстәрди?

⁵ Чәтин шәраитләрә бахмајараг, Јеһованын садиг хидмәтчиләри тарих боју севинҹ дујурдулар. Бә’зиләри, Јеһованын сәдагәтсиз инсанлар үзәринә гәзәбини төкәрәк, Өз һөкмләрини јеринә јетирдији бир вахтда јашамышлар. Аллаһын бу ҹүр садиг хидмәтчиләринин арасында Јеремја вә онун бә’зи мүасирләри, һәм дә биринҹи әсрин мәсиһчиләри олмушлар. Һәмин тарихи һадисәләр бизим руһланмамыз үчүн Мүгәддәс Китаба јазылмышдыр вә биз онлары тәдгиг едәрәк чох шеј өјрәнә биләрик (Ромалылара 15:4). Мәсәлән, Јеремја һаггында данышаг.

⁶ Ҝәнҹ јашларында Јеремја Јәһудејада пејғәмбәр кими хидмәт етмәјә чағырылмышды. Буну асан тапшырыг адландырмаг олмаз. Бир чохлары јалан танрылара ибадәт едирдиләр. Јеремјанын хидмәтинин әввәлиндә һөкмранлыг едән Јошија падшаһ Аллаһа сәдагәтини горуса да, ондан сонра ҝәлән падшаһларын һамысы сәдагәтсиз идиләр, халгы өјрәтмәк мәс’улијјәти дашыјан пејғәмбәр вә каһинләрин әксәријјәти исә, һәгигәтә тәрәфдар олмурдулар (Јеремја 1:1, 2; 6:13; 23:11). Бәс Јеһова Јеремјаны пејғәмбәр олмаға чағыранда, о һансы һисси кечиртди? Горху! (Јеремја 1:8, 17). Јеремја өзүнүн илк реаксијасы һаггында јазмышдыр: “Мән дедим: Аһ, ја Рәбб Јеһова! Будур, мән сөз сөјләмәји билмирәм; чүнки ушағам” (Јеремја 1:6).

7. Инсанлар Јеремјанын сөјләдији хәбәрә неҹә реаксија ҝөстәрирдиләр вә о, һансы һиссләри кечирирди?

⁷ Јеремјанын әразисиндәки инсанларын әксәријјәти онун ҝәтирдији хәбәри гәбул етмирдиләр вә пејғәмбәр тез-тез ҝүҹлү мүгавимәтләрлә гаршылашырды. Бир дәфә каһин Пашһур ону дөјдү вә күндәјә салды. Јеремја о заман һансы һисси кечирдијини данышыр: “Ону [Јеһованы] анмајаҹағам вә артыг онун исмилә сөјләмәјәҹәјәм, дедим”. Еһтимал ки, бә’зән сәндә дә бу ҹүр һиссләр јараныр — сән тәслим олмаг истәјирсән. Јеремјанын мәтанәт ҝөстәрмәси үчүн она нәјин көмәк етдијинә диггәт јетир. О деди: “О заман, [Аллаһын сөзү, јә’ни хәбәри] үрәјимдә, сүмүкләримин ичинә ҝизләдилмиш јанар бир атәш кими олду вә өзүмү тутмагдан јорулдум, артыг әлимдән ҝәлмир” (Јеремја 20:9). Аллаһын сөзләри сәнә дә бу ҹүр тә’сир ҝөстәрирми?

Јеремјанын достлары

8, 9. а) Пејғәмбәр Урија неҹә зәифлик ҝөстәрди вә бунун нәтиҹәси нә олду? б) Барук нәјә ҝөрә руһдан дүшдү вә она неҹә јардым ҝөстәрилди?

