Гој сәнә дүнјанын јох, Аллаһын руһу тәсир етсин!
«Биз дүнјанын руһуну јох, Аллаһдан ҝәлән руһу алдыг ки, Аллаһын бизә бәхш етдији шејләри анлаја биләк» (1 КОР. 2:12).
1, 2. а) Һәгиги мәсиһчиләр һансы мүһарибәдә иштирак едирләр? б) Биз һансы суаллары мүзакирә едәҹәјик?
ҺӘГИГИ мәсиһчиләр һал-һазырда дөјүш мејданындадырлар. Бизим дүшмәнимиз ҝүҹлү вә мәкрлидир, һәм дә онун бөјүк дөјүш тәҹрүбәси вар. Онун истифадә етдији силаһ о гәдәр ҝүҹлүдүр ки, артыг әксәр инсанлар онун тәсири алтына дүшүбләр. Лакин биз зәиф вә чарәсиз олдуғумузу дүшүнмәмәлијик (Јешаја 41:10). Чүнки бизим әлимиздә елә бир силаһ вар ки, она һеч ким вә һеч нә гаршы дура билмәз!
2 Бизим иштирак етдијимиз мүһарибә ади јох, руһани мүһарибәдир. Дүшмәнимиз исә Шејтан Иблисдир вә онун әсас силаһларындан бири ‘дүнјанын руһудур’ (1 Кор. 2:12). Биз она, әсас етибарилә, мүгәддәс руһун көмәји илә гаршы дура биләрик. Бу мүһарибәдән сағ чыхмаг вә руһән мөһкәм галмаг үчүн Аллаһдан мүгәддәс руһ диләмәли вә онун бәһрәсини һәјатымызда тәзаһүр етдирмәлијик (Галат. 5:22, 23). Бәс дүнјанын руһу нәдир? Нәјә ҝөрә о, бөјүк тәсир гүввәсинә маликдир? Дүнјанын руһунун бизә тәсир едиб-етмәдијини неҹә мүәјјән едә биләрик? Аллаһын руһуну неҹә алмаг олар? Дүнјанын руһуна неҹә мүгавимәт ҝөстәрмәлијик? Иса бу саһәдә бизә һансы нүмунәни гојуб?
Дүнјанын руһунун ҝениш јајылмасынын сәбәбләри
3. Дүнјанын руһу нәдир?
3 Дүнјанын руһу «бу дүнјанын һөкмдары» олан Шејтан Иблисдән гајнагланыр вә Аллаһын мүгәддәс руһуна гаршы чыхыр (Јәһ. 12:31; 14:30; 1 Јәһ. 5:19). Бу руһ дүнјада һөкм сүрән әһвал-руһијјә, инсан ҹәмијјәтини Аллаһын ирадә вә нијјәтинә зидд давранмаға тәшвиг едән гүввәдир.
4, 5. Шејтанын руһу дүнјаја неҹә јајылды?
4 Шејтанын руһу дүнјаја неҹә јајылды? Һәр шеј Шејтанын Еден бағында Һәвваны алдатмасы илә башлады. О, илк гадыны инандырды ки, Аллаһдан асылы олмаса, һәјаты јахшылашаҹаг (Јар. 3:13). Бу ки ағ јаландыр! (Јәһ. 8:44). Сонра Шејтан Һәвванын васитәсилә Адәми дә Јеһованын сөзүндән чыхмаға тәһрик етди. Адәмин сечими уҹбатындан бәшәријјәт ҝүнаһын көләси олду вә бу сәбәбдән Шејтанын јајдығы итаәтсизлик руһуна ујмаға мејиллидир. (Ефеслиләрә 2:1—3 ајәләрини оху.)
5 Шејтан һәмчинин бир чох мәләкләрә тәсир етмәјә мүвәффәг олду. Нәтиҹәдә, онлар ҹин олдулар (Вәһј 12:3, 4). Бу, Нуһун ҝүнләриндәки Дашгындан габаг баш вермишди. Һәмин мәләкләр дүшүнүрдүләр ки, ҝөјдәки әзәл мөвгеләрини тәрк едиб гејри-тәбии арзуларыны тәмин етмәк үчүн јерә енсәләр, онлар үчүн даһа јахшы олаҹаг (Јәһуда 6). Руһани аләмә гајыдан бу ҹинләрин көмәјилә бу ҝүн Шејтан ‘бүтүн дүнјаны алдадыр’ (Вәһј 12:9). Тәәссүф ки, инсанларын әксәријјәти ҹинләрин тәсириндән бихәбәрдир (2 Кор. 4:4).
