Јеһованын руһу илә фәалијјәт ҝөстәрән Падшаһ сизә хејир-дуалар бәхш едәҹәк!
«Рәббин Руһу... онун үзәриндә олаҹаг» (ЈЕШАЈА 11:2).
1. Дүнјанын проблемләри илә әлагәдар һансы фикирләр сөјләнилмишди?
«СИЈАСӘТДӘ, иҹтимаи вәзијјәтдә вә әтраф мүһитдә гатма-гарышыглығын һөкм сүрдүјү бир дүнјада бәшәријјәт даһа 100 ил мөвҹудлуғуна давам едә биләрми?» Бу суалы 2006-ҹы илдә астрофизик Стивен Һокинг вермишди. Бир журналда дејилирди: «Биз нә јохсуллуғу арадан галдырмышыг, нә дә ки дүнјада сүлһ јаратмышыг. Демәк олар ки, бунларын әксинә наил олмушуг. Амма бу, о демәк дејил ки, биз һеч чалышмамышыг. Коммунизмдән базар игтисадијјатынадәк, Милләтләр Ҹәмијјәтиндән нүвә ваһимәси сијасәтинәдәк, бир сөзлә, һәр шеји сынагдан кечирмишик. Мүһарибәләрә сон гојмаг үчүн о гәдәр мүһарибәләр етмишик ки, артыг бир шеј тамамилә ајдындыр: биз буну етмәјин јолуну билмирик» («New Statesman»).
2. Јеһова Јер Күрәсинин гануни Һөкмдары олдуғуну тезликлә неҹә ҝөстәрәҹәк?
2 Бу кими сөзләр Јеһованын хидмәтчиләриндә тәәҹҹүб доғурмур. Мүгәддәс Китабда дејилир ки, инсанлар өзләри-өзләрини идарә етмәк баҹарығы илә јарадылмајыблар (Јер. 10:23). Јалныз Јеһова гануни Һөкмдардыр. Бу сәбәбдән бизим үчүн ганун гојмаг, һәјатымызын мәгсәдини тәјин етмәк вә бу мәгсәдә доғру бизи апармаг сәлаһијјәти јалныз вә јалныз Она мәхсусдур. Бундан әлавә, тезликлә Јеһова Өз сәлаһијјәтиндән истифадә едәрәк бәшәријјәтин өзү-өзүнү идарә етмәк үчүн ҝөстәрдији мүвәффәгијјәтсиз ҹәһдләринә сон гојаҹаг. Ејни заманда, Јеһованын али һөкмранлығыны рәдд едәрәк бәшәријјәтин ҝүнаһын, гејри-камиллијин вә «бу дөврүн аллаһы» олан Шејтан Иблисин көләлијиндә галмасыны истәдикләрини ҝөстәрән инсанларын һамысы мәһв едиләҹәк (2 Кор. 4:4).
3. Мәсиһ барәдә Јешаја һансы пејғәмбәрлији сөјләмишди?
3 Ҹәннәтдә, јени дүнјада Јеһова мәһәббәт долу һөкмранлығыны Падшаһлығы васитәсилә тәзаһүр етдирәҹәк (Дан. 7:13, 14). Бу Падшаһлығын Падшаһы барәдә Јешаја пејғәмбәрлик етмишди: «Јессејин көтүјүндән јени бир фидан чыхаҹаг, көкүндән чыхан бир будаг бар верәҹәк. Рәббин Руһу, һикмәт вә анлајыш руһу, өјүд-нәсиһәт вә гүдрәт руһу, билик вә Рәбб горхусу руһу онун үзәриндә олаҹаг» (Јешаја 11:1, 2). Аллаһын мүгәддәс руһу «Јессејин көтүјүндән» чыхан «фидан»ы, јәни Иса Мәсиһи бәшәријјәти идарә етмәк үчүн неҹә јарарлы етмишди? Онун рәһбәрлији һансы хејир-дуалары ҝәтирәҹәк? Бу хејир-дуалары алмаг үчүн биздән нә тәләб олунур?
Аллаһын јарарлы етдији Рәһбәр
4-6. Һансы ваҹиб биликләр Исаны мүдрик вә рәһмли Падшаһ, Баш Каһин вә Һаким кими хидмәт етмәјә јарарлы едир?
