“Hər şeydən əvvəl bir-birinizə coşğun məhəbbətiniz olsun”

“Hər şeyin axırı yaxındır. [...] Hər şeydən əvvəl bir-birinizə coşğun məhəbbətiniz olsun” (1 PETER 4:7, 8).

İSA həvariləri ilə keçirdiyi son saatların nə qədər qiymətli olduğunu bilirdi. O, şagirdlərini qarşıda nələr gözlədiyini başa düşürdü. Onlar çoxlu iş görməli idilər; bundan əlavə, İsa kimi, onun şagirdlərinə də nifrət etməli və onları tə’qib etməli idilər (Yəhya 15:18-20). Son gecə həvariləri ilə birlikdə olarkən, o bir neçə dəfə ‘bir-birini sevməyin’ zəruri olduğunu xatırlatdı (Yəhya 13:34, 35; 15:12, 13, 17).

² Həmin gecə İsa ilə birlikdə olan həvari Peter bu sözlərin vacibliyini anlamışdı. İllər keçdikdən sonra, Yerusəlimin dağılmasından bir qədər öncə, Peter məhəbbətin vacib olduğunu vurğulamışdı. O, məsihçiləri də’vət edirdi: “Hər şeyin axırı yaxındır. [...] Hər şeydən əvvəl biri–birinizə coşğun məhəbbətiniz olsun” (1 Peter 4:7, 8). Bugünkü pis sistemin ‘axır günlərində’ yaşayan insanlara Peterin sözlərini yadda saxlamaq çox vacibdir (2 Timoteyə 3:1). Bəs “coşğun məhəbbət” nədir? Bu məhəbbəti başqalarına qarşı təzahür etdirmək nəyə görə vacibdir? Və biz bunu necə edə bilərik?

“Coşğun məhəbbət” nədir?

³ Bir çoxları elə düşünürlər ki, məhəbbət öz-özünə yaranan bir hissdir. Lakin Peter hər hansı bir həssas duyğu barədə danışmırdı; o, məhəbbətin ən nəcib növünü nəzərdə tuturdu. 1 Peter 4:8 ayəsindəki “məhəbbət” sözü yunanca aqápe sözündən tərcümə olunub. Bu ifadə altında prinsiplərə əsaslanan təmənnasız məhəbbət nəzərdə tutulur. Bir arayış əsərində qeyd olunur: “Aqápe məhəbbətini idarə etmək mümkündür, çünki o yalnız emosiyalardan ibarət deyil, müəyyən hərəkətlərə aparan şüurlu qərardır”. Eqoistlik meylini miras aldığımız üçün, biz bir-birimizə qarşı Müqəddəs Kitabın prinsiplərinə müvafiq olan məhəbbəti təzahür etdirməyin vacib olduğuna dair xatırlatmalara ehtiyac duyuruq (Təkvin 8:21; Romalılara 5:12).

⁴ Bu heç də o demək deyil ki, bir-birimizi borc hissindən irəli gələrək sevməliyik. Aqápe səmimi hisslərdən məhrum deyil. Peter demişdir ki, ‘bir–birimizə coşğun məhəbbətimiz’ olmalıdıra. Lakin bu cür məhəbbəti təzahür etdirmək üçün sə’y tələb olunur. “Coşğun” kimi tərcümə olunan yunan sözünə dair bir alim demişdir: “O finişə yaxın son qüvvəsini toplayan idmançının sə’yini təsvir edir”.

⁵ Deməli, biz öz məhəbbətimizi yalnız hər hansı çətinliklərlə bağlı olmayanda, ya da məhdud sayda insanlara qarşı təzahür etdirməli deyilik. Məsihçi məhəbbəti tələb edir ki, bizim ürəyimiz ‘genişlənsin’ və hətta bunu etmək asan olmayanda belə onu təzahür etdirək (2 Korinflilərə 6:11-13, İ–93). Tamamilə aydındır ki, öz bacarığını artırmaq məqsədilə məşq edən idmançı kimi, biz də məhəbbətin bu növünü təzahür etdirmək üçün sə’y göstərməliyik. Aramızda bu cür məhəbbətin olması olduqca vacibdir. Nəyə görə? Ən azı üç səbəbə görə.

