«Мүвәггәти сакин»ләр һәгиги ибадәтдә бирләшибләр
«Әҹнәбиләр сизә әкинчилик вә бағбанлыг едәҹәк. Сизсә Рәббин каһинләри... адланаҹагсыныз» (ЈЕШАЈА 61:5, 6).
НЕҸӘ ҸАВАБ ВЕРӘРДИН?
Бәзиләри әҹнәбиләрә неҹә јанашыр, бәс Мүгәддәс Китабда һансы фәргли нөгтеји-нәзәр әкс олунур?
Бу ҝүн бүтүн милләтләрдән олан инсанлар нәјә дәвәт олунур?
Һансы мәнада Јеһованын Шаһидләри арасында әҹнәбиләр јохдур?
1. Бәзиләри әҹнәбиләрә неҹә јанашыр, бәс бу нәјә ҝөрә дүзҝүн дејил?
ӘВВӘЛКИ мәгаләдән ҝөрдүјүмүз кими, инсанлар «әҹнәби» сөзүнү кимисә алчалтмаг, һөрмәтсизлик ҝөстәрмәк, һәтта нифрәтләрини бүрузә вермәк мәгсәдилә истифадә едирләр. Өзүмүзү өлкәмиздә јашајан башга милләтләрдән үстүн тутмаг онлара гаршы һөрмәтсизлик сајылыр. Үстәлик, бу ҹүр дүшүнҹә тәрзи бизим бәзи фактлардан хәбәрсиз олдуғумузу ҝөстәрир. Бир нәшрдә белә фикир гејд олунур: «Мүгәддәс Китабда иргләр һаггында дејилир ки, онларын һамысы гардашдырлар» («Тһе Раҹес оф Манкинд»). Чох вахт гардашлар бир-бирләриндән тамамилә фәргләнирләр, анҹаг онлар јенә дә гардашдырлар.
2, 3. Јеһова әҹнәбиләрә неҹә јанашыр?
2 Дүздүр, һарада јашамағымыздан асылы олмајараг, әтрафымызда әҹнәбиләр вар. Буну Јеһова Аллаһла Ганун әһди бағлајараг Онунла хүсуси мүнасибәти олан гәдим Исраил халгынын һадисәсиндән дә ҝөрмәк олар. Бу гануна әсасән, гејри-исраиллиләрин һүгуглары мүәјјән мәнада мәһдуд олса да, исраиллиләр онларла һөрмәтҹил тәрздә вә әдаләтлә давранмалы идиләр. Бу, бизим үчүн неҹә дә ҝөзәл нүмунәдир! Һәгиги мәсиһчиләрин арасында ајры-сечкилијә вә ја нифрәтә јер јохдур. Нәјә ҝөрә? Һәвари Петер демишди: «Доғрудан да, ҝөрүрәм ки, Аллаһымыз ајры-сечкилик етмәјән Аллаһдыр, һәр халгын ичиндә Ондан горхан вә салеһ һәјат сүрән адамы хошлајыр» (Һәв. иш. 10:34, 35).
3 Гәдим Исраилдәки әҹнәбиләр исраиллиләрлә сых үнсијјәтдән фајда әлдә едирдиләр. Илләр сонра Павелин Јеһова барәсиндә вердији суал Онун бу мәсәләјә даир нә дүшүндүјүнү әкс етдирир: «Мәҝәр Аллаһ јалныз јәһудиләрин Аллаһыдыр? Мәҝәр О, диҝәр милләтләрин дә Аллаһы дејил? Бәли, диҝәр милләтләрин дә Аллаһыдыр» (Ром. 3:29; Јоел 2:32).
4. Һансы мәнада Аллаһын Исраили арасында әҹнәбиләр јох иди?
4 Јеһованын мәсһ олунмушларын јығынҹағы илә бағладығы јени әһд Онунла хүсуси мүнасибәти олан Исраил халгы илә бағладығы әһди әвәз етди. Буна ҝөрә дә бу јени халг Аллаһын Исраили адланды (Галат. 6:16). Павелин гејд етдији кими, бу халгын арасында «јунан вә ја јәһуди, сүннәтли вә ја сүннәтсиз, әҹнәби, скиф, гул, азад јохдур. Јалныз Мәсиһ вар. О, һәр шејдир вә һамысындадыр» (Колос. 3:11). Бу мәнада һәмин вахт мәсиһчи јығынҹағында әҹнәбиләр јох иди.
5, 6. а) Јешаја 61:5, 6 ајәләринә әсасән һансы суал јараныр? б) Јешајанын һаггында данышдығы «Рәббин каһинләри» вә «әҹнәбиләр» кимләрдир? ҹ) Бу ики груп бирҝә һансы ишлә мәшғул олур?
5 Мәсиһчи јығынҹағы үзәриндә јеринә јетән «Јешаја» китабынын 61-ҹи фәслиндәки пејғәмбәрлик бәзиләриндә чашгынлыг јарада биләр. Чүнки бу фәслин 6-ҹы ајәсиндә «Рәббин каһинләри» олаҹаг кәсләрдән, 5-ҹи ајәсиндә исә каһинләрлә бирҝә әмәкдашлыг едәҹәк әҹнәбиләрдән данышылыр. Бу фикри неҹә баша дүшә биләрик?
6 Биз баша дүшүрүк ки, «Рәббин каһинләри» «биринҹи дирилмәдә» иштирак едән, еләҹә дә «Аллаһын вә Мәсиһин гаршысында каһин кими хидмәт едәҹәк вә мин ил әрзиндә Мәсиһлә бирликдә һакимијјәт сүрәҹәк» мәсһ олунмуш мәсиһчиләрдир (Вәһј 20:6). Бундан әлавә, јерүзү Ҹәннәтдә јашамаг үмидинә малик олан бир чох садиг мәсиһчиләр дә вар. Мәҹази дилдә десәк, онлар ҝөјдә хидмәт едәҹәк мәсһ олунмушларла әмәкдашлыг едән вә сых үнсијјәтдә олан әҹнәбиләрдир. Бу әҹнәбиләр бөјүк мәмнунијјәтлә «Рәббин каһинләри»нә «әкинчилик вә бағбанлыг» едәрәк онлары дәстәкләјирләр. Бәли, онлар Аллаһа иззәт ҝәтирән тәблиғ вә тәлим ишиндә иштирак етмәклә мәсһ олунмушлара көмәк едирләр. Һәм башга гојунлар, һәм дә мәсһ олунмушлар инсанлара һәгигәти өјрәдир вә мәһәббәтлә һәгигәтә ујғун јашамаларына көмәк едирләр (Јәһ. 10:16).
ИБРАҺИМ КИМИ «МҮВӘГГӘТИ САКИНЛӘР»
7. Гәдимдә јашамыш Ибраһим вә диҝәр садиг инсанларла һәгиги мәсиһчиләр арасында һансы охшарлыг вар?
7 Әввәлки мәгаләдән өјрәндик ки, һәгиги мәсиһчиләр Шејтанын идарә етдији дүнјада әҹнәби вә ја мүвәггәти сакиндирләр. Онлар да, гәдимдә јашамыш Ибраһим вә диҝәр садиг инсанлар кими, Шејтан дүнјасынын бир һиссә олмаг истәмир вә јашадыглары әразидә гәриб вә мүвәггәти сакин олдугларыны ҝөстәрирләр (Ибр. 11:13). Јерүзү Ҹәннәтдә вә ја ҝөјдә јашамаг үмидинә малик олмағымыздан асылы олмајараг, Ибраһим кими, бизим дә Аллаһла јахын мүнасибәтләр гурмаг үстүнлүјүмүз вар. Исанын шаҝирди Јагуб гејд едир: «“Ибраһим Јеһоваја иман ҝәтирди вә буна ҝөрә салеһ сајылды” сөзләри јеринә јетди вә она “Јеһованын досту” дејилди» (Јаг. 2:23).
8. Ибраһимә һансы вәд верилмишди вә о, бу вәдин јеринә јетмәсинә неҹә јанашырды?
8 Аллаһ сөз вермишди ки, Ибраһим вә онун нәсли васитәсилә јалныз бир милләт јох, јер үзүндә бүтүн аиләләр хејир-дуа алаҹаг. (Јарадылыш 22:15—18 ајәләрини оху.) Аллаһын вердији вәдин узаг ҝәләҹәкдә јеринә јетәҹәјинә бахмајараг, Ибраһим бу вәдин һәјата кечәҹәјинә әмин иди. О, аиләси илә бирликдә өмрүнүн чох һиссәсини дијарбадијар долашмаға сәрф етди. Бунунла белә, Ибраһим Јеһова илә достлуг мүнасибәтләрини горујуб сахлады.
9, 10. а) Ибраһимин нүмунәсини неҹә тәглид едә биләрик? б) Бу ҝүн биз инсанлары нәјә дәвәт едирик?
9 Бу вәдин јеринә јетмәси үчүн нә гәдәр ҝөзләмәли олаҹағыны билмәсә дә, Ибраһимин Јеһова Аллаһа олан мәһәббәти вә садиглији һеч вахт сарсылмады. О, һеч вахт мүвәггәти сакин олдуғуну унутмур вә мүәјјән бир әразидә даими мәскән салмырды (Ибр. 11:14, 15). Ибраһимин нүмунәсини изләјәрәк садә һәјат сүрүб мал-мүлк саһиби олмағын вә ҹәмијјәтдә ад-сан газанмағын, еләҹә дә карјера гурмағын ваҹиб олмадығыны дүшүнмәк неҹә дә мүдриклик оларды. Ахы бу фани дүнјада «нормал» һәјат сүрмәк вә мүвәггәти шејләрә һәддән артыг бағланмаг нәјимизә ҝәрәк? Ибраһим кими, биз дә даһа јахшы шејләрә ҹан атмалы вә сәбир едәрәк үмидимизин ҝерчәкләшмәсини ҝөзләмәлијик. (Ромалылара 8:25 ајәсини оху.)
10 Јеһова бу ҝүн дә бүтүн халглардан олан инсанлары Ибраһимин нәсли васитәсилә хејир-дуа алмаға дәвәт едир. «Рәббин каһинләри», јәни мәсһ олунмушлар, еләҹә дә башга гојунлардан олан «әҹнәбиләр» бүтүн дүнјада 600-дән чох дилдә инсанлары бу хејир-дуалар барәдә билик әлдә етмәјә дәвәт едир.
СӘРҺӘДЛӘРИ АШЫН
11. Сүлејман бүтүн халглардан олан инсанлар барәдә нәји вурғулады?
11 Бизим ерадан әввәл 1026-ҹы илдә мәбәдин һәср олунмасы мәрасиминдә Јеһованын Ибраһимлә бағладығы әһдә ујғун олараг Сүлејман вурғулады ки, бүтүн халглардан олан инсанлар Јеһоваја һәмд етмәк үчүн мәбәдә ҝәләҹәкләр. О, сәмими-гәлбдән дуа едәрәк деди: «Әҝәр халгын Исраилдән олмајан јаделли дә Сәнин адын наминә узаг өлкәдән ҝәлсә, Сәнин бөјүк адын, гүдрәтли әлин вә узанан голун барәдә ешидиб бу мәбәдә тәрәф дуа етсә, о вахт Сән ҝөјдә — Өз мәскәниндә ешит вә јаделлинин Сәнә фәрјад етдији һәр шеји елә ки, јер үзүнүн бүтүн халглары да Сәнин адыны танысынлар, халгын Исраил кими Сәндән горхсунлар» (1 Пад. 8:41—43).
12. Нәјә ҝөрә бәзи инсанлар Јеһованын Шаһидләрә гәрибә, јәни «әҹнәби» кими бахырлар?
12 Әҹнәби дедикдә башга бир өлкәјә сәјаһәт едән вә ја орада јашајан инсан нәзәрдә тутулур. Јеһованын Шаһидләри дә мәһз белә әҹнәбиләрә бәнзәјирләр. Онлар дүнјанын бир чох өлкәләриндә јашајырлар, амма јалныз Аллаһын сәмави Падшаһлығыны вә онун Падшаһы Иса Мәсиһи дәстәкләјирләр. Мүасир дөврдә Јеһованын Шаһидләринин сијаси мәсәләләрдә битәрәф мөвге тутмалары башгаларына гәрибә ҝәлсә дә, онлар өз мөвгеләриндән әл чәкмирләр.
13. а) Һәр һансы инсана әҹнәби кими јанашмамағы неҹә өјрәнә биләрик? б) Јеһованын әзәли нијјәтинә әсасән, бүтүн инсанлар бир-бирләринә неҹә јанашмалыдырлар? Изаһ един.
13 Чох вахт киминсә әҹнәби олдуғуну онун данышдығы дилдән, риајәт етдији адәт-әнәнәләрдән, физики әламәтләриндән, һәтта һәјат тәрзи вә ја хариҹи ҝөрүнүшүндән таныјырлар. Анҹаг миллијјәтиндән асылы олмајараг, бүтүн инсанлара арасындакы үмуми ҹәһәтләр јухарыда садаланан фәргләндириҹи ҹәһәтләрдән даһа ваҹибдир. Беләликлә, инсанын биздән фәргли олан ҹәһәтләринә диггәт јетирмәмәји өјрәнсәк, гаршымыздакы инсана әҹнәби кими јанашмајаҹағыг. Бүтүн дүнјада бир һакимијјәт вә ја бир өлкә оларса, һеч кимә әҹнәби дејилмәз. Елә Јеһованын да әзәли нијјәти о олуб ки, бүтүн инсанлар бир һакимијјәт алтында — Онун һакимијјәти алтында бир аилә кими бирләшсинләр. Бәс һал-һазырда бүтүн халглардан олан инсанларын бир-бирләринә әҹнәби кими јанашмамалары мүмкүндүрмү?
14, 15. Јеһованын Шаһидләри нәјә наил олублар?
14 Биз егоист вә өз милләтләрини диҝәр милләтләрдән үстүн тутан инсанларын арасында јашајырыг. Анҹаг чох хошдур ки, јер үзүндә һәлә дә бүтүн милләтләри севән инсанлар вар! Бу ҹүр јанлыш дүшүнҹә тәрзинин өһдәсиндән ҝәлмәк чәтин ола биләр. CNN шәбәкәсинин тәмәлини гојан, мүхтәлиф милләтләрдән олан истедадлы инсанларла ишләјән Тед Төрнер дејир: «Бу инсанларла бир јердә ишләмәк әсил зөвг верирди. Башга өлкәләрдән олан инсанлары таныдыгҹа онлара “әҹнәбиләр” кими јох, планетимизин вәтәндашлары кими јанашмағы өјрәндим. “Әҹнәби” сөзү мәним үчүн алчалдыҹы мәна дашымаға башлады вә CNN-дә бу сөзүн һәм ефирдә, һәм дә офисдә ишләнмәсинә гадаға гојдум. Әвәзиндә “бејнәлхалг” сөзүнү истифадә етмәк оларды».
15 Бүтүн дүнјада јалныз Јеһованын Шаһидләри Аллаһын нөгтеји-нәзәрини әкс етдирирләр. Онлар инсанлара, ејнилә Јеһова кими јанашмағы өјрәнибләр вә нәтиҹәдә, башга милләтләрдән олан инсанлар һаггында дүшүнҹә вә һиссләрини дәјишибләр. Онлар диҝәр халглардан олан инсанлара етибар етмәмәк, шүбһәләнмәк вә ја нифрәт етмәк әвәзинә, бу инсанларын мүхтәлиф хүсусијјәтләрини вә габилијјәтләрини ҝөзәл бир шеј кими дәјәрләндирирләр. Һеч онларын буну неҹә етдикләри барәдә дүшүнмүсәнми? Бәс бу, сәнин башгалары илә мүнасибәтинә неҹә тәсир едиб?
ЈЕНИ ДҮНЈАДА ӘҸНӘБИ ОЛМАЈАҸАГ
16, 17. Вәһј 16:16 вә Даниел 2:44 ајәләринин јеринә јетмәси шәхсән сәнин үчүн һансы мәнаны кәсб едир?
16 Тезликлә бүтүн милләтләр Аллаһын һакимијјәтинә гаршы галдырылан «ибраниҹә Һар-Маҝедон адланан» сонунҹу мүһарибәдә иштирак етмәк үчүн Иса Мәсиһлә вә мәләкләрдән ибарәт ордусу илә үз-үзә ҝәләҹәкләр (Вәһј 16:14, 16; 19:11—16). Тәхминән 2500 ил бундан әввәл Даниел пејғәмбәр Аллаһын нијјәтинә гаршы чыхан инсан һакимијјәтләри илә нә баш верәҹәјини пејғәмбәрлик едәрәк јазмышды: «О падшаһларын дөврүндә ҝөјләрин Аллаһы һеч вахт дағылмајан бир падшаһлыг гураҹаг вә бу падшаһлыг башга халгын әлинә кечмәјәҹәк. О бүтүн әввәлки падшаһлыглары әзиб-дағыдаҹаг, өзү исә әбәди галаҹаг» (Дан. 2:44).
17 Бунун шәхсән сәнин үчүн нә демәк олдуғу барәдә бир дүшүн. Бу ҝүн инсанларын сәрһәдләр јаратмасы уҹбатындан һәр биримиз мүәјјән мәнада әҹнәби һесаб олунуруг, лакин бу чох чәкмәјәҹәк. Ҝәләҹәкдә дә инсанлар хариҹи ҝөрүнүшләринә вә ја һәр һансы физики әламәтләринә ҝөрә бир-бириләриндән фәргләнәҹәкләр; бу, садәҹә олараг Јеһованын јаратдыгларында һејрәтамиз мүхтәлифлијин олдуғундан хәбәр верәҹәк. Белә ҝөзәл үмидә ҝөрә биз Јараданымыз Јеһова Аллаһа баҹардығымыз гәдәр һәмд етмәјә вә Ону иззәтләндирмәјә давам едәҹәјик.
18. Бу јахынларда баш верән һансы дәјишиклик ҝөстәрир ки, «әҹнәби» анлајышынын өһдәсиндән ҝәлмәк мүмкүндүр?
18 Бүтүн дүнјада белә бир дәјишиклијин олмасы инанылмаздыр? Хејр, һеч дә елә дејил. Әксинә, бунун баш верәҹәјинә инанмаг мәнтигәујғундур. Инсанларын миллијјәтинә фәрг гојмајан Јеһованын Шаһидләри үчүн «әҹнәби» сөзү артыг индидән өз әһәмијјәтини итириб. Мәсәлән, нәзарәт ишинин асанлашдырылмасы вә Падшаһлыг һаггында хош хәбәрин тәблиғинин даһа еффектив сурәтдә һәјата кечирилмәси үчүн бу јахынларда бир нечә кичик филиал бирләшдирилиб (Мат. 24:14). Тәбии ки, бу ҹүр гәрарлар гәбул олунаркән, ганун чәрчивәсиндән чыхмамаг шәртилә, инсанларын гурдуглары милли сәрһәдләр нәзәрә алынмыр. Диҝәр бир сүбут исә одур ки, Јеһова тәрәфиндән тахта јүксәлдилән Падшаһ Иса Мәсиһ һал-һазырда етник барјери арадан галдырыр вә тезликлә о, «јекун гәләбәсинә доғру» ирәлиләјәҹәк (Вәһј 6:2).
19. Һәгигәтин пак дили сајәсиндә нә мүмкүндүр?
19 Мүхтәлиф халглардан олмаларына вә мүхтәлиф дилләрдә данышмаларына бахмајараг, Јеһованын Шаһидләри һәгигәтин пак дилини горумаға чалышырлар. Јарадылмыш бу бирлик бағыны гопармаг мүмкүн дејил. (Сефанја 3:9 ајәсини оху.) Бу бејнәлхалг аилә индики пис системдә јашамасына бахмајараг, бу дүнјанын бир һиссәси дејил. Бирлик ичиндә јашајан аиләнин артыг мөвҹуд олмасы ҝөстәрир ки, јени дүнјада «әҹнәби» анлајышы олмајаҹаг. Шүбһәсиз, сағ галанларын һәр бири мәгаләнин әввәлиндә «Иргләр» адлы китабдан ҝәтирилән сөзләрин һәгигәт олдуғуну севинҹлә етираф едәҹәкләр!
[28–ҹи сәһифәдәки јазы]
Милләтләр арасында олан сәрһәдләрин вә «әҹнәбиләр» анлајышынын олмајаҹағы бир вахты ҝөзләјирсәнми?
[25–ҹи сәһифәдәки шәкил]
Сән дә, Ибраһим кими, диггәтини Аллаһын вәдләринин јеринә јетмәсинә ҹәмләјирсәнми?
[27–ҹи сәһифәдәки шәкил]
Јеһованын ҝөзүндә һеч кәс әҹнәби дејил