4 Јеһованын арзусу одур ки, хидмәтчиләри рәһмли вә әсил һикмәтә саһиб олан Падшаһын, Баш Каһинин вә Һакимин рәһбәрлији алтында камиллијә јетишсинләр. Буна ҝөрә дә Јеһова Иса Мәсиһи сечди вә мүгәддәс руһу илә ону ән ваҹиб вәзифәләри иҹра етмәк үчүн јарарлы етди. Бәс нәјә ҝөрә биз әмин ола биләрик ки, Иса Аллаһын она һәвалә етдији вәзифәләрин өһдәсиндән мүвәффәгијјәтлә вә мүкәммәл сурәтдә ҝәләҹәк? Ҝәлин бир нечә сәбәби нәзәрдән кечирәк.
5 Иса Аллаһы һамыдан јахшы таныјыр. Аллаһын јеҝанә Оғлу Атасыны һамыдан чох — милјард илләрдир ки таныјыр. Бу вахт әрзиндә Иса Јеһованы о гәдәр јахындан таныды ки, ону «ҝөзәҝөрүнмәз Аллаһын иникасы», јәни сурәти адландырмаг олар (Колос. 1:15). Исанын өзү дә демишди: «Мәни ҝөрән Атаны да ҝөрүб» (Јәһ. 14:9).
6 Јеһовадан сонра Иса, инсанлар да дахил олмагла, јарадылан һәр шеј барәдә ән дәрин вә әтрафлы билијә маликдир. Колослулара 1:16, 17 ајәләриндә дејилир: «Ҝөјдәки вә јердәки, ҝөрүнән вә ҝөрүнмәз һәр шеј... онун [Аллаһын Оғлунун] васитәсилә јаранды... О, һәр шејин әзәлидир вә галан шејләр онун васитәсилә мөвҹуд олуб». Бир тәсәввүр един, Иса Аллаһын «маһир уста»сы (ЈД) кими һәр бир шејин јарадылмасында иштирак едиб. Тәәҹҹүблү дејил ки, о, Каинатда мөвҹуд олан хырда зәррәҹикләрдән тутмуш һејрәтамиз инсан бејнинә гәдәр һәр шејә јахшы бәләддир. Иса, һәгигәтән дә, мүдриклијин тәҹәссүмүдүр! (Сүл. мәс. 8:12, 22, 30, 31).
7, 8. Аллаһын руһу Исаја хидмәтдә неҹә көмәк едирди?
7 Иса Аллаһын мүгәддәс руһу илә мәсһ олуб. Иса демишди: «Јеһованын руһу үзәримдәдир, чүнки О, мәни јохсуллара хош хәбәри бәјан етмәк үчүн мәсһ етди. О, мәни әсирләрә азадлығы вә корлара ишығы тәблиғ етмәк, мәзлумлара гуртулуш вермәк, Јеһованын илтифат илини тәблиғ етмәк үчүн ҝөндәрди» (Лука 4:18, 19). Ҝөрүнүр, Иса вәфтиз оланда мүгәддәс руһ она инсан кими доғулмаздан әввәл малик олдуғу бүтүн биликләри јадына салмаға көмәк етди. Бу биликләрә јерүзү хидмәти заманы Аллаһын әмри илә онун Мәсиһ кими иҹра етмәли олдуғу тапшырыглар да дахил иди. (Јешаја 42:1; Лука 3:21, 22; Јәһја 12:50 ајәләрини оху.)
8 Исанын үзәриндә мүгәддәс руһ вар иди вә о, камил бәдәнә вә дүшүнҹәјә малик иди. Буна ҝөрә дә онун нәинки бәшәр тарихиндә јашамыш ән бөјүк инсан, һәм дә бөјүк Мүәллим олмасы тәәҹҹүблү дејил. Исаны динләјәнләр ‘онун неҹә тәлим вердијинә һејран галырдылар’ (Мат. 7:28). Чүнки Иса баша дүшүрдү ки, бәшәр проблемләринин көкүндә ҝүнаһ, гејри-камиллик вә инсанларын Аллаһы танымамасы дурур. Һәмчинин о, инсанларын дахилән неҹә олдугларыны ҝөрүр вә онларла буна ујғун тәрздә давранырды (Мат. 9:4; Јәһ. 1:47).
9. Исанын јерүзү хидмәти үзәриндә дүшүнмәк она бир Рәһбәр кими олан етибарынызы неҹә артырыр?