Дүнјанын руһу сәнә тәсир ҝөстәрирми?
6. Бу дүнјанын руһу нә вахт бизә тәсир ҝөстәрә биләр?
6 Инсанларын чоху Шејтанын тәсириндән бихәбәр олса да, һәгиги мәсиһчиләр онун фәндләринә јахшы бәләддирләр (2 Кор. 2:11). Әслинә галса, биз јол вермәсәк, дүнјанын руһу бизә тәсир ҝөстәрә билмәз. Ҝәлин дөрд суалы нәзәрдән кечирәк вә ҝөрәк, биз һансы руһун тәсири алтындајыг: Аллаһын, јохса дүнјанын.
7. Шејтан бизи Јеһовадан узаглашдырмаг үчүн һансы васитәләрә әл атыр?
7 Әјләнҹә сечимим мәним барәмдә нә дејир? (Јагуб 3:14—18 ајәләрини оху.) Шејтан бизи Аллаһдан узаглашдырмаг үчүн һәр васитәјә әл атыр. О, үрәјимиздә зоракылыға мәһәббәт тохумлары сәпмәјә чалышыр. Иблис јахшы билир ки, Јеһова зоракылығы севәнләрә нифрәт едир (Мәз. 11:5). Буна ҝөрә дә китаб вә журналлар, филмләр вә маһнылар васитәсилә ҹисмани арзуларымызы ојатмаг истәјир. Мәгсәдинә наил олмаг үчүн о, електрон ојунларындан да истифадә едир. Белә ојунларын бәзиләри ојунчулары ҝөрдүкләри позғун вә вәһши һәрәкәтләри тәглид етмәјә сөвг едир. Үрәјимизин бир һиссәсинин јахшылығы севдији һалда, диҝәр һиссәсинин пислији севмәси дә Шејтаны гане едир (Мәз. 97:10).
8, 9. Әјләнҹә илә бағлы өзүмүзә һансы суаллары вермәлијик?
8 Аллаһын руһу исә инсанлары әхлаглы, сүлһпәрвәр вә мәрһәмәтли олмаға тәшвиг едир. Јахшы оларды ки, өзүмүздән сорушаг: «Сечдијим әјләнҹә мәндә јахшы хүсусијјәтләр инкишаф етдирирми?» Јухарыдан назил олан һикмәтдә «ријакарлыг јохдур». Аллаһын руһунун тәсири алтында олан инсанлар башгаларына әхлаг вә сүлһ барәдә данышыб, сонра да тәкликдә оланда гәддар вә позғун верилишләрә, филмләрә вә бу кими диҝәр шејләрә тамаша етмирләр.
9 Јеһова биздән там сәдагәт ҝөзләјир. Лакин Шејтана, Исанын һадисәсиндә олдуғу кими, бизим һеч олмаса бир дәфә она сәҹдә етмәјимиз кифајәтдир (Лука 4:7, 8). Өзүнә нөвбәти суаллары вер: «Сечдијим әјләнҹә Јеһоваја там сәдагәтли олдуғуму ҝөстәрирми? Һәмин әјләнҹә дүнјанын руһуна мүгавимәт ҝөстәрмәјими асанлашдырыр, јохса әксинә, чәтинләшдирир? Бәлкә, бу саһәдә мәнә дәјишиклик етмәк лазымдыр?»
10, 11. а) Мадди шејләрә ҝәлдикдә, дүнјанын руһу бизи нәјә тәшвиг едир? б) Бәс Аллаһын Кәламы бизи неҹә олмаға чағырыр?
10 Мадди шејләрә неҹә јанашырам? (Лука 18:24—30 ајәләрини оху.) Бу дүнјанын руһуна тамаһкарлыг, вар-дөвләт һәрислији вә «ҝөзләрин истәји» хасдыр (1 Јәһ. 2:16). Бу руһ бир чохларында варланмаг истәји ојадыб (1 Тим. 6:9, 10). Инди дә бизи инандырмаға чалышыр ки, чох шејә саһиб олмаг тәһлүкәсизлијимизә зәманәтдир (Сүл. мәс. 18:11). Әҝәр биз пулпәрәстлијин Јеһоваја олан мәһәббәтимизи сыхышдырыб чыхармасына јол версәк, Шејтан үзәримиздә гәләбә чалмыш олаҹаг. Биз өзүмүздән сорушмалыјыг: «Фикрим-зикрим бу дүнјада раһат вә зөвглү һәјат тәрзи сүрмәкдә дејил ки?»
