Ушагларын дилиндән төкүлән руһландырыҹы кәлмәләр
2009-ҹу илин декабр ајында Русија Федерасијасынын Али Мәһкәмәси Русијанын Таганрог шәһәриндә Јеһованын Шаһидләринин јерли дини тәшкилатынын ләғв едилмәси, Падшаһлыг залынын мүсадирә едилмәси вә нәшрләримиздән 34-нүн екстремист елан олунмасы барәдә гәрары дәстәкләди. Бу инанылмаз һадисәләр барәдә мәлумат, ушаглар да дахил олмагла, бу гәрарын тәсир ҝөстәрдији Шаһидләрин шәкилләри илә бирҝә бизим рәсми Интернет сајтымызда јерләшдирилмишди.
Бу һадисәдән бир нечә ај кечмиш Русијада Јеһованын Шаһидләринин Мәркәзи Идарәсинә Квинсленддә (Австралија) јашајан вә Јеһованын Шаһидләри олан бир аиләдән бағлама вә мәктуб ҝәлди. Онлар мәһкәмәнин гәрары барәдә һәмин һесабаты охумушдулар. Мәктубда дејилирди: «Әзиз гардашлар, ушагларымыз Коди вә Лариса Русијадакы достларынын үзләшдикләри сынаглардан вә тәзаһүр етдирдикләри имандан чох тәсирләндиләр. Онлар ачыгҹа вә мәктублар јазыблар, биз исә Таганрогдакы ушаглар үчүн һәдијјәләрдән ибарәт олан балаҹа бир бағлама һазырладыг ки, чох узагда онлар кими Јеһоваја сәдагәтлә хидмәт едән вә онлары дүшүнән ушагларын олдуғуну билсинләр. Ушагларымыз онлара гуҹаг долу саламларыны вә севҝиләрини ҝөндәрирләр».
Таганрогдакы ушаглар һәдијјәләри алдыгдан сонра Австралијадакы аиләјә шәкилли миннәтдарлыг мәктублары јаздылар. Русијадакы филиалда хидмәт едән бир гардаш бу ушагларын дилиндән төкүлән руһландырыҹы кәлмәләрдән тәсирләнәрәк Коди вә Ларисаја мәктуб јазды: «Тәсәввүр едирсиниз, һәм ушаглар, һәм дә бөјүкләр үчүн етмәдикләри ишә ҝөрә ҹәзаландырылмаг нә гәдәр хошаҝәлмәздир?! Таганрогдакы баҹы-гардашларымыз пис иш ҝөрмәдикләри бир һалда, онларын Падшаһлыг залыны әлләриндән алыблар. Һәмин һадисә онлары чох кәдәрләндириб. Бу ушаглар биләндә ки, дүнјанын о бири башында онлары дүшүнәнләр вар, чох руһланаҹаглар. Сәмимијјәтинизә вә сәхавәтинизә ҝөрә чох сағ олун!» (Мәз. 8:2).
Биз, һәгигәтән дә, үмумдүнја гардашлығын бир һиссәсијик вә бир-биримизә бәсләдијимиз мәһәббәт бизә һәјатдакы бүтүн тәгиб вә чәтинликләрин өһдәсиндән ҝәлмәјә көмәк едир. Мәһкәмә залларында Јеһованын Шаһидләринин нәшрләринин инсанлары әдавәтә тәһрик едиб-етмәмәсинин мүбаһисәси ҝетдији бир вахтда, ушагларымыз милли вә мәдәни сәрһәдләри ашараг, еләҹә дә Исанын нөвбәти сөзләринин доғрулуғуну тәсдиг едәрәк сакитҹә бир-бирләринин рифаһы үчүн нараһат олдугларыны ҝөстәрирләр: «Аранызда мәһәббәт олса, һамы биләҹәк ки, сиз мәним шаҝирдимсиниз» (Јәһ. 13:35).
[32–ҹи сәһифәдәки шәкилләр]
Австралијадакы ушаглардан (сағда) һәдијјәләр алан Русијадакы ушаглар (солда)