9 Иса јер үзүндә инсан кими јашајыб. Јер үзүндә инсан кими јашамасы вә гејри-камил инсанларла сых мүнасибәтдә олмасы Исаны Падшаһ кими даһа јарарлы етди. Һәвари Павел јазмышды: «Инсанларын ҝүнаһыны өртән барышыг гурбаны тәгдим етмәк вә Аллаһа хидмәтдә мәрһәмәтли вә садиг баш каһин олмаг үчүн о, [Иса] һәр шејдә “гардашларына” охшамалы иди. О, сынаг вахты әзаб чәкдији үчүн сынагларла үзләшәнләрин дә имдадына јетишмәјә гадирдир» (Ибр. 2:17, 18). Иса сынагларла үзләшдији үчүн белә вәзијјәтдә олан инсанларын һалына аҹыја билир. Исанын шәфгәтли олмасы јер үзүндә хидмәт едән заман өзүнү ајдын бүрузә верирди. Хәстә, әлил, зүлм алтында оланлар вә һәтта ушаглар она сәрбәст јахынлаша билирдиләр (Марк 5:22—24, 38—42; 10:14—16). Һәлим вә руһән аҹ оланлар да онун јанына ҝәлирди. Амма мәғрур, тәкәббүрлү вә ‘гәлбләриндә Аллаһа мәһәббәт олмајан’ инсанлар ону гәбул етмирдиләр, әксинә, она нифрәт едир вә мүгавимәт ҝөстәрирдиләр (Јәһ. 5:40—42; 11:47—53).
10. Исанын бизә олан мәһәббәтинин ән бөјүк сүбуту нәдир?
10 Иса өз һәјатыны бизим уғрумузда гурбан верди. Исанын мүнасиб Рәһбәр олдуғуна ән бөјүк сүбут бизим уғрумузда өлмәјә һазыр олмасы иди. (Мәзмур 40:6—10 ајәләрини оху.) Мәсиһ демишди: «Достлары уғрунда ҹаныны фәда едән инсанын мәһәббәтиндән бөјүк мәһәббәт јохдур» (Јәһ. 15:13). Бәли, чох вахт тәбәәләрин вәсаити һесабына кеф-дамаг ичиндә јашајан гејри-камил инсан рәһбәрләриндән фәргли олараг, Иса бәшәријјәт үчүн өз ҹаныны белә әсирҝәмәди (Мат. 20:28).
Фидјәнин дәјәрини тәтбиг етмәк сәлаһијјәтини алыб
11. Нәјә ҝөрә биз шүбһә етмәмәлијик ки, Иса фидјә гурбанлығынын дәјәрини бизим фајдамыз үчүн тәтбиг едәҹәк?
11 Исанын Баш Каһин кими фидјә гурбанлығынын дәјәрини бизә тәтбиг етмәк сәлаһијјәтини алмасы неҹә дә мүнасибдир! Иса јер үзүндә хидмәт едәркән фидјәни өдәјән бир шәхс кими Миниллик Һөкмранлығы әрзиндә нәләр едәҹәјини ҝөстәрди. Садиг галсаг, о хејир-дуалары биз дә ҝөрәҹәјик. Иса әлилләрә вә хәстәләрә шәфа верирди, өлүләри дирилдирди, минләрлә инсанлары једиздирирди вә һәтта тәбиәт гүввәләрини идарә етмәк сәлаһијјәтинә малик иди (Мат. 8:26; 14:14—21; Лука 7:14, 15). Үстәлик, о, бу мөҹүзәләри ҝүҹү вә сәлаһијјәтләри илә өјүнмәк үчүн јох, инсанлары севдији вә онлара јазығы ҝәлдији үчүн едирди. Бир ҹүзамлы Исаја јахынлашыб шәфа диләјәндә о деди: «Истәјирәм. Тәмизлән» (Марк 1:40, 41). Иса Миниллик Һөкмранлығы заманы да ејни шәфгәт ҝөстәрәҹәк, лакин даһа бөјүк мигјасда.
12. Јешаја 11:9 ајәсиндәки сөзләр неҹә јеринә јетәҹәк?
12 Бундан әлавә, Мәсиһ 2 000 ил бундан әввәл башладығы руһани тәлим програмыны һакимијјәт шәрикләри илә бирҝә давам етдирәҹәк. Онда Јешаја 11:9 ајәсиндәки сөзләр јеринә јетәҹәк: «Сулар дәнизи бүрүдүјү кими дүнја Рәббин [Јеһованын] билији илә долаҹаг». Шүбһә јохдур ки, бу илаһи тәлимә Јер күрәсинин вә үзәриндә јашајан сајсыз-һесабсыз мәхлугларын гајғысына неҹә галмаға даир ҝөстәришләр дә дахил олаҹаг. Вахтилә Адәм дә белә тапшырыг алмышды. Миниллијин сонунда Јарадылыш 1:28 ајәсиндә јазылан Аллаһын нијјәти јеринә јетәҹәк вә фидјә гурбанлығынын дәјәри там тәтбиг олунаҹаг.
