Müqəddəs ruhun verdiyi güclə şirnikdirici təsirlərə və ruh düşkünlüyünə sinə gəririk
«Müqəddəs ruh üzərinizə gələndə siz qüvvət alacaqsınız» (HƏV. İŞ. 1:8).
1, 2. İsa öz davamçılarına hansı qüvvəni verəcəyini vəd etmişdi və nəyə görə onlar bu qüvvəyə ehtiyac duyurdular?
İSA bilirdi ki, onun bütün göstərişlərinə riayət etmək üçün davamçılarının öz gücləri kifayət etməyəcək. Təbliğ etmək tapşırığının nə qədər böyük, düşmənlərin nə qədər qüdrətli və insan bədəninin nə qədər zəif olduğunu nəzərə alsaq, tamamilə aydın idi ki, onlara insan qüvvəsindən üstün olan qüvvə lazım olacaqdı. Göyə qalxmazdan öncə İsa şagirdlərini əmin etdi: «Müqəddəs ruh üzərinizə gələndə siz qüvvət alacaqsınız və Yerusəlimdə, bütün Yəhudeya və Samariyada, hətta yerin ucqarlarınadək mənim şahidim olacaqsınız» (Həv. iş. 1:8).
2 Bu vəd eramızın 33-cü ilinin Əllinci gün bayramında — müqəddəs ruh İsa Məsihin davamçılarına bütün Yerusəlimdə təbliğ etmək qüvvətini verəndə yerinə yetməyə başladı. Bu işin qarşısını heç kim və heç nə ala bilmədi! (Həv. iş. 4:20). Biz də daxil olmaqla, İsanın sadiq davamçılarının həmişə, düz «dövrün yekununa kimi» Allahın verdiyi bu qüvvəyə son dərəcədə ehtiyacı olacaqdı (Mat. 28:20).
3. a) Müqəddəs ruhla qüvvət arasında hansı fərq var? İzah edin. b) Yehovanın verdiyi qüvvət bizə necə kömək edir?
3 İsa şagirdlərinə vəd etmişdi ki, ‘müqəddəs ruh üzərlərinə gələndə onlar qüvvət alacaqlar’. «Ruh» və «qüvvət» fərqli anlayışlardır. Allahın ruhu, yəni fəal qüvvəsi Onun iradəsinin həyata keçirilməsi üçün insanlara və əşyalara yönəldilən və onlara təsir göstərən enerjidir. Qüvvət isə «bir işi görə bilmək qabiliyyəti və ya nəticə əldə etmək bacarığı»dır. Qüvvət müəyyən nəticənin əldə olunmasına ehtiyac yaranana qədər kimdəsə və ya nədəsə fəaliyyətsiz qala bilər. Buna görə də müqəddəs ruhu akkumulyatoru yükləyən elektrik cərəyanla, qüvvəti isə yüklənmiş akkumulyatorda hərəkətsiz şəkildə olan enerji ilə müqayisə etmək olar. Müqəddəs ruh vasitəsilə Yehovanın Öz xidmətçilərinə verdiyi qüvvət hər birimizə həsr olunmağımıza uyğun yaşamağa, eləcə də üzləşdiyimiz pis təsirlərlə mübarizə aparmağa kömək edir. (Mikeya 3:8; Koloslulara 1:29 ayələrini oxu.)
4. Bu məqalədə nə müzakirə olunacaq və nəyə görə?
4 Müqəddəs ruh vasitəsilə Yehovanın bizə verdiyi qüvvət özünü necə büruzə verir? Bu qüvvət müxtəlif vəziyyətlərdə davranışımızı və hərəkətlərimizi necə müəyyən edir? Allaha sədaqətlə xidmət etmək istədiyimiz üçün biz bir çox maneələrlə üzləşirik: bu ya Şeytan və onun pis sistemi, ya da ki qeyri-kamilliyimiz ucbatından yaranan çətinliklər ola bilər. Bundan sonra da məsihçi kimi fəaliyyət göstərmək, xidmətdə müntəzəm olmaq və Yehova ilə sıx münasibətləri qorumaq üçün bu cür maneələrin öhdəsindən gəlmək vacibdir. Gəlin müqəddəs ruhun şirnikdirici təkliflərə «yox» deməyə, yorğunluq və ruh düşkünlüyünün öhdəsindən gəlməyə bizə necə kömək etdiyini nəzərdən keçirək.
