Аллаһ кимдир?

БУ СУАЛА сиз неҹә ҹаваб верәрдиниз? Бәзиләри дүшүнүрләр ки, Аллаһы јахшы таныјырлар. Онлар Аллаһы јахын дост һесаб едирләр. Башгалары исә Она узаг гоһумлары кими мүнасибәт бәсләјир. Беләләри Аллаһын мөвҹудлуғуна шүбһә етмәсә дә, Онун һаггында чох аз шеј билирләр. Әҝәр сиз дә Аллаһа инанырсынызса, нөвбәти суаллара неҹә ҹаваб верәрдиниз?

1. Аллаһ реал шәхсијјәтдирми?

2. Аллаһын ады вармы?

3. Иса Мәсиһ Күлли-Ихтијар Аллаһдырмы?

4. Аллаһ мәним гајғыма галырмы?

5. Динләрин һамысымы Аллаһа мәгбулдур?

Бу суаллары башгаларына версәниз, еһтимал ки, чохлу фәргли фикирләр ешидәҹәксиниз. Буна ҝөрә дә дүнјада Аллаһ һагда бу гәдәр әфсанәләрин вә јанлыш фикирләрин мөвҹуд олмасы һеч дә тәәҹҹүблү дејил.

Ҹаваблары билмәк нә үчүн ваҹибдир?

Аллаһа инанан самаријалы гадынла гују башында сөһбәт едәркән Иса Мәсиһ Аллаһ һаггында һәгигәти билмәјин ваҹиблијини вурғулады. Гадын Исанын пејғәмбәр олдуғуну етираф етди. Лакин ону бир шеј нараһат едирди: Исанын дини онункундан фәргли иди. Гадын нараһатлығыны билдирәндә Иса ачыг шәкилдә она деди: «Сиз билмәдијинизә ибадәт едирсиниз» (Јәһја 4:19-22). Бу сөзләрдән ҝөрүнүр ки, Исанын зәннинҹә, Аллаһа инананларын һамысы әслиндә Ону танымыр.

Бәс онда Исанын сөзләриндән елә чыхмырмы ки, һеч кәс Аллаһы таныја билмәз? Хејр. Сөзүнә давам едәрәк Иса деди: «Һәгиги ибадәт едәнләрин Атаја руһән вә һәгигәтән ибадәт едәҹәкләри саат ҝәлир вә ҝәлди дә. Чүнки Ата Өзүнә бу ҹүр ибадәт едәнләр ахтарыр» (Јәһја 4:23). Сиз дә Аллаһа «руһән вә һәгигәтән» ибадәт едәнләрин сырасындасынызмы?

Бу суалын ҹавабыны билмәк сон дәрәҹә ваҹибдир. Нә үчүн? Бир дәфә дуа едәркән Иса дәгиг билијин нә дәрәҹәдә ваҹиб олдуғуну гејд етмишди: «Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар» (Јәһја 17:3). Бәли, сизин ҝәләҹәк һәјатыныз билаваситә Аллаһ һаггында һәгигәти билмәјиниздән асылыдыр!

Бәс Аллаһ һаггында һәгигәти билмәк мүмкүндүрмү? Әлбәттә! Белә исә ону һарадан тапа биләрик? Иса өзү һагда бунлары демишди: «Јол, һәгигәт вә һәјат Мәнәм; Мәним васитәчилијим олмаса, Атанын јанына һеч ким ҝәлә билмәз» (Јәһја 14:6). О, һәмчинин гејд етмишди: «Атанын ким олдуғуну Оғулдан вә Оғулун она ачмаг истәдији шәхсдән башга һеч ким билмәз» (Лука 10:22).

Беләликлә, Аллаһы танымаг үчүн Онун Оғлу Иса Мәсиһин тәлимләри илә јахындан таныш олмалыјыг. Иса вәд етмишди: «Әҝәр сиз Мәним сөзүмә садиг галсаныз, һәгигәтән Мәним шаҝирдләримсиниз. Сиз һәгигәти дәрк едәҹәксиниз; вә һәгигәт сизи азад едәҹәкдир» (Јәһја 8:31, 32).

Бәс јухарыда ҝәтирилән беш суала Иса неҹә ҹаваб верәрди?

[4-ҹү сәһифәдәки шәкил]

Ибадәт етдијиниз Аллаһы һәгигәтән дә таныјырсынызмы?