Һөкм етмәк сәлаһијјәтини алыб
13. Иса салеһлији севдијини неҹә ҝөстәрди?
13 Аллаһ Мәсиһи ‘дириләрин вә өлүләрин һакими тәјин едиб’ (Һәв. иш. 10:42). Неҹә дә тәсәлливериҹидир ки, Иса рүшвәтхор дејил; о, салеһлији вә сәдагәти кәмәр кими белинә мөһкәм бағлајыб (Јешаја 11:5). Иса тамаһкарлыға, икиүзлүлүјә вә бу кими диҝәр пис хүсусијјәтләрә нифрәт етдијини ҝөстәриб. Һәмчинин о, башгаларынын изтирабларына гаршы лагејд оланлары мүһакимә едирди (Мат. 23:1—8, 25—28; Марк 3:5). Үстәлик, Иса инсанларын заһири ҝөрүнүшүнә алданмырды, «чүнки о, адамларын үрәјинә бәләд иди» (Јәһ. 2:25).
14. Иса салеһлији вә әдаләти севдијини бу ҝүн неҹә ҝөстәрир вә биз өзүмүзә һансы суаллары вермәлијик?
14 Иса бәшәр тарихиндә ән бөјүк тәлим вә тәблиғ кампанијасына нәзарәт етмәклә салеһлији вә әдаләти севдијини ҝөстәрмәјә давам едир. Бу ишин Аллаһын истәдији кими јеринә јетирилмәсинә һеч бир инсан, һеч бир һөкумәт, һеч бир пис руһани варлыг мане ола билмәз. Буна ҝөрә дә биз там әмин ола биләрик ки, Һар-Маҝедонда Аллаһын әдаләти зәфәр чалаҹаг. (Јешаја 11:4; Матта 16:27 ајәләрини оху.) Өзүндән соруш: «Мәсиһин инсанлара олан мүнасибәтини хидмәтдә әкс етдирирәмми? Хәстәлик вә ја диҝәр сәбәб Јеһоваја хидмәтими мәһдудлашдырырса, шәраитим јол вердији гәдәр Она там хидмәт едирәмми?»
15. Јеһоваја ҹанла-башла хидмәт етмәк үчүн нәји јадда сахламалыјыг?
15 Тәблиғ ишинин Јеһованын иши олдуғуну јадда сахласаг, Она ҹанла-башла хидмәт едәҹәјик. Бу иш Онун әмри илә һәјата кечирилир; О, Оғлу васитәсилә она нәзарәт едир; вә бу ишдә иштирак едәнләрә мүгәддәс руһу илә ҝүҹ-гүввә верир. Мүгәддәс руһла фәалијјәт ҝөстәрән Иса илә бирҝә Јеһова илә әмәкдашлыг етмәк шәрәфини гијмәтләндирирсәнми? Әксәријјәтинин «савадсыз, садә адам» сајылдығы једди милјондан чох адамы Јеһовадан башга ким 236 өлкә вә әразидә Падшаһлыг һаггында хош хәбәри тәблиғ етмәјә тәшвиг едә биләр? (Һәв. иш. 4:13).
Мәсиһ васитәсилә хејир-дуалара ҹан ат
16. Јарадылыш 22:18 ајәсиндә Аллаһын хејир-дуалары барәдә нә дејилир?
16 Јеһова Ибраһимә демишди: «Дүнјанын бүтүн милләтләри сәнин нәслинин [нәслиндән олан өвлад] васитәсилә хејир-дуа алаҹаг, чүнки сән Мәним сөзүмә гулаг асдын» (Јар. 22:18). Бу о демәкдир ки, Аллаһа вә Онун Оғлуна хидмәт етмәји өзләринә шәрәф биләнләр Мәсиһ олан Өвладын онлара хејир-дуалар бәхш едәҹәјинә там әмин ола биләрләр. Вә бу хејир-дуалары јадда сахлајараг онлар бу ҝүн фәал шәкилдә хидмәт едирләр.
17, 18. Ганунун тәкрары 28:2 ајәсиндә Јеһованын һансы вәди јазылыб вә бу, бизим үчүн һансы мәнаны кәсб едир?