Şirnikdirici təkliflər
5. Dua bizə necə güc verə bilər?
5 İsa şagirdlərini: «Qoyma sınaqlar qarşısında yıxılaq, amma bizi Şərirdən xilas et», — deyə dua etməyə öyrətmişdi (Mat. 6:13). Yehova sadiq xidmətçilərinin bu kimi xahişlərini heç vaxt yerə salmır. Başqa vaxt isə İsa demişdi: ‘Göydəki Ata ondan istəyənlərə müqəddəs ruhundan verəcək’ (Luka 11:13). Necə də ruhlandırıcıdır ki, Yehova salehlik yolunda qalmağımıza kömək etmək üçün öz müqəddəs ruhunu bizdən əsirgəməyəcəyini vəd edir! Lakin bu, o demək deyil ki, Allah bizi bütün sınaqlardan hifz edəcək (1 Kor. 10:13). Əksinə, sınaqlarla üzləşəndə biz daha təkidlə dua etməliyik (Mat. 26:42).
6. Şeytanın şirnikdirici təkliflərinə İsanın verdiyi cavablar nəyə əsaslanırdı?
6 İblisin şirnikdirici təkliflərinə cavab olaraq İsa Müqəddəs Yazılardan ayələr sitat gətirirdi. O demişdi: «Yazılıb... Həmçinin yazılıb... Rədd ol, Şeytan! Axı yazılıb: “Allahın Yehovaya səcdə qıl və yalnız Ona ibadət et”». Yehovaya və Onun Kəlamına olan məhəbbət İsanı Şeytanın bütün şirnikdirici təkliflərini rədd etməyə təşviq etdi (Mat. 4:1—10). İsa bir neçə dəfə və qətiyyətlə Şeytanın bütün təkliflərinə «yox» deyəndə o, onu tərk etdi.
7. Müqəddəs Kitab bizə İblisin şirnikdirici təkliflərini rədd etməyə necə kömək edir?
7 Əgər İsa İblisin təkliflərini rədd etmək üçün hər dəfə Müqəddəs Yazılara istinad edirdisə, onda bizim belə etməli olduğumuz daha vacib deyilmi? Bəli, İblisin və onun qurduğu fəndlərin qurbanı olmamaq üçün biz, ilk növbədə, Allahın normaları haqqında öyrənməyə və onları həyatımızda tam tətbiq etməyə qəti qərarlı olmalıyıq. Bir çox insanlar Müqəddəs Yazıları öyrənməyə, həmçinin Allahın müdrikliyini və salehliyini dərk edib onu qiymətləndirməyə başlayandan sonra onlarda bu normalara uyğun yaşamaq istəyi yaranıb. Həqiqətən də, «Allahın sözü» insana ‘ürəyinin düşüncə və niyyətlərini’ ayırd etmək bacarığını verir (İbr. 4:12). İnsan nə qədər çox Müqəddəs Yazıları oxuyub üzərində düşünsə, bir o qədər Yehovanın «həqiqətini» ‘dərk edəcək’ (Dan. 9:13). Bu səbəbdən zəif cəhətlərimizlə bağlı olan ayələrin üzərində düşünmək xüsusilə vacibdir.
8. Müqəddəs ruh almaq üçün nə etməliyik?
8 İsa İblisin şirnikdirici təkliflərinin hamısını rədd etməyə müvəffəq oldu, çünki o nəinki Müqəddəs Yazıları bilirdi, həm də ‘müqəddəs ruhla dolu’ idi (Luka 4:1). Bizdə də belə qüvvə və bacarıq olsun deyə Yehovanın bizi müqəddəs ruhla təmin etmək üçün təqdim etdiyi hər şeydən tam yararlanaraq Ona yaxınlaşmalıyıq (Yaq. 4:7, 8). Yəni Müqəddəs Kitabı araşdırmalı, dua etməli və həmimanlılarımızla ünsiyyətdə olmalıyıq. Bir çoxları məsihçi fəaliyyəti ilə tam məşğul olmağın gətirdiyi faydanı öz təcrübələrində görmüşlər. Bəli, bu, onlara bütün diqqətlərini ruhən möhkəmləndirən fikirlərə yönəltməyə kömək edir.
