ФӘСИЛ 11
Мән нә ҝејиним ахы?
Ајдан евдән чыхмаға һазырлашыр. Валидејнләри ҝөзләринә инана билмирләр.
— Бу нә палтардыр, ҝејинмисән? — дејә атасы тәәҹҹүблә сорушур.
— Бурада нә вар ки? Ушагларла ҝәзмәјә ҝедирик дә.
— Бу палтарда ҝетмәјәҹәксән! — анасы дејир.
— Ана, ахы инди һамы белә ҝејинир. Һәм дә ки, мәним хошума ҝәлир! — дејә Ајдан мызылданыр.
— Амма бизим хошумуза ҝәлмир! — дејә атасы сәрт шәкилдә ҹаваб верир. — Ҝет, бу дәгигә палтарыны дәјиш, јохса һеч һара ҝетмәјәҹәксән!
ҜЕЈИМ үстүндә мүбаһисәләрин дүшмәси һеч дә јени бир шеј дејил. Ола билсин, вахтилә валидејнләринин дә өз валидејнләри илә ҝејимлә бағлы проблемләри олуб. Чох еһтимал ки, онлар да һал-һазырда сәнин кечирдијин һиссләри кечирибләр. Лакин артыг роллар дәјишиб. Инди сән өз мөвгејини мүдафиә етмәли олурсан.
Сән: Раһатдыр.
Онлар: Сәлигәсиздир.
Сән: Мәнҹә, супердир!
Онлар: Чох әдәбсиздир.
Сән: Јары гијмәтәдир.
Онлар: Олаҹаг да... Палтарын јарысы јохдур!
Бу давада «атәшкәсә» наил олмаг мүмкүндүрмү? Бәли, мүмкүндүр! 23 јашлы Меган буну неҹә етмәјин сиррини бөлүшүр: «Дава етмәк јох, разылыға ҝәлмәк лазымдыр». Разылыға ҝәлмәк? Бу о демәкдир ки, сән 40 јашындакы адам кими ҝејинмәлисән? Һеч дә јох! Разылыға ҝәлмәк о демәкдир ки, валидејнләринлә бирликдә мәсәләни мүзакирә етмәли, һәм сәни, һәм дә онлары гане едән вариантлар ахтарыб тапмалысыныз. Бунунла сән нә әлдә едәҹәксән?
1. Ҝөзәл ҝөрүнәҹәксән. Бу, һәтта һәмјашыдларынын да хошуна ҝәләҹәк.
2. Валидејнләрин ҝејимини, јәгин ки, бир о гәдәр дә тәнгид атәшинә тутмајаҹаглар.
3. Валидејнләрин ҝејим саһәсиндә етибаралајиг олдуғуну ҝөрүб башга саһәләрдә дә сәнә сәрбәстлик верәҹәкләр.
Ҝәл бахаг, буну неҹә едә биләрсән. Мәсәлән, тәсәввүр ет ки, Интернетдә вә ја мағазада бир палтар хошуна ҝәлиб вә о, мүтләг сәндә дә олмалыдыр. Илк нөвбәдә...
Мүгәддәс Китаб принсипләри үзәриндә дүшүн
Тәәҹҹүблүдүр ки, Мүгәддәс Китабда ҝејим һагда аз данышылыр. Бирбаша бу мөвзу илә бағлы олан мәсләһәтләри бир нечә дәгигәјә охујуб гуртармаг олар. Анҹаг һәмин вахт әрзиндә сән дәјәрли рәһбәрлик алаҹагсан. Мәсәлән:
● Мүгәддәс Китаб гадынлара өзләрини «һәја вә әдәб-әрканла» бәзәмәји мәсләһәт ҝөрүр (1 Тимотејә 2:9, 10)a.
«Һәја» сөзүнү ҝөрүб тәәҹҹүблә дејә биләрсән: «Инди елә чыхыр, мән чадра ҝејинмәлијәм?» Тәбии ки, јох! Бу контекстдә «һәја вә әдәб-әрканла» дедикдә өзүнә вә башгаларына һөрмәт нәзәрдә тутулур (2 Коринфлиләрә 6:3). Бу ҹүр ҝејимә ҝәлдикдә исә палтар сечими һеч дә аз дејил. 23 јашы олан Диана дејир: «Дүздүр, асан олмаса да, ифрата вармадан дәбә ујғун ҝејинмәк мүмкүндүр».
● Мүгәддәс Китабда дејилир ки, хариҹи ҝөрүнүш һагда дүшүнәркән «дахили аләм», јахуд башга бир тәрҹүмәјә әсасән, «үрәјин ҝизли инсаны» (Инҹил, 1993) барәдә унутмаг олмаз (1 Петер 3:4).