11 Бу дүнјанын руһундан фәргли олараг, Аллаһын мүгәддәс руһунун тәсири алтында јазылмыш Мүгәддәс Китаб бизи пула таразлы јанашмаға вә аиләмизи доландырмаг үчүн сәјлә ишләмәјә тәшвиг едир (1 Тим. 5:8). Јеһованын руһунун тәсири алтында оланлар Онун кими сәхавәтли олмаға ҹан атырлар. Белә инсанлар башгаларындан нә исә уммурлар, әксинә, онлар әлиачыг олмалары илә танынырлар. Онлар үчүн инсанлар әшјалардан даһа ваҹибдир вә имканлары дахилиндә һәмишә башгаларына әл тутмаға һазырдырлар (Сүл. мәс. 3:27, 28). Јеһоваја хидмәт онлар үчүн һәр шејдән өнәмлидир вә буна ҝөрә дә јол вермирләр ки, һәјатларында әсас јери пул тутсун.
12, 13. Дүнјанын руһундан фәргли олараг, Аллаһын руһу бизә неҹә тәсир едир?
12 Мәним давранышым вә хүсусијјәтләрим һансы руһу әкс етдирир? (Колослулара 3:8—10, 13 ајәләрини оху.) Дүнјанын руһу ҹисмани әмәлләри тәблиғ едир (Галат. 5:19—21). Бизим һансы руһун тәсири алтында олдуғумуз һәјатымызда һәр шеј јағ кими ҝедәндә јох, чәтинликләр заманы, мәсәлән, баҹы вә ја гардаш бизә сајмазјана јанашанда, хәтримизә дәјәндә вә һәтта бизә гаршы ҝүнаһ ишләдәндә үзә чыхыр. Үстәлик, бизи һансы руһун идарә етдији евдә тәк оланда бәлли олур. Буна ҝөрә вахташыры өзүмүзү јохламаг пис олмазды. Өзүнә суал вер: «Сон алты ај әрзиндә мәним хүсусијјәтләрим даһа чох Мәсиһин хүсусијјәтләри кими олуб, јохса көһнә данышыг вә ја давраныш тәрзимин бәзи пис ҹәһәтләри јенидән гајыдыб?»
13 Аллаһын руһу бизә «көһнә шәхсијјәти вә онун әмәлләрини» чыхарыб, әјнимизә «јени шәхсијјәти» ҝејмәјә көмәк едир. Бунун сајәсиндә биз даһа мәһәббәтли вә хејирхаһ олуруг. Шикајәт етмәк үчүн әсаслы сәбәбимизин олдуғуну һесаб етсәк белә, бир-биримизи үрәкдән бағышламаға мејилли олаҹағыг. Әдаләтсизликлә үзләшәндә даһа әввәлки кими өзүмүздән чыхараг ‘кин, һирс, гәзәб, гышгырыг, тәһгирамиз данышыға’ јол вермәјәҹәјик. Әксинә, вар ҝүҹүмүзлә «шәфгәтли» олмаға чалышаҹағыг (Ефес. 4:31, 32).
14. Әксәр инсанлар Аллаһын Кәламына неҹә јанашырлар?
14 Мүгәддәс Китабдакы әхлаг нормаларына һөрмәт едир вә онлары севирәм? (Сүлејманын мәсәлләри 3:5, 6 ајәләрини оху.) Бу дүнјанын руһу Аллаһын Кәламында јазыланлара гаршы чыхыр. Онун тәсири алтында олан инсанлар өзләринә сәрф етмәјән Мүгәддәс Китаб һиссәләринә мәһәл гојмурлар; онлар инсан әнәнәләринә вә фәлсәфәсинә үстүнлүк верирләр (2 Тим. 4:3, 4). Бәзиләриндә исә үмумијјәтлә Аллаһын Кәламына гаршы һөрмәтдән әсәр-әламәт јохдур. Белә инсанлар Мүгәддәс Китабын дәјәрини вә доғрулуғуну шүбһә алтына алараг өзләрини ағыллы һесаб едирләр. Онлар Мүгәддәс Китабын хәјанәтә, һомосексуализмә вә бошанмаја даир саф ганунларыны өз истәкләринә ујғунлашдырырлар. Онлар писин јахшы, јахшынын исә пис олдуғуну өјрәдирләр (Јешаја 5:20). Бу руһ бизә дә тәсир ҝөстәрирми? Проблемләрлә үзләшәркән Мүгәддәс Китабын мәсләһәтләринә әмәл едирик, јохса шәхси фикирләримизә вә инсан мүдриклијинә бел бағлајырыг?
