Әзаб чәкәнләрә тәсәлли верин

«[Јеһова] мәни мәсһ етди... јаслыларынa һамысына тәсәлли вермәк үчүн» (ЈЕШАЈА 61:1, 2).

1. Иса әзаб-әзијјәт чәкәнләр үчүн нә едирди вә нәјә ҝөрә?

ИСА МӘСИҺ демишди: «Мәним јемәјим мәни ҝөндәрәнин ирадәсини јеринә јетирмәк вә Онун ишини тамамламагдыр» (Јәһ. 4:34). Иса Аллаһдан алдығы тапшырығы јеринә јетирәркән Онун еҹазкар хүсусијјәтләрини әкс етдирирди. Бу хүсусијјәтләрдән бири Јеһованын инсанлара бәсләдији бөјүк мәһәббәтдир (1 Јәһ. 4:7—10). Јеһова бу мәһәббәти һәм дә инсанлара тәсәлли вермәклә ҝөстәрир. Буна ҝөрә һәвари Павел Јеһованы «һәр ҹүр тәсәлли Аллаһы» адландырды (2 Кор. 1:3). Иса Јешајанын пејғәмбәрлијини јеринә јетирмәклә бу мәһәббәти тәзаһүр етдирди. (Јешаја 61:1, 2 ајәләрини оху.) О, бу пејғәмбәрлији Назарет шәһәриндәки синагогда охујуб өзүнә аид етди (Лука 4:16—21). Бүтүн хидмәти боју Иса әзаб-әзијјәт чәкәнләрә мәһәббәтлә тәсәлли вериб онлары руһландырыр вә гәлбләрини раһатлыгла долдурурду.

2, 3. Нәјә ҝөрә Мәсиһин давамчылары башгаларына тәсәлли вермәкдә ондан нүмунә ҝөтүрмәлидирләр?

² Исанын бүтүн давамчылары ондан нүмунә ҝөтүрәрәк әзаб-әзијјәт чәкәнләрә тәсәлли вермәлидирләр (1 Кор. 11:1). Павел демишди: «Бир-биринизә тәсәлли верин вә бир-биринизи мөһкәмләндирин» (1 Салон. 5:11). Хүсусилә дә биз башгаларына тәсәлли вермәлијик, чүнки бу дәрәҹәдә «ағыр бир зәманә» бәшәр тарихиндә һәлә олмајыб (2 Тим. 3:1). Пис инсанларын сајы ҝетдикҹә артдығы үчүн јахшы инсанлар өз сөзләри вә һәрәкәтләри илә башгаларына әзаб вә үрәкағрысы верән инсанларын ичиндә јашамаг мәҹбуријјәтиндәдирләр.

³ Мүгәддәс Китабда пејғәмбәрлик едилмишди ки, бу пис системин сон ҝүнләриндә «инсанлар худбин, пулпәрәст, өзүнү өјән, өзүндән разы, күфр данышан, валидејнләринә итаәт етмәјән, нанкор, вәфасыз, доғмаларыны севмәјән, тәрс, бөһтанчы, тәмкинсиз, залым, јахшылығын дүшмәни, хаин, өз билдијини едән, ловға олаҹаглар, Аллаһдан чох ејш-ишрәти севәҹәкләр». Инсанларын әмәлләри вә дүшүнҹәләри индики гәдәр позулмамышды. Чүнки һәмин пејғәмбәрликдә гејд олунур ки, инсанлар «даһа да пис ишләр ҝөрәҹәкләр» (2 Тим. 3:2—4, 13).

4. Дүнјанын вәзијјәти нә јердәдир?

⁴ Аллаһын Кәламында ајдын дејилир ки, «бүтүн дүнја... Шәририн әлиндәдир», буна ҝөрә дә һал-һазыркы вәзијјәт бизи һеч тәәҹҹүбләндирмир (1 Јәһ. 5:19). «Бүтүн дүнја» дејилдикдә, онун сијаси, дини, тиҹари системләри, һәмчинин тәблиғат васитәләри нәзәрдә тутулур. Шүбһә јохдур ки, «бу дүнјанын һөкмдары» вә «бу дөврүн аллаһы» Шејтан Иблисдир (Јәһ. 14:30; 2 Кор. 4:4). Бүтүн јер үзүндә вәзијјәт ҝетдикҹә даһа бетәр олур, чүнки Шејтан вахтынын гуртармаг үзрә олдуғуну вә тезликлә Јеһованын ону Өз јолундан ҝөтүрәҹәјини билдији үчүн чох гәзәблидир (Вәһј 12:12). Аллаһын Шејтана вә онун пис системинә ҝөстәрдији сәбрин тезликлә сона чатаҹағыны вә Шејтанын Јеһованын али һөкмранлығы илә бағлы галдырдығы мәсәләнин өз һәллини тапаҹағыны билмәк неҹә дә тәсәлливериҹидир! (Јар., фәс. 3; Әјј., фәс. 2).

