Kaat Samuel iba
23 Bibañga bi nsôk bi David+ bini:
2 Mbuu u Yéhôva u bi tinde me i pot.+
Bibañga gwé bi yé mu hilémb+ hiem.
3 Nyambe nu Israel a bi pot;
Liaa li Israel+ li bi kal me le:
‘I ngéda mut nu a ñane bôt a téé sép,+
a konok Nyambe+ woñi,
4 ane yé i yé kiki mapubi ma kegla i ngéda hiañgaa hi mbai,+
i yé kiki kegla i i gwé bé ond.
I yé kiki mapubi ma ma mbai i mbus nop,
ma boñok le bikai bi nañ.’+
5 Hala nyen Nyambe a ntehe lihaa jem.
Inyule a bi boñ malômbla ma boga lôñni me,+
ma a bi kôôba loñge, ma bak ntiik.
Inyule mon ma bi boñ le me kôhna tohi ni i mam momasôna ma nkon me ngôñ,
baa inyu hala bé nyen a nsayap+ lihaa jem?
6 Ndi b’a lep+ bijôñ bi bôt gwobisôna kiki ba nlep biloo,
inyule ba nla bé gwel gwo ni moo.
7 Ibale mut a nsômbôl tihba gwo,
a nlama bana sélél kei* ni pen likoñ,
bi nlama yaga lighana ha homa wap.”
8 Môl ma mimpémba mi bôt ba gwét+ ba David mana: nu bisu le Yôseb-Basebet, man Lôk Takmôni, nyen a bé ane mimpémba mi bôt ba gwét maa.+ Kel yada, a bi nol 800 bôt ni likoñ jé. 9 Nu yônôs iba le Éléazar,+ man Dôdô,+ man Ahôhi; a bé mut wada mu mimpémba mi bôt ba gwét maa mi mi bé ni David i ngéda ba bi leñ bôt ba Filistia gwét. I kel i, bôt ba Filistia ba bi kodba inyu jo gwét, ndi bon ba Israel ba so gwét, 10 ndi Éléazar a bi yégle ha, a nol bôt ba Filistia letee woo wé u waa, yak pansoñ+ i adbe nye i woo mu kiki a bi gwel yo ntandaa ngéda. Hala nyen Yéhôva a bi boñ le a yémbél,* i kel+ i, i nya i mbuma ñañ. Bôt ba gwét ba Israel ba bi yik lo i mbus yé, inyu yoñ gwom bi bôt ba Filistia ba ba bi wo.
11 Nu yônôs aa le Sama, man Agé, mut Harar. Bôt ba Filistia ba bi kodba i Léhi, i wom u u bé nyonok ni dinjañga di kôn; bôt ba gwét ba Israel ba ke bôt ba Filistia ngwéé. 12 Ndi Sama a bi telep i ñemkété wom, a sôñ wo, a nol ki bôt ba Filistia. Hala nyen Yéhôva a bi boñ le a yémbél*+ i nya i mbuma ñañ.
13 I ngéda libumbul, bôt baa mu 30 ma baane ba ntôñ gwét, ba bi sôs yak David nyoo i hôk liaa i Adulam;+ ntôñ gwét u bôt ba Filistia u bi téé mandap ma mabadô i nsôsôgô* u Lôk Réfaim.+ 14 David a bé i lisolbene,+ i bôt ba gwét ba bé i bisu bi ntôñ gwét u bôt ba Filistia, bo ba bé i Bétléhém. 15 Ha nyen David a bi bana ngôñ i nyo malép, a kal le: “Éé, ibale me bak to le me nyo malép ma bee i i yé bebee ni nwemel u Bétléhém!” 16 Jon mimpémba mi bôt ba gwét maa mi jôp ni ngui i homa ntôñ gwét u bôt ba Filistia u bé, ba ap malép mu bee i i yé bebee ni nwemel u Bétléhém, ba kena mo David; ndi a tjél nyo mo, a sop mo inyu Yéhôva.+ 17 A kal le: “Me ta bé le me nyo i malép mana, a Yéhôva! A yé wengoñle me yé nyo matjél+ ma bôt bana, ba ba bak le ba nimis biniñ* gwap.” Jon a bi tjél nyo mo. I mam mana mon mimpémba mi bôt mini nwo maa mi bi boñ.
18 Abisai,+ manyañ Yôab, man Séruya,+ a bé énél mimpémba mi bôt ba gwét maa mimpe. Kel yada, a bi nol 300 bôt ni likoñ jé. A bé yiba ngandak nlélém kiki mimpémba mi bôt ba gwét maa+ mi bisu. 19 To hala kiki a bé yiba ngandak iloo bana bape bo baa, a bak ki ñane wap, a bi la bé pam i likala li mimpémba mi bôt maa mi David mi bisu.
20 Bénaya,+ man Yéhôyada, a bé lôs mut;* a bi boñ mimpémba mi mam i Kabzéel,+ nyen a bi nol bon bôlôm bo iba ba Ariel nu Môab. Nye ki nyen a bi sôs kel yada ikété bee i ngéda libu li lisuni* li bé kwo, a nol mbondo njéé.+ 21 A nol ki man Égiptô nu a bé mbôñgô mut. To hala kiki man Égiptô a bééna likoñ i woo wé, Bénaya a bi ke i jôs nye ni ntoñgo, a kadal likoñ li li bé i woo u man Égiptô, a nol nye ni likoñ li. 22 I mimpémba mi mam mini nwon Bénaya, man Yéhôyada, a bi boñ; a bé yiba ngandak, nlélém kiki mimpémba mi bôt maa mi David mi bisu. 23 To hala kiki a bé yiba ngandak iloo mana 30 ma bôt bape, a bi la bé pam i likala li mimpémba mi bôt ba gwét maa mi David mi bisu. Ndi David a bi téé nye le a ane i bôt ba bé tat nye.
24 Asahel,+ manyañ Yôab, a bé mut wada mu 30 ma bôt. Môl map mana: “Elhanan, man Dôdô, nu a bé lôl i Bétléhém;+ 25 Sama, mut Harod; Élika, mut Harod; 26 Héles,+ mut Bét-Pélet; Ira,+ man Ikes, nu a bé lôl i Tékôa; 27 Abiézer,+ mut Anatôt;+ Mébunai, man Lôk Husa; 28 Zalmôn, mut Ahôhi; Mahari,+ mut Nétôfa; 29 Héleb, man Baana, mut Nétôfa; Itai, man Ribai, nu a bé lôl i Gibéa nu Lôk Benyamin; 30 Bénaya,+ mut Piratôn; Hidai, nu a bé lôl nyoo i malép* ma Gaas;+ 31 Abialbon, mut Araba; Azmavet mut Bahurim; 32 Éliaba, mut Saalbim; bon ba Yasen; Yônatan; 33 Sama, mut Harar; Ahiam, man Sarar, mut Harar; 34 Élifélet, man Ahasbai, man Maaka; Éliam, man Ahitôfel,+ mut Gilô; 35 Hézrô, mut Karmel; Paarai, mut Arab; 36 Igal, man Natan, nu a nlôl i Zôba; Bani, mut Gad; 37 Zélek, man Lôk Amôn; Naharai, mut Béérôt, nyen a bé begee bijôl bi gwét bi Yôab, man Séruya; 38 Ira, man Lôk Yéter; Gareb, mut It;+ 39 Uriya,+ man Lôk Hét. Bobasôna ba bé 37.