15. Өз мүдриклијимизә ҝүвәнмәк әвәзинә, нә етмәлијик?
15 Аллаһын руһу бизә Мүгәддәс Китаба һөрмәт һисси ашылајыр. Мәзмурчу кими, биз дә һесаб едирик ки, Аллаһын сөзләри аддымларымыз үчүн чыраг, јолларымыза ишыгдыр (Мәз. 119:105). Биз өз мүдриклијимизә јох, Аллаһын Кәламына ҝүвәнирик вә там әминик ки, бу китаб бизә хејирлә шәри ајырд етмәјә көмәк едир. Биз нәинки Мүгәддәс Китаба һөрмәт етмәји, һәм дә орада јазылан Аллаһын ганунларыны севмәји өјрәнирик (Мәз. 119:97).
Исанын нүмунәсиндән өјрән
16. ‘Мәсиһ кими дүшүнмәк’ нә демәкдир?
16 Аллаһын руһуну алмаг үчүн ‘Мәсиһ кими дүшүнмәји’ өјрәнмәлијик (1 Кор. 2:16). ‘Мәсиһ Исанын дүшүнҹә тәрзинә’ малик олмаг үчүн биз онун неҹә дүшүндүјүнү вә даврандығыны билмәли, сонра да ону тәглид етмәлијик (Ром. 15:5; 1 Пет. 2:21). Буну неҹә етмәк олар?
17, 18. а) Исадан дуа барәдә нә өјрәнирик? б) Нәјә ҝөрә биз ‘дурмадан диләмәлијик’?
17 Аллаһдан мүгәддәс руһ дилә. Сынагларла гаршылашмаздан өнҹә Иса дуада Аллаһдан хаһиш етмишди ки, мүгәддәс руһу илә она көмәк етсин (Лука 22:40, 41). Аллаһдан мүгәддәс руһ диләмәк бизим үчүн дә ваҹибдир. Јеһова Ондан иманла диләјән һәр кәсә сәхавәтлә вә севинҹлә мүгәддәс руһ верир (Лука 11:13). Иса демишди: «Дурмадан диләјин вә сизә вериләҹәк; дурмадан ахтарын вә тапаҹагсыныз; дурмадан гапыны дөјүн вә сизә ачаҹаглар. Чүнки диләјән истәдијини алыр, ахтаран тапыр вә гапыны дөјәнә ачаҹаглар» (Мат. 7:7, 8).
18 Јеһовадан мүгәддәс руһ вә көмәк диләјәндә јалварышларына дәрһал сон гојма. Јадда сахла ки, бу заман тез-тез вә даһа чох дуа етмәк лазымдыр. Һәрдән Аллаһ Она дуа едәнләрә дәрһал ҹаваб вермир. О имкан верир ки, биз нараһатчылығымызын нә гәдәр дәрин вә иманымызын нә гәдәр сәмими олдуғуну Она ҝөстәрәкa.
19. Иса һәјаты боју нә едирди вә нәјә ҝөрә биз онун нүмунәсини изләмәлијик?
19 Јеһованын һәр сөзүнә гулаг ас. Иса һәмишә Атасынын хошуна ҝәлән ишләри ҝөрүрдү. Ән азы бир дәфә онун јаранмыш вәзијјәтә олан бахышы Атасынын ирадәсиндән фәргләнирди. Буна бахмајараг, о, әминликлә деди: «Гој мәним јох, Сәнин истәјинҹә олсун» (Лука 22:42). Өзүндән соруш: «Аллаһа итаәт етмәк асан олмајан вахтларда белә Онун әмрләрини јеринә јетирирәмми?» Аллаһа итаәткарлыг өлүм-дирим мәсәләсидир. О, бизим Јараданымыз вә һәјат Мәнбәјимиз олдуғу үчүн Онун һәр кәлмәсинә табе олмаг бизим борҹумуздур (Мәз. 95:6, 7). Итаәткарлығын јерини һеч нә тута билмәз. Онсуз Аллаһын рәғбәтини газанмаг мүмкүн дејил.
20. Иса һәјаты боју нә едирди вә биз ону неҹә тәглид едә биләрик?