Әдәбли олмајан ҝејим садәҹә бир анлыг диггәти ҹәлб едә биләр, анҹаг дахили ҝөзәллијин сајәсиндә һәм бөјүкләрин, һәм дә ҝәнҹләрин даими һөрмәтини газанмаг мүмкүндүр. Ҝәнҹләрин? Бәли, һәтта онлар белә һәддән артыг дәбдәбәли ҝејимин ағылсызлыг олдуғуну дүшүнә биләр. 16 јашлы Британи дејир: «Гадынларын өз ҝејимләри илә кишиләри абырсызҹасына өзләринә ҹәлб етмәјә чалышдыгларыны ҝөрәндә адам лап нифрәт едир!» Кејт дә онун сөзләри илә разылашыр. Ҝөрүн о, кечмиш рәфигәси барәдә нәләр дејир: «О, ҝејиндији бүтүн палтарларла, санки: “Мәнә бахын!” — дејирди. Үрәји ҝедирди ки, бүтүн оғланлар она бахсын, бунун үчүн дә ән ҹәлбедиҹи палтарлары ҝејинирди».
Валидејнләринә гулаг ас
Ҝејинмәк истәдијин палтары чантана гојуб мәктәбдә дәјишмәк һеч дә јахшы фикир дејил. Сән валидејнләринә гаршы һәтта онларын хәбәр тутмајаҹагларыны дүшүндүјүн һалларда белә дүрүст олсан, даһа чох етибар газанаҹагсан. Әслиндә, палтар сечәркән онларын фикрини өјрәнсән, јахшы олар (Сүлејманын мәсәлләри 15:22). (82 вә 83-ҹү сәһифәләрдәки «Сәнин гардеробун» адлы чәрчивәдән истифадә ет.)
Бәлкә дә, сән дүшүнәҹәксән: «Онлардан сорушмағын нә мәнасы вар? Онсуз да хошума ҝәлән шејләрин һеч бирини бәјәнән дејилләр». Бу һеч дә белә дејил. Дүздүр, ата-ананын фикирләри сәнинкиндән фәргләнә биләр, амма бәзән бу лап јеринә дүшүр. 17 јашлы Натали дејир: «Мән һәмишә валидејнләримдән мәсләһәт алырам, чүнки гапыдан чөлә чыханда биабыр олмаг вә ја башгаларынын архамҹа данышыб ҝүлмәләрини истәмирәм».
Ачыг данышсаг, әслиндә, нә гәдәр ки, валидејнләринлә бир дамын алтында јашајырсан, онларын фикирләрини нәзәрә алмаг сәнин борҹундур (Колослулара 3:20). Ејни заманда, бир-биринизин дүшүнҹә тәрзини баша дүшдүкдән сонра нә гәдәр чох шејләрдә асанлыгла разылыға ҝәлдијинизи ҝөрүб тәәҹҹүбләнәҹәксән. Вә нәһајәт, палтар мәсәләсиндә сөз-сөһбәтә вә дава-далаша сон гојулаҹаг!
Мәсләһәт. Һәр һансы палтары ҝејинәркән тәкҹә ҝүзҝүдә ҝөрдүкләринлә кифајәтләнмә. Һәтта илк бахышдан әдәбли ҝөрүнән палтар белә отуранда вә ја әјиләндә әдәбсиз палтара чеврилә биләр. Әҝәр мүмкүндүрсә, валидејнләриндән вә ја јеткин достларындан мәсләһәт ал.
Өзүн-өзүнә дүшмән кәсилмисән? Әҝәр өзүндән хошун ҝәлмирсә, нә едә биләрсән?
[Һашијә]
a Мүгәддәс Китабын бу мәсләһәти гадынлара үнванланса да, орадакы принсип кишиләрә дә аиддир.
АЧАР АЈӘ
“Өзүнүзү... дәбдәбәли либасларла бәзәмәјин. Гој бәзәјиниз... дахили аләминиз олсун” 1 Петер 3:3, 4
МӘСЛӘҺӘТ
Сексуал арзулар ојадан палтар ҝејинмәкдән гачын. Бу ҹүр палтар әтрафдакылара сәнин чарәсиз һалда өзүнә диггәт ҹәлб етмәк истәдијини вә ифрат дәрәҹәдә өзүнә гапылдығыны ҝөстәрир.
БИЛИРСӘН... ?
Сәнин һаггында јаранан илк тәәссүрат ҝејимдән асылыдыр. Әбәс јерә демәјибләр ки, инсаны ҝејиминә ҝөрә гаршылајарлар.
ҺӘРӘКӘТ ПЛАНЫ!
Палтар аларкән мәсләһәтләшә биләҹәјим аиләмин үзвү вә ја јеткин достум: ․․․․․
Палтар аларкән нөвбәти амилләри нәзәрә алаҹағам: ․․․․․
Бу мөвзу илә бағлы валидејнләримә вермәк истәдијим суаллар: ․․․․․
НЕҸӘ ДҮШҮНҮРСӘН?
● Нәјә ҝөрә валидејнләрлә ушаглар арасында тез-тез палтар үстүндә мүбаһисә дүшүр?
