«Ҝедин, бүтүн халглары шаҝирдим един, онлары... вәфтиз един»
«Беләликлә, ҝедин, бүтүн халглары шаҝирдим един, онлары... вәфтиз един; сизә әмр етдијим һәр шејә риајәт етмәји онлара өјрәдин» (МАТТА 28:19, 20).
1. Исраил халгы Сина дағынын әтәјиндә Аллаһа нә вә’д етди?
ТӘХМИНӘН 3 500 ил бундан әввәл Исраил халгы Сина дағынын әтәјиндә топлашараг, Јеһоваја вә’д етмишди: «Рәббин бүтүн сөјләдикләринә әмәл едәҹәјик». Бу сөзләри дејәрәк исраиллиләр өзләрини Јеһоваја һәср етдиләр вә һәмин андан е’тибарән, Аллаһа ‘мәхсус халг’ олдулар (Чыхыш 19:5, 8; 24:3). Исраиллиләр Аллаһын онлары мүдафиә едәҹәјини вә нәсилдән-нәслә ‘сүд вә бал ахан торпагда’ јашајаҹағы вахты сәбирсизликлә ҝөзләјирдиләр (Левилиләр 20:24).
2. Бу ҝүн инсанларын Аллаһла һансы мүнасибәти гурмаг имканы вар?
2 Мәзмурчу Асафын е’тираф етдији кими, исраиллиләр ‘Аллаһын әһдини поздулар, [Онун] ганунлары илә јашамаг истәмәдиләр’ (Мәзмур 78:10). Исраиллиләр, әҹдадларынын Јеһоваја вердији вә’дә садиг галмадылар. Нәтиҹәдә халг Јеһова илә олан хүсуси мүнасибәтини итирди (Ваиз 5:4; Матта 23:37, 38). Буна ҝөрә дә, Аллаһ Өз ады наминә халг тәшкил етмәк үчүн диггәтини диҝәр милләтләрә јөнәлтди (Һәвариләрин ишләри 15:14). Бу ахыр ҝүнләрдә О, «һәр милләтдән, бүтүн гәбиләләрдән, халглардан вә дилләрдән олан, кимсәнин сајмаға гадир олмадығы бөјүк бир издиһам» топлајыр. Бу издиһам севинҹлә нида едир: «Хилас, тахтда отуран Аллаһымыза вә Гузуја мәхсусдур!» (Вәһј 7:9, 10).
3. Аллаһла шәхси мүнасибәт гурмаг үчүн инсан һансы аддымлары атмалыдыр?
3 Әҝәр биз дә Аллаһла дәјәрли мүнасибәти олан инсанларын арасында олмаг истәјириксә, онда һәјатымызы Јеһоваја һәср етмәли вә буну башгаларына билдирмәк үчүн суда вәфтиз олунмалыјыг. Бу, Исанын шаҝирдләринә вердији әмрә мүвафигдир: «Беләликлә, ҝедин, бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един; сизә әмр етдијим һәр шејә риајәт етмәји онлара өјрәдин» (Матта 28:19, 20). Гәдимдә исраиллиләр ‘әһд китабынын’ охунмасына гулаг асырдылар (Чыхыш 24:3, 7, 8). Буна ҝөрә дә, онлар Јеһованын гаршысында һансы өһдәчилији ҝөтүрдүкләрини баша дүшүрдүләр. Бу ҝүн дә, вәфтиз олмаздан габаг Аллаһын ирадәсинә даир Мүгәддәс Китабдан дәгиг билик әлдә етмәк зәруридир.
4. Вәфтиз үчүн тәләбләрә мүвафиг олмаг үчүн инсан нә етмәлидир? (Ҹавабыныза 24-ҹү сәһифәдә олан чәрчивәдәки фикирләри дә дахил един.)