20 Мүгәддәс Китабы дәриндән арашдыр. Шејтан Исанын иманына бирбаша һүҹум едәндә о, Мүгәддәс Јазылардан ситатлар ҝәтирирди (Лука 4:1—13). Иса она дүшмән кәсилән дин рәһбәрләри илә данышаркән Аллаһын Кәламынын онун үчүн нүфузлу мәнбә олдуғуну ҝөстәрирди (Мат. 15:3—6). Исанын бүтүн һәјаты Аллаһын ганунларыны өјрәнмәјә вә онлары тәтбиг етмәјә јөнәлмишди (Мат. 5:17). Биз дә даима әглимизи иманы мөһкәмләндирән Аллаһын Кәламы илә гидаландырмалыјыг (Филип. 4:8, 9). Шәхси вә аиләви өјрәнмә үчүн вахт тапмаг бәзиләри үчүн чәтин ола биләр. Амма биз вахт тапмалы дејилик, ону сатын алмалыјыг (Ефес. 5:15—17).
21. Мүгәддәс Китабы даһа јахшы билмәк вә ону тәтбиг етмәк үчүн бизә һансы имкан јарадылыб?
21 «Садиг вә ағыллы нөкәр» һәфтәлик аиләви ибадәт тәсис едиб ки, шәхси вә аиләви өјрәнмә кечирмәјә вахтымыз олсун (Мат. 24:45). Сән бу имкандан мүдрикликлә истифадә едирсәнми? Мәсиһин дүшүнҹә тәрзинә јијәләнмәк үчүн сәнә мараглы олан мөвзулар һагда онун нә өјрәтдијини мүнтәзәм олараг арашдыра биләрсәнми? Бунун үчүн тәлим нәшринин һәр декабр сајында чап олунан «Ҝөзәтчи Гүлләси»нин тематик индексиндән истифадә етмәк олар. Онун көмәјилә сәнә лазым олан мәлуматын һарада јерләшдијини тапа биләрсән. Мәсәлән, 2008-ҹи илдән 2010-ҹу иләдәк «Ҝөзәтчи Гүлләси»нин күтләви нәшриндә «Иса пејғәмбәрдән нә өјрәнирик?» рубрикасы ады алтында 5 мәгалә чыхыб. Нәјә ҝөрә һәмин мәгаләләри арашдырмајасан?
Дүнјаја галиб ҝәлә биләрик!
22, 23. Дүнјаја галиб ҝәлмәк үчүн биздән нә тәләб олунур?
22 Аллаһын руһу бәләдчимиз олсун дејә дүнјанын руһуна мүгавимәт ҝөстәрмәлијик. Бу, асан иш дејил. Һәрдән бу, әсил мүбаризә, гызғын дөјүш ола биләр (Јәһуда 3). Амма биз галиб чыха биләрик! Иса шаҝирдләринә демишди: «Дүнјада чох әзијјәтлә үзләшәҹәксиниз, анҹаг ҹәсарәтли олун! Мән дүнјаја галиб ҝәлдим» (Јәһ. 16:33).
23 Дүнјанын руһуна мүгавимәт ҝөстәрмәклә вә Аллаһын руһуну алмаг үчүн биздән тәләб олунан һәр шеји етмәклә биз дә дүнјаја галиб ҝәлә биләрик. Һәгигәтән дә, «әҝәр Аллаһ бизимләдирсә, ким бизә гаршы чыха биләр?» (Ром. 8:31). Биздә Аллаһын руһу олса вә Мүгәддәс Китабын рәһбәрлијинә дәгиг әмәл етсәк, онда дахилимиздә мәмнунлуг, сүлһ вә хошбәхтлик һөкм сүрәҹәк. Үстәлик, јахынлашмагда олан јени дүнјада мүтләг бизим дә јеримизин олаҹағына әминлијимиз артаҹаг!
[Һашијә]
a Әлавә мәлумат алмаг үчүн «Мүгәддәс Китаб әслиндә нә өјрәдир?» китабынын 170—173-ҹү сәһифәләринә бах.
Јадыныздадырмы?
• Нәјә ҝөрә дүнјанын руһу бу гәдәр ҝениш јајылыб?
• Өзүмүзә һансы дөрд суалы вермәлијик?
• Аллаһын руһуну алмаг үчүн биз Исаны һансы үч саһәдә тәглид етмәлијик?
[8-ҹи сәһифәдәки шәкил]
Бәзи мәләкләр неҹә ҹин олдулар?
[10-ҹу сәһифәдәки шәкил]
Шејтан инсанлары идарә етмәк үчүн бу дүнјанын руһундан истифадә едир. Онун тәсириндән азад олмаг өз әлимиздәдир