9, 10. a) Yaşadığın ərazində ən çox hansı sınaqlarla üzləşəcəyin yəqindir? b) Düşünmək və dua yorğun olduğun hallarda sınaqlarla mübarizə aparmağa necə güc verir?
9 Şəxsən sən hansı pis arzularla mübarizə aparmalı olmusan? Ürəyində nə vaxtsa həyat yoldaşın olmadığı bir kəslə eşqbazlıq etmək istəyi yaranıbmı? Əgər subaysansa, imanına şərik olmayan insanla görüşmək və ya ailə qurmaq təklifini qəbul etmək arzusu səndə baş qaldırıbmı? Məsihçi televizora baxarkən və ya İnternetdən istifadə edərkən birdən-birə onda ədəbsiz bir şeyə baxmaq istəyi yarana bilər. Sən də bu kimi vəziyyətlərlə üzləşmisənmi? Əgər üzləşmisənsə, onda bu zaman necə davranmısan? Yaxşı olardı ki, bir səhv addımın başqa səhv addıma, nəticədə isə ciddi günaha necə gətirə biləcəyinin üzərində düşünəsən (Yaq. 1:14, 15). Yehovaya bircə dəfə sədaqətsizlik göstərməyin Ona, yığıncağa və ailə üzvlərinə nə qədər ağrı-acı gətirəcəyini bir düşün. Ancaq Allahın prinsiplərinə sadiq qalsan, vicdanın təmiz olacaq. (Məzmur 119:37; Süleymanın məsəlləri 22:3 ayələrini oxu.) Belə sınaqlarla üzləşəndə onlara müqavimət göstərmək üçün Yehovadan güc-qüvvət diləməyə qəti qərarlı ol.
10 İblisin İsaya etdiyi şirnikdirici təklifləri ilə əlaqədar bir şeyi də yadda saxlamalıyıq. İblis İsaya başqa vaxt yox, məhz səhrada 40 gün ac qalandan sonra yaxınlaşdı. Şübhə yoxdur ki, İblis İsanın nöqsansızlığını sınağa çəkmək üçün bunu əla «fürsət» hesab edirdi (Luka 4:13). Şeytan bizim də nöqsansızlığımızı sınamaq üçün əlverişli vaxt axtarır. Buna görə də ruhani cəhətdən həmişə möhkəm olmağımız olduqca vacibdir. Şeytan, adətən, hədəfinin zəif olduğunu gördüyü vaxt ona hücum edir. Buna görə də biz özümüzü yorğun, yaxud ruhdan düşmüş hiss edəndə Yehovadan kömək və müqəddəs ruh diləməyə həmişəkindən daha əzmli olmalıyıq (2 Kor. 12:8—10).
Yorğunluq və ruh düşkünlüyü
11, 12. a) Nəyə görə çoxları bu gün ruh düşkünlüyünə qapılırlar? b) Ruh düşkünlüyünə qapılmamağa bizə nə kömək edəcək?
11 Qeyri-kamil olduğumuz üçün vaxtaşırı ruh düşkünlüyünə qapılırıq. Gərgin zəmanədə yaşamağımız vəziyyətimizi daha da ağırlaşdırır. Həqiqətən də, bu dövr bəşəriyyətin üzləşdiyi ən çətin dövrdür (2 Tim. 3:1—5). Har-Magedon yaxınlaşdıqca iqtisadi, emosional və digər təzyiqlər artır. Buna görə də təəccüblü deyil ki, bəzilərinə ailə üzvlərinin qayğısına qalmaq və onları dolandırmaq günü-gündən çətinləşir. Onlar özlərini yorğun, üzgün, bəzən də tamamilə əldən düşmüş hiss edirlər. Əgər bütün bunlar sənə də tanışdırsa, gərginliklə necə mübarizə apara bilərsən?
