Yehovanın məhəbbətinə görə minnətdarlıq təzahür etdirin.
Martın 24-də Məsihin ölüm günü qeyd ediləcək
1. Yehova Öz məhəbbətini bizə necə göstərmişdir?
1 Məzmurçu nida etmişdir: «Rəbbə şükür etsinlər məhəbbətinə görə, bəşər övladlarına göstərdiyi xariqələrinə görə!» (Məz. 107:8). Allahın insanlara bəslədiyi məhəbbət zərif bağlılıqdan daha artıq şeyi nəzərdə tutur. Bu, məzmurçunun Allahdan ilham almış həmd mahnısından aydın olur: «Ya Rəbb, mənə məhəbbətinlə dayaqsan» (Məz. 94:18). Yehovanın bizim uğrumuzda Öz Oğlunu qurban verməsi, doğrudan da, bizə olan məhəbbətinin ən böyük təzahürüdür! (1 Yəh. 4:9, 10).
2. Yehovaya minnətdarlığımızı necə göstərə bilərik?
2 Məsihin ölümünün Xatirə Gecəsi mərasimi yaxınlaşdığı üçün ‘məhəbbətini göstərən’ Allaha minnətdarlığımızı necə təzahür etdirə bilərik? (Məz. 59:17). Bizlərdən hər birimizə İsanın yer üzündəki həyatının son günlərində baş verən hadisələr üzərində düşünmək üçün vaxt ayırmaq lazımdır (Məz. 143:5). 2005-ci il üçün «Müqəddəs Yazıları gündəlik araşdırmaq» broşurasında (rus.) artıq qeyd edildiyi kimi, Xatirə Gecəsi ilə əlaqədar Müqəddəs Kitabı oxumaq üçün nəzərdə tutulan xüsusi qrafikə riayət etmək faydalıdır və əgər mümkündürsə, Müqəddəs Kitaba əsaslanan nəşrlərlə birgə «Ən böyük insan» kitabının (rus.) 112-116-cı fəsillərini oxu və əlavə axtarışlar et. Oxuduğun abzasların üzərində dərindən düşün (1 Tim. 4:15). Dua vasitəsilə Allahdan rəhbərlik diləyib Onun Kəlamı üzərində dərindən düşünməklə biz həm ürəklərimizi qidalandırır, həm də Yehovaya olan məhəbbətimizi göstəririk (Mat. 22:37).
3, 4. a) Liberiyalı qardaşlarımızı necə təqlid edə bilərik? b) Xatirə Gecəsinə kimləri də’vət etməyi planlaşdırırsan?
3 Başqa adamları Allaha minnətdar olmağa təşviq et. Ötən il Xatirə Gecəsində bütün dünyada 16 760 607 nəfər iştirak etmişdir. Liberiyanın bir kəndində qardaşlar şəhərin merinə məktub yazıb mə’lumat verdilər ki, onlar həmin şəhərdə Rəbbin Xatirə Gecəsini keçirmək istəyirlər. Mer qardaşlara yerli futbol meydançasını istifadə etməyə icazə verdi və həmin ərazinin sakinlərini bu mərasimə də’vət etmək üçün e’lan verdi. Həmin kənddə cəmi beş təbliğçi olmasına baxmayaraq, Xatirə Gecəsinə 636 nəfər gəlmişdir.
4 Biz də daha çox insanların Xatirə Gecəsi mərasimində bizimlə birlikdə olmalarına kömək etmək istəyirik. Də’vət etmək istədiyin insanların siyahısını tutmusanmı? Mərasimə də’vət etmək üçün çap edilmiş də’vətnamələrdən istifadə etmək olar. Onların üzərində Xatirə Gecəsinin nə vaxt və harada keçiriləcəyini səliqə ilə yaz və ya çap et və də’vət etmək istədiyin hər bir insana ver. Martın 24-ü yaxınlaşdığı ərəfədə onlara zəng et və ya yanlarına gəlib xatırlat və hər şeyi dəqiqləşdir.
5. Müqəddəs Kitabı öyrənənləri Xatirə Gecəsinə gəlməyə necə təşviq edə bilərik?
5 Müqəddəs Kitabı öyrənən, lakin hələ yığıncaq görüşlərinə gəlməyən insanlara bu mərasimə gəlməyə və onlardan tam fayda əldə etməyə necə kömək edə bilərik? Öyrənənlərin bu mərasimin vacib olduğunu başa düşmələrinə kömək etmək üçün, hər məşğələ zamanı bir neçə dəqiqə vaxt ayır. Bu haqda faydalı mə’lumatı «Gözətçi Qülləsi»nin 2004-cü ilin 1 aprel sayının 3-7-ci səhifələrində və «Bilik» kitabının 127-ci səhifəsində tapmaq olar.
6. Xatirə Gecəsinə gələnləri salamlamaq nəyə görə vacibdir?
6 Xatirə Gecəsinə gələnləri salamla. Xatirə Gecəsinə gələnlərə yaxınlaş və onları salamla (Rom. 12:13). Də’vət etdiyin insanlarla otur. Onların Müqəddəs Kitabları və mahnı kitabları yoxdursa, bu barədə sən özün qayğı göstər. Bu mərasimə gələn qeyri-fəal bacı və qardaşları mehribanlıqla salamlamaq üçün xüsusi təşəbbüs göstərəcəyik. Onlara göstərdiyimiz məhəbbət yığıncaqla müntəzəm ünsiyyəti bərpa etmələrinə kömək edə bilər (Luka 15:3-7). Gəlin əlimizdən gələni edək ki, bu müqəddəs mərasim zamanı başqalarını da Yehovaya Onun ‘məhəbbətinə’ görə minnətdar olmaqda bizə qoşulmağa təşviq edək (Məz. 31:21).