4 Бәли, Иса истәјирди ки, онун шаҝирдләринин иманы артыг вәфтиз олунмаздан габаг мөһкәм тәмәл үзәриндә гурулсун. О, давамчыларына јалныз ҝедиб шаҝирд һазырламағы дејил, һәм дә ‘әмр етдији һәр шејә риајәт етмәји онлара өјрәтмәји’ дә тапшырмышды (Матта 7:24, 25; Ефеслиләрә 3:17-19). Вәфтиз үчүн тәләбләрә мүвафиг оланлар адәтән Мүгәддәс Китабы бир нечә ај вә ја бир-ики ил әрзиндә өјрәнирләр. Буна ҝөрә, онларын бу гәрарларынын тәләсик вә ја дүшүнүлмәмиш олдуғуну демәк олмаз. Вәфтиздән габаг намизәдләр ики мүһүм суала «бәли» ҹавабыны верирләр. Исанын сөзләринә ҝөрә бизим «“Бәли, Бәли”, “Хејр, Хејр”» олмалыдыр. Ҝәлин бу ики суалы һәртәрәфли нәзәрдән кечирәк (Матта 5:37).
Төвбә вә һәср едилмә
5. Вәфтиз үчүн биринҹи суалда һансы ики ваҹиб аддым гејд едилир?
5 Вәфтиз үчүн намизәдләрә верилән биринҹи суалда кечмиш һәјат тәрзиндән төвбә едиб-етмәдији вә Јеһованын ирадәсини јеринә јетирмәк үчүн өзүнү Она һәср едиб-етмәдији сорушулур. Бу суалда гејд едилир ки, вәфтиздән әввәл инсан ики ваҹиб аддымы атмалыдыр — төвбә етмәли вә өзүнү Јеһоваја һәср етмәлидир.
6, 7. а) Вәфтиз олмаг истәјән бүтүн инсанлар үчүн төвбә етмәк нәјә ҝөрә ваҹибдир? б) Инсан төвбә едәндән сонра һансы дәјишикликләри етмәлидир?
6 Инсан вәфтиздән әввәл ҝүнаһларына ҝөрә нә үчүн төвбә етмәлидир? Һәвари Павел буну белә изаһ едир: ‘Бир заманлар бизим һамымыз да ҹисмани тәбиәтимизин еһтирасларына ујмушдуг’ (Ефеслиләрә 2:3). Аллаһын ирадәси һаггында дәгиг билик әлдә етмәздән габаг биз ҹәмијјәтдә һөкм сүрән гајда-ганунлара әсасән јашамыш вә бу дүнјанын дәјәрләрини мәнимсәмишдик. Һәјатымызы бу системин танрысы Шејтан идарә едирди (2 Коринфлиләрә 4:4). Лакин Аллаһын ирадәсини өјрәндикдән сонра биз ‘артыг бәшәри еһтираслара ҝөрә дејил, Аллаһын ирадәсинә ҝөрә јашамаг’ гәрарына ҝәлдик (1 Петер 4:2).
7 Инсанын вәфтиздән сонра гәдәм гојдуғу јени һәјат јолу чох мүкафатландырыҹыдыр. Ән ваҹиби одур ки, онун Јеһова илә сых мүнасибәтинин јаранмасына јол ачылыр. Давудун сөзләринә ҝөрә бу, Аллаһын ‘чадырына’ вә ‘мүгәддәс дағына’ дә’вәт алмаг гәдәр бөјүк бир шәрәфдир (Мәзмур 15:1). Јеһованын ораја һамыны дејил, јалныз «камиллик јолу илә ҝедән, әмәлисалеһ олан, үрәкдән һәгигәти сөјләјән» кәсләри дә’вәт етмәси мәнтигә ујғундур (Мәзмур 15:2). Һәгигәти билмәздән габаг сүрдүјүмүз һәјат тәрзиндән асылы олараг, бу тәләбләрә мүвафиг олмаг үчүн давраныш тәрзимиздә вә шәхсијјәтимиздә дәјишикликләр етмәк лазым ҝәлә биләр (1 Коринфлиләрә 6:9-11; Колослулара 3:5-10). Инсаны һәјатында белә дәјишикликләр етмәјә — төвбә, јә’ни әввәлләр сүрдүјү һәјат тәрзинә ҝөрә дәрин пешманчылыг һисси вә Јеһованы мәмнун етмәк гәтијјәти тәшвиг етмәлидир. Нәтиҹәдә инсан худбин, дүнјәви һәјат тәрзиндән тамамилә дөнүб, Јеһованы разы салан јол илә јеримәјә башлајыр (Һәвариләрин ишләри 3:19).
