Əgər biz hərdən dəyərsizlik hissi ilə mübarizə aparırıqsa, onda Yehovanın bizi Özünə necə cəlb etdiyi barədə düşünə bilərik (Yəh. 6:44). O bizim özümüzdə görmədiyimiz yaxşı cəhətlərimizi görür, ürəyimizdəkiləri bilir (2 Saln. 6:30). Ona görə də Yehovanın «siz dəyərlisiniz» sözünə inanmalıyıq (1 Yəh. 3:19, 20). Bəzilərimiz həqiqəti öyrənməzdən əvvəl etdiyimiz səhvlərə görə hələ də özümüzü günahkar hiss edirik (1 But. 4:3). Hətta Yehovaya sədaqətlə xidmət edən məsihilərin arasında da zəiflikləri ilə mübarizə aparanlar var. Bəs sizin də ürəyiniz nəyəsə görə sizi qınayır? Əgər elədirsə, bilin ki, Yehovanın digər sadiq bəndələri də oxşar hisslər keçirib. Məsələn, həvari Bulus zəiflikləri barədə düşünəndə özünü qınayırdı (Rom. 7:24). Təbii ki, o, günahlarından tövbə etmişdi və vəftiz olunmuşdu. Bununla belə, yenə də özünü «həvarilərin ən kiçiyi» və «günah sahiblərindən ən betəri» adlandırmışdı (1 Kor. 15:9; 1 Tim. 1:15). w24.03 s. 27, abz. 5, 6

Yuəs padşahın səhvini təkrarlamamaq üçün nə etməliyik? Biz Yehovanı sevən, Onu razı salmaq istəyən insanlarla dostluq etməliyik. Onlar bizi yaxşı işlərə təşviq edəcək. Həmçinin mütləq deyil ki, yalnız öz yaşıdlarımızla dostluq edək. Bildiyimiz kimi, Yuəs Yəhyadaydan yaşca xeyli kiçik idi. Dostlarınız barədə özünüzə bu sualları verin: «Onlar Yehovaya imanımı möhkəmləndirməyə kömək edir? Məni Allahın normalarına uyğun yaşamağa təşviq edir? Mənimlə Yehova və Onun dəyərli həqiqətləri haqda söhbət edir? Yehovanın normalarına hörmətlə yanaşır? Sadəcə eşitmək istədiklərimi deyir, yoxsa səhvimi də göstərir?» (Məs. 27:5, 6, 17). Açığı, dostlarınız Yehovanı sevmirsə, onlar sizə lazım deyil. Amma Yehovanı sevirlərsə, onlardan bərk yapışın, onların sizə çox köməyi dəyəcək! (Məs. 13:20). w23.09 s. 9—10, abz. 6—7

«Alfa» yunan əlifbasının birinci, «omeqa» isə axırıncı hərfidir. Yehova nəyə görə Özü ilə bağlı bu sözləri deyir? Çünki O, başladığı hər işi mütləq axıra çatdırır. Yehova Adəmlə Həvvanı yaradandan sonra onlara demişdi: «Törəyib çoxalın, bütün yer üzünü doldurun və ona sahib olun» (Yar. 1:28). Yehova bu niyyətini bəyan etməklə sanki «Alfa» dedi. Onun niyyəti aydın idi: Adəmlə Həvvadan törəyən kamil, itaətkar insanlar yer üzünü doldurub onu cənnətə çevirməli idilər. Bu niyyəti yerinə yetəndə O, sanki «Omeqa» deyəcək. «Göyün, yerin və onlarda olan hər şeyin yaradılışı» başa çatandan sonra Yehova buna zəmanət verdi. O, bildirdi ki, bəşəriyyətlə və Yer kürəsi ilə bağlı niyyətini yerinə yetirəcək və bu, yeddinci günün sonunda tam şəkildə gerçəkləşəcək (Yar. 2:1—3). w23.11 s. 4—5, abz. 13, 14