⁸ Пејғәмбәрлик ишиндә Јеремја тәк дејилди. Онун достлары варды вә еһтимал ки, бу ону руһландырырды. Лакин бә’зән онун достлары мүдрик давранмырдылар. Мәсәлән, пејғәмбәр Урија Јерусәлимә вә Јәһудаја гаршы Јеремјанын бүтүн сөзләринә мүвафиг олараг пејғәмбәрлик едирди. Лакин падшаһ Јеһојаким Уријаны өлдүрмәк әмри верәндә, пејғәмбәр горху ичиндә Мисирә гачды. Бу ону хилас еләмәди. Падшаһын гуллугчулары ону тә’гиб едиб тутдулар вә ҝери Јерусәлимә ҝәтирәрәк орада гәтлә јетирдиләр. Јәгин ки, бу Јеремја үчүн чох бөјүк зәрбә иди! (Јеремја 26:20-23).

⁹ Јеремјанын диҝәр досту исә катиби Барук иди. Барук Јеремја үчүн ҝөзәл көмәкчи иди, лакин ҝүнләрин бириндә о да руһани нөгтеји-нәзәрини итирди. О, шикајәтләнмәјә башлады: “Вај башыма! Чүнки Рәбб ағрыларыма кәдәр гатды; инилтимдән јорулдум вә раһатлыг тапмырам”. Руһдан дүшән Барук руһани шејләрә олан миннәтдарлығыны итирмәјә башлады. Лакин Јеһова Барука мәрһәмәтлә һикмәтли нәсиһәт верди, о да бу нәсиһәти динләјәрәк өзүнү дүзәлтди. Сонра Јеһова она, Јерусәлимин мәһвиндән сағ чыхаҹағына даир зәманәт верди (Јеремја 45:1-5). Барук руһани таразлығыны јенидән бәрпа едәндә, јәгин ки, Јеремја чох севинди.

Јеһова пејғәмбәринә дәстәк олурду

10. Јеһова Јеремјаны дәстәкләјәҹәјинә даир һансы вә’ди верди?

¹⁰ Ән ваҹиби исә, Јеһова Јеремјаны атмады. Аллаһ пејғәмбәрин һансы һиссләри кечирдијини баша дүшүр вә она ҝәрәк олан гүввәни вә көмәклији верирди. Мәсәлән, хидмәтинин әввәлиндә, Јеремја јарарлы олдуғуна даир шүбһәсини билдирәндә Јеһова ону үрәкләндирди: “Онларын үзүндән горхма; чүнки сәни гуртармаг үчүн мән сәнинлә бәрабәрәм, Рәбб дејир”. Сонра пејғәмбәрә, онун тапшырыгларына даир ҝөстәриш верәрәк Јеһова ону әмин етди: “Сәнинлә ҹәнҝләшәҹәкләр; фәгәт сәнә ҝүҹләри јетмәјәҹәк; чүнки сәни гуртармаг үчүн мән сәнинлә бәрабәрәм, Рәбб дејир” (Јеремја 1:8, 19). Неҹә дә тәсәлливериҹи вә’ддир! Нәтиҹәдә Јеһова Өз вә’динә әсасән давранды.

11. Нәдән ҝөрүнүр ки, Јеһова Јеремјаны дәстәкләмәк вә’дини јеринә јетирди?

¹¹ Буна ҝөрә дә күндәјә салынан вә халгын истеһзасына мә’руз галан Јеремја әминликлә белә деди: “Рәбб горхунҹ бир иҝид кими мәнимлә бәрабәрдир; бундан өтрү мәни говалајанлар сүрүшәҹәкләр вә јенмәјәҹәкләр... чох утанаҹаглар” (Јеремја 20:11). Сонрадан Јеремјаны өлдүрмәк үчүн суи-гәсд һазырлананда, Јеһова онунла олмаға давам етди вә Барук кими, Јеремја да Јерусәлимин мәһвиндән сағ чыхды. Онун тә’гибчиләри вә хәбәрдарлығына е’тинасыз јанашанлар ја һәлак олдулар, ја да Бабилә әсир апарылдылар.

12. Руһ дүшкүнлүјүнә јол ачан сәбәбләр олса да, нәји јаддан чыхармамалыјыг?

