Еј ҝәнҹләр, һәјатынызы нәјә һәср едәҹәксиниз?
«Јумруғу елә атырам ки, зәрбәм боша чыхмасын» (1 КОР. 9:26).
1, 2. Јеткинлијә доғру уғурла аддымламаг үчүн сәнә нә лазымдыр?
ТӘСӘВВҮР ЕТ ки, танымадығын јолла ҝедирсән. Јәгин ки, сәнә хәритә вә компас лазым олаҹаг. Хәритә сәнә һарада олдуғуну вә ҝедәҹәјин јолу мүәјјән етмәјә, компас исә јолуну азмамаға көмәк едәҹәк. Анҹаг һара ҝетдијини дәгиг билмәсән, нә компасын, нә дә хәритәнин сәнә һеч бир фајдасы олмајаҹаг. Бош-бошуна ҝәзиб вахт итирмәмәк үчүн ҝетдијин јери дәгиг мүәјјән етмәлисән.
2 Јеткинлијә доғру ирәлиләјән бир ҝәнҹ кими, сән дә ејни вәзијјәтдәсән. Сәнин дә әлиндә етибарлы хәритә вә компас вар. Мүгәддәс Китаб, бир хәритә кими, дүзҝүн јолу сечмәкдә сәнә көмәк едәҹәк (Сүл. мәс. 3:5, 6). Дүзҝүн тәрбијә олунан виҹданын сајәсиндә исә сән бу јолда галаҹагсан (Ром. 2:15). О, сәнә компас кими хидмәт едә биләр. Лакин һәјатда уғур газанмаг үчүн һара ҝетдијини дә билмәлисән. Јәни сәнин конкрет вә ајдын мәгсәдләрин олмалыдыр.
3. Һәвари Павел 1 Коринфлиләрә 9:26 ајәсиндә мәгсәд гојмағын һансы фајдасыны вурғулајыр?
3 Мәгсәд гојмағын вә она чатмаг үчүн әлиндән ҝәләни етмәјин фајдасыны ҝөстәрәрәк һәвари Павел јазыр: «Мән мәгсәдсиз гачмырам, јумруғу елә атырам ки, зәрбәм боша чыхмасын» (1 Кор. 9:26). Мәгсәдләрин оларса, гаршындакы јолу әминликлә ‘гачаҹагсан’. Тезликлә сән ибадәтлә, ишлә, никаһла, аилә вә диҝәр мәсәләләрлә бағлы ваҹиб гәрарлар гәбул етмәли олаҹагсан. Бәзән сечим едәркән чаш-баш галаҹагсан. Лакин гәрарларыны Аллаһын Кәламындакы һәгигәтләрә вә принсипләрә әсасландырараг јолуну габагҹадан мүәјјән етсән, азмајаҹагсан (2 Тим. 4:4, 5).
4, 5. а) Гаршына мәгсәд гојмасан, нә баш верә биләр? б) Нәјә ҝөрә һәјатда етдијин сечимләрә Аллаһы разы салмаг истәји тәсир етмәлидир?
4 Әҝәр сәнин мәгсәдләрин олмаса, онда, чох еһтимал ки, һәмјашыдларын вә мүәллимләрин өзләринин дүзҝүн һесаб етдикләри јолла ҝетмәјин үчүн сәнә тәзјиг ҝөстәрәҹәкләр. Һәтта конкрет мәгсәдләрин олса белә, јенә дә бәзиләри өз фикирләрини сәнә јеритмәјә чалыша биләрләр. Бу заман өзүндән соруш: «Онларын мәсләһәтинә гулаг асмаг ҹаванлыг ҝүнләримдә Јараданы хатырламағыма көмәк едәҹәк, јохса бундан јајындыраҹаг?» (Ваиз 12:1 ајәсини оху.)
5 Нәјә ҝөрә һәјатда етдијин сечимләрә Аллаһы разы салмаг истәји тәсир етмәлидир? Сәбәбләрдән бири одур ки, малик олдуғумуз һәр јахшы бәхшиши бизә верән Јеһова Аллаһдыр (Јаг. 1:17). Доғрудан да, Јеһоваја миннәтдар олмаг һәр биримизин борҹудур (Вәһј 4:11). Аллаһа миннәтдарлығыны ҝөстәрмәјин ән јахшы јолларындан бири һансыдыр? Мәҝәр гаршына мәгсәд гојаркән Онун фикирләрини нәзәрә алмаг дејил? Ҝәл ҝөрәк, һансы мәгсәдләрә ҹан атмаға дәјәр вә онлара чатмаг үчүн нә етмәлисән.
