Təbliğ etməzdən öncə, axtarış aparmaq lazım gələ bilər

1. Nəyə görə çoxdilli ərazidə yığıncağın ərazisi dilə görə təyin edilir?

¹ Eramızın 33-cü ilin Əllinci gün bayramında İsanın şagirdləri müqəddəs ruh aldıqdan sonra dünyanın müxtəlif yerlərindən Yerusəlimə axışan insanlarla «müxtəlif dillərdə danışmağa başladı»lar (Həv. iş. 2:4). Nəticədə, təxminən 3000 adam vəftiz olundu. Maraqlısı odur ki, gələnlərin böyük qismi ümumi dil olan ibrani, yaxud yunan dilində də danışırdı. Lakin Yehova Padşahlıq haqqında xoş xəbərin onlara öz ana dillərində çatdırılmasına qərar verdi. Şübhəsiz, bunun səbəblərindən biri odur ki, insanlar, adətən, xoş xəbəri öz ana dillərində eşidəndə ona daha həvəslə hay verirlər. Buna görə də bu gün çoxdilli ərazidə yığıncağın ərazisi dilə görə təyin edilir. («Təşkil olunmuşuq» kitabı 107-ci səhifə, 1 və 2-ci abzaslar (rus.).) Əcnəbidilli qrupa ərazi təyin olunmur. Qrup aid olduğu yığıncağın və ətrafdakı digər yığıncaqların ərazisində yaşayan və onların dilində danışan insanlara təbliğ edir.

2. a) Axtarış işi nədir və ona hansı ərazilərdə ehtiyac ola bilər? b) Çoxdilli ərazilərdə yığıncaqlar bir-birlərinə necə kömək edə bilərlər? c) Başqa dildə danışan və xoş xəbərə maraq göstərən insana rast gəldiyimiz hallarda nə etməliyik?

² Siz hamının eyni dildə danışdığı ərazidə yaşayırsınızsa, güman ki, evdən-evə təbliğ etmək çətin deyil. Amma əgər sizin yaşadığınız ərazi çoxdilli böyük şəhərdirsə, onda vəziyyətiniz fərqli ola bilər. Ola bilsin, qonşuluqda yerləşən yığıncaq başqa dildə təbliğ edir. Həmin yığıncaq sizin dildə danışan insanlar haqda məlumat təqdim edə bilər, lakin təbliğ edə biləcəyiniz insanları tapmaq məsuliyyəti, əsas etibarilə, sizin yığıncağın və ya qrupun üzərinə düşür. («Bir-birinizə kömək edin» adlı çərçivəyə baxın.) Buna görə də sizin dildə danışan insanları tapmaq üçün axtarış aparmaq lazım gələ bilər. Bunu necə etmək olar?

3. Yığıncaq və ya qrupun harada axtarış aparacağı və buna nə qədər vaxt sərf edəcəyi hansı amillərdən asılıdır?

³ Axtarış işinin təşkili. Çoxdilli ərazilərdə axtarış işinə sərf olunan vaxt yerli şəraitdən asılıdır. Məsələn, əhali arasında həmin dildə nə qədər insan danışır? Təbliğçilərin sayı nə qədərdir? Yığıncaq və ya qrup həmin dildə danışan nə qədər insanın ünvanını əldə edib? Yığıncağın hər rayonda eyni şəkildə axtarış aparması tələb olunmur. Diqqəti yığıncağın ərazisinin hüdudları çərçivəsində, eləcə də ona çox uzaq olmayan ərazilərdə yaşayan və həmin dildə danışan insanların sıx məskunlaşdığı rayonlara cəmləmək olar. Mütəşəkkil surətdə axtarış aparmaq mümkün qədər çox insana Yehovanın adını çağırmaq üçün imkan verməkdə vacib rol oynayır (Rom. 10:13, 14).

4. a) Axtarış işi necə təşkil edilməlidir? b) Sizin dildə danışan insanları tapmaq üçün hansı üsullar var?

