Yérémia

42 I mbus, baane ba mintôñ mi gwét bobasôna, ni Yôhanan+ man Karéa, Yésania man Hôsaya lôñni litén jolisôna, ibôdôl nuntitigi ikepam nunkeñi, ba kôôge bebee 2 ni mpôdôl Yérémia, ba kal nye le: “Soho, emble minyemhe nwés, soohe ki Yéhôva Nyambe wés inyu yés, ni inyu bôt bobasôna ba ba bi yégle, inyule wemede u ntehe le di bé ngandak ndi nano di nyégle ndék.+ 3 Bat Yéhôva Nyambe woñ le a kal bés i jam di nlama boñ, jo ki jon di ga boñ.”

4 Mpôdôl Yérémia a timbhe bo le: “Me nok, m’a soohe Yéhôva Nyambe nan kiki ni mbat; hiki jam Yéhôva Nyambe nan a ntimbhe, me ga kal bé. Me ga sôô bé bé jam jo ki jo.”

5 Ba timbhe Yérémia le: “Yéhôva a ba maliga, a ba ki bañga yés mbôgi le d’a kôhna kogse ibale di mboñ bé i mam momasôna Yéhôva Nyambe woñ a ga kal we le u kal bés. 6 Too ndimbhe i nlémél bés, too i nlémél bé bés, di ga nôgôl Yéhôva Nyambe wés, nu di ñom we i nyeni; le ndi mam ma kee bés loñge inyule di nôgôl Yéhôva Nyambe wés.”

7 I mbus jôm li dilo Yéhôva a pôdôs Yérémia. 8 Ha nyen Yérémia a bi sébél Yôhanan, man Karéa, ni baane ba mintôñ mi gwét bobasôna ba ba bé lôñni nye, yak ni bôt ba litén bobasôna ibôdôl nuntitigi ikepam nunkeñi.+ 9 A kal bo le: “Haana nyen Yéhôva Nyambe nu Israel, nu ni bi ep me i nyeni, a nkal: 10 ‘Ibale ni nyoñ makidik le ni nyén munu loñ ini, me ga lédés bé, ndi me ga tjé bé bé; me ga bel bé, ndi me ga nup bé bé; inyule me ga tam bikuu me bi boñ le bi kwél bé.+ 11 Ni sehla bañ inyu kiñe Babilôn i ni kon woñi.’+

“‘Ni kon bañ nye woñi,’ hala nyen Yéhôva a mpot, ‘inyule me yé lôñni bé inyu sôñ bé ni inyu péyés bé i moo mé. 12 Me ga kônôl bé ngoo,+ yak nye a ga kônôl bé ngoo, a boñ ki bé le ni témb i loñ nan.

13 “‘Ndi ibale ni nkal le: “Di ga yén bé munu loñ ini!” Ni ndogbene ki Yéhôva Nyambe nan 14 ni kalak le: “Di ga ke ndigi i loñ Égiptô,+ i het di ntehe bé gwét, to nok kiki ba nhem sép, homa di nhañ bé bret; nyoo nyen di ga yééne,” 15 jon emblana bañga i Yéhôva, a bôt ba Yuda ba ba bi yégle. Haana nyen, Yéhôva nu mintôñ mi ngwét, Nyambe nu Israel a mpot: “Ibale ni mal yoñ makidik le ni nke i Égiptô ni i yééne nyoo,* 16 yina ni le i pansoñ ni nkon woñi i ga kop bé nyoo i loñ Égiptô, yak i njal ni nkon woñi i ga noñ bé i Égiptô, nyoo ki nyen ni ga wél.+ 17 I bôlôm bobasôna ba nkit le ba nke i Égiptô inyu yééne nyoo, pansoñ, njal ni himala* gwon bi ga nol bo. To wada ikété yap a ga niñ bé, a ga pei bé to bikuu bi me ga boñ le bi kwél bo.”’

18 “Inyule haana nyen Yéhôva nu mintôñ mi gwét, Nyambe nu Israel a nkal: ‘Kiki hiun hiem ni njôô yem bi bi kwél bôt ba Yérusalem,+ hala nyen hiun hiem hi ga kwél bé ibale ni nke i Égiptô; ni ga yila yom ndiihe, yom i nyega, yom ba ñok ni yom i nwéhna nyuu,+ kekikel n’a tehe ha bé i homa nunu.’

19 “Yéhôva a mbéhe bé, a bôt ba ba bi yégle i Yuda. Ni ke bañ i Égiptô. Ni tibil nok hala, ibôdôl i len ini, me mal yis bé le 20 ni ga wél inyu dihôha dinan. Inyule ni bi ep me yak Yéhôva Nyambe nan, ni kal le: ‘Soohene bés Yéhôva Nyambe wés, u kal ki bés mam momasôna Yéhôva Nyambe wés a nkal; di ga boñ mo.’+ 21 I len ini, me mal kal bé, ndi ni ga nôgôl bé Yéhôva Nyambe nan, ni ga boñ bé to jam jo ki jo a ñep me le me kal bé.+ 22 Jon yina le pansoñ, njal ni himala gwon bi ga nol bé nyoo i het ni gwé ngôñ i ke i yééne.”+