8. Инсан өзүнү Аллаһа неҹә һәср едир вә бу вәфтизлә неҹә бағлыдыр?
8 Биринҹи суалын икинҹи һиссәсиндә намизәдләрдән, Јеһованын ирадәсини јеринә јетирмәк үчүн һәјатларыны Аллаһа һәср едиб-етмәдикләри сорушулур. Һәср едилмә — вәфтиздән габаг атылмалы олан ән ваҹиб аддымдыр. Бунун үчүн, һәјатымызы Јеһоваја һәср етмәк арзумузу дуада Она сөјләмәлијик (Ромалылара 14:7, 8; 2 Коринфлиләрә 5:15). Һәмин андан Јеһова бизим Саһибимиз олур, биз исә Мәсиһ кими, Аллаһын ирадәсини јеринә јетирмәкдән даһа чох мәмнунлуг дујуруг (Мәзмур 40:8; Ефеслиләрә 6:6). Бу мүгәддәс вә’д һәјатда јалныз бир дәфә верилир. Өзүмүзү Јеһоваја һәср едәндә, буну тәкликдә едирик, лакин сәмави Атамыза мүгәддәс вә’ди вердијимизи һамыја вәфтиз олмагла ҝөстәририк (Ромалылара 10:10).
9, 10. а) Аллаһын ирадәсини јеринә јетирмәк өзүнә нәји дахил едир? б) Һәтта насистләр Шаһидләрин Аллаһа һәср олундуғуну неҹә е’тираф етмишләр?
9 Мәсиһин ардынҹа ҝетмәк вә Аллаһын ирадәсини јеринә јетирмәк өзүнә нәји дахил едир? Иса шаҝирдләринә демишди: «Ким ардымҹа ҝәлмәк истәјирсә, гој өзүнү инкар етсин, ишҝәнҹә дирәјини ҝөтүрүб даима ардымҹа ҝәлсин» (Матта 16:24, ЈД). Бурада о, үч аддымы вурғуламышды. Биринҹиси, ‘өзүмүзү инкар етмәлијик’, башга сөзлә десәк, худбин, гејри-камил арзуларымыза «јох», Аллаһын мәсләһәт вә рәһбәрлијинә исә «бәли» демәлијик. Икинҹиси, ‘ишҝәнҹә дирәјимизи ҝөтүрмәлијик’. Исанын ҝүнләриндә ишҝәнҹә дирәји рүсвајчылыг вә изтираб рәмзи иди. Биз, мәсиһчи олдуғумуз үчүн хош хәбәрә ҝөрә бә’зән әзијјәтләрлә үзләшәҹәјимизи баша дүшүрүк (2 Тимотејә 1:8). Дүнја тәрәфиндән истеһза вә иттиһамлара мә’руз гала биләҹәјимизә бахмајараг, Аллаһы разы салдығымыздан севинҹ дујараг Иса кими ‘рүсвајчылыға е’тинасызлыг’ ҝөстәририк (Ибраниләрә 12:2). Үчүнҹүсү исә, биз «даима» Исанын ардынҹа ҝетмәлијик (Мәзмур 73:26; 119:44; 145:2).