● Бу мәсәләдә валидејнләринлә дил тапмаға чалышдыгҹа һансы фајдалы тәҹрүбәјә јијәләнәҹәксән?
[81–ҹи сәһифәдәки јазы]
“Әдәбсиз ҝејинән гызлар о дәгигә ҝөзүмдән дүшүр. Әдәб-әрканла, ејни заманда зөвглә ҝејинән ҝөрәндә исә өз-өзүмә дејирәм, бах мән дә инсанларда белә тәәссүрат ојатмаг истәјирәм” Натали
[82 вә 83–ҹү сәһифәләрдәки чәрчивә/шәкилләр]
Чәрчивә
Сәнин гардеробун
Тәлимат: Бу сәһифәләрин сүрәтини чыхарт. Валидејнләриндән хаһиш ет ки, сағ тәрәфдәки суаллара ҹаваб јазсынлар, өзүн исә солдакылара ҹаваб јаз. Сонра вәрәгләри дәјишдирин вә ҹаваблары мүзакирә един. Сизи нә исә тәәҹҹүбләндирди? Бир-биринизин нөгтеји-нәзәрләри барәдә јени нә исә өјрәндиниз?
Сәнин үчүн Сән һансы палтары алмаг/ҝејинмәк истәјирсән?
Бу палтар нәјә ҝөрә хошуна ҝәлир? Ашағыда ҝәтирилән амилләри ваҹиблик дәрәҹәсинә ҝөрә нөмрәлә.
․․․․․ Фирма
․․․․․ Әкс ҹинсин диггәтини ҹәлб етмәк
․․․․․ Һәмјашыдларын фикирләри
․․․․․ Раһатлыг
․․․․․ Гијмәт
․․․․․ Диҝәр ․․․․․
Валидејнләримин ҝөстәрәҹәкләри илк реаксија:
□ «Гәтијјән!»
□ «Пис дејил».
□ «Јахшыдыр».
Сечимими бәјәнмәмәләринин сәбәби:
□ «Чох ҹәлбедиҹидир».
□ «Һәддән артыг сәлигәсиздир».
□ «Чох әҹаиб вә шитдир».
□ «Бир валидејн кими онлары биабыр едир».
□ «Чох баһалыдыр».
□ Диҝәр ․․․․․
Ортаг мәхрәҹә ҝәлә биләрикми?
Валидејнләринә һагг вермәјә чалыш. Сәнҹә, онлар нәдә һаглыдырлар?
․․․․․
Палтарын мүнасиб олмасы үчүн нә етмәк олар?
․․․․․
Валидејнләрин үчүн Ушағыныз һансы палтары алмаг/ҝејинмәк истәјир?
Бу палтар нәјә ҝөрә онун хошуна ҝәлир? Ашағыда ҝәтирилән амилләри ушағынызын нөгтеји-нәзәриндән ваҹиблик дәрәҹәсинә ҝөрә нөмрәләјин.
․․․․․ Фирма
․․․․․ Әкс ҹинсин диггәтини ҹәлб етмәк
․․․․․ Һәмјашыдларын фикирләри
․․․․․ Раһатлыг
․․․․․ Гијмәт
․․․․․ Диҝәр ․․․․․
Мәним илк реаксијам:
□ «Гәтијјән!»
□ «Пис дејил».
□ «Јахшыдыр».
Онун сечимини бәјәнмәмәјимин сәбәби:
□ «Чох ҹәлбедиҹидир».
□ «Һәддән артыг сәлигәсиздир».
□ «Чох әҹаиб вә шитдир».
□ «Бир валидејн кими бизи биабыр едир».
□ «Чох баһалыдыр».
□ Диҝәр ․․․․․
Ортаг мәхрәҹә ҝәлә биләрикми?
Бәлкә, бу, садәҹә зөвг мәсәләсидир?
□ Бәли □ Ола билсин □ Хејр
Палтарын мүнасиб олмасы үчүн нә етмәк олар?
Гәрар ․․․․․
[84–ҹү сәһифәдәки чәрчивә]
Оғланлара
Бу фәсилдә мүзакирә олунан Мүгәддәс Китаб принсипләри оғланлара да аиддир. Әдәб-әрканла ҝејин. Гој һәр кәс үрәјинин ҝизли инсаныны — дахили ҝөзәллијини ҝөрсүн. Палтар аларкән өзүндән соруш: «Бу палтар мәним һаггымда нә дејәҹәк? Әслиндә, ким олдуғуму ајдын ҝөстәрәҹәкми?» Унутма ки, палтар инсанын өзүнүифадә формасыдыр. Чалыш, ҝејимин сәнин нәјә инандығыны вә дәјәр вердијини әкс етдирсин!
[80–ҹи сәһифәдәки шәкил]
Ҝејиндијин палтар, санки, сәнин һагда һәр шеј дејән лөвһәҹикдир. Ҝејимим мәним һаггымда нә дејир?