Biz nəyə görə bir-birimizi sevməliyik?

⁶ Birincisi, “məhəbbət Allahdandır” (1 Yəhya 4:7). Bu gözəl keyfiyyətin Mənbəyi olan Yehova bizi birinci sevmişdir. Həvari Yəhya deyir: “Allahın məhəbbəti bizdə belə zühur etmişdir: Allah Öz yeganə Oğlunu dünyaya göndərdi ki, biz Onun vasitəsilə həyat alaq” (1 Yəhya 4:9). Allahın Oğlu dünyaya insan kimi göndərilmiş, xidmətini icra etmiş və işgəncə dirəyində öldürülmüşdür — bütün bunların hamısı bizim ‘həyat almağımız’ üçün edilmişdir. Biz Allahın məhəbbətinin ən böyük təzahürünə necə münasibət göstərməliyik? Yəhya yazır: “Sevimlilərim, əgər Allah bizi belə sevdisə, biz də bir-birimizi sevməliyik” (1 Yəhya 4:11). Diqqət yetirin ki, Yəhya “Əgər Allah bizi belə sevdisə” deyir, yə’ni tək səni yox, bizi. Bundan aydın olur ki, əgər Allah həmimanlılarımızı sevirsə, biz də onları sevməliyik.

⁷ İkincisi, “hər şeyin axırı yaxındır” və buna görə də ehtiyac içində olan qardaşlarımıza kömək edərək bir-birimizə məhəbbət göstərmək indi xüsusilə vacibdir (1 Peter 4:7). Biz “çətin anlar”da yaşayırıq (2 Timoteyə 3:1). Dünya hadisələri, təbii fəlakətlər və müxtəlif təzyiqlər bizə çətinliklər yaradır. Bu çətin şəraitlərdə gərək bir-birimizə həmişə olduğundan daha yaxın olaq. Coşğun məhəbbət bizi birləşdirər və ‘bir-birimizin qayğısına qalmağa’ təşviq edər (1 Korinflilərə 12:25, 26).

⁸ Üçüncüsü isə, biz ona görə bir-birimizi sevməliyik ki, ‘İblisə yer vermək’ istəmirik (Efeslilərə 4:27). Şeytan elə etməyə çalışır ki, həmimanlılarımızın qeyri-kamilliyi — zəif cəhətləri, çatışmazlıqları və səhvləri bizim büdrəməyimizə səbəb olsun. Biz kiminsə düşünmədən fikir söylədiyinə və ya nalayiq hərəkət etdiyinə görə yığıncağa getməyə son qoyacağıqmı? (Süleymanın məsəlləri 12:18). Əgər bir-birimizə qarşı coşğun məhəbbətimiz varsa, əlbəttə ki, yox! Bu cür məhəbbət bizə sülhü qorumağa və Allahımıza “bir ürəklə”, yə’ni çiyin-çiyinə xidmət etməyə kömək edəcək (Tsefanya 3:9).

Başqalarını sevdiyimizi necə göstərə bilərik?

⁹ Məhəbbətin təzahürü evdən başlanmalıdır. İsa demişdir ki, onun həqiqi davamçılarını bir-birinə olan məhəbbətdən tanımaq olacaq (Yəhya 13:34, 35). Məhəbbət tək yığıncaqda yox, həmçinin ailədə — həyat yoldaşları və valideynlərlə uşaqlar arasında da özünü büruzə verməlidir. Ailə üzvlərimizə qarşı sadəcə olaraq məhəbbət hissi duymaq kifayət deyil; onu əməldə göstərmək lazımdır.

