Faciə baş verəndə

İKİ YAŞ yarımlıq Ouen evdə hamam otağında oynayırdı. Necə oldusa, valideynlərinin uşaq üçün əlçatmaz sandıqları dərman qutusu onun əlinə keçdi. Dərmanların arasında onun diqqətini bir şüşə cəlb etdi. Uşaq şüşənin qapağını açıb, içindəkini içdi. Faciə baş verdi.

Şüşənin içindəki yeyici turşu idi və təəssüf olsun ki, balaca Ouen öldü. Onun valideynləri qəm-qüssə içində idilər. Uşağın atası Persi mənsub olduğu kilsədə təsəlli tapmağa çalışdı. «Bu nə üçün baş verdi?» deyə soruşdu. Keşiş «Allah göydə daha bir mələkciyin olmasını istədi» sözləri ilə cavab verdi. Kədərdən üzülmüş ata bu fikirlə razılaşa bilmirdi. Doğrudanmı Allah bu cür faciənin baş verməsini istəyirdi? Persi öz dininə olan bütün ümidini itirdi və qərara gəldi ki, bir daha kilsəyə getməyəcək.

Hər dəfə baş verən hadisə barəsində düşünəndə, Persi özündən soruşurdu: «Görəsən oğlum hələ də iztirab çəkirmi? Onu bir daha görəcəyəmmi?»

Ehtimal ki, siz də «İnsan öləndə nə baş verir? Ölən əzizlərimizi yenidən görmək mümkündürmü?» deyə soruşmusunuz. Allahın Kəlamı olan Müqəddəs Kitab bu suallara aydınlıq gətirir. Buna bənzər faciələrlə üzləşən insanların hamısı bu kitabdan təsəlli sözləri tapacaqlar. Daha vacibi isə odur ki, bu kitabda Allahın gözəl və’di — ölülərin dirilməsi haqqında danışılır.

Əlinizdəki jurnalın 18-32-ci səhifələrindəki məqalələri oxumaqla, bu gözəl ümid haqqında daha çox öyrənəcəksiniz.