Хош хәбәр бүтүн дүнјада тәблиғ олунур

5. Тәблиғ иши илә бағлы пејғәмбәрлик сон ҝүнләрдә неҹә јеринә јетир?

⁵ Бәшәр тарихинин бу чәтин дөврү әрзиндә Исанын сөјләдији пејғәмбәрлик јеринә јетир. О демишди: «Падшаһлыг һаггындакы бу хош хәбәр милләтләрин һамысына шәһадәт олсун дејә, бүтүн јер үзүндә тәблиғ едиләҹәк вә сон о вахт ҝәләҹәк» (Мат. 24:14). Аллаһын Падшаһлығы һаггында дүнја мигјасында апарылан шаһидлик иши ҝетдикҹә даһа бөјүк вүсәт алыр. Бу ҝүн бүтүн дүнјада 107 000-дән чох јығынҹаг вә 7 500 000-дән чох Јеһованын Шаһиди вар. Иса Аллаһын Падшаһлығы һагда тәблиғ етдији вә өјрәтдији кими, онлар да һәмин иши иҹра едирләр (Мат. 4:17). Бунун сајәсиндә әзаб-әзијјәт чәкәнләр бөјүк тәсәлли тапырлар. Сон ики ил әрзиндә 570 601 адам Јеһованын Шаһиди кими вәфтиз олунуб!

6. Тәблиғ фәалијјәтинин бу гәдәр ҝениш вүсәт алмасы барәдә нә дүшүнүрсән?

⁶ Јеһованын Шаһидләринин Мүгәддәс Китаба әсасланан әдәбијјатларыны 500-дән артыг дилә тәрҹүмә етмәләри вә пајламалары бу ишин нә дәрәҹәдә ҝениш мигјасда јеринә јетирилдијини ҝөрмәјә көмәк едир. Бәшәр тарихиндә һәлә белә бир шеј олмајыб! Јеһованын тәшкилатынын јер үзүндәки һиссәсинин мөвҹуд олмасы, фәалијјәти вә инкишафы, һәгигәтән дә, һејрәтамиздир. Аллаһын гүдрәтли мүгәддәс руһунун рәһбәрлији вә көмәклији олмасајды, Шејтанын идарәси алтында олан бу дүнјада Аллаһын ишини һәјата кечирмәк гејри-мүмкүн олаҹагды. Хош хәбәр дүнјанын һәр јериндә олан инсанлара тәблиғ олундуғу үчүн Мүгәддәс Китаб јалныз һәмиманлыларымыза јох, һәмчинин Падшаһлыг һагда хәбәрә һај верән һәр бир инсана тәсәлли верир.

Һәмиманлыларымыз бизә тәсәлли верә биләр

7. а) Нәјә ҝөрә биз ҝөзләмәмәлијик ки, Јеһова бизә әзаб верән бүтүн вәзијјәтләри арадан галдыраҹаг? б) Һарадан билирик ки, сынаглара вә тәгибләрә таб ҝәтирмәк мүмкүндүр?

⁷ Пислик вә әзаб-әзијјәтлә долу олан бу дүнјада нараһатчылыға сәбәб олан вәзијјәтләрлә үзләшмәјимиз лабүддүр. Нә гәдәр ки Аллаһ бу системи мәһв етмәјиб, биз ҝөзләмәмәлијик ки, О, бизә дәрд-гәм вә бәдбәхтлик ҝәтирән һәр шеји һәјатымыздан силиб атаҹаг. О ҝүнү ҝөзләдијимиз әрәфәдә бизим Јеһоваја вә Онун али һакимијјәтинә садиглијимиз, габагҹадан дејилдији кими, сынаға чәкиләҹәк (2 Тим. 3:12). Лакин сәмави Атамызын көмәји вә бизә вердији тәсәлли сајәсиндә биз дә, гәдим Салоникидә јашајан мәсһ олунмуш мәсиһчиләр кими, чәтинликләр вә тәгибләр заманы «дөзүм вә инам» тәзаһүр етдирә биләрик. (2 Салоникилиләрә 1:3—5 ајәләрини оху.)

