DƏRS 10
Yehovanın Şahidlərinin ibadət görüşlərinin sizə faydası
Sizi nə vaxtsa Yehovanın Şahidlərinin ibadət görüşlərinə dəvət ediblər? Əgər heç vaxt orada olmamısınızsa, ola bilər, bu görüşlərə getməyə tərəddüd edəsiniz. Sizi bu kimi suallar narahat edə bilər: «İbadət görüşləri necə keçirilir? Bu görüşlər nə dərəcədə vacibdir? Nəyə görə ora getmək lazımdır?» Bu dərsdə görəcəksiniz ki, başqaları ilə bir yerdə ibadət etmək sizi Allaha yaxınlaşdıracaq və sizə şəxsən kömək edəcək.
1. Yehovanın Şahidlərinin birgə yığışmasının ən vacib səbəbi nədir?
Görün Müqəddəs Kitabı yazanlardan biri birgə yığışmağın ən vacib səbəbini necə açıqlamışdı: «Böyük məclisdə Yehovaya alqış edərəm» (Zəbur 26:12). Yehovanın Şahidləri də birgə yığışmaqdan sevinc duyurlar. Dünyanın hər yerində onlar Allahı mədh etmək, Ona həmd nəğmələri oxumaq və dua etmək üçün hər həftə birgə toplaşırlar. Həmçinin ildə bir neçə dəfə daha böyük qruplar şəklində yığışaraq Allaha ibadət edirlər.
2. İbadət görüşlərimizdə nə öyrənəcəksiniz?
İbadət görüşlərində Allahın Kəlamını öyrənirik. Müqəddəs Kitabdan oxunan ayələr aydın izah edilir, mənası açıqlanır. (Nəhəmya 8:8 ayəsini oxuyun.) Bu görüşlərdə Yehova barədə, Onun gözəl keyfiyyətləri haqda öyrənəcəksiniz. Yehovanın sizə olan məhəbbəti barədə daha çox öyrəndikcə Ona daha da yaxın olacaqsınız. Həmçinin görəcəksiniz ki, O, sizə həyatdan məmnunluq duymağa necə kömək edə bilər (Əşiya 48:17, 18).
3. İbadət görüşlərində başqaları ilə ünsiyyətin sizə hansı faydası olacaq?
Yehova Allah buyurur ki, «bir-birimizə qarşı diqqətli olub bir-birimizi məhəbbətə və yaxşı işlərə təşviq edək, yığıncaqlarımızdan qalmayaq» (İbranilərə 10:24, 25). Yığıncaq görüşlərimizdə bir-birinə səmimi qayğı göstərən və sizin kimi, Allah haqqında daha çox öyrənmək istəyən insanlarla tanış olacaqsınız. Onların Müqəddəs Kitabdan söylədiyi ruhlandırıcı fikirləri eşidəcəksiniz. (Romalılara 1:11, 12 ayələrini oxuyun.) Həmçinin çətinliklərə baxmayaraq, həyatda sevincini itirməyən insanlarla tanış olacaqsınız. Bəli, bu və digər səbəblərə görə Yehova istəyir ki, biz müntəzəm olaraq birgə yığışaq.
D Ə R İ N L İ Y Ə V A R I N
Görün Yehovanın Şahidlərinin ibadət görüşləri necə keçirilir və nəyə görə əlimizdən gələni edib bu görüşlərə gəlməyə dəyər.
4. Yehovanın Şahidlərinin ibadət görüşləri
Birinci əsrdə məsihilər müntəzəm olaraq toplaşıb Yehovaya ibadət edirdilər (Romalılara 16:3—5). Koloslulara 3:16 ayəsini oxuyun və növbəti sualı müzakirə edin:
Birinci əsrdəki məsihilər Yehovaya necə ibadət edirdilər?
Bu gün Yehovanın Şahidləri də ibadət etmək üçün müntəzəm olaraq ibadət evlərində yığışırlar. Onların ibadət görüşlərinin necə keçirildiyini bilmək üçün VİDEOYA baxın. Sonra yığıncaq görüşünün şəklinə baxın və növbəti sualları müzakirə edin:
İbadət görüşlərimizlə Koloslulara 3:16 ayəsi arasında hansı oxşarlığı gördünüz?
Videoda və ya şəkildə ibadət görüşləri ilə bağlı sizə maraqlı gələn nə oldu?
2 Korinflilərə 9:7 ayəsini oxuyun və növbəti sualı müzakirə edin:
Nəyə görə Yehovanın Şahidlərinin ibadət görüşlərində pul yığılmır?
Sizə dərs keçən insanla birgə növbəti ibadət görüşünün proqramına nəzər salın.
Proqramda nə xoşunuza gəldi?
Bilirsiniz?
jw.org saytında bütün dünyada keçirilən ibadət görüşlərinin vaxtını və yerini öyrənə bilərsiniz.
A) İbadət görüşlərimizdə çıxışlar, səhnəciklər və videolar olur. Görüşlərin əvvəlində və sonunda nəğmə oxunur və dua edilir
B) Görüşdə iştirak edənlər proqramın bəzi hissələrində şərh verir
C) Görüşlərə hər kəs — ailələr, qocalar, cavanlar gələ bilər
Ç) Görüşlərdə pul yığılmır
5. İbadət görüşlərinə gəlmək üçün səy göstərmək lazımdır
Gəlin İsa peyğəmbərin ailəsinin nümunəsinə nəzər salaq. Onlar hər il Yerusəlimdə keçirilən mərasimə gəlmək üçün yaşadıqları Nasirə şəhərindən dağlı-dərəli yollarla üç gün, təxminən yüz kilometr piyada yol gedirdilər. Luka 2:39—42 ayələrini oxuyun və növbəti sualları müzakirə edin:
Sizcə, onların Yerusəlimə səfəri asan başa gəlirdi?
İbadət görüşlərinə gəlmək sizin üçün nəyə görə çətin ola bilər?
Sizcə, çətin olsa da, bu görüşlərə gəlməyə dəyər? Nəyə görə belə düşünürsünüz?
Müqəddəs Kitabda deyilir ki, birgə yığışıb ibadət etmək çox vacibdir. İbranilərə 10:24, 25 ayələrini oxuyun və növbəti sualı müzakirə edin:
Nəyə görə yığıncaq görüşlərinə müntəzəm gəlməliyik?
BƏZİ İNSANLAR DEYİR: «Evdə Müqəddəs Kitabı oxumaq bəs edir. Harasa getməyə ehtiyac yoxdur».
Müqəddəs Kitabdakı hansı ayə və ya nümunə Yehovanın bu məsələyə dair fikrini açıqlayır?
İCMAL
Yığıncaq görüşlərinə gəlməyin sayəsində Yehova barədə biliyiniz artacaq, Onunla münasibətiniz möhkəmlənəcək və Ona başqaları ilə birgə ibadət edəcəksiniz.
Təkrar
Nəyə görə Yehova bizi birgə yığışmağa səsləyir?
Yehovanın Şahidlərinin ibadət görüşlərində nə öyrənəcəksiniz?
Sizcə, ibadət görüşlərinin daha hansı faydaları var?
Ə L A V Ə M Ə L U M A T
Ola bilsin, yığıncaq görüşünə getməyə tərəddüd edirsiniz. Görün bu cür hisslər keçirən bir kişi sonradan görüşləri necə sevdi.
«Onların bizi necə qarşıladığını heç vaxt unutmayacağıq» (4:16)
Fikir verin gənc oğlanın ibadət görüşlərində nə xoşuna gəldi və o, görüşlərə müntəzəm gəlmək üçün nə etdi.
Başqalarının ibadət görüşlərinə necə yanaşdığını öyrənin.
«İbadət evindəki görüşlərdə nəyə görə iştirak etməliyəm?» (internet məqaləsi)
Görün quldur dəstəsinin üzvü Yehovanın Şahidlərinin yığıncaq görüşündə iştirak edəndən sonra necə dəyişdi.
«Mən harada, silahım da orada idi» («Gözətçi qülləsi», iyul—sentyabr 2014)