12 İsa şagirdlərinə köməkçi, yəni Allahın müqəddəs ruhunu verəcəyinə söz vermişdi. (Yəhya 14:16, 17 ayələrini oxu.) Müqəddəs ruh Kainatda ən qüdrətli qüvvədir. Onun vasitəsilə Yehova bizə ‘düşündüyümüzdən qat-qat artıq’ güc verə bilər (Efes. 3:20). Bu qüvvənin köməyilə, Pavelin təbirincə desək, biz hətta ‘hər tərəfdən sıxışdırılsaq’ belə, ‘insan gücündən üstün olan qüdrət’ alırıq (2 Kor. 4:7, 8). Yehova bizi stressdən azad edəcəyini demir, lakin əmin edir ki, ruhu vasitəsilə bizə onunla mübarizə aparmağa güc verəcək (Filip. 4:13).
13. a) Bir gənc bacımız çətin sınaqla mübarizədə güc-qüvvəni haradan əldə edir? b) Sən də bu kimi nümunələrlə rastlaşmısanmı?
13 Daimi pioner kimi xidmət edən 19 yaşlı Stefaninin nümunəsinə nəzər salaq. Bu bacı 12 yaşında insult keçirmişdi və həkimlər onun beynində şiş aşkar etmişdilər. O vaxtdan bəri Stefani iki dəfə əməliyyat olunub və şüa müalicəsi alıb. Bundan sonra keçirdiyi daha iki insult nəticəsində onun sol tərəfi qismən iflic olub və görmə qabiliyyəti zəifləyib. Stefani gücünü daha vacib hesab etdiyi işlər üçün — məsihçi görüşləri və təbliğ xidməti üçün qorumalı olur. Lakin o, Yehovanın müqəddəs ruh vasitəsilə ona müxtəlif cür kömək etdiyini hiss edir. Stefani özünü halsız hiss edəndə Müqəddəs Kitaba əsaslanan nəşrlərdəki həmimanlılarımızın nümunələri ona güc-qüvvət verir. Bacı və qardaşlar onu tək qoymurlar, həmişə ona dayaq olurlar: ona məktublar göndərir, görüşlərdən əvvəl və sonra onu ruhlandırırlar. Həqiqətlə maraqlanan insanlar isə Stefaninin evinə gəlib öz dərslərini burada keçirlər və bununla ona minnətdarlıqlarını ifadə edirlər. Bütün bunlara görə Stefani Yehovaya ürəkdən minnətdardır. Məzmur 41:3 ayəsi onun sevimli ayəsidir və o inanır ki, bu ayə onun üzərində də yerinə yetir.
14. Biz ruhdan düşəndə nə etməməliyik və nəyə görə?
14 Yorğun olanda və ya daxilimizdə gərginlik hiss edəndə heç vaxt düşünməməliyik ki, bunun öhdəsindən gəlməyin ən yaxşı üsulu bəzi ruhani məşğuliyyətlərimizə son qoymaqdır. Bu, qətiyyən yaxşı qərar olmazdı. Nəyə görə? Çünki şəxsi və ailəvi öyrənmə, təbliğ xidməti və yığıncaq görüşləri kimi işlər vasitəsilə bizə yeni enerji verən müqəddəs ruh alırıq. Məsihçi fəaliyyəti həmişə təravətləndiricidir. (Matta 11:28, 29 ayələrini oxu.) Yəqin, özümüz də fikir vermişik ki, bacı və qardaşlar çox vaxt görüşlərə taqətsiz halda gəlirlər, ancaq evə getmək vaxtı gələndə onlar özlərində yenidən güc-qüvvət hiss edirlər, sanki, onların ruhani akkumulyatoru təzədən yüklənib.
15. a) Yehova məsihçi həyatının asan olacağını vəd edibmi? Cavabınızı Müqəddəs Kitaba əsaslandırın. b) Allah bizə nə vəd edib və bununla əlaqədar hansı sual yaranır?
15 Bu, o demək deyil ki, Məsihin şagirdi olmaq çox asandır. Əslində, sadiq məsihçi olmaq üçün çoxlu səy tələb olunur (Mat. 16:24—26; Luka 13:24). Lakin Yehova müqəddəs ruh vasitəsilə taqətdən düşmüş insana güc verə bilər. Yeşaya peyğəmbər yazır: «Rəbbə ümid bağlayanlarsa yeni qüvvət alar, qanad açıb qartal kimi yüksəklərə uçar, qaçanda taqətdən düşməzlər, yol gedib yorulmazlar» (Yeşaya 40:29—31). Buna görə də özümüzə növbəti sualı verməliyik: «Məni əslində hansı məşğuliyyətlər yorur?»