⁴ Axtarış ediləcək ərazidə eyni işi iki dəfə görməmək üçün ağsaqqallar şurası, xüsusilə də xidmət nəzarətçisi axtarış işini təşkil etməli və ona nəzarət etməlidirlər (1 Kor. 9:26). Əcnəbidilli qrupda bu işə həmin qrupun aid olduğu yığıncağın ağsaqqallar şurası tərəfindən seçilən münasib bir qardaş (əgər mümkündürsə, ağsaqqal və ya xidməti köməkçi) rəhbərlik edə bilər. Bir çox yığıncaq və qruplarda sistematik ilkin axtarış tədbirləri mövcuddur. Onlar İnternetdə, eləcə də telefon və ünvan kitabçalarında həmin dilə xas olan insan adları axtarırlar. Sonra hansı ünvanı onların ərazisinə daxil etməyi müəyyən etmək üçün onlara zəng edir və ya baş çəkirlər. Əgər münasibdirsə, qrupun aid olduğu yığıncağın ağsaqqallar şurası vaxtaşırı olaraq bütün yığıncağın axtarış işində iştirak etməsini təşkil edə bilər. («Sizin dildə danışan insanları necə tapmaq olar?» adlı çərçivəyə baxın.)

5. a) Axtarışla məşğul olan təbliğçilər üçün hansı məsləhətlər var? b) Axtarış zamanı qarşımıza çıxan insanlara nə demək olar?

⁵ Axtarış işində iştirak edən hər bir kəsin aydın məqsədi olmalıdır. Bu fəaliyyət xidmətimizin bir hissəsi olduğu üçün biz xidmətdə olarkən geyindiyimiz kimi geyinməliyik. Çoxları fikir vermişlər ki, axtarış zamanı təqdiməni məşq etmək və həmin dildə danışmaq onlara yüksək əhval-ruhiyyəni qoruyub saxlamağa, eləcə də həmin dili inkişaf etdirmələrinə kömək edir. Biz axtarışa sərf etdiyimiz vaxtı hesabata daxil edə bilərik, lakin ərazinin xəritəsinin və siyahıların hazırlanmasına sərf etdiyimiz vaxt buna aid deyil. Biz bu dildə danışan insan tapdıqda, onunla xoş xəbəri bölüşməyə çalışmalı və bundan dərhal sonra xidmət nəzarətçisinə və ya onun təyin etdiyi şəxsə bu barədə məlumat verməliyik ki, ərazi ilə bağlı qeydlər təzələnsin. İnsan maraq göstərmədiyi təqdirdə belə biz bu cür davranmalıyıq. Axtarış işi vacib olsa da, biz tarazlığı qorumalı və xidmətin bütün digər sahələrində də iştirak etməliyik. («Axtarış zamanı nə demək lazımdır?» adlı çərçivəyə baxın.)

6. Eşitmə qabiliyyəti olmayan insanların axtarışının hansı özünəməxsus çətinlikləri var?

⁶ Lal-kar insanların axtarışı. Lal-kar insanların axtarışının özünəməxsus çətinlikləri var və bu, böyük səy və dözüm tələb edir. Belə insanları nə adına, nə zahiri əlamətinə, nə də ki geyiminə görə müəyyən etmək mümkündür. Üstəlik, ailə üzvləri və dostları onu müdafiə etmək üçün təbliğçiyə onun barəsində məlumat verməyə tərəddüd edə bilərlər. Lal-kar insanların axtarışı üçün nəzərdə tutulan növbəti məsləhətlər adi dildə danışan insanların axtarışı üçün də yararlıdır.

7. a) Lal-kar insanları tapmaq üçün yaşayış məntəqələrində sorğunu necə keçirmək olar? b) Ev sahibinin şübhələrini necə aradan qaldıra bilərik?

⁷ Jestdilli yığıncaq və qruplar yaşayış məntəqələrində sorğu apararkən uğur əldə etmişlər. Ola bilsin, sizin söhbət etdiyiniz insanın qonşusu, iş və ya sinif yoldaşı jest dilində danışır və ya fikir verib ki, qonşu küçədə lal-kar uşaqların olduğundan xəbər verən yol işarəsi var. Ola bilsin, onun qohumlarından kimsə lal-kardır. Unutmayın ki, sizin gəlişiniz onlarda şübhə doğura bilər. Lakin səmimi və mülayim olmaqla, eləcə də gəlişinizin məqsədini dürüst və ləyaqətli tərzdə izah etməklə bu şübhələri aradan qaldırmaq olar. Bəziləri ev sahibindən onun lal-kar insanları tanıyıb-tanımadıqlarını soruşarkən Müqəddəs Kitab və ya jest dilində olan digər DVD disklər göstərməklə yaxşı nəticələrə nail olmuşlar. Sonra isə belə insanlarla Müqəddəs Kitabın verdiyi ümidi bölüşmək arzusunda olduqlarını qeyd edirlər. Əgər ev sahibi məlumat təqdim etməyə tərəddüd edirsə, ola bilsin, o, məmnuniyyətlə sizdən vizit kartınızı və ya yığıncağa dəvətnamə qəbul edib onu lal-kar olan dostu və ya qohumuna verməyə razılaşdı.