17 Бир дәфә Аллаһ Ибраһимдән төрәјән гәдим Исраил халгына демишди: «Аллаһыныз Рәббин сөзүнү динләсәниз, бүтүн бу хејир-дуалар сизә ҝәләҹәк вә үзәриниздә галаҹаг» (Ганун. т. 28:2). Ејни шеји Аллаһын мүасир хидмәтчиләринә дә шамил етмәк олар. Әҝәр Јеһованын хејир-дуаларыны алмаг истәјириксә, Онун ‘сөзүнү динләмәлијик’. Онда Онун хејир-дуалары ‘бизә ҝәләҹәк вә үзәримиздә галаҹаг’. Јеһованын ‘сөзүнү динләмәк’ өзүнә нәји дахил едир?
18 Аллаһы ‘динләмәјә’ Онун Кәламына вә тәгдим етдији руһани гидаја ҹидди јанашмаг дахилдир (Мат. 24:45). Бу һәмчинин Аллаһа вә Онун Оғлуна итаәт етмәји нәзәрдә тутур. Иса демишдир: «Мәнә: “Ағам, Ағам”, — дејән һәр кәс сәмави падшаһлыға ҝирмәјәҹәк, јалныз ҝөјдәки Атамын ирадәсини јеринә јетирән ора ҝирәҹәк» (Мат. 7:21). Үстәлик, Аллаһы ‘динләмәк’ Онун тәсис етдији гурулуша — «инсанлар тимсалында һәдијјәләр» олан ағсаггаллар башда олмагла, мәсиһчи јығынҹағына сидг-үрәкдән табе олмаг мәнасыны дашыјыр (Ефес. 4:8).
19. Аллаһын хејир-дуаларыны неҹә ала биләрик?
19 «Инсанлар тимсалында һәдијјәләр» арасында бүтүн мәсиһчи јығынҹағынын тәмсилчиләри олан Рәһбәрлик Шурасынын үзвләри дә вар (Һәв. иш. 15:2, 6). Мәсиһин руһани гардашларына олан мүнасибәтимиз үзүмүзә ҝәлән бөјүк мүсибәтдә бизә гаршы һансы һөкмүн чыхарылаҹағына тәсир ҝөстәрәҹәк әсас амилләрдән биридир (Мат. 25:34—40). Буна ҝөрә дә әҝәр хејир-дуалар алмаг истәјириксә, Аллаһын мәсһ олунмушларына һәмишә дәстәк олмалыјыг.
20. а) «Инсанлар тимсалында һәдијјәләр» олан нәзарәтчиләринин әсас вәзифәләриндән бири һансыдыр? б) Бу гардашлары гијмәтләндирдијимизи неҹә ҝөстәрә биләрик?
20 «Инсанлар тимсалында һәдијјәләр» арасында филиалларын комитә үзвләри, сәјјар нәзарәтчиләр вә јығынҹаг ағсаггаллары да вар. Онларын һамысы мүгәддәс руһ васитәсилә тәјин олунурлар (Һәв. иш. 20:28). Бу гардашларын әсас вәзифәләриндән бири ‘һамымыз иманда бирлијә вә Аллаһын Оғлу һаггындакы дәгиг биликдә вәһдәтә, јеткин инсан сәвијјәсинә, Мәсиһә мәхсус долғунлуғун инкишаф дәрәҹәсинә јетишәнәдәк’ Аллаһын халгыны мөһкәмләндирмәкдән ибарәтдир (Ефес. 4:13). Бизим кими, бу гардашлар да гејри-камилдирләр. Лакин онларын рәһбәрлијинә бүтүн үрәкдән риајәт едәндә хејир-дуалар алаҹағымыза үмид едә биләрик (Ибр. 13:7, 17).
21. Нәјә ҝөрә Аллаһын Оғлуна табе олмаг олдугҹа ваҹибдир?
21 Тезликлә Мәсиһ Шејтанын пис системини мәһв етмәк үчүн һәрәкәтә кечәҹәк. Бу баш верәндә һәјатымыз Исанын әлиндә олаҹаг, чүнки Аллаһ она ‘бөјүк издиһамы’ ‘һәјат сују булагларына апармағы’ тапшырыб (Вәһј 7:9, 16, 17). Буна ҝөрә дә ҝәлин Јеһованын руһу илә фәалијјәт ҝөстәрән Падшаһа көнүллү сурәтдә вә миннәтдарлыгла табе олаг.
Нөвбәти ајәләрдән нә өјрәндиниз?
[17-ҹи сәһифәдәки шәкил]
Иса Јаирин гызыны дирилдәндә онун нә гәдәр шәфгәтли олдуғу ајдын ҝөрүндү
[18-ҹи сәһифәдәки шәкилләр]
Иса Мәсиһ бәшәр тарихиндә ән бөјүк тәблиғ кампанијасына нәзарәт едир