Мән зәиф оланда Аллаһын ҝүҹү өзүнү бүтүнлүклә ҝөстәрир

ФИНЛАНДИЈАДА КЕЧӘН УШАГЛЫГ ИЛЛӘРИМ

Мән 1955-ҹи илдә дүнјаја ҝәлмишәм. Аиләнин үч оғлунун ән кичијијәм. Ушаглыг илләрим Финландијанын ҹәнуб саһилинә јахын бир әразидә кечиб. Һәмин әрази бу ҝүн Вантаа шәһәри кими таныныр.

Мән дүнјаја ҝәлмәздән бир нечә ил өнҹә анам Јеһованын Шаһиди кими вәфтиз олунмушду. Амма атам һәгигәтә гаршы иди. О, анамы бизә дәрс кечмәјә, бизи јығынҹаға апармаға гојмурду. Буна ҝөрә дә анам бизә Мүгәддәс Китабдакы әсас тәлимләри атам јанымызда олмајанда өјрәдирди.

Ушаг јашларымдан Јеһоваја садиг галмаға чалышмышам. Мәсәлән, бир дәфә 7 јашымда мүәллимәмә дејәндә ки, мән верилаттуја (финләрин ганлы көкәси) јемәјәҹәјәм, о өзүндән чыхды. О, ағзымы ачмаг үчүн бир әли илә јанагларымдан сыхды, диҝәр әли илә исә көкәни чәнҝәллә ағзыма сохмаға чалышырды. Мән чәнҝәли мүәллимәмин әлиндән јерә сала билдим.

12 јашымда атамы итирдим. Бундан сонра артыг јығынҹаглара ҝедә билирдим. Јығынҹагдакы гардашлар мәнә диггәт ҝөстәрирдиләр. Бу да мәни руһани ҹәһәтдән инкишаф етмәјә һәвәсләндирди. Мүгәддәс Китабы һәр ҝүн охумаға, нәшрләримизи диггәтлә арашдырмаға башладым. Јахшы мүталиә вәрдишимин сајәсиндә 1969-ҹу ил августун 8-дә, 14 јашымда вәфтиз олундум.

Мәктәби битирәндән сонра өнҹүл хидмәтинә башладым. Бир нечә һәфтә ичәрисиндә мән тәблиғчиләрә тәләбат олан әразијә, Финландијанын мәркәзинә јахын олан Пиелавесијә көчдүм.

Мән әзиз һәјат јолдашым Сирка илә Пиелавесидә таныш олдум. Онун садәлији, руһанилији ағлымы башымдан алды. Сирка ад-сан, маддијјат далынҹа гачмырды. Икимиз дә Јеһованын јолунда даһа чох иш ҝөрмәк истәјирдик. Истәнилән тәјинаты гәбул етмәјә һазыр идик. Биз 1974-ҹү ил 23 март тарихиндә аилә гурдуг. Бал ајына ҝетмәк әвәзинә, биз Карттулаја хидмәт етмәјә ҝетдик. Орада тәблиғчиләрә Пиелавесидән дә чох тәләбат вар иди.

ЈЕҺОВА ГАЈҒЫМЫЗА ГАЛДЫ

Јеһова евлилијимизин та әввәлиндән бизә ҝөстәрди ки, Падшаһлығы һәр шејдән үстүн тутсаг, бизим мадди тәләбатларымызы өдәјәҹәк (Мәт. 6:33). Мәсәлән, Карттулада јашајанда бизим машынымыз јох иди, һәр јерә велосипедлә ҝедирдик. Амма оранын гышы чох сәрт кечир. Јығынҹағын әразиси бөјүк олдуғуна ҝөрә бизә машын лазым иди. Ону алмаға да пулумуз јох иди.

Елә һәмин әрәфәләрдә ортанҹыл гардашым ҝөзләнилмәдән бизә гонаг ҝәлди. Сағ олсун, бизә өз машыныны верди. Машынын сығортасы да өдәнилмишди, бизә бирҹә бензин төкмәк галырды. Артыг машынымыз да вар иди.

Јеһова ҝөстәрди ки, мадди тәләбатларымызы өдәмәји Өз өһдәсинә ҝөтүрүб. Бизим ишимиз исә Падшаһлығы һәр шејдән үстүн тутмагдыр.

ҜИЛАД МӘКТӘБИ

1978-ҹи илдә Өнҹүл Мәктәбини кечәндә мүәллимләримиздән бири олан Рајмо Куокканенa бизи Ҝилад мәктәбинә әризә долдурмаға тәшвиг етди. Биз дә һәмин мәктәби кечмәк үчүн инҝилис дилини өјрәнмәјә башладыг. Амма 1980-ҹи илдә, әризә долдурмамышдан әввәл Финландијадакы Бејтелдә хидмәт етмәјә дәвәт олундуг. Һәмин вахт бејтеллиләр Ҝилад мәктәбини кечә билмәзди. Амма биз өз истәдијимиз јердә јох, Јеһованын мәсләһәт билдији јердә хидмәт етмәк истәјирдик. Буна ҝөрә дә дәвәти гәбул етдик. Бунунла белә, инҝилис дилини өјрәнмәји дајандырмадыг. Дедик, ким билир, бәлкә, нә вахтса Ҝиладда охумаг имканымыз олду.

Бир нечә ил сонра Рәһбәрлик Шурасы бејтеллиләрин дә Ҝиладда охумасына иҹазә верди. Биз дәрһал әризә долдурдуг. Она ҝөрә јох ки, Бејтелдә хидмәт етмәк истәмирдик, әксинә, ҝөстәрмәк истәјирдик ки, әҝәр тәләбләрә ҹаваб веририксә, тәләбат олан әразидә хидмәт етмәјә һазырыг. Беләҹә, биз Ҝилада дәвәт алдыг вә 1985-ҹи илин сентјабр ајында 79-ҹу синифдән мәзун олдуг. Тәјинатымыз Колумбија иди.

ХҮСУСИ ТӘЈИНАТЛЫ МҮЖДӘЧИ КИМИ ИЛК ТӘЈИНАТЫМЫЗ

Колумбијада илк олараг филиалда хидмәт етмәјә тәјин олундуг. Тәјинатымы јеринә јетирмәк үчүн әлимдән ҝәләни едирдим. Амма бир ил сонра ҝөрдүм ки, дәјишиклијә еһтијаҹымыз вар. Һәјатымда илк вә сонунҹу дәфә иди ки, гардашлардан тәјинатымызы дәјишмәләрини хаһиш етдим. Онлар бизи хүсуси тәјинатлы мүждәчи кими Уила реҝионунун Нејва шәһәринә тәјин етдиләр.

Тәблиғ етмәји һәмишә севмишәм. Субај вахты Финландијада өнҹүл кими хидмәт едәндә сәһәрин ҝөзү ачыландан та ахшама гәдәр тәблиғ едирдим. Сирка илә аилә гурандан сонра да бүтүн ҝүнү тәблиғдә олурдуг. Уҹгар әразиләрә тәблиғә ҝедәндә бәзән машында јатырдыг. Бунун сајәсиндә јола вахт сәрф етмирдик вә нөвбәти ҝүн сүбһ тездән хидмәтә башлајырдыг.

Хүсуси тәјинатлы мүждәчи оланда биз әввәлләр хидмәтдә дујдуғумуз севинҹи јенидән дујдуг. Јаваш-јаваш јығынҹағымыз бөјүдү. Колумбијадакы баҹы-гардашлар чох һөрмәтҹил, мәһәббәтли, миннәтдар инсанлар иди.

ДУАНЫН ҜҮҸҮ

Нејваја јахын олан бәзи шәһәрләрдә бир нәфәр дә олсун Јеһованын Шаһиди јох иди. Үсјанчы дәстәләрин апардығы мүһарибәјә ҝөрә јерли олмајан инсанлар үчүн оралар тәһлүкәли иди. Һәмин әразиләрә хош хәбәрин неҹә чатаҹағы мәни бәрк нараһат едирди. Она ҝөрә дә Јеһоваја дуа едирдим ки, һәмин шәһәрләрдә кимсә Јеһованын Шаһиди олсун. Фикирләширдим ки, һәгигәти өјрәнә билмәси үчүн һәмин кәс ҝәрәк Нејвада јашасын. Һәм дә дуа едирдим ки, вәфтиз олунандан сонра о, јеткин мәсиһи олсун вә өз јурдуна гајыдыб орада тәблиғ етсин. Амма Јеһованын даһа јахшы һәлл јолу вар имиш.

Бундан чох кечмәмиш, Фернандо Гонсалес адлы ҹаван бир оғлана Мүгәддәс Китаб дәрси кечмәјә башладым. О, Јеһованын Шаһидләри олмајан шәһәрләрдән бириндә, Алхесирасда јашајырды. Фернандо һәр һәфтә 50 километрдән чох јол гәт едиб Нејваја ишә ҝәлирди. О, һәр дәрсә чох јахшы һазырлашырды вә дәрһал бүтүн јығынҹаг ҝөрүшләринә ҝәлмәјә башлады. Дәрсимизин елә биринҹи һәфтәсиндән Фернандо јашадығы шәһәрдә инсанлары башына јығыб онлара Мүгәддәс Китабдан өјрәндикләрини данышырды.

Фернандо Мүгәддәс Китабы арашдырандан 6 ај сонра, 1990-ҹы илин јанвар ајында вәфтиз олунду. Даһа сонра исә өнҹүл хидмәтинә башлады. Алхесирасда артыг бир јерли Јеһованын Шаһиди олдуғу үчүн филиал һәмин әразијә хүсуси өнҹүл ҝөндәрмәкдә тәһлүкә ҝөрмүрдү. 1992-ҹи илин феврал ајында һәмин шәһәрдә јығынҹаг јаранды.

Фернандо тәкҹә јашадығы шәһәрдә тәблиғ етмирди. О, аилә гурандан сонра јолдашы илә бирликдә Сан-Висенте-дел-Кагуан шәһәринә көчдү. Бу шәһәрдә дә Јеһованын Шаһиди јох иди. Онлар бурада јығынҹағын јаранмасына көмәк етдиләр. 2002-ҹи илдә Фернандо рајон нәзарәтчиси тәјин олунду вә бу ҝүнәдәк јолдашы Олга илә бирликдә сәјјар хидмәтдәдирләр.

Бу һадисәдән өјрәндим ки, Јеһоваја теократик тәјинатымыза аид конкрет мәсәләләрлә бағлы дуа етмәк чох ваҹибдир. Бизим едә билмәдијимизи Јеһова едир. Ахы бичин саһиби биз дејилик, Јеһовадыр (Мәт. 9:38).

ЈЕҺОВА БИЗӘ ҺӘМ АРЗУ ВЕРИР, ҺӘМ ДӘ ҜҮҸ

1990-ҹы илдә биз сәјјар хидмәтә тәјин олундуг. Илк рајонумуз пајтахт шәһәр Богота иди. Горхурдуг ки, бу тәјинаты јахшы иҹра едә билмәрик. Чүнки јолдашым вә мән ади инсанлар идик, хүсуси баҹарығымыз јох иди. Үстәлик, биз инсанларын гајнашдығы бир әразидә јашамаға өјрәшмәмишдик. Бунунла белә, Јеһова Филиппилиләрә 2:13 ајәсиндәки сөзүнүн үстүндә дурду: «Аллаһ сизи гүввәтләндирир. О, гәлбиниздә һәм арзу ојадыр, һәм дә фәалијјәт ҝөстәрмәјиниз үчүн сизә ҝүҹ верир, чүнки бу Она хошдур».

Даһа сонра јухарыда гејд етдијим Меделјин шәһәриндәки рајона тәјин олундуг. Орада инсанларын ҝөзләри күчәдәки зоракылыға о гәдәр алышмышды ки, онлара ади ҝәлирди. Мәсәлән, бир дәфә шаҝирдимин евиндә она дәрс кечән вахт чөлдән атышма сәси ҝәлди. Мән дәрһал јерә узандым, амма шаҝирдим һеч нә олмамыш кими абзасы охумаға давам етди. Гуртаранда исә үзр истәјиб чөлә чыхды. Чох кечмәмиш ики балаҹа ушағы илә ҝери гајыдыб сакитҹә деди: «Бағышлајын, ушагларымы ичәри салмалы идим».

Тәһлүкә илә үз-үзә олдуғумуз башга вәзијјәтләр дә олмушду. Бир дәфә ев-ев тәблиғ едәндә јолдашым гача-гача мәнә тәрәф ҝәлди, рәнҝи-руһу гачмышды. Сирка деди ки, кимсә она атәш ачыб. Бу мәни бәрк горхутду. Амма сонра өјрәндик ки, һәмин әлисилаһлы адам Сирканы јох, онун јанындан кечән бир кишини нишан алыбмыш.

Тәдриҹән күчә зоракылығына биз дә алышдыг. Бурада јашајан Јеһованын Шаһидләринин бундан да бетәр вәзијјәтләрдә мөһкәм галмасы бизи үрәкләндирмишди. Белә бир гәнаәтә ҝәлдик ки, Јеһова онлара көмәк етдији кими бизә дә көмәк едәҹәк. Һәм дә биз ағсаггалларын мәсләһәтинә гулаг асырдыг, еһтијат тәдбирләри ҝөрүрдүк, галаныны исә Јеһованын өһдәсинә бурахмышдыг.

Әлбәттә, бәзи вәзијјәтләр дүшүндүјүмүз гәдәр тәһлүкәли олмурду. Бир дәфә тәблиғ етдијим бир евдә оларкән чөлдән ики гадынын бир-бири илә далашдығыны ешитдим. Онларын мүбаһисәси мәнә мараглы дејилди. Амма ев јијәси мәни дилә тутду ки, чөлә чыхаг бахаг. Сән демә, бу, гоншулары јамсылајан ики тутугушунун мүбаһисәси имиш.

ЈЕНИ ТӘЈИНАТЛАР ВӘ ЈЕНИ ЧӘТИНЛИКЛӘР

1997-ҹи илдә мән Хидмәти Тәкмилләшдирмә Мәктәбинәb мүәллим кими тәјин олундум. Теократик мәктәбләрдә тәлим алмағы һәмишә ваҹиб һесаб етмишәм. Амма јатсам јухума да ҝирмәзди ки, нә вахтса өзүм бу мәктәбләрин бириндә тәлим верәрәм.

Сонралар мән вилајәт нәзарәтчиси кими хидмәт етдим. Бу хидмәт нөвү дајандырыландан сонра јенидән рајон хидмәтинә гајытдым. Беләликлә, 30 илдән чохдур ки, мән мәктәб мүәллими вә сәјјар нәзарәтчи кими хидмәт едирәм. Бу тәјинатлар мәнә бол-бол немәтләр ҝәтириб. Амма һәјатымда һеч дә һәр шеј јағ кими ҝетмәјиб. Ҝәлин дејим нијә.

Мән ҝүҹлү характерли бир инсанам. Елә чәтинликләримин чохуна бунун сајәсиндә таб ҝәтирә билмишәм. Амма јығынҹагда һансыса мәсәләләри дүзәлтмәјә чалышанда һәрдән лазымындан артыг сәј ҝөстәрмишәм. Бир дәфә бир нечә нәфәрә ҹанфәшанлыгла изаһ едирдим ки, башгаларына гаршы мәһәббәтли, анлајышлы олсунлар. Лакин ән ҝүлмәлиси одур ки, һәмин вахт бу кејфијјәтләр елә мәним өзүмдә чатышмырды (Ром. 7:21—23).

Һәрдән чатышмајан ҹәһәтләримә ҝөрә чох руһдан дүшүрдүм (Ром. 7:24). Һәтта бир дәфә Јеһоваја дуа едиб дедим ки, јахшысы будур, тәјинатымы дајандырыб Финландијаја гајыдым. Һәмин ахшам јығынҹаға ҝетдим. Орада ешитдикләрим мәни әмин етди ки, тәјинатымы давам етдирмәлијәм вә зәиф ҹәһәтләримин үзәриндә ишләмәлијәм. Јеһованын дуама неҹә ајдын ҹаваб вердији һагда дүшүнәндә ҝүнү бу ҝүн дә түкләрим биз-биз олур. Үстәлик, миннәтдарам ки, Јеһова мәнә зәифликләримин өһдәсиндән ҝәлмәјә көмәк едир.

ҜӘЛӘҸӘЈӘ ӘМИНЛИКЛӘ БАХЫРАМ

Сирка илә өмрүмүзүн чоху тамвахтлы хидмәтдә кечиб. Белә бир шәрәфә ҝөрә Јеһованын гаршысында өзүмүзү борҹлу һисс едирик. Һәм дә Јеһоваја миннәтдарам ки, бу илләр әрзиндә јанымда бу ҹүр сәдагәтли, мәһәббәтли јарым олуб.

Јахын заманларда 70 јашым олаҹаг. Мән мәктәб мүәллими вә сәјјар нәзарәтчиси кими хидмәтими дајандырмалы олаҹағам. Амма бу мәни һеч дә кәдәрләндирмир. Билирсиниз нијә? Ахы мән адым кими әминәм ки, Јеһованы ән чох шәрәфләндирән бизим Она тәвазөкарлыгла хидмәт етмәјимиздир. Шүкранла, севҝи илә ашыб-дашан үрәклә Онун адыны уҹалтмағымыздыр (Мик. 6:8; Марк 12:32—34). Јеһованы шәрәфләндирмәк үчүн һансыса хүсуси тәјинатда олмаг шәрт дејил.

Архаја бојланыб алдығым тәјинатлара баханда баша дүшүрәм ки, Јеһова мәнә бу тәјинатлары башгаларындан үстүн олдуғума ҝөрә вә ја һансыса хүсуси габилијјәтим олдуғуна ҝөрә вермәјиб. Гәтијјән! Әксинә, алдығым бу тәјинатлар Јеһованын мәнә олан лүтфүдүр. Зәиф ҹәһәтләрим ола-ола О мәнә бу шәрәфли ишләри һәвалә етди. Јеһованын көмәји олмасајды, бу тәјинатларымын өһдәсиндән әсла ҝәлә билмәздим. Бәли, мән зәиф оланда Јеһованын ҝүҹү өзүнү бүтүнлүкдә ҝөстәрир! (2 Кор. 12:9).