8. Јеһованын Өз хидмәтчиләринә тәсәлли вердијини Мүгәддәс Китаб неҹә ҝөстәрир?

⁸ Јеһованын хидмәтчиләринә лазыми тәсәллини вердијинә һеч бир шүбһә јохдур. Мәсәлән, мәләкә Изебел Илјас пејғәмбәри өлүмлә һәдәләјәндә о горхуб гачды вә өлмәк истәдијини деди. Анҹаг Јеһова Илјасы мәзәммәт етмәди, әксинә, пејғәмбәр кими ишини давам етдирмәси үчүн она тәсәлли вә үрәк-дирәк верди (1 Пад. 19:1—21). Јеһованын Өз халгына тәсәлли вермәсини биринҹи әсрдәки мәсиһчи јығынҹағынын нүмунәсиндән дә ҝөрмәк олар. Мисал үчүн, биз охујуруг: «Бүтүн Јәһудеја, Галилеја вә Самаријадакы јығынҹаг үчүн әмин-аманлыг дөврү башланды». Үстәлик, јығынҹаг «Јеһова Аллаһын горхусу вә мүгәддәс руһун тәсәллиси илә јашајараг бөјүјүрдү» (Һәв. иш. 9:31). Биз дә «мүгәддәс руһун тәсәллиси»нә ҝөрә Јеһоваја үрәкдән миннәтдарыг!

9. Иса барәдә өјрәнмәк нәјә ҝөрә бизә тәсәлли верир?

⁹ Иса Мәсиһ барәдә өјрәнмәк вә онун изләри илә јеримәк биз мәсиһчиләрә тәсәлли верир. Иса демишди: «Еј бүтүн зәһмәткешләр вә јүкү ағыр оланлар, јаныма ҝәлин, мән сизә тәравәт верәҹәјәм. Бојундуруғуму үзәринизә ҝөтүрүн вә мәнә бахыб өјрәнин, чүнки мән һәлим вә гәлбән тәвазөкарам. Онда ҹаныныз тәравәтләнәр. Чүнки бојундуруғум раһат, јүкүм јүнҝүлдүр» (Мат. 11:28—30). Исанын инсанларла хејирхаһҹасына вә мәһәббәтлә давранмасы барәдә өјрәнмәк вә онун бу мүсбәт нүмунәсини тәглид етмәк нараһатчылығын өһдәсиндән ҝәлмәкдә артыг өзү-өзлүјүндә бөјүк көмәкдир.

10, 11. Јығынҹагда тәсәллини кимдән ала биләрик?

¹⁰ Һәмиманлыларымыз да бизә тәсәлли верә биләрләр. Мәсәлән, ҝөрәк јығынҹаг ағсаггаллары иманлары зәифләјән баҹы-гардашлара неҹә көмәк едирләр. Шаҝирд Јагуб јазмышды: «Аранызда [руһани ҹәһәтдән] хәстә олан вармы? Гој јығынҹағын ағсаггалларыны чағырсын. Онлар Јеһованын ады илә онун башына јағ сүртүб онун үчүн дуа едәрләр». Бу, һансы бәһрәләри ҝәтирир? «Иманла едилән дуа хәстәни сағалдаҹаг вә Јеһова ону ајаға галдыраҹаг. Әҝәр ҝүнаһ ишләјибсә, тәгсири бағышланаҹаг» (Јаг. 5:14, 15). Јығынҹағын диҝәр үзвләри дә бизим үчүн әсил тәсәлли ола биләрләр.

¹¹ Гадынлара өз проблемләри барәдә диҝәр гадынларла сөһбәт етмәк, адәтән, даһа асан олур. Хүсусилә дә јашлы вә зәнҝин һәјат тәҹрүбәләри олан баҹылар ҹаван баҹылара јахшы мәсләһәтләр верә биләрләр. Бу јашлы јеткин баҹылар, ола билсин, нә вахтса һәјатларында һәмин проблемләрлә үзләшибләр. Онларын шәфгәтли олмаларынын вә гадынлара хас олан диҝәр хүсусијјәтләринин ҹаван баҹылара көмәји дәјә биләр. (Титус 2:3—5 ајәләрини оху.) Әлбәттә, ағсаггаллар вә диҝәр мәсиһчиләр әзаб-әзијјәт чәкән баҹы-гардашлара тәсәлли верә биләрләр вә һәтта бу, онларын борҹудур (1 Салон. 5:14, 15). Биз јадымызда сахламалыјыг ки, Аллаһ «һәр дәрдимиздә бизә тәсәлли верир. Биз дә Ондан алдығымыз тәсәлли васитәсилә мүхтәлиф ҹүр дәрди оланлара тәскинлик ҝәтирә билирик» (2 Кор. 1:4).