¹² Бу ҝүн Јеһованын бир чох Шаһидләри Јеремја кими изтираблара мә’руз галырлар. Јухарыда гејд олундуғу кими, бу бә’зән бизим шәхси гејри-камиллијимиз уҹбатындан, бә’зән дүнјада һөкм сүрән гармагарышыглыгдан, бә’зән исә ишимизә мүгавимәт ҝөстәрәнләрин уҹбатындан баш верир. Бу ҹүр чәтинликләр бизи руһдан сала биләр. Јеремјаја бәнзәр тәрздә биз дә хидмәти давам етдирмәк үчүн гүввәмизин олмадығыны дүшүнмәјә башлаја биләрик. Е’тираф етмәк лазымдыр ки, вахташыры олараг руһ дүшкүнлүјү һисс етмәк инсанлар үчүн, демәк олар ки, гачылмаздыр. Руһ дүшкүнлүјү јаранан заман Јеһоваја олан мәһәббәтимизин дәринлији сынаға чәкилир. Белә исә ҝәлин, Уријадан фәргли олараг, руһ дүшкүнлүјүнүн бизи Јеһоваја хидмәтдән узаглашдырмасына јол вермәмәјә гәти гәрарлы олаг. Бунун әвәзинә Јеремјаны тәглид едәк вә Јеһованын јардымына әмин олаг.

Руһ дүшкүнлүјү илә неҹә мүбаризә апармалы

13. Биз Јеремјанын вә Давудун нүмунәсини неҹә тәглид едә биләрик?

¹³ Јеһоваја ән дәрин дујғуларыны ачараг вә она ҝүҹ вермәсини хаһиш едәрәк, Јеремја мүнтәзәм олараг Јеһова илә үнсијјәтдә олурду. Бу, тәглид етмәк үчүн ҝөзәл нүмунәдир. Көмәк үчүн ејни Мәнбәјә мүраҹиәт едән Давуд падшаһ јазырды: “Сөзләримә гулаг вер, ја Рәбб, аһыма бах. Фәрјадымын сәсини јахшы динлә, еј Падшаһым вә Аллаһым, чүнки дуам сәнәдир” (Мәзмур 5:1, 2). Давудун һәјаты барәдә олан илһамланмыш һадисә, онун көмәк үчүн етдији дуалара Јеһованын тәкрар-тәкрар ҹаваб вердијини ҝөстәрир (Мәзмур 18:1, 2; 21:1-5). Буна бәнзәр тәрздә, ҝүҹлү тәзјиг һисси кечирәндә вә проблемләр ашылмаз кими ҝөрүнәндә, Јеһоваја дуада мүраҹиәт етмәк вә үрәјимизи Она ачмаг бизим үчүн бөјүк тәсәлли олаҹаг (Филипилиләрә 4:6, 7; 1 Салониклиләрә 5:16-18). Јеһова биздән үз чевирмир. Әксинә, гајғымыза галдығына әмин едир (1 Петер 5:6, 7). Амма әҝәр биз Јеһоваја дуа едиб, сонра Онун дедикләринә гулаг асмасаг, бу мүдрик давраныш олардымы?

14. Јеһованын сөзләри Јеремјаја неҹә тә’сир едирди?

¹⁴ Јеһова бизимлә неҹә данышыр? Јенидән Јеремјаны јада салаг. Јеремја пејғәмбәр олдуғу үчүн, Јеһова онунла бирбаша үнсијјәт едирди. Јеремја, Аллаһын сөзүнүн онун үрәјинә неҹә тә’сир етдијини данышыр: “Сөзләрин тапылды вә онлары једим; вә сөзләрин мәнә шадлыг вә үрәјимә севинҹ олду; чүнки сәнин исминлә чағырылырам, еј ордуларын Аллаһы Рәбб!” (Јеремја 15:16). Бәли, Јеремја Аллаһын исмилә чағырылмаға шад иди вә Аллаһын сөзләри онун үчүн чох гијмәтли иди. Бу сәбәбдән, Павел кими, Јеремја да она е’тибар едилмиш хәбәри вар ҝүҹү илә бәјан етмәк истәјирди (Ромалылара 1:15, 16).

