Qane olun

NƏYƏ GÖRƏ VACİBDİR?

Psixoloq Cesika Köhler müşahidə edib ki, qane olmağı bacaran insanlar müsbət əhval-ruhiyyədə olurlar. O həmçinin diqqət yetirib ki, onlar başqalarına paxıllıq etmirlər. Buna görə də təəccüblü deyil ki, qane olmağı bacaran insanlar adətən daha xoşbəxt olurlar və daha az stres keçirirlər. Əslində, ən xoşbəxt insanların bəziləri elə də imkanlı deyillər. Bu, xüsusilə də pul ilə satın alınmayan şeylərə dəyər verən insanlara aiddir. Onlar üçün ən vacib şeylərdən biri ailələri və dostları ilə vaxt keçirməkdən duyduqları məmnunluqdur.

NƏ EDƏ BİLƏRSİNİZ?

Özünüzü başqaları ilə müqayisə etməyin. Öz sadə həyatınızı bahalı həyat yaşayan biri ilə müqayisə etsəniz, narazı, paxıl insan ola bilərsiniz. Üstəlik, hər şey göründüyü kimi olmaya bilər. Bəzi insanlar bahalı əşyalara sahib olduğu üçün imkanlı görünsələr də, əslində borc içində üzə bilərlər. Seneqalda yaşayan Nikol deyir: «Xoşbəxt olmaq üçün mənə çox şey lazım deyil. Qane olmağı bacarsam, başqaları məndən daha çox şeyə sahib olsa da, xoşbəxt ola bilərəm».

Məsləhət. İnsanların zənginliyini, yaxud prestijli həyatını nümayiş etdirən reklamlara və ya sosial şəbəkələrdəki paylaşımlara baxmayın.

Şükür edən olun. Adətən şükür edən insanlar qane olmağı bacarırlar və sahib olduqlarından daha artığına ehtiyac duyduqlarını və ya layiq olduqlarını düşünmürlər. Haitidən olan Roberton deyir: «Mən vaxt ayırıb özümə və ailəmə göstərilən xeyirxah əməllər üzərində düşünürəm. Sonra etdikləri yaxşılıqlara görə həmin insanlara minnətdarlığımı bildirirəm. Həmçinin səkkiz yaşlı oğluma ona verilən hər şeyə görə “çox sağ ol” deməyi öyrədirəm».

Məsləhət. Hər gün nələrə görə minnətdar olduğunuzu qeyd edin. Bura yaxşı sağlamlıq, mehriban ailə, əsl dostlar, hətta gözəl gün batımı da aid ola bilər.

Hərdən hamımız üçün əlimizdə olana qane olmaq heç də asan olmur. Amma buna cəhd etməyə dəyər! Qane olmağı seçiriksə, deməli, xoşbəxt olmağı da seçirik. Xoşbəxtliyi isə pul ilə satın almaq mümkün deyil.