10 Мараглыдыр ки, Јеһованын Шаһидләринин Аллаһа гејдсиз-шәртсиз һәср олунмасыны һәтта бә’зи тә’гибчиләр белә баша дүшүрләр. Мәсәлән, Бухенвалд алман фашист һәбс дүшәрҝәсиндә өз е’тигадларындан дөнмәјән Шаһидләр бу сөзләр јазылан вәрәгә имза атмалы идиләр: «Мән һәлә дә Мүгәддәс Китабын сә’јли тәдгигатчысыјам вә Јеһоваја вердијим андымы һеч вахт позмајаҹағам». Бәли, Аллаһа һәср олунмуш бүтүн садиг мәсиһчиләр мәһз белә фикирләширләр! (Һәвариләрин ишләри 5:32).
Јеһованын Шаһидләринә гошулмаг
11. Вәфтиздән сонра мәсиһчи һансы шәрәфә лајиг ҝөрүлүр?
11 Вәфтиз үчүн намизәдләрә верилән икинҹи суалда онлардан Јеһованын Шаһидләринә гошулдугларыны баша дүшүб-дүшмәдикләри сорушулур. Вәфтиздән сонра инсан Јеһованын адыны дашыјан, тә’јин едилмиш хидмәтчи олур. Бу бөјүк шәрәф олмагла јанашы, һәм дә ҹидди мәс’улијјәтдир. Садиг галаҹаглары тәгдирдә вәфтиз олунанларын әбәди хиласа наил олмаг үмидләри вардыр (Матта 24:13).
12. Јеһованын адыны дашымаг шәрәфи һансы өһдәчиликлә бағлыдыр?
12 Әлбәттә, һәр шејә Гадир Јеһова Аллаһын адыны дашымаг хүсуси шәрәфдир. Микеја пејғәмбәр демишдир: «Бүтүн халглар, өз аллаһларынын јолу илә ҝетсәләр белә, биз исә даим вә әбәди Аллаһымыз Рәббин [«Јеһованын», ЈД] ады илә ҝедирик» (Микеја 4:5). Лакин Аллаһын адыны дашымаг шәрәфи мүәјјән өһдәчиликләрлә бағлыдыр. Биз чалышмалыјыг ки, һәјат тәрзимиз дашыдығымыз ада шәрәф ҝәтирсин. Павелин Ромада јашајан мәсиһчиләрә хатырлатдығы кими, әҝәр кимсә тәблиғ етдији мүждәјә мүвафиг давранмырса, онда Аллаһын адына ләкә ҝәтирир, Онун адына ‘күфр олунур’ (Ромалылара 2:21-24).
13. Нә үчүн Јеһованын һәср олунмуш хидмәтчиләринин үзәринә Аллаһ һаггында шаһидлик вермәк мәс’улијјәти гојулмушдур?
13 Инсан Јеһованын Шаһиди оланда, үзәринә Аллаһ һаггында шаһидлик вермәк мәс’улијјәтини дә ҝөтүрүр. Јеһова, Она һәср едилмиш Исраил халгыны Өзүнүн әбәди Илаһилијинә шаһидлик етмәјә чағырмышды (Јешаја 43:10-12, 21). Лакин Исраил халгы өһдәчиликләрини јеринә јетирмәди вә һәмишәлик олараг Јеһованын лүтфүндән мәһрум олду. Бу ҝүн һәгиги мәсиһчиләр Јеһованын ады һаггында шаһидлик вермәк шәрәфинә малик олдуглары илә фәхр едирләр. Биз Аллаһы севдијимиз вә адынын иззәтләнмәсини истәдијимиз үчүн тәблиғ едирик. Сәмави Атамыз вә Онун нијјәти һаггында һәгигәти биләндән сонра, неҹә суса биләрик? Биз һәвари Павелин «бу, мәним зәрури вәзифәмдир вә әҝәр тәблиғ етмирәмсә, вај һалыма!» сөзләринә там шәрикик (1 Коринфлиләрә 9:16).
14, 15. а) Јеһованын тәшкилаты бизим руһани инкишафымызда һансы ролу ојнајыр? б) Руһани инкишафымыз үчүн Јеһова бизи нә илә тә’мин едир?