15. Јеһованын сөзләринин бизим үрәјимиздә олмасы үчүн нә етмәлијик вә һансы сәбәбләрдән суса билмәрик?

¹⁵ Бу ҝүн Јеһова һеч кимлә бирбаша үнсијјәт етмир. Буна бахмајараг, биз Аллаһын Мүгәддәс Китабын сәһифәләриндә јазылмыш сөзләринә маликик. Әҝәр биз Мүгәддәс Китабы тәдгиг етмәјә ҹидди јанашырыгса вә охудугларымызын үзәриндә дәриндән дүшүнүрүксә, Аллаһын сөзләри бизим үрәјимиз үчүн дә ‘шадлыг вә севинҹ’ олаҹагдыр. Бу сөзләри башгалары илә бөлүшәркән Јеһованын адыны дашыдығымызы билмәк бизи јахшы мә’нада һәјәҹанландырыр. Һеч заман унутмајаг ки, бу дүнјада башга һеч бир груп Јеһованын адыны бәјан етмир. Јалныз Онун Шаһидләри Аллаһын гурулмуш Падшаһлығы барәсиндәки хош хәбәри е’лан едир вә һәлим инсанлары өјрәдәрәк, онлара Иса Мәсиһин шаҝирдләри олмаға көмәк едирләр (Матта 28:19, 20). Неҹә дә бөјүк шәрәфдир! Јеһованын бизә мәһәббәтлә һәвалә етдији бөјүк үстүнлүјү нәзәрә алараг суса биләрикми?

Кимләрлә үнсијјәт етдијимизә диггәт јетирәк

16, 17. Јеремјанын кимләрлә үнсијјәт етмәјә даир нөгтеји-нәзәри неҹә иди вә биз ону неҹә тәглид едә биләрик?

¹⁶ Јеремја она ҹәсарәтли олмагда көмәк едән даһа бир амил барәсиндә данышыр. О демишдир: “Ҝүләнләрин дәрнәјиндә отурмадым вә севиниб ҹошмадым; сәнин әлиндән өтрү тәк башыма отурдум; чүнки мәни гәзәблә долдурдун” (Јеремја 15:17). Јеремја үчүн тәк отурмаг, пис достлугларын позуҹу тә’сиринә мә’руз галмагдан јахшы иди. Бу мәсәләдә биз онун һиссләринә шәрикик. Һәвари Павелин хәбәрдарлығыны һеч заман јаддан чыхармајаг ки, “пис достлуг јахшы әхлагы позар” (1 Коринфлиләрә 15:33).

¹⁷ Пис достлугларын васитәсилә дүнјанын руһу ағлымыза јол тапар вә ону чиркләндирә биләр (1 Коринфлиләрә 2:12; Ефеслиләрә 2:2; Јагуб 4:4). Ҝәлин буна ҝөрә дә өз һиссләримизи зәрәрли достлуглары ајырд етмәјә алышдыраг ки, онлардан бүтүнлүклә гачына биләк (Ибраниләрә 5:14). Әҝәр Павел бу ҝүн јашасајды, әхлагсызлыг вә зоракылыгла мүшајиәт олунан филмә вә ја зоракылығы илә фәргләнән идман јарышларына бахан мәсиһчијә, сәнин зәннинҹә нә дејәрди? Һеч танымадығы адамла Интернет васитәсилә достлуг јарадан гардаша һансы мәсләһәти верәрди? О, шәхси өјрәнмәјә вахт ајырмадан саатларла видео ојунлары ојнајан вә ја телевизора бахан мәсиһчи һаггында нә дүшүнәрди? (2 Коринфлиләрә 6:14б; Ефеслиләрә 5:3-5, 15, 16).

Руһани Ҹәннәтдә галмаға давам ет

18. Руһән ҝүҹлү галмагда бизә нә көмәк едәр?

