LÔK LÉVI

1 Yéhôva a sébél Môsi, a pôdôs nye i ndap libadô i likoda,+ a kal nye le: 2 “Pôdôs bon ba Israel, kal bo le: ‘Ibale mut ikété nan a nsômbôl ti Yéhôva likébla, li lôlak mu bilém gwé, a nlama yôñôl jo mu liuñ li nyaga tole mu bémba i mintômba.+

3 “‘Ibale likébla jé li yé sesema i ntul i hié, i lôlak mu liuñ li nyaga, a ga ti nlôm lém+ nu a gwé bé lem yo ki yo. A nlama ti yo ni ñem wé wonsôna+ i bisu bi Yéhôva, i lijubul li ndap libadô i likoda. 4 A ga bii woo wé i ngii ño u sesema i ntul i hié, ha nyen Nyambe a’ neebe i sesema ini inyu hô bibéba gwé.*

5 “‘I mbus, ba ga nol man nlôm nyaga i bisu bi Yéhôva; bon bôlôm ba Arôn, biprisi,+ ba ga lona matjél, ba nwes ki mo mu bipes gwobisôna bi juu li bisesema,+ li li yé i lijubul li ndap libadô i likoda. 6 Ba ga héya kôgôô i* sesema i ntul i hié, ba kit ki yo bipes bipes.+ 7 Bon bôlôm ba Arôn, biprisi, ba ga kuye hié* i juu li bisesema,+ ba ha* ki tjéé mu hié. 8 Bon bôlôm ba Arôn, biprisi, ba ga yoñ bipes bi sesema i ntul i hié,+ lôñni ño ni mahoñ ma ma nkéña ditam, ba ha gwo i ngii tjéé di di nloñ mu ngii juu li bisesema. 9 Ba ga jôwa minla lôñni makôô mé* ni malép. Prisi i ga ligis gwobisôna i ngii juu li bisesema. Hala a yé sesema i ntul i hié, sesema i hié i i numb loñge njiñ* inyu Yéhôva.+

10 “‘Ibale likébla jé inyu sesema i ntul i hié li nlôl mu bémba,+ ikété bon ba balôm ba mintômba tole kembee, a ga ti nlôm lém+ nu a gwé bé lem yo ki yo. 11 Ba ga nol yo i pes ñombok i juu li bisesema, i bisu bi Yéhôva; bon bôlôm ba Arôn, biprisi, ba ga nwes matjél mé mu bipes gwobisôna bi juu li bisesema.+ 12 Ba ga kit yo bipes bipes; i mbus, prisi i ga yoñ bipes gwé, ni ño wé lôñni mahoñ ma ma nkéña ditam, a bii gwo i ngii tjéé di di nloñ mu ngii juu li bisesema. 13 Ba ga jôwa minla ni malép; ha nyen prisi i ga lona gwobisôna, i ligis ki gwo mu ngii juu li bisesema. Hala a yé sesema i ntul i hié, sesema i hié i i numb loñge njiñ* inyu Yéhôva.

14 “‘Ndi ibale a nti dinuni kiki sesema i ntul i hié inyu Yéhôva, a ga yôñôl likébla jé mu bakukuu tole mu bon ba dibeñ.+ 15 Prisi i ga lona hinuni i juu li bisesema, i kit hio ngodol,* ndi i ga kôp matjél mé momasôna mu pes yada i juu li bisesema. I mbus, prisi i ga ligis hio i ngii juu li bisesema. 16 A ga héya ngoo* yé ni biléé gwé, a lep gwo ipañ juu li bisesema, i pes likôl, i homa ba nlébél libu.*+ 17 A ga kan hinuni i ñemkété ipôla bipapai gwé, ndi a kit bañ hio bipes biba. I mbus, prisi i ga ligis hio i ngii juu li bisesema, i ngii tjéé di di nloñ mu hié. Hala a yé sesema i ntul i hié, sesema i hié i i numb loñge njiñ* inyu Yéhôva.

2 “‘Nano ni, ibale mut a nlona likébla li bijek+ inyu Yéhôva, likébla jé li nlama ba flawa ilam; a nlama kôp môô mu ngii, a ha ki nunumba* mu ngii.+ 2 I mbus, a ga lona jo yak bon bôlôm ba Arôn, biprisi. Prisi i ga hôgôô woo wada u flawa ilam i ba mbôô ni môô, lôñni nunumba yosôna. Prisi i ga ligis jo kiki yimbne i likébla+ jôlisôna* i ngii juu li bisesema. Hala a yé sesema i hié i i numb loñge njiñ* inyu Yéhôva. 3 I yom yosôna i ga yégle mu likébla li bijek, i ga ba inyu Arôn ni bon+ bé bôlôm; hala a yé yom i nlôôha pubhaga+ i i nlôl mu bisesema bi hié inyu Yéhôva.

4 “‘Ibale u nlona likébla li bijek li ba mbôm i juu, li nlama ba flawa ilam: li ga ba ngiiña bret bi ngi-séñha bi bi yé mbôôk ni môô, tole li ga ba mimbamba mi biôlô mi ngi-séñha nhook môô.+

5 “‘Ibale likébla joñ li yé likébla li bijek li ba nwañ i flapan,+ li nlama ba flawa ilam ngi-séñha i i yé mbôôk ni môô. 6 Ba nlama bek yo bikét bikét, u ga kôp ki yo môô mu ngii.+ Hala a yé likébla li bijek.

7 “‘Ibale likébla joñ li yé likébla li bijek li ba nwañ i saspan, li nlama ba flawa ilam i ba mbôô ni môô. 8 I ngéda u ga mal gwélél i bikule bini gwobisôna inyu boñ likébla li bijek inyu Yéhôva, u ga lona jo yak prisi, nyen a ga kena jo bebee ni juu li bisesema. 9 Ha nyen prisi i ga yoñ ndék mu likébla li bijek kiki yimbne i likébla+ jolisôna,* a ligis jo i ngii juu li bisesema. Hala a yé sesema i hié i i numb loñge njiñ* inyu Yéhôva.+ 10 I yom i ga yégle mu likébla li bijek, i ga ba inyu Arôn ni bon bé bôlôm; hala a yé yom i nlôôha pubhaga i i nlôl mu bisesema bi hié+ inyu Yéhôva.

11 “‘Likébla li bijek to jada li ni ga lona inyu Yéhôva, li nlama bé bana séñha;+ inyule ni nlama bé ligis séñha yo ki yo, to wéi kiki sesema i hié inyu Yéhôva.

12 “‘Ni nla lona i gwom bini inyu Yéhôva kiki likébla li matam ma bisu,+ ndi ni nlama bé lona gwo i juu li bisesema kiki sesema i i numb loñge njiñ.*

13 “‘Hiki likébla li bijek u ga boñ, u nlama nés jo ni bas. Bas yon i nhôñlaha we malômbla ma yé ipôla we ni Nyambe woñ,* jon yoñ yihe le bas i hañ bañ mu likébla joñ li bijek. U ga ha bas+ mu makébla momasôna u ga ti.

14 “‘Ibale u nti Yéhôva likébla li bijek li li nlôl mu matam ma bisu ma libumbul joñ, u nlama yoñ blé* i bisu i libumbul i ba nwañ, blé i bisu i libumbul* i ba ntét ndék, u lona yo kiki likébla li bijek li matam ma bisu.+ 15 U ga ha môô mu ngii, u ha ki nunumba mu ngii. Hala a yé likébla li bijek. 16 Prisi i ga yoñ ndék mu kôn i ba ntét, i ba mbôô ki ni môô, lôñni nunumba yosôna, a ligis yo kiki yimbne i likébla+ jolisôna.* Hala a yé sesema i hié inyu Yéhôva.

3 “‘Ibale likébla jé li yé sesema inyu kôp nsañ,+ ni le ibale a nyôñôl jo mu liuñ li nyaga, to nlôm lém, to ñin, a nlama ti lém i i gwé bé lem yo ki yo i bisu bi Yéhôva. 2 A ga bii woo wé i ngii ño u likébla jé, ba ga nol ki lém i lijubul li ndap libadô i likoda; ha nyen bon bôlôm ba Arôn, biprisi, ba ga nwes matjél mu bipes gwobisôna bi juu li bisesema. 3 I gwom bini gwon a ga yoñ mu sesema inyu kôp nsañ, a ti gwo kiki sesema i hié inyu Yéhôva:+ mahoñ+ ma ma nhô minla, ni mahoñ momasôna ma ma édi ni minla, 4 yak ditam tjé tjo diba lôñni mahoñ ma ma nkéña tjo, ma bak bebee ni bôbôk. I ngéda a ga héya ditam,+ a ga héya ki lihoñ li li yé i ngii libaa. 5 Bon bôlôm ba Arôn ba ga ligis i gwom bini i ngii juu li bisesema, hala wee i ngii tjéé di di nloñ mu hié;+ hala a yé sesema i hié i i numb loñge njiñ* inyu Yéhôva.+

6 “‘Ibale likébla a ga ti kiki sesema inyu kôp nsañ inyu Yéhôva li nlôl mu bémba, a ga lona nlôm lém tole ñin,+ ngi lem yo ki yo. 7 Ibale a nlona man nlôm ntômba kiki likébla jé, a kena nye i bisu bi Yéhôva. 8 A ga bii woo wé i ngii ño u likébla jé, ha nyen ba ga nol lém i lijubul li ndap libadô i likoda. Bon bôlôm ba Arôn, biprisi, ba ga nwes matjél mé mu bipes gwobisôna bi juu li bisesema. 9 A ga yoñ mahoñ ma sesema inyu kôp nsañ, a ti mo kiki sesema i hié inyu Yéhôva.+ A ga héya nwel wonsôna u u gwé mahoñ, a kit wo isi nkak,* yak mahoñ ma ma nhô minla, ni mahoñ momasôna ma ma édi ni minla, 10 yak ditam tjé tjo diba lôñni mahoñ ma ma yé i ngii yap, ma bak bebee ni bôbôk. I ngéda a ga héya ditam,+ a ga héya ki lihoñ li li yé i ngii libaa. 11 Prisi i ga ligis i gwom bi i ngii juu li bisesema kiki ngaba bijek* i Nyambe. Hala a yé sesema i hié inyu Yéhôva.+

12 “‘Ibale likébla jé li yé kembee, a ga lona yo i bisu bi Yéhôva. 13 A ga bii woo wé i ngii ño u kembee, ha nyen ba ga nol yo i lijubul li ndap libadô i likoda; bon bôlôm ba Arôn ba ga nwes matjél mé mu bipes gwobisôna bi juu li bisesema. 14 I ngaba ini yon a ga ti kiki sesema i hié inyu Yéhôva: mahoñ ma ma nhô minla, ni mahoñ momasôna ma ma édi ni minla,+ 15 yak ditam tjé tjo diba lôñni mahoñ ma ma nkéña tjo, ma bak bebee ni bôbôk. I ngéda a ga héya ditam, a ga héya ki lihoñ li li yé i ngii libaa. 16 Prisi i ga ligis i gwom bi i ngii juu li bisesema kiki ngaba bijek* i Nyambe. Hala a yé sesema i hié i i numb loñge njiñ.* Mahoñ momasôna ma yé ma Yéhôva.+

17 “‘Ni nlama bé je mahoñ mo ki mo, to matjél+ mo ki mo; hala a yé litéak li li ga nom i boga ni boga mu tjai dinan tjodisôna, ni mu bahoma bobasôna ni mba ni nyééne.’”

4 Yéhôva a kal ki Môsi le: 2 “Kal bon ba Israel le: ‘Ibale mut* a mboñ béba ngi kôôba,+ ndi a boñ jam jada mu mam Yéhôva a bi kal le mut a nlama bé boñ, i biniigana bini gwon a nlama noñ:

3 “‘Ibale prisi+ keñi* i mboñ béba,+ i boñ ki le yak litén li begee béba, a nlama lona inyu Yéhôva: man nlôm nyaga nu a gwé bé lem yo ki yo, inyu béba a bi boñ;+ hala a yé sesema inyu béba.* 4 A ga lona nlôm nyaga i lijubul li ndap libadô i likoda,+ i bisu bi Yéhôva; a ga bii woo wé i ngii ño u nlôm nyaga, a nol ki nlôm nyaga i bisu bi Yéhôva.+ 5 I mbus, prisi+ keñi i ga yoñ ndék matjél ma nlôm nyaga, a jôbna mo i ndap libadô i likoda. 6 Ha nyen prisi i ga tjak hinoo hié i matjél,+ a nwes ki mo ngélé+ isaambok i bisu bi Yéhôva, i bisu bi libadô li homa mpubhaga. 7 Prisi i ga ha ki ndék matjél mu bitoñ bi juu li biloñge bi binjinjiñ,+ li li yé i bisu bi Yéhôva ikété ndap libadô i likoda. Ha nyen a ga kôp mana matjél momasôna ma nlôm nyaga ma ma nyégle isi juu li bisesema bi ntul i hié,+ li li yé i lijubul li ndap libadô i likoda.

8 “‘I mbus, a ga héya mahoñ momasôna ma nlôm nyaga nu sesema inyu béba, yak mahoñ