Гаршына һансы мәгсәдләри гоја биләрсән?
6. Гаршына һансы ваҹиб мәгсәди гоја биләрсән вә нәјә ҝөрә?
6 Әввәлки мәгаләдә дејилдији кими, гаршына гоја биләҹәјин ваҹиб мәгсәдләрдән бири Мүгәддәс Китабда дејиләнләрин һәгигәт олдуғуна шәхсән әмин олмагдыр (Ром. 12:2; 2 Кор. 13:5). Һәмјашыдларын садәҹә башгаларынын сөзүнә ҝөрә тәкамүл нәзәријјәсинә вә мүхтәлиф јалан дини тәлимләрә инана биләрләр. Лакин сән тамамилә фәргли даврана биләрсән. Унутма, Сәмави Атамыз Јеһова сәнин Она бүтүн ағлынла хидмәт етмәјини истәјир. (Матта 22:36, 37 ајәләрини оху.) Онун арзусу одур ки, иманын дәлилләрә әсаслансын (Ибр. 11:1).
7, 8. а) Һазырда әлчатан олан һансы мәгсәдләрә ҹан атмаг иманыны мөһкәмләндирмәјә көмәк едәҹәк? б) Белә мәгсәдләрә чатанда нә һисс едәҹәксән?
7 Иманыны мөһкәмләндирмәк үчүн нәјә ҝөрә гаршына һазырда әлчатан олан мәгсәдләр гојмајасан? Белә мәгсәдләрдән бири һәр ҝүн дуа етмәк ола биләр. Дуаларын һәмишә рәнҝарәнҝ вә конкрет олсун дејә онлара ҝүн әрзиндә баш верән һадисәләри дахил едә биләрсән. Бу һадисәләри јадда сахламаг вә ја гысаҹа гејд етмәк олар. Јахшы оларды ки, дуа едәркән јалныз гаршылашдығын чәтинликләри јох, севинҹини дә бөлүшәсән (Филип. 4:6). Диҝәр мәгсәд Мүгәддәс Китабы һәр ҝүн охумагдыр. Билирсәнми ки, әҝәр ҝүндә тәхминән дөрд сәһифә охусан, бир ил әрзиндә бүтүн Мүгәддәс Китабы гуртараҹагсан?a Мәзмур 1:1, 2 ајәләриндә дејилир ки, Аллаһын ‘ганунуну ҝеҹә-ҝүндүз аһәстә сәслә охујан инсан’, (ЈД) һәгигәтән дә, бәхтијардыр.
8 Гаршына гоја биләҹәјин үчүнҹү мәгсәд бүтүн јығынҹаг ҝөрүшләринә һазырлашмагдыр. Әввәлҹә, ола билсин, сән үзүндән һансыса суалын ҹавабыны вә ја ајә охумаг истәјәҹәксән. Бир гәдәр сонра исә өз сөзләринлә ҹаваб вермәји гаршына мәгсәд гоја биләрсән. Сәнин һәр бир ҹавабын Јеһоваја тәгдим етдијин мәдһ гурбаныдыр (Ибр. 13:15). Бу мәгсәдләрә чатанда әминлијин, Јеһоваја миннәтдарлығын артаҹаг вә сән артыг даһа бөјүк мәгсәдләрә ҹан атмаға һазыр олаҹагсан.
9. Әҝәр сән һәлә тәблиғчи дејилсәнсә, гаршына һансы нөвбәти мәгсәдләри гоја биләрсән?
9 Бунлардан сонра нөвбәти мәгсәдләрин нә ола биләр? Әҝәр сән һәлә тәблиғчи дејилсәнсә, гаршына бу мәгсәди гоја биләрсән. Бу шәрәфли мәгсәдә чатдыгдан сонра сән, бир ајда олсун, ара вермәдән мүнтәзәм тәблиғ етмәк вә бир тәблиғчи кими пүхтәләшмәк истәјәҹәксән. Һәмчинин сәндә тәблиғдә Мүгәддәс Китабдан мәһарәтлә истифадә етмәји өјрәнмәк истәји јаранаҹаг. Бундан сонра тәблиғ ишинин сәнә даһа чох мәмнунлуг ҝәтирдијини ҝөрәҹәксән. Сонра евдән-евә даһа чох тәблиғ едә вә Мүгәддәс Китаб өјрәнмәси кечирә биләрсән. Вәфтиз олунмамыш тәблиғчи кими гаршына гоја биләҹәјин ән јахшы мәгсәд вәфтиз үчүн тәләбләрә ҹаваб вермәк, сонра исә Јеһоваја һәср олунуб вәфтиз олунмагдыр.