8. Qonşu yığıncaq jestdilli yığıncağa necə kömək edə bilər?

⁸ Böyük şəhərlərdə jestdilli yığıncaqlar ildə bir və ya iki gün ərzində qonşu yığıncaqdan onlara aid olan böyük ərazinin müəyyən rayonunda axtarış aparmasında kömək etməsini xahiş edə bilər. Jestdilli yığıncaqda təbliğ üçün görüşlərdə bununla əlaqədar göstərişlər və səhnəciklər daxil etmək olar. Eyni maşında gedən hər qrupa jestdilli yığıncaqdan bir təbliğçi təyin olunmalı və harada axtarış aparmaq lazım olduğunu göstərən xəritə verilməlidir.

9. Lal-kar insanların ünsiyyət, istirahət və ya müəyyən xidmətlərdən yararlanmaq üçün yığışdıqları yerlərdə axtarışı necə aparmaq olar?

⁹ Axtarışı həmçinin lal-kar insanların ünsiyyət, istirahət və ya müəyyən xidmətlərdən yararlanmaq üçün yığışdıqları yerlərdə də aparmaq olar. Bu zaman təbliğçi müvafiq geyimdə olmalıdır. Yaxşı olardı ki, təbliğçi bütün qrupla yox, bir-iki nəfərlə söhbət etsin. Əgər söhbət səmərəli keçdisə, əlaqə saxlamaq üçün telefon nömrələrinizi və ya ünvanlarınızı bir-birinizə verə bilərsiniz.

10. Təbliğçilər yerli işgüzar müəssisələrdə necə axtarış apara bilərlər?

¹⁰ Digər variant isə işgüzar müəssisələrin göstərildiyi xəritələr tərtib etmək və münasib vaxtda onlara baş çəkməkdir. Məsələn, yanacaqdoldurma və ya kimyəvi təmizləmə məntəqələrinin, camaşırxanaların, restoranların, mehmanxanaların və bu kimi digər müəssisələrin xəritəsini çəkmək olar. Əgər xəritədə eyni iş müəssisələri göstərilirsə, təbliğçilər eyni təbliğ üsulundan istifadə edə və bunun sayəsində təcrübələrini artıra bilərlər. Məsələn, mehmanxanalar, adətən, lal-kar müştərilər də qəbul edirlər. İşimizin məqsədini qeydiyyat şöbəsinin işçilərinə qısaca izah etdikdən sonra onlardan xahiş edə bilərik ki, içində «DVD» disk və yığıncağa dəvətnamə olan qabaqcadan hazırladığımız bağlamaları lal-kar müştərilərinə versinlər. Bəzi müəssisələrdə isə işçilər və ya daimi müştərilər arasında jest dilindən istifadə edənlərin olub-olmadığı ilə maraqlana bilərik. Əgər sizin yaşadığınız ərazidə lal-kar uşaqlar üçün məktəb varsa, bəzi DVD nəşrlərimizi məktəbin kitabxanası üçün təklif etmək olar.

11. Nəyə görə axtarış işi xidmətimizin vacib sahələrindən biridir?

¹¹ Mühüm iş. Sizin dilinizdə danışan insanları axtarıb tapmaq çox zəhmət tələb edən iş ola bilər. Üstəlik, insanlar tez-tez bir yerdən o biri yerə köçdükləri üçün ərazi qeydlərini təzələmək asan olmaya bilər. Bununla belə, get-gedə daha çox yerlərdə axtarış işi xidmətin vacib sahəsinə çevrilir. Bizə təbliğ etməyi tapşıran Yehova ayrı-seçkilik etmir (Həv. iş. 10:34). «O istəyir ki, hər cür insan xilas olub həqiqət barəsində dəqiq biliyə yiyələnsin» (1 Tim. 2:3, 4). Beləliklə, gəlin bütün millətlərdən olan «yaxşı və gözəl ürəkli» insanları tapmaq üçün Yehova və bir-birimizlə əməkdaşlıq edək (Luka 8:15).