16. Yorğunluğa və ruh düşkünlüyünə bəzən nə səbəb ola bilər və bunları necə aradan qaldırmaq olar?
16 Yehovanın Kəlamı bizi ‘daha vacib şeyləri ayırd etməyə’ təşviq edir (Filip. 1:10). Məsihçi həyat tərzini uzun məsafəyə qaçışla müqayisə edərək Allahdan ilham alan Pavel nəsihət edir: «Gəlin bizə ağırlıq edən hər şeyi... çıxaraq və dözümlə qaçaraq qarşımızdakı məsafəni qət edək» (İbr. 12:1). Başqa sözlə desək, bizi əldən salan lazımsız məşğuliyyətlərdən qaçmalı və artıq yükdən azad olmalıyıq. Ola bilsin, bizlərdən bəziləri boş vaxtlarının olmamasına baxmayaraq, hələ üstəlik çiyinlərinə əlavə yük də götürməyə çalışırlar. Beləliklə, əgər sən çox vaxt özündə gərginlik və yorğunluq hiss edirsənsə, onda fikirləş, işinə, səyahətlərə, idmana və digər məşğuliyyətlərə nə qədər vaxt və qüvvə sərf edirsən. Müdriklik və təvazökarlıq imkanlarımızın məhdud olduğunu boynumuza almağa və lazımsız məşğuliyyətlərin sayını azaltmağa təşviq etməlidir.
17. Bəzilərinin ruhdan düşməsinə səbəb nədir, lakin Yehova bizi nəyə əmin edir?
17 Ola bilsin, bəzilərimizin ruhdan düşməsinə səbəb bu pis sistemin sonunun fikirləşdiyimiz vaxtda gəlməməsidir (Sül. məs. 13:12). Əgər biz də belə düşünürüksə, qoy Habaqquq 2:3 ayəsindəki sözlər bizi ruhlandırsın: «Bu görüntü müəyyən vaxt üçündür, başa çatmağa tələsir və yalan deyil. Gecikmiş kimi görünsə də, gözləyin, hökmən gələcək, gecikməyəcək». Yehova bizi əmin edir ki, bu sistemin sonu düz Onun təyin etdiyi vaxtda gələcək!
18. a) Hansı vədlər səni möhkəmləndirir? b) Növbəti məqalədə nə müzakirə olunacaq?
18 Yehovanın bütün sadiq xidmətçiləri yorğunluğun və ruh düşkünlüyünün olmayacağı və hamımızın gənc və sağlam olacağı vaxtı böyük səbirsizliklə gözləyirlər (Əyy. 33:25). Lakin hətta bu gün biz təravətləndirici ruhani işlərlə məşğul olduğumuz zaman müqəddəs ruhun köməyi sayəsində daxilimizdə qüvvə hiss edə bilərik (2 Kor. 4:16; Efes. 3:16). Yol vermə ki, yorğunluq səni əbədi xeyir-dualardan məhrum etsin. Bugünkü sınaqlarımız — bizi yoldan çıxarmağa çalışan hər şey, yorğunluq və ruh düşkünlüyü keçib gedəcək. Əgər indi keçməsə də, Allahın yeni dünyasında mütləq keçəcək. Növbəti məqalədə biz müqəddəs ruhun təqiblərin, ətrafımızdakı insanların zərərli təsirinin və bir çox başqa çətinliklərin öhdəsindən gəlməyimiz üçün bizə necə güc verdiyini araşdıracağıq.
Necə cavab verərdiniz?
• Müqəddəs Kitabı oxumağımızın sayəsində biz necə güc əldə edirik?
• Dua və düşünmək bizə necə güc verir?
• Ruh düşkünlüyünün səbəblərini necə aradan qaldırmaq olar?
[24-cü səhifədəki şəkil]
Məsihçi görüşləri bizə ruhani güc verir