Yehovanın Kəlamı canlıdır
Salonikililərə və Timoteyə yazılan birinci və ikinci məktublardan diqqətəlayiq fikirlər
SALONİKDƏKİ yeni yığıncaq həvari Pavel tərəfindən təsis edildiyi gündən təqiblərə məruz qalır. Bu səbəbdən, təxminən 20 yaşında olan Timotey oradan yaxşı xəbərlə qayıdanda Pavel saloniklilərə məktub yazıb onları tərifləməyə və ruhlandırmağa təşviq olunur. Ola bilsin, eramızın 50-ci ilinin sonunda yazılmış bu məktub Pavelin yazdığı ilhamlanmış məktublarından birincisi idi. Çox çəkməmiş o, Salonikdəki məsihçilərə ikinci məktubunu yazır. Bu dəfə Pavel bəzilərinin yanlış düşüncə tərzinə düzəliş verir və qardaşları imanda möhkəm durmağa təşviq edir.
Təxminən on il sonra Pavel Makedoniyada, Timotey isə Efesdədir. Pavel Timoteyə ünvanlandığı məktubunda onu təşviq edir ki, Efesdə qalsın və yığıncaqdakı yalançı müəllimlərin təsirinə baxmayaraq, həmimanlılarına Yehova ilə yaxşı münasibətlərini qoruyub saxlamağa kömək etsin. Eramızın 64-cü ilində Romada baş verən yanğından sonra məsihçilərə qarşı təqib dalğası qalxanda Pavel Timoteyə ikinci məktubunu yazır. Bu onun Allahdan ilham alaraq yazdığı son məktubdur. Bu gün biz Pavelin bu dörd məktubundakı ruhlandırıcı fikirlərdən və məsləhətlərdən faydalana bilərik (İbr. 4:12).
‘OYAQ DURUN’
Pavel salonikliləri ‘imandan irəli gələn fəaliyyətlərinə, məhəbbətdən hasil olan əməklərinə və mətanətlərinə’ görə tərifləyir. Pavel deyir ki, onlar onun ‘ümidi, sevinci, iftixar edəcəyi tacıdır’ (1 Salon. 1:3; 2:19).
Salonikdəki məsihçiləri bir-birlərinə dirilmə ümidi ilə təsəlli verməyə təşviq etdikdən sonra Pavel yazır: «Rəbbin [«Yehovanın», YD] Günü oğru gecə gələn kimi gələcək». Pavel onlara ‘oyaq durub ayıq olmağı’ məsləhət görür (1 Salon. 4:16-18; 5:2, 6).
Müqəddəs Kitab suallarına cavablar:
4:15-17 — ‘Rəbbi havada qarşılamaq üçün buludlar içində qaldırılacaq’ olanlar kimlərdir və bu necə baş verir? Onlar Məsihin Padşah kimi iştirakı ərzində yaşayan məsh edilmişlərdir. Onlar İsanı gözəgörünməz səmavi aləmdə qarşılayırlar. Amma bunu etmək üçün əvvəlcə ölməli və ruhani varlıqlar kimi dirilməlidirlər (Rom. 6:3-5; 1 Kor. 15:35, 44). Məsihin iştirakı artıq başladığı üçün bu gün ölən məsh olunmuşlar ölü vəziyyətdə qalmırlar — dərhal dirildilib göyə ‘qaldırılırlar’ (1 Kor. 15:51, 52).
5:23 — Pavel duasında: «Ruhunuz, canınız və bədəniniz qüsursuz hifz olunsun», — deməklə nəyi nəzərdə tuturdu? Pavel bu sözləri deməklə Salonikdəki məsh olunmuşların da daxil olduğu məsihçi yığıncağını nəzərdə tuturdu. O, sadəcə yığıncağın yox, onun ‘ruhunun’, yəni oradakı əhval-ruhiyyənin hifz olunması barədə dua edirdi. Pavel yığıncağın ‘canı’, yəni həyatı və ya mövcudluğu, həmçinin onun ‘bədəni’ — bütün məsh olunmuşlar barədə də dua edirdi (1 Kor. 12:12, 13). Bu dua Pavelin yığıncağa görə çox narahat olduğunu göstərir.
Bizim üçün ibrət dərsləri:
1:3, 7; 2:13; 4:1-12; 5:15. Məsləhət verməyin ən yaxşı üsulu insanı həm tərifləmək, həm də daha yaxşı davranmağa təşviq etməkdir.
4:1, 9, 10. Yehovanın xidmətçiləri daima ruhən inkişaf etməlidirlər.
5:1-3, 8, 20, 21. Yehovanın günü yaxınlaşdıqca ‘ayıq olmalı, köksümüzə iman və məhəbbət zirehini, başımıza dəbilqə olaraq xilas ümidini geyməliyik’. Bundan əlavə, biz Allahın peyğəmbərlik Kəlamı olan Müqəddəs Kitaba ciddi diqqət yetirməliyik.
«SABİT DURUN»
Yığıncaqda bəziləri Pavelin birinci məktubunda yazdıqlarını təhrif edərək Məsihin ‘iştirakının’ (YD) çatdığını iddia edirlər. Pavel bu səhv fikri düzəltmək üçün nəyin ‘əvvəlcə gələcəyindən’ bəhs edir (2 Salon. 2:1-3).
Pavel təşviq edir: «Sabit durun və... öyrəndiyiniz təlimlərə bağlı qalın». O, onlara tapşırır ki, ‘boş-bikar gəzən hər qardaşdan uzaqlaşsınlar’ (2 Salon. 2:15; 3:6).
Müqəddəs Kitab suallarına cavablar:
2:3, 8 — «Haqsızlıq adamı» (İ-93) kimdir və o, necə məhv ediləcək? Bu ‘adam’ Xristian dünyasının ruhanilərini təmsil edir. Pislərə qarşı Allahın hökmlərini bəyan və icra etmək səlahiyyəti verilən şəxs «Kəlam», yəni Allahın Baş Nümayəndəsi olan İsa Məsihdir (Yəh. 1:1). Buna görə də demək olar ki, İsa «ağzından çıxan nəfəslə [qüvvəsilə]» haqsızlıq adamını məhv edəcək.
2:13, 14 — Məsh olunmuşlar hansı mənada ‘ta başlanğıcdan xilas üçün seçiliblər’? Yehova demişdi ki, qadının övladı Şeytanın başını əzəcək və məsh olunmuşlar da bir sinif kimi elə həmin vaxt xilas üçün təyin edilmişdi (Yar. 3:15). Yehova onların cavab verəcəkləri tələbləri, edəcəkləri işləri və məruz qalacaqları sınaqları da bildirmişdi.
Bizim üçün ibrət dərsləri:
1:6-9. Yehova Öz hökmlərini salehlərlə pisləri bir-birindən ayıraraq icra edəcək.
3:8-12. Özümüzü təmin etmək və xidmətimizi davam etdirmək üçün işləməliyik, amma Yehovanın gününün yaxınlaşması bunu etməməyə bəhanə olmamalıdır. Boş-bikar gəzsək, tənbəlləşəcəyik və ‘başqalarının işinə müdaxilə etməyə’ başlayacağıq (1 Pet. 4:15).
«SƏNƏ HƏVALƏ EDİLMİŞ ƏMANƏTİ HİFZ ET»
Pavel Timoteyə ‘yaxşı döyüşçü kimi döyüşməyi, imana və təmiz vicdana’ sahib olmağı öyrədir. Həvari yığıncaqda təyinat alan qardaşlar üçün tələblər sadalayır. O, Timoteyə həm də ‘murdar əfsanələri rədd etməyi’ nəsihət edir (1 Tim. 1:18, 19; 3:1-10, 12, 13; 4:7).
Pavel yazır: «Ağsaqqalı [yəni yaşlı adamı] məzəmmətləmə». O, Timoteyi təşviq edir: «Sənə həvalə edilmiş əmanəti hifz et, Allaha məkruh olan boşboğazlıq və yalan yerə “elm” adlanan bir-birinə zidd fikirlərindən qaçın» (1 Tim. 5:1; 6:20).
Müqəddəs Kitab suallarına cavablar:
1:18; 4:14 — Timotey haqda hansı «peyğəmbərlik sözləri» söylənilmişdi? Ola bilsin, bu, Pavel ikinci missioner səyahəti zamanı Listraya baş çəkərkən Timoteyin məsihçi yığıncağında gələcək rolu barədə Allahın ilhamı ilə söylənilən peyğəmbərlik sözləri idi (Həv. iş. 16:1, 2). Bu «peyğəmbərlik sözləri»nə əsaslanaraq yığıncağın ağsaqqalları gənc Timoteyin üzərinə ‘əllərini qoyub’ onu xüsusi xidmət üçün təyin etmişdilər.
2:15 — Qadın ‘uşaq doğmaqla’ necə ‘xilas olur’? Uşaq doğmaq, onun qayğısına qalmaq və ev işlərini görmək qadını ‘boşboğaz olub, başqalarının işinə burnunu soxmaqdan’ ‘xilas edə’, yəni qoruya bilər (1 Tim. 5:11-15).
3:16 — «Allaha bağlılığın müqəddəs» (YD) sirri nədədir? İnsanın Yehovanın ali hökmranlığına mükəmməl surətdə tabe olmasının mümkün olub-olmadığı əsrlər boyu sirr olaraq qalmışdı. İsa ölənədək Allah qarşısında mükəmməl nöqsansızlığını qorumaqla bu məsələyə aydınlıq gətirdi.
Bizim üçün ibrət dərsləri:
4:15. Həqiqətdə olduğumuz illərdən asılı olmayaraq, hamımız daima tərəqqi etməli və Yehova ilə münasibətlərimizi möhkəmləndirməliyik.
6:2. Əgər həmimanlımız bizi işə götürübsə, öz vəziyyətimizdən sui-istifadə etməməli və ona məsihçi olmayan müdirdən daha böyük həvəslə xidmət etməliyik.
«ALLAHIN KƏLAMINI TƏBLİĞ ET»
Pavel Timoteyi gələcək çətin günlərə hazırlamaq üçün yazır: «Allah bizə qorxaqlıq ruhu deyil, qüdrət, məhəbbət və nəfsə hakim olmaq ruhu vermişdir». Timoteyə məsləhət olunur: ‘Rəbbin qulu toqquşmaya baş qoşmamalı, amma hamı ilə sakit rəftar etməli, öyrətməyə hazır olmalıdır’ (2 Tim. 1:7; 2:24).
Pavel Timoteyə nəsihət verir: «Öyrəndiyin və əmin olduğun şeylərə əməl etməkdə davam et». Dönüklərin təlimləri baş alıb getdiyinə görə həvari gənc ağsaqqala məsləhət verir: «Allahın kəlamını təbliğ et... insanları... iqna, məzəmmət, təşviq et» (2 Tim. 3:14; 4:2).
Müqəddəs Kitab suallarına cavablar:
1:13, (KM) — «Sağlam sözlərin nümunəsi» nə deməkdir? «İsa Məsihin sözləri» olan ‘sağlam sözlər’ həqiqi məsihçi təlimləridir (1 Tim. 6:3). İsanın təlimləri və əməlləri Allahın Kəlamına müvafiq olduğuna görə, ‘sağlam sözlər’ ifadəsi də geniş tətbiq edildikdə, Müqəddəs Kitabdakı təlimlərin hamısına aid edilə bilər. Bu təlimlər Yehovanın tələblərini görməyimizə kömək edir. Müqəddəs Kitabdan öyrəndiklərimizi tətbiq etməklə bu nümunəni izləmiş oluruq.
Bizim üçün ibrət dərsləri:
1:5; 3:15. Timotey Müqəddəs Yazılardakı təlimi uşaqlıqdan ailəsində almış və Məsih İsaya iman gətirmişdi, bu iman isə onun etdiyi hər şeyə təsir göstərirdi. Ailə üzvlərinin Allah və uşaqları qarşısında öz vəzifələrini necə yerinə yetirdikləri üzərində ciddi düşünmələri necə də vacibdir!
1:16-18. Həmimanlılarımız sınaqlara, təqiblərə məruz qalanda və ya həbsxanalara düşəndə gəlin onlar üçün dua edək və əlimizdən gəldiyi qədər kömək edək (Sül. məs. 3:27; 1 Salon. 5:25).
2:22. Məsihçilərin, xüsusilə də gənclərin başı bodibildinqə, idmanın başqa növlərinə, musiqiyə, əyləncəyə, hobbiyə, səyahətə, mənasız söhbətlərə və bu kimi şeylərə o qədər qarışmalı deyil ki, ruhani işlərə az vaxtları qalsın.
[31-ci səhifədəki şəkil]
Pavelin Allahdan ilham alaraq yazdığı məktublarından hansı sonuncu idi?