“İnsanlar timsalında hədiyyələr” Allahın sürüsünü həvəslə otarırlar
1 Yehova, Oğlunun vasitəsilə “insanlar timsalında hədiyyələr” verməklə, necə də böyük qayğı göstərmişdir! (Efes. 4:8, YD, 11, 12). Onların çoxsaylı vəzifələrindən biri — Allahın sürüsünü çalışqanlıqla və sə’ylə otarmaqdır (1 Pet. 5:2, 3). Bu çox lazımlı işdir və bizim hamımıza fayda gətirir. Ağsaqqallar, çətinliklərlə qarşılaşan və ya zəiflikləri ilə mübarizə aparan, həqiqətdə ilk addımlar atan və ya büdrəyən bütün insanların ruhani rifahına dərin maraq göstərirlər (Filip. 2:4; 1 Salon. 5:12–14).
2 Dünyada baş verən həyəcanlandırıcı hadisələr bizi narahat edəndə, bu çobanlar “yeldən saxlanacaq bir yer kimi və tufana qarşı örtülü bir yer kimi” olurlar. Özümüzü yorğun və ya yüklənmiş hiss edəndə və təsəlliyə ehtiyac duyanda, onlar bizə təravət verirlər. Onlar bizim üçün “quraq yerdə axar sular kimi, yorucu diyarda böyük qaya kölgəsi” kimidirlər (İş. 32:2).
3 Qeyri–fəal olanları ruhlandırırlar. Ağsaqqallar qeyri–müntəzəm və qeyri–fəal olanlara, yığıncağın bütün işlərində yenidən fəal iştirak etməkdə kömək edərək, onları xüsusi tərzdə ruhlandırmağa çalışırlar. Ağsaqqal ziyarətləri sayəsində qeyri–fəal olanların əksəriyyəti yığıncaq görüşlərinə müntəzəm gəlməyə başlayır və ruhən o dərəcədə möhkəmlənirlər ki, yenidən təbliğ etməyə başlayırlar. Ağsaqqalların buna bənzər bütün işlərində Yehovanın zərif qayğısı və İsa Məsihin fəal rəhbərliyi əks olunur. İsanın özü, azmış və ya itmiş qoyunlara qayğı göstərməklə nümunə vermişdir (Mat. 18:12–14; Yəh. 10:16, 27–29).
4 Çobanlar, qoyunlardakı ruhani zəifliyin əlamətlərini müəyyənləşdirməyə çalışırlar. Özündə mə’yusluq əlaməti aşkar edənlər, yığıncağa nadir hallarda gələnlər və ya az təbliğ edənlər, çox ehtimal ki, ruhani köməyə ehtiyac duyurlar. Ağsaqqallar, həmçinin dünyada dəbdə olan ləyaqətsiz geyimə və xarici görünüşə üstünlük verməyə və ya yığıncağa tənqidi yanaşmağa başlayanlara da kömək etməyə çalışırlar. Səmimi maraq göstərərək və incə hisslər duyaraq, qayğıkeş ağsaqqallar belə təbliğçilərə Yehovaya olan məhəbbətlərini yenidən alışdırmağa kömək etməyə çalışaraq öz canlarını həvəslə verməyə hazırdırlar (1 Salon. 2:8).
5 Elə olur ki, sağlamlıqla əlaqədar yaranan problemlər ucbatından, iqtisadi müvəffəqiyyətsizlik və ya ailə həyatındakı çətinliklər üzündən, vəftiz olunmuş bə’zi məsihçilər yığıncaqla ünsiyyəti dayandırır və ruhani cəhətdən qeyri–fəal olurlar. Tənqiddən qaçınaraq, ağsaqqallar onları şəfqətlə əmin edirlər ki, Yehova bütün qoyunlarına qayğı göstərir və onlara çətin anlarında yardım edir (Məz. 55:22; 1 Pet. 5:7). Diqqətli çobanlar qoyunlara kömək edirlər ki, onlar “Allaha yaxınlaş”arlarsa Allahın da onlara yaxınlaşacaqını, onlara təsəlli verəcəyini və qüvvətləndirəcəyini anlasınlar (Yaq. 4:8; Məz. 23:3, 4).
6 Zəiflərə dəstək olurlar. Sevən çobanlar, həmçinin insanlar tərəfindən xor görülən kəslərə də qayğı göstərirlər. Hər bir yığıncaqda, ehtimal ki, qocalar evində və müalicəxanalarda yaşayan zəif və xəstə adamlar var. Aydındır ki, bu cür vəziyyətdə onlar çox təbliğ edə bilmirlər. Ola bilsin ki, yalnız xəstə yanına gələnlərə, xəstə baxıcısına və başqa xəstələrə təbliğ edirlər. Buna baxmayaraq, onların edə bildiklərinə, ümumdünya təbliğ işinə qiymətli hədiyyə kimi baxılır (Mat. 25:15).
7 “İnsanlar timsalında hədiyyələr” həmimanlılarının ruhani tələbatlarına ilin bu mövsümündə, yazda, Xatirə Gecəsinin keçiriləcəyi vaxtda xüsusi diqqət yetirirlər. Bu, ağsaqqalların, xüsusi sə’y göstərərək azmış bütün təbliğçilərə yığıncaqla hərarətli ünsiyyətdən bir daha sevinc və qəlb rahatlığı duymaqda kömək etmələri üçün ən münasib vaxtdır. Bu cür bacı–qardaşlar — “imanlılar ailəsi” — yığıncaq görüşlərinə gələndə, fidiyə qurbanlığına imanlarını yenidən təsdiqləyərək xidmətdə iştirak edəndə, biz hamımız böyük sevinc hissi duyuruq (Qalat. 6:10; Luka 15:4–7; Yəh. 10:11, 14).