14 Икинҹи суал, һәмчинин ону да гејд едир ки, намизәд Јеһованын мүгәддәс руһла идарә едилән тәшкилаты илә әмәкдашлыг етмәлидир. Биз тәкбашына Аллаһа хидмәт едә билмәрик, чүнки бүтүн ‘гардашлығын’ көмәјинә, дәстәјинә вә руһландырмасына еһтијаҹ дујуруг (1 Петер 2:17; 1 Коринфлиләрә 12:12, 13). Аллаһын тәшкилаты руһани инкишафымызда олдугҹа бөјүк рол ојнајыр. Онун тәгдим етдији Мүгәддәс Китаба әсасланан нәшрләр һәгигәт һаггында билијимизи артырмагда, проблемләри һәлл етмәкдә вә Аллаһла сых мүнасибәтләри инкишаф етдирмәкдә бизә көмәк едир. Ушагларыны јахшы гидаландыран вә онларын гајғысына галан бир ана кими, «садиг вә ағыллы гул» да руһани инкишафымыз үчүн бизи вахтлы-вахтында бол-бол руһани гида илә тә’мин едир (Матта 24:45-47; 1 Салониклиләрә 2:7, 8).
15 Јеһованын халгы хидмәтини сәдагәтлә давам етдирмәк үчүн һәфтәлик ҝөрүшләрдә руһланыр вә лазыми тә’лим алыр (Ибраниләрә 10:24, 25). «Теократик Хидмәт Мәктәби»ндә биз натиглик мәһарәтини инкишаф етдирмәји, хидмәти ҝөрүшләрдә исә хош хәбәри еффектив үсулларла тәгдим етмәји өјрәнирик. Һәм ҝөрүшләрдә, һәм дә Мүгәддәс Китаба әсасланан нәшрләри шәхсән өјрәндијимиз заман биз Јеһованын руһунун фәалијјәтини, јә’ни онун васитәсилә Аллаһын Өз тәшкилатына неҹә рәһбәрлик етдијини ҝөрүрүк. Јеһова, мүнтәзәм олараг тәгдим етдији руһани гида вә јығынҹаг ҝөрүшләри васитәсилә бизи тәһлүкәләр һаггында хәбәрдар едир, мәһарәтли тәблиғчи олмағы өјрәдир вә руһани ҹәһәтдән ојаг дурмағымыза көмәк едир (Мәзмур 19:7, 8, 11; 1 Салоникилиләрә 5:6, 11; 1 Тимотејә 4:13).
Гәрарын архасында дуран нијјәт
16. Һәјатымызы Јеһоваја һәср етмәјә бизи нә тәшвиг едир?
16 Намизәдләрә верилән ики суал онлара вәфтизин мә’насыны вә бунунла бағлы мәс’улијјәтләри хатырладыр. Бәс бу гәрары гәбул етмәјә онлары нә тәшвиг етмәлидир? Киминсә бизи мәҹбур етдијинә ҝөрә дејил, Јеһованын ‘ҹәлб етдијинә’ ҝөрә биз Мәсиһин вәфтиз олунмуш давамчысы олуруг (Јәһја 6:44). Аллаһ мәһәббәтин тәҹәссүмү олдуғу үчүн Каинаты мәһәббәтлә идарә едир, јаратдығы мәхлуглары Өзүнә зор ҝүҹүнә табе етдирмир (1 Јәһја 4:8). Бизи Јеһоваја ҹәлб едән Онун ҝөзәл хүсусијјәтләри вә бизә ҝөстәрдији мүнасибәтдир. Јеһова ваһид Оғлуну уғрумузда гурбан вермәклә јанашы, ҝәләҹәјә даир ән јахшы үмиди дә тәклиф едир (Јәһја 3:16). Биздә исә өз нөвбәсиндә һәјатымызы она һәср етмәк арзусу ојаныр (Сүлејманын мәсәлләри 3:9; 2 Коринфлиләрә 5:14, 15).
17. Биз өзүмүзү нәјә һәср етмирик?
17 Биз өзүмүзү һәр һансы идеја вә ја ишә дејил, Јеһоваја һәср едирик. Аллаһын халгына вердији тапшырыг ҝәләҹәкдә дәјишсә дә, Она һәср едилмәјимиз дәјишилмәз олараг галаҹаг. Мәсәлән, Аллаһын Ибраһимә вә Јеремјаја вердији тапшырыглар бир-бириндән фәргләнирди (Јарадылыш 13:17, 18; Јеремја 1:6, 7). Бу хидмәтчиләрин һәр икиси Јеһованын хүсуси тапшырығыны јеринә јетирирди, чүнки онлар Аллаһы севир вә Онун ирадәсини сәдагәтлә јеринә јетирмәји арзулајырдылар. Бу ахыр ҝүнләрдә Мәсиһин бүтүн вәфтиз олунмуш давамчылары Падшаһлыг һаггында хош хәбәри тәблиғ етмәк вә шаҝирдләр һазырламаг тапшырығыны сә’јлә јеринә јетирирләр (Матта 24:14; 28:19, 20). Биз тәблиғ ишиндә үрәкдән иштирак етмәклә сәмави Атамыз Јеһованы севдијимизи вә һәгигәтән дә Она һәср едилдијимизи ҝөстәририк (1 Јәһја 5:3).
18, 19. а) Биз вәфтиз олунмагла һамынын гаршысында нәји е’тираф етмиш олуруг? б) Нөвбәти мәгаләдә һансы суаллары арашдыраҹағыг?
18 Шүбһәсиз, вәфтиз бир чох хејир-дуалар ҝәтирир, лакин бу гәрар дүшүнүлмәдән гәбул едилмәмәлидир (Лука 14:26-33). Вәфтиз олунмагла һәјатда ән ваҹиб гәрары гәбул етдијимизи ҝөстәририк (Лука 9:62). Биз вәфтиз едиләндә һамынын гаршысында бунлары е’тираф етмиш олуруг: «Әбәди, сонсузадәк бу Аллаһ бизим Аллаһымыздыр. Өмрүмүзүн сонунадәк О бизә јол ҝөстәрәҹәк!» (Мәзмур 48:14).
19 Нөвбәти мәгаләдә вәфтизлә әлагәдар диҝәр суаллары арашдыраҹағыг: инсаны бу аддымы атмагдан чәкиндирән тутарлы бир сәбәб ола биләрми? Јаш нәзәрә алынмалыдырмы? Һәр кәс бу мәрасимә һөрмәтлә јанашдығыны неҹә ҝөстәрә биләр?
Изаһ едә биләрсинизми?
• Һәр бир мәсиһчи вәфтиздән габаг нәјә ҝөрә төвбә етмәлидир?
• Аллаһа һәср едилмәјимиз өзүнә нәји дахил едир?
• Јеһованын адыны дашымаг шәрәфи илә јанашы үзәримизә һансы мәс’улијјәт гојулур?
• Вәфтиз олунмаға бизи нә тәшвиг етмәлидир?
[24-ҹү сәһифәдәки чәрчивә/шәкил]
Вәфтиз үчүн намизәдләрә верилән ики суал
Иса Мәсиһин гурбанлығы әсасында ҝүнаһларындан төвбә етмисәнми вә Јеһованын ирадәсини јеринә јетирмәк үчүн өзүнү Она һәср етмисәнми?
Һәср вә вәфтиз олунмағынла Јеһованын Шаһидләринә — Аллаһын руһу илә идарә олунан тәшкилата гошулудуғуну ҝөстәрирсән. Сән буну дәрк едирсәнми?
[25-ҹи сәһифәдәки шәкил]
Һәср олунма — Јеһоваја дуада верилән мүгәддәс вә’ддир.