¹⁸ Биз руһани Ҹәннәтимизи јүксәк гијмәтләндиририк. Буҝүнкү дүнјада бу Ҹәннәтин бәнзәри јохдур. Мәсиһчиләрин арасындакы мәһәббәт, диггәт вә хејирхаһлыг һәтта иманымыза шәрик олмајан инсанлара да тәәссүрат бағышлајыр (Ефеслиләрә 4:31, 32). Буна бахмајараг, руһ дүшкүнлүјү илә әввәл олдуғундан даһа чох мүбаризә апармалыјыг. Јахшы достлуглар, дуа вә шәхси өјрәнмәдә ҝөстәрдијимиз сә’ј, руһән мөһкәм галмагда бизә көмәк едәр. Бүтүн бунлар бизи о гәдәр мөһкәмләдәр ки, биз, Јеһоваја там е’тибарымызы горујуб сахлајараг, истәнилән чәтинликләрин өһдәсиндән ҝәлә биләрик (2 Коринфлиләрә 4:7, 8).

19, 20. а) Таб ҝәтирмәјимизә нә көмәк едәҹәк? б) Нөвбәти мәгалә кимләрә үнванланыб вә һәм дә кимләр үчүн мараглы олаҹаг?

¹⁹ Һеч бир заман јол вермәли дејилик ки, чатдырдығымыз Мүгәддәс Китаб хәбәринә нифрәт едәнләр бизи горхутсунлар вә ја иманымызы зәифләтсинләр. Јеремјаны тә’гиб едән дүшмәнләр кими, бизә гаршы вурушанлар да, әслиндә Аллаһа гаршы вурушурлар. Онлар бизә бата билмәјәҹәкләр. Рәгибләримиздән олдугҹа гүввәтли олан Јеһова дејир: “Рәбби ҝөзлә, гүввәтли ол вә үрәјин ҹәсарәтли олсун; бәли, Рәбби ҝөзлә” (Мәзмур 27:14). Јеһоваја бүтүн үрәјимизлә бел бағлајараг, хејирхаһлыг етмәкдән ваз кечмәмәјә гәти гәрарлы олаг. Әмин ола биләрик ки, Јеремја вә Барук кими, биз дә ‘әҝәр зәиф дүшмәсәк вахтында бичәҹәјик’ (Галатијалылара 6:9).

²⁰ Руһ дүшкүнлүјү илә мүбаризә бир чох мәсиһчиләрдән даима ҝүҹ тәләб едир. Ҝәнҹләр исә хүсуси чәтинликләрлә гаршылашырлар. Лакин буна бахмајараг, ҝәнҹләрин гаршысында даһа чох ҝөзәл имканлар ачылыб. Нөвбәти мәгалә бирбаша онлара үнванланыб. Һәмин мәгалә һәм дә валидејнләр вә үмумијјәтлә Аллаһа һәср олунмуш, сөзү, нүмунәси вә конкрет әмәлләри илә ҝәнҹ мәсиһчиләрә көмәк едә биләҹәк јығынҹағын бүтүн үзвләри үчүн мараглы олаҹаг.

Неҹә ҹаваб верәрдиниз?

• Руһ дүшкүнлүјү јарадан чәтинликләр нәјә ҝөрә гачылмаздыр вә көмәк үчүн кимә мүраҹиәт етмәлијик?

• Чәтин тапшырыг алса да Јеремја руһ дүшкүнлүјүнә неҹә галиб ҝәлди?

• Һәтта чәтин анларда белә үрәјимизә ‘шадлыг вә севинҹи’ нә ҝәтирәҹәк?

[19-ҹу сәһифәдәки шәкил]

Јеремја һесаб едирди ки, пејғәмбәр олмаг үчүн һәддиндән артыг ҝәнҹ вә тәҹрүбәсиздир.

[20-ҹи сәһифәдәки шәкил]

Һәтта тә’гибләрә мә’руз галаркән белә Јеремја билирди ки, Јеһова “горхунҹ бир иҝид кими” онунладыр.