[5–ci səhifədəki çərçivə]

Bir-birinizə kömək edin

Əgər yığıncaq və ya qrup onların dilində danışan insanları tapmaq üçün köməyə ehtiyac duyursa, xidmət nəzarətçisi yaxınlıqda yerləşən yığıncaqların ağsaqqallarına müraciət edə bilər. Yaxşı olardı ki, o yalnız həddən artıq uzaq olmayan yığıncaqlarla və ya ərazilərində onların danışdığı dildə insanların çox olduğu yığıncaqlarla əlaqə saxlasın. Sonra müraciət olunan yığıncaqlar təbliğçilərinə məlumat verə bilərlər ki, həmin dildə danışan insan tapdıqda onun ünvanını qeyd edib xidmət nəzarətçisinə ötürsünlər. Xidmət nəzarətçisi də həmin ünvanları həmin yığıncaq və ya qrupa verəcək. Çoxdilli ərazidə fəaliyyət göstərən yığıncaqların xidmət nəzarətçiləri hər yığıncaq üçün əlverişli olan çoxdilli ərazini işləmə və həqiqətə maraq göstərən insanları müvafiq yığıncağa, yaxud da qrupa yönəltmə sistemini hazırlaya bilərlər.

Təbliğçilər lal-kar insana və ya həqiqətə ciddi maraq göstərən əcnəbiyə rast gəlirlərsə, dərhal «Zəhmət olmasa, bu adama baş çək» adlı S-43 nömrəli blankı doldurub yığıncağın katibinə verməlidirlər. Bunun sayəsində həmin insana tez bir zamanda ruhani kömək göstəriləcək. (km 5/11 səh. 3-ə baxın.)

[6–cı səhifədəki çərçivə]

Sizin dildə danışan insanları necə tapmaq olar?

• Başqalarından soruşun: Müqəddəs Kitabı öyrətdiyiniz insanlardan, ailə üzvlərinizdən, iş yoldaşlarınızdan və sairə.

• Telefon kitabçasında sizin dilə xas olan insan adları axtarın. Bəzi yerlərdə adların ünvanlara görə sıralanan yenilənmiş telefon kitabçalarını İnternetdən və ya telefon şirkətindən əldə etmək olar.

• Yerli kitabxanalar, hökumət müəssisələri və ya kolleclər kimi ictimai xidmətlər təklif edən yerlərdə ehtiyatla sorğu keçirin.

• Əcnəbilərin təşkil etdiyi ictimai tədbirlərlə əlaqədar yerli qəzetlərdə verilən elanları axtarın.

• Əcnəbilərə xidmətlər göstərən yerli ticarət mərkəzlərinə və işgüzar ərazilərə baş çəkin.

• Müvafiq şəxsdən icazə aldıqdan sonra bizə lazım olan dildə danışan insanların tez-tez olduğu işgüzar ərazilərdə, tələbələrin toplaşdığı məkanlarda və ya nəqliyyat qovşaqlarında ədəbiyyat masası yerləşdirmək olar.

• Əgər sizin ölkədə qanun icazə verirsə, özəl sorğu kitabçası və ya İnternet vasitəsilə belə insanları axtarmağa kömək edən kompüter proqramlarını əldə edin.

[7–ci səhifədəki çərçivə]

Axtarış zamanı nə demək lazımdır?

İnsanlarla mehriban, səmimi və açıq olsaq, bu, şübhələri aradan qaldıra bilər. Adətən, həmin dildə ilk öncə ədəbiyyat göstərməyin köməyi dəyir.

İnsanla salamlaşdıqdan sonra belə demək olar: «Biz filan dildə danışan insanları axtarırıq ki, onlarla Müqəddəs Kitabın verdiyi ümidi bölüşək. Siz belə bir insan tanıyırsınız?»

Lal-kar insanları axtaranda isə belə demək olar: «Salam. Sizə bir şey göstərmək istərdim. [Balaca daşınan videopleyerin köməyilə DVD-də olan “Yeni Dünya Tərcüməsi”ndən bir ayə göstər.] Bu jest dilində olan Müqəddəs Kitabdan bir parça idi. Müqəddəs Kitabdan başqa, bizim jest dilində pulsuz olan və lal-kar insanların ruhani tələbatlarını ödəyəcək digər videolarımız da var. Siz lal-kar və ya eşitmə qabiliyyəti zəif olan insan tanıyırsınızmı?» Əgər ev sahibinin yadına heç kəs düşmürsə, ondan soruşmaq olar: «Bəlkə, siz belə insanlara iş yerinizdə, məktəbdə və ya qonşuluqda rast gəlmisiniz?»