12. Мәсиһчи ҝөрүшләриндә иштирак етмәк нәјә ҝөрә олдугҹа ваҹибдир?

¹² Тәсәлли тапмаг үчүн мәсиһчи јығынҹагларында иштирак етмәк олдугҹа ваҹибдир, чүнки бурада Мүгәддәс Китаб әсасында апарылан мүзакирәләр бизи руһландырыр. Аллаһын Кәламында дејилир ки, Јәһуда вә Сила «гардашлары бир чох сөзләрлә дөнә-дөнә руһландырыб мөһкәмләндирдиләр» (Һәв. иш. 15:32). Ҝөрүшдән әввәл вә сонра баҹы вә гардашлар бир-бирләрилә үнсијјәт едирләр вә руһланырлар. Буна ҝөрә дә һәјатда проблемләрлә үзләшәндә ҝәлин өзүмүзү башгаларындан тәҹрид етмәјәк, чүнки бунунла вәзијјәт дүзәлмәјәҹәк (Сүл. мәс. 18:1). Әксинә, һәвари Павелин Аллаһдан илһам алараг јаздығы мәсләһәтә әмәл едәк: «Ҝәлин бир-биримизә гаршы диггәтҹил олуб бир-биримизи мәһәббәтә вә хејирхаһ ишләрә тәшвиг едәк, бәзиләринин вәрдиш етдији кими, јығынҹагларымыздан галмајаг, әксинә, о ҝүнүн јахынлашдығыны ҝөрдүкҹә бир-биримизи даһа чох руһландыраг» (Ибр. 10:24, 25).

Аллаһын Кәламы бизә тәсәлли верир

13, 14. Мүгәддәс Китаб бизә неҹә тәсәлли верә биләр?

¹³ Истәр вәфтиз олунмуш мәсиһчи олаг, истәрсә дә Аллаһ вә Онун нијјәтләри барәдә јениҹә өјрәнмәјә башлајаг биз Аллаһын Кәламындан бөјүк тәсәлли тапа биләрик. Павел јазмышды: «Әввәлҹәдән јазыланларын һамысы исә бизә нәсиһәт олараг јазылыб ки, дөзүм вә Мүгәддәс Јазылардан алдығымыз тәсәлли сајәсиндә үмидимиз олсун» (Ром. 15:4). Мүгәддәс Китаб бизә тәсәлли вермәклә јанашы, «там сәриштәли, һәр ҹүр јахшы ишә тамамилә һазыр» олмаға көмәк едә биләр (2 Тим. 3:16, 17). Аллаһын нијјәти барәдә һәгигәти билмәјимиз вә ҝәләҹәјә даир әсил үмидимизин олмасы бизим үчүн бөјүк тәсәллидир. Буна ҝөрә дә ҝәлин бизә тәсәлли верән вә бир чох фајдалар ҝәтирән Аллаһын Кәламындан вә она әсасланан нәшрләрдән там шәкилдә јарарланмаг.

¹⁴ Иса инсанлара тәлим вә тәсәлли вермәк үчүн Мүгәддәс Китабдан истифадә едәрәк бизә ҝөзәл нүмунә гојуб. Мәсәлән, дирилдикдән сонра Иса ики шаҝирдинә ҝөрүнәрәк Мүгәддәс Јазылары онлара изаһ етди. Исанын дедији сөзләр онларын үрәјинә ҝүҹлү тәсир етмишди (Лука 24:32). Онун мүкәммәл нүмунәсини изләјән һәвари Павел дә «Мүгәддәс Јазылара әсасланараг» инсанларла сөһбәт едирди. О, Веријада оланда онун динләјиҹиләри «Аллаһын сөзүнү бөјүк һәвәслә гәбул етдиләр. Онлар ешитдикләринин доғру олуб-олмадығыны јохламаг үчүн Мүгәддәс Јазылары һәр ҝүн диггәтлә арашдырырдылар» (Һәв. иш. 17:2, 10, 11). Буна ҝөрә дә Мүгәддәс Китабы һәр ҝүн охумаг вә она әсасланан нәшрләри арашдырмаг чох ваҹибдир. Бу, јашадығымыз нараһат дөврдә бизә тәсәлли вә үмид верә биләр!

Башгаларына тәсәлли вермәјин диҝәр үсуллары

15, 16. Һәмиманлыларымызы руһландырмаг вә онлара тәсәлли вермәк үчүн һансы үсуллар вар?

¹⁵ Биз һәмиманлыларымыза көмәк әлимизи узадараг онлара тәсәлли верә биләрик. Буну етмәјин мүхтәлиф үсуллары мөвҹуддур. Мәсәлән, јашлы вә хәстә баҹы-гардашлар үчүн базарлыг етмәк вә ја кимәсә ев ишләриндә көмәк едәрәк онлара шәхси мараг ҝөстәрмәк олар (Филип. 2:4). Ола билсин, биз мәһәббәт, зирәклик, ҹәсарәт вә иман кими ҝөзәл хүсусијјәтләринә ҝөрә һәмиманлыларымызы тәрифләјә биләрик.

¹⁶ Јашлылара тәсәлли вермәк үчүн биз онлара баш чәкмәли вә кечмиш һәјатларындан вә Јеһоваја хидмәтдә алдыглары хејир-дуалардан данышанда диггәтлә гулаг асмалыјыг. Бу сөһбәтләрдән сонра өзүмүз дә руһланыр вә тәсәлли тапырыг! Биз баш чәкдијимиз һәмиманлыларымызла бирҝә Мүгәддәс Китабы вә она әсасланан нәшрләри охуја биләрик. Јахуд да «Ҝөзәтчи Гүлләси»ндә вә ја Јығынҹағын Мүгәддәс Китаб өјрәнмәсиндә һәмин һәфтә мүзакирә олунаҹаг материалы арашдырмаг, еләҹә дә тәшкилатын филмләринә бахмаг олар. Һәмчинин нәшрләримиздән тапдығымыз руһландырыҹы нүмунәләри охуја ја да даныша биләрик.

17, 18. Нәјә ҝөрә биз әмин ола биләрик ки, Јеһова садиг хидмәтчиләринә тәсәлли верәҹәк вә онлара дајаг олаҹаг?

¹⁷ Әҝәр биз һансыса һәмиманлымызын тәсәллијә еһтијаҹ дујдуғуну ҝөрүрүксә, онун барәсиндә Јеһоваја дуа едә биләрик (Ром. 15:30; Колос. 4:12). Өзүмүз һәјатда проблемләрлә үзләшәндә, еләҹә дә башгаларына тәсәлли вермәјә чалышанда, нөвбәти сөзләри дејән мәзмурчу кими, биздә дә мөһкәм иман вә әминлик олмалыдыр: «Сән гајғы јүкүнү Рәббә вер, гој сәнә дајаг олсун. О һеч вахт салеһә сарсынты вермәз» (Мәз. 55:22). Јеһова һәр заман бизә тәсәлли верәҹәк вә көмәк едәҹәк. О, садиг хидмәтчиләрини һеч вахт тәрк етмәјәҹәк.

¹⁸ Аллаһ гәдимдәки хидмәтчиләринә демишди: «Сизә тәсәлли верән Мәнәм, Мән» (Јешаја 51:12). Јеһова ејни шеји бизим үчүн дә едәҹәк вә әзијјәт чәкәнләрә хејир-дуа верәркән сөзләримизи вә јахшы әмәлләримизи хејир-дуаландыраҹаг. Ҝөјләр вә ја јерүзү үмидинә малик олмағымыздан асылы олмајараг, Павелин мәсһ олунмуш мәсиһчиләрә дедији сөзләр һәр биримиз үчүн тәсәллидир: «Гој Ағамыз Иса Мәсиһ вә бизи севиб лүтфү сајәсиндә бизә сонсуз тәскинлик илә мисилсиз бир үмид бәхш етмиш Атамыз Аллаһ үрәјинизә тәсәлли версин, һәр ҹүр хејирхаһ сөздә вә әмәлдә дилинизә тәпәр, голунуза гүввәт версин» (2 Салон. 2:16, 17).

[Һашијә]

Јадыныздадырмы?

• Әзијјәт чәкәнләрә тәсәлли вермәк ишимиз һансы мигјасда јеринә јетирилир?

• Башгаларына тәсәлли вермәјин һансы үсуллары вар?

• Мүгәддәс Китаб Јеһованын Өз халгына тәсәлли вердијини неҹә ҝөстәрир?

[28 сәһифәдәки шәкил]

Әзијјәт чәкәнләрә тәсәлли верирсәнми?

[30 сәһифәдәки шәкил]

Һәм ҝәнҹләр, һәм дә јашлылар башгаларыны руһландыра биләрләр