10, 11. Ҝәнҹләр гаршыларына ҝәләҹәк үчүн һансы мәгсәдләри гоја биләрләр?
10 Артыг вәфтиз олунмусанса, ашағыдакы мәгсәдләр барәдә дүшүнмәк олар. Мисал үчүн, надир һалларда ишләнән әразиләрдә вахташыры олараг тәблиғ едәрәк јығынҹаглара көмәк едә биләрсән. Ола билсин, сән һәмчинин ҝәнҹлик гүввәтини вә сағламлығыны көмәкчи вә ја даими пионер хидмәтинә һәср етмәк гәрарына ҝәләҹәксән. Јеһоваја севинҹлә хидмәт едән он минләрлә пионер таммүддәтли хидмәтин Јараданы ҹаванлыг ҝүнләриндә хатырламағын нә гәдәр бөјүк хејир-дуалар ҝәтирдијини сәнә даныша биләрләр. Бу мәгсәдләрә һәлә валидејнләринлә јашајаркән чата биләрсән. Аид олдуғун јығынҹаг да бунлардан фајда әлдә едәҹәк.
11 Лакин диҝәр мәгсәдләр јалныз өз јығынҹағына јох, диҝәр јығынҹаглара да фајда ҝәтирә биләр. Мәсәлән, истәр јашадығын өлкәдә, истәрсә дә ондан кәнарда тәблиғчиләрә даһа чох тәләбат олан әразиләрдә хидмәт етмәји планлашдыра биләрсән. Ола билсин, хариҹи өлкәләрдә Падшаһлыг Залларынын вә филиалларын тикинтисиндә иштирак етмәк, Бет-Ел хидмәтчиси вә ја миссионер олмаг истәдин. Сөзсүз ки, бурада садаланан мәгсәдләрин әксәријјәтинә наил олмаздан өнҹә сән илк ваҹиб аддымы атмалы, јәни вәфтиз олмалысан. Бу аддымы һәлә атмајыбсанса, ҝәл ҝөрәк, бунун үчүн нә тәләб олунур.
Вәфтиз үчүн тәләбләр
12. Бәзиләри һансы нијјәтдән ирәли ҝәләрәк вәфтиз олурлар вә нәјә ҝөрә бу, кифајәт дејил?
12 Сәнҹә, нәјә ҝөрә вәфтиз олмаг лазымдыр? Бәзиләри дүшүнә биләрләр ки, вәфтиз инсаны ҝүнаһ ишләтмәкдән горујур. Башгалары исә һәмјашыдларынын вәфтиз олундуғуну ҝөрүб һәвәсә дүшүрләр. Диҝәрләри исә, ола билсин, валидејнләрини разы салмаг истәјирләр. Лакин вәфтиз хәлвәтдә ҝөрмәк истәдијин ишдән сәни сахлајан бир сазиш дејил. Һәмчинин тәкҹә киминсә сөзүнә ҝөрә дә вәфтиз олмаг дүзҝүн дејил. Бу аддымы атмаздан әввәл сән Јеһованын Шаһиди олмағын нә демәк олдуғуну там дәрк етмәли, бу мәсулијјәти үзәринә ҝөтүрмәјә һазыр олмалы вә буну үрәкдән истәмәлисән (Ваиз 5:4, 5).
13. Сән нәјә ҝөрә вәфтиз олмалысан?
13 Вәфтиз олмағын сәбәбләриндән бири Исанын давамчыларына ‘шаҝирд һазырлајыб, вәфтиз етмәк’ тапшырығыны вермәсидир. О, өзү вәфтиз олунмагла бизә нүмунә гојуб. (Матта 28:19, 20; Марк 1:9 ајәләрини оху.) Үстәлик, вәфтиз хилас олмаг истәјәнләр үчүн ваҹиб аддымдыр. Дашгын заманы Нуһун вә аиләсинин тикдији ҝәми васитәсилә хилас олмалары барәдә јаздыгдан сонра һәвари Петер деди: «Инди дә буна охшар бир шеј, вәфтиз мөвҹуддур. Вәфтиз... сизи Иса Мәсиһин дирилмәси васитәсилә хилас едир» (1 Пет. 3:20, 21). Вәфтизи бәдбәхт һадисәләрдән горујан сығорта сәнәдинә бәнзәтмәк олмаз. Сән Јеһованы севдијин вә Она бүтүн үрәјинлә, ҹанынла, ағлынла вә вар ҝүҹүнлә хидмәт етмәк истәдијин үчүн вәфтиз олурсан (Марк 12:29, 30).
