Мүгәддәс Јазылара аид суаллара ҹаваб
Нәјә ҝөрә Аллаһа дуа етмәлијик?
Јеһова Аллаһ истәјир ки, биз даима өз нараһатчылыгларымызы Онунла сәрбәст шәкилдә бөлүшәк (Лука 18:1—7). О, бизимлә марагландығы үчүн дуаларымызы ҹани-дилдән динләјир. Јараданымыз Өзү мәһәббәтлә бизи дуа етмәјә дәвәт едирсә, нәјә ҝөрә Онун дәвәтини гәбул етмәјәк? (Филипилиләрә 4:6 ајәсини охујун.)
Дуа садәҹә көмәк диләмәк үчүн дејил. Бу, бизә Аллаһа јахынлашмаға көмәк едән бир әнамдыр (Мәзмур 8:3, 4). Һәмишә дуада Аллаһла һиссләримизи бөлүшәндә Онунла достлуг мүнасибәтимиз мөһкәмләнир. (Јагуб 4:8 ајәсини охујун.)
Дуа неҹә едилмәлидир?
Аллаһ истәмир ки, дуа заманы биз тәмтәраглы сөзләрдән истифадә едәк, ја да ки дуалары әзбәр сөјләјәк. О, биздән хүсуси дуруш тәрзи дә тәләб етмир. Јеһова Аллаһ истәјир ки, биз үрәјимиздәкиләри Онунла бөлүшәк (Матта 6:7). Мәсәлән, гәдим дөврләрдә Исраилдә јашајан Ханна адлы бир гадын үзүҹү аилә проблеми барәдә дуа едирди. Сонрадан онун кәдәри севинҹә чевриләндә сидги-үрәкдән дуада Аллаһа миннәтдарлығыны билдирди. (1 Шамуел 1:10, 12, 13, 26, 27; 2:1 ајәләрини охујун.)
Биз неҹә дә бөјүк шәрәфә лајиг ҝөрүлмүшүк! Өз нараһатчылыгларымызы Јараданымызла бөлүшә биләрик. Үстәлик, Она һәмд едә вә бизим үчүн етдикләринә ҝөрә миннәтдарлығымызы ифадә едә биләрик. Шүбһәсиз, белә шәрәфә хор бахмамалыјыг. (Мәзмур 145:14—16 ајәләрини охујун.)