«Gözətçi Qülləsi»nin yeni təlim nəşri
SƏNİN oxuduğun bu jurnal «Gözətçi Qülləsi»nin təlim nəşrinin ilk buraxılışıdır. Biz səni bu jurnalın yeni tərtibatının bəzi yönləri ilə tanış etmək istəyirik.
Təlim nəşri Yehovanın Şahidləri və Müqəddəs Kitab öyrənməsində irəliləyiş edən insanlar üçün nəzərdə tutulub. Bu jurnal ayda bir dəfə çıxacaq və orada dörd və ya beş öyrənmə məqaləsi olacaq. Həmin məqalələrin qrafiki jurnalın üz qabığında çap olunacaq. «Gözətçi Qülləsi»nin kütləvi nəşrindən fərqli olaraq, təlim nəşri təbliğdə istifadə olunmayacağı üçün üz qabığının görünüşü saydan-saya dəyişməyəcək.
Jurnalın 2-ci səhifəsində hər öyrəniləcək məqalənin məqsədi haqda qısa xülasə veriləcək və saya daxil olacaq digər məqalələrin mündəricatı yerləşəcək. Bu yenilik «Gözətçi Qülləsi»ni aparan qardaşlara yığıncaq görüşündə məqalələrin daha səmərəli müzakirəsinə hazırlaşmaqda çox kömək edəcək.
Sən görəcəksən ki, öyrənmə məqalələri əvvəllər olduğundan bir az qısadır. Buna görə də, onların araşdırılması zamanı əsas ayələrin müzakirəsinə çox vaxt qalacaq. Biz səni səmimi-qəlbdən hər məqalədə gətirilən bütün ayələri nəzərdən keçirməyə təşviq edirik. Bəzi ayələrin yanında «oxu» yazılacaq və bu ayələr öyrənmə məqalələrinin araşdırılması zamanı oxunub müzakirə edilməlidir. Vaxt yol verərsə, gətirilən digər ayələri də oxumaq olar. Bəzi məqalələrdə ayələrin yanında «müqayisə et» yazılacaq. Bu ayələr abzasın əsas fikirləri ilə birbaşa bağlı olmadığı üçün adətən görüş zamanı oxunmayacaq. Buna baxmayaraq, həmin ayələrdə əlavə maraqlı məlumat, yaxud da müzakirə olunan fikirlərə əlavə izahat ola bilər. Biz səni, «Gözətçi Qülləsi»nin öyrənilməsinə hazırlaşarkən həmin ayələri oxumağa təşviq edirik. Sən belə ayələri də öz şərhlərinə daxil edə bilərsən.
2008-ci ildən etibarən illik hesabat artıq «Gözətçi Qülləsi»ndə deyil, «İllik məcmuə»də olduğu kimi, «Bizim Padşahlıq Xidmətimiz»də də çap olunacaq. Yuxarıda qeyd edildiyi kimi, təlim nəşrinə başqa məqalələr də daxil olacaq. Onların çoxu yığıncaq görüşlərində müzakirə olunmasa da, biz səni həmin məqalələri diqqətlə oxumağa təşviq edirik. Onlar da «sadiq və ağıllı qul»un təqdim etdiyi ruhani qidadır (Mat. 24:45-47).
Beləliklə, «Gözətçi Qülləsi»nin təlim və kütləvi nəşri fərqli jurnallar deyil. Bu jurnalların hər ikisi də «Gözətçi Qülləsi Yehovanın Padşahlığını elan edir» adlanır. Hər iki nəşrin 2-ci səhifəsində «Gözətçi Qülləsi»nin məqsədi izah edilir. Jurnalın hər ikisi cildlənmiş nüsxəyə daxil ediləcək. Hər iki jurnalın əsasında tərtib olunan «Yadınızdadırmı?» rubrikası təlim nəşrində çap ediləcək.
Dünyada baş verən müharibələrə, iqtisadi çətinliklərə və təqiblərə baxmayaraq, «Gözətçi Qülləsi» 1879-cu ildən bəri Allahın Padşahlığı haqqında həqiqətləri sədaqətlə bəyan edir. Biz dua edirik ki, Yehovanın xeyir-duası ilə jurnal yeni tərtibatında da bunu etməyə davam etsin. Dua edirik ki, «Gözətçi Qülləsi»nin bir oxucusu kimi, yeni təlim nəşrindən faydalanmağına Yehova xeyir-dua versin.