14. Бәзиләри һансы сәбәбләрә ҝөрә вәфтиз олмаға тәрәддүд едә биләрләр, лакин сән нәјә әмин олмалысан?
14 Бәзиләри сонралар јығынҹагдан кәнар едиләҹәкләриндән горхараг вәфтиз олунмаға тәрәддүд едирләр. Сәндә дә белә горху вармы? Әҝәр варса, нараһат олма, бу һеч дә пис дејил. Бу ҝөстәрир ки, сән Јеһованын Шаһиди олмағын нә гәдәр ҹидди мәсулијјәт олдуғуну дәрк едирсән. Даһа һансы сәбәбләр ола биләр? Бәлкә дә, сән Аллаһын нормаларына ујғун јашамағын ән јахшы һәјат јолу олдуғуна һәлә дә там әмин дејилсән. Бу һалда Мүгәддәс Китаб нормаларына хор бахан инсанларын агибәти барәдә дүшүнмәк сәнә дүзҝүн гәрар вермәкдә көмәк едә биләр. Јахуд да, ола билсин ки, сән Аллаһын ганунларыны севирсән, лакин онлара риајәт едә биләҹәјинә әмин дејилсән. Әслиндә, бу, сәнин тәвазөкар олдуғуну ҝөстәрир. Мүгәддәс Китабда дејилир ки, бүтүн гејри-камил инсанларын үрәји һијләҝәрдир (Јер. 17:9). Анҹаг сән даима Аллаһын «сөзләринә бағлы галмагла» бүтүн ишләриндә уғур газана биләрсән. (Мәзмур 119:9 ајәсини оху.) Вәфтиз олмаға тәрәддүд етмәјинә сәбәб нә олурса олсун, онлары арадан галдырмалысанb.
15, 16. Вәфтизә һазыр олуб-олмадығыны неҹә мүәјјән едә биләрсән?
15 Бәс вәфтизә һазыр олуб-олмадығыны неҹә мүәјјән едә биләрсән? Өзүндән соруш: «Башгаларына Мүгәддәс Китабын әсас тәлимләрини изаһ едә билирәмми? Валидејнләрим тәблиғә ҝетмәдији ҝүнләрдә мән тәблиғә ҝедирәмми? Бүтүн мәсиһчи ҝөрүшләриндә иштирак етмәјә чалышыраммы? Һәмјашыдларымын тәзјигинә мүгавимәт ҝөстәрдијим конкрет һаллары јадыма сала биләрәмми? Валидејнләрим вә ја достларым Јеһоваја хидмәти дајандырсалар, мән давам едәҹәјәмми? Аллаһа дуа едәркән Онунла мүнасибәтим барәдә данышыраммы? Өзүмү дуада Јеһоваја һәср етмишәмми?»
16 Вәфтиз инсанын һәјатыны бүсбүтүн дәјишир, буна ҝөрә дә бу мәсәләјә бармагарасы јанашмаг олмаз. Бу барәдә ҹидди дүшүнмәк үчүн кифајәт гәдәр јеткин олмалысан. Јеткинлик ҝөзәл чыхышлар етмәк вә ја шәрһләрлә инсанларда тәәссүрат ојатмаг дејил. Јеткинлик Мүгәддәс Китаб принсипләрини баша дүшәрәк дүзҝүн гәрарлар гәбул етмәк баҹарығыны тәләб едир. (Ибраниләрә 5:14 ајәсини оху.) Әҝәр сән бу сәвијјәјә чатмысанса, онда гаршында бүтүн үрәјинлә Јеһоваја хидмәт етмәк вә һәгигәтдән дә, Она һәср олдуғуну ҝөстәрән һәјат тәрзи сүрмәк кими ән шәрәфли иш дурур.
17. Вәфтиздән сонра јарана биләҹәк сынагларын өһдәсиндән ҝәлмәкдә сәнә нә көмәк едә биләр?
17 Вәфтиздән дәрһал сонра Јеһоваја хидмәт етмәк арзусу илә алышыб-јанаҹагсан. Лакин тезликлә иманынын нә гәдәр мөһкәм олдуғу вә сәнин нә гәдәр сарсылмаз олдуғун сынаға чәкиләҹәк (2 Тим. 3:12). Дүшүнмә ки, чәтинликләрлә тәк мүбаризә апармалысан. Мәсләһәт үчүн валидејнләринә мүраҹиәт ет. Јығынҹагда руһән јеткин мәсиһчиләрдән көмәк истә. Сәнә дәстәк олаҹаг инсанларла достлуғуну мөһкәмләндир. Ән әсасы, Јеһованын сәнин гејдинә галдығыны һеч вахт унутма вә јадда сахла ки, истәнилән чәтинлијин өһдәсиндән ҝәлмәк үчүн О, сәнә лазыми ҝүҹү вермәјә гадирдир (1 Пет. 5:6, 7).
Мәгсәдләринә неҹә чата биләрсән?
18, 19. Һәјатда сәнин үчүн нәјин даһа ваҹиб олдуғу үзәриндә нәјә ҝөрә дүшүнмәлисән?
18 Ән јахшы нијјәтләринин олмасына бахмајараг, сәнә һәрдән елә ҝәлирми ки, ваҹиб вә етмәк истәдијин ишләрә вахтын галмыр? Әҝәр беләдирсә, һәјатда сәнин үчүн нәјин даһа ваҹиб олдуғу үзәриндә дүшүн. Ҝәл бир тәҹрүбә апараг. Бир пластмас ведрә ҝөтүр вә ичинә бир нечә бөјүк даш гој. Сонра ичинә гум төк. Ҝөрдүн, даш да, гум да ведрәјә јерләшди. Инди исә ведрәни бошалт вә әввәлҹә гуму төк, сонра да дашлары гој. Дашлар үчүн јер галмады, елә дејилми? Чүнки ведрәјә биринҹи гуму төкмүшдүн.
19 Вахтыны нәјә сәрф едәҹәјинин үзәриндә дүшүнәркән дә ејни чәтинликлә үзләшә биләрсән. Әҝәр әјләнҹә кими шејләри биринҹи јерә гојсан, һәјатда даһа ваҹиб олан руһани мәшғулијјәтләрә вахтын һеч галмајаҹаг. Амма әҝәр Мүгәддәс Китабын ‘даһа ваҹиб шејләри ајырд етмәк’ мәсләһәтинә риајәт етсән, ҝөрәҹәксән ки, һәм Аллаһа хидмәтә, һәм дә истираһәтә вахтын вар (Филип. 1:10).
20. Мәгсәдләринә доғру ирәлиләдикҹә бәзән үрәјиндә нараһатчылыг вә шүбһәләр баш галдырарса, нә етмәлисән?
20 Вәфтиз вә диҝәр мәгсәдләрә доғру ирәлиләдикҹә бәзән үрәјиндә нараһатчылыг вә шүбһәләр баш галдыра биләр. Белә һалларда «гајғы јүкүнү Рәббә вер, гој сәнә дајаг олсун» (Мәз. 55:22). Һал-һазырда сәнин бәшәр тарихиндә ән севиндириҹи вә ән ваҹиб иш олан үмумдүнја тәлим вә тәблиғ ишиндә иштирак етмәк имканын вар (Һәв. иш. 1:8). Сән ја ади тамашачы, ја да ки фәал иштиракчы ола биләрсән. Габилијјәтләрини Падшаһлыг ишинин ирәлиләмәси үчүн истифадә ет. ‘Ҹаванлыг ҝүнләрини’ Јараданына хидмәтә һәср етдијинә ҝөрә һеч вахт пешман олмајаҹагсан! (Ваиз 12:1).
[Һашијәләр]
a «Ҝөзәтчи Гүлләси»нин 2009-ҹу ил 1 август сајынын 15—18-ҹи сәһифәләринә (рус.) бах.
b Бу кими мәсәләләрлә әлагәдар көмәк үчүн «Ҝәнҹләрин суаллары. Практики мәсләһәтләр — II» китабынын 34-ҹү фәслинә (рус.) бах.
Неҹә ҹаваб верәрдиниз?
• Нәјә ҝөрә гаршына мәгсәдләр гојмалысан?
• Һансы мәгсәдләрә ҹан атмаға дәјәр?
• Вәфтиз олунмаг мәгсәдинә чатмаг үчүн нә тәләб олунур?
• Һәјатда сәнин үчүн нәјин даһа ваҹиб олдуғуну ајырд етмәк мәгсәдләринә наил олмагда неҹә көмәк едә биләр?
[13-ҹү сәһифәдәки шәкил]
Мүгәддәс Китабы һәр ҝүн охумағы гаршына мәгсәд гојмусанмы?
[15-ҹи сәһифәдәки шәкил]
Вәфтиз олмаг мәгсәдинә наил олмагда сәнә нә көмәк едәҹәк?
[16-ҹы сәһифәдәки шәкил]
Бу нүмунәдән нә өјрәнә биләрсән?