¹⁰ Ər-arvad bir-birinə qarşı məhəbbətlərini necə təzahür etdirə bilərlər? Həyat yoldaşını həqiqətən də sevən ər, həm sözlərində, həm əməllərində — insanlar arasında və təklikdə — onu çox qiymətləndirdiyinə inandırır. O, arvadının ləyaqətinə hörmət edir və onun fikirlərini, nöqteyi-nəzərini və hisslərini nəzərə alır (1 Peter 3:7 ). Ər, həyat yoldaşının rifahını şəxsi rifahından üstün tutur və onun maddi, ruhani və emosional tələbatlarının qayğısına qalmaq üçün əlindən gələni edir (Efeslilərə 5:25, 28). Ərini həqiqətən də sevən qadın, əri bə’zən onun ümidlərini doğrultmayanda belə ona ‘ehtiram edir’ (Efeslilərə 5:22, 33). O, ərinə kömək edir, ona qulaq asır, qarşısına hədsiz tələblər qoymur, lakin onunla birlikdə diqqətini həmişə ruhani şeylərə mərkəzləşdirməyə çalışır (Təkvin 2:18; Matta 6:33).

¹¹ Valideynlər, uşaqlarınıza necə məhəbbət göstərə bilərsiniz? Onların maddi tələbatlarını tə’min etmək üçün ağır iş görməyə hazır olmağınız, şübhəsiz ki, sizin məhəbbətinizə sübutdur (1 Timoteyə 5:8). Lakin uşaqlar təkcə qida, paltar və mənzilə ehtiyac duymurlar. Böyüdükdən sonra həqiqi Allahı sevmələri və Ona xidmət etmələri üçün onlara ruhani tərbiyə vermək tələb olunur (Süleymanın məsəlləri 22:6). Buna görə bütün ailə ilə birlikdə Müqəddəs Kitabı öyrənmək, xidmətdə iştirak etmək və məsihçi yığıncaqlarına getmək üçün vaxt ayırmaq vacibdir (Təsniyə 6:4-7). Xüsusilə bu çətin zamanlarda bu işdə sabitlik göstərmək üçün, çox şeyi qurban vermək tələb olunur. Uşaqlarınızın ruhani tələbatlarının qayğısına qalmaqla, siz onların əbədi rifahının qayğısına qalmış olursunuz. Bu onlara olan məhəbbətinizin sübutu deyilmi? (Yəhya 17:3).

¹² Çox vacibdir ki, valideynlər uşaqlarının emosional tələbatlarının da qayğısına qalsınlar. Uşaqlar emosional cəhətdən çox zəif olduqları üçün, dönə-dönə onları sevdiyinizə əmin edin. Onları sevdiyinizi söyləyin və nəvazişinizi onlardan əsirgəməyin. Bunun sayəsində onlar özlərinin sevildiklərinə və qiymətləndirildiklərinə əmin olacaqlar. Onların sə’yini gördüyünüzə və qiymətləndirdiyinizə əmin etmək üçün, onları ürəkdən tə’rifləməyi unutmayın. Onları məhəbbətlə tərbiyə edin ki, necə insan olacaqlarına e’tinasız yanaşmadığınızı başa düşsünlər (Efeslilərə 6:4). Məhəbbətin bu cür təzahürü ailə üzvlərinin xoşbəxtliyinə və birliyinə xidmət edərək, ailənizə yaxşı tə’sir göstərəcək. Bu isə öz növbəsində axır günlərdə qarşılaşdığınız çətinliklərin öhdəsindən müvəffəqiyyətlə gəlməkdə sizə kömək edəcək.

¹³ Məhəbbət bizi başqalarının nöqsanlarına güzəştlə yanaşmağa təşviq edir. Yadınıza salın ki, Peter məsihçiləri “bir-birinizə coşğun məhəbbətiniz olsun” deyə, təşviq edəndə, bunun nəyə görə vacib olduğunu izah etmişdir: “Çünki məhəbbət bir çox günahın üstünü örtər” (1 Peter 4:8). Burada söhbət ciddi günahların üstünü ört-basdır etməkdən getmir. Bu cür günahlar haqqında yığıncaqdakı məs’­ul qardaşlara xəbər vermək lazımdır, çünki belə problemləri həll etmək onlara həvalə olunub (Levililər 5:1; Süleymanın məsəlləri 29:24). Qatı günahkarların təqsirsiz insanlara zərər gətirməyə davam etmələrinə yol vermək son dərəcədə rəhmsizlik və Müqəddəs Yazılara zidd olardı (1 Korinflilərə 5:9-13).

¹⁴ Əksər hallarda isə həmimanlılarımızın çatışmazlıqları və səhvləri bir o qədər də ciddi olmur. Bə’zən bizim hamımız sözdə və əməldə səhvə yol verir, bir-birimizi mə’yus edir və hətta incidirik (Yaqub 3:2). Kiminsə səhvləri haqqında xəbər tutduqda, dərhal başqalarına danışmağa dəyərmi? Bu cür davranış yığıncaqda yalnız ixtilaflara səbəb olur (Efeslilərə 4:1-3). Məhəbbətdən irəli gələrək həmimanlılarımızın səhvlərini hamıya bildirməyəcəyik (Məzmur 50:20). Boya və suvaq divarın əyri olan yerlərini gizlətdiyi kimi, məhəbbət də bacı-qardaşlarımızın nöqsanlarını örtür (Süleymanın məsəlləri 17:9).

¹⁵ Məhəbbət bizi təşviq edir ki, ehtiyac içində olanlara kömək edək. Bu axır günlərdə insanların həyat şəraiti get-gedə pisləşdiyi üçün, həmimanlılarımıza maddi və ya praktiki kömək göstərmək lazım gələ bilər (1 Yəhya 3:17, 18). Misal üçün, əgər yığıncağımızda kim isə maddi cəhətdən çətinlik çəkir və ya işsiz qalıbsa, onda necə? Belə halda, güman ki, biz imkanımız yol verən qədər ona maddi kömək göstərə bilərik (Süleymanın məsəlləri 3:27, 28; Yaqub 2:14-17). Yaşlı dul bacımızın evinin tə’mirə ehtiyacı varmı? Onda nəyə görə biz özümüz ona hər hansı köməyi təklif etməyək? (Yaqub 1:27).

¹⁶ Biz yalnız yaxınlıqda yaşayanlara məhəbbət göstərməklə kifayətlənmirik. Bə’zən qasırğa, zəlzələ və ya müxtəlif iğtişaşlara görə başqa ölkələrdə Allahın xidmətçilərinin güclü zərər çəkdikləri haqda eşidirik. Ola bilsin, onlar qidaya, paltara və həyat üçün vacib olan başqa şeylərə çox ehtiyac duyurlar. Onların hansı irqdən və ya etnik qrupdan olmalarının fərqi yoxdur. Biz bütün ‘qardaşlığı sevirik’ (1 Peter 2:17). Fəlakətlərdən zərər çəkənlər üçün humanitar yardım təşkil olunanda, I əsrin yığıncaqları kimi biz də göstərilən yardımda iştirak etməyə çalışırıq (Həvarilərin işləri 11:27-30; Romalılara 15:26). Bu tərzdə məhəbbət təzahür etdirməklə, bu axır günlərdə bizi birləşdirən birlik bağlarını möhkəmləndiririk (Koloslulara 3:14).

¹⁷ Məhəbbət bizi Allahın Padşahlığı haqqındakı xoş xəbəri başqaları ilə bölüşməyə təşviq edir. İsanın nümunəsini nəzərdən keçirək. Onu təbliğ etməyə və öyrətməyə təşviq edən nə idi? İnsanların ruhani cəhətdən acınacaqlı vəziyyətdə olduqlarını görəndə, onlara yazığı gəlirdi (Mark 6:34). Yalan din rəhbərləri həmin insanlara ruhani həqiqətləri öyrətmək və onlara ümid vermək əvəzinə, onların qayğısına heç qalmır və onları aldadırdılar. Buna görə, İsa dərin məhəbbət və mərhəmətlə təşviq olunaraq, onlara ‘Allahın Padşahlığının müjdəsi’ ilə təskinlik verirdi (Luka 4:16-21, 43, İ–93).

¹⁸ Bu gün də bir çox insanlar ruhani rəhbərlikdən məhrumdurlar, aldanırlar və ümidsizlik içindədirlər. Əgər İsa kimi biz də həqiqi Allahı tanımayan insanların ruhani tələbatlarına həssaslıqla yanaşırıqsa, onda məhəbbət və mərhəmət bizi təşviq edəcək ki, Allahın Padşahlığı haqqındakı xoş xəbəri onlarla bölüşək (Matta 6:9, 10; 24:14). Qalan vaxtın çox qısa olduğu üçün, xilasedici xəbəri təbliğ etmək həmişəkindən daha vacibdir (1 Timoteyə 4:16).

“Hər şeyin axırı yaxındır”

¹⁹ Xatırlayın ki, Peter həmimanlılarını bir-birini sevməyə təşviq etməzdən əvvəl bu sözləri demişdir: “Hər şeyin axırı yaxındır” (1 Peter 4:7). Bu natəmiz dünya tezliklə Allahın ədalətli yeni dünyası ilə əvəz olunacaq (2 Peter 3:13). Bu o deməkdir ki, indi özünə arxayın olmağın vaxtı deyil. İsa bizi xəbərdar edib: “Diqqətli olun ki, ürəkləriniz qarınqululuq və sərxoşluqla, bu həyatın qayğıları ilə ağırlaşmasın və o Gün sizi qəflətən yaxalamasın” (Luka 21:34, 35).

²⁰ Buna görə də, hansı dövrdə yaşadığımızı yadda saxlayaraq, gəlin bütün qüvvəmizlə bundan sonra da oyaq duraq (Matta 24:42). Gəlin, bizi sapdıra bilən Şeytanın hər bir imtahanına qarşı sayıqlıq göstərməyə davam edək. Gəlin, bu soyuq və məhəbbətdən məhrum olan dünyaya başqalarına məhəbbət göstərməyimizə mane olmasına yol verməyək. Və hər şeydən əvvəl, gəlin həqiqi Allah olan Yehovaya daha da yaxınlaşaq. Tez bir zamanda Allahın Xilaskar Padşahlığı Onun Yer kürəsinə dair izzətli niyyətini icra edəcək (Vəhy 21:4, 5).

[Haşiyələr]

ÖYRƏNMƏ ÜÇÜN SUALLAR

• Son gecə şagirdləri ilə birlikdə olanda, İsa onlara hansı məsləhəti verdi və nədən görünür ki, Peter o sözlərin vacib olduğunu dərk etmişdir? (abz. 1, 2).

• “Coşğun məhəbbət” nədir? (abz. 3-5).

• Biz bir-birimizi nəyə görə sevməliyik? (abz. 6-8).

• Başqalarını sevdiyimizi necə göstərə bilərik? (abz. 9-18).

• Nəyə görə indi özünə arxayın olmağın vaxtı deyil və biz nəyə qəti qərarlı olmalıyıq? (abz. 19, 20).

[29-cu səhifədə olan şəkil]

Birlik hökm sürən ailələr axır günlərin çətinliklərinin öhdəsindən daha müvəffəqiyyətlə gələ bilirlər.

[30-cu səhifədə olan şəkil]

Məhəbbət bizi təşviq edir ki, ehtiyac içində olanlara kömək edək.

[31-ci səhifədə olan şəkil]

Biz Allahın Padşahlığı haqqındakı xoş xəbəri başqaları ilə bölüşməklə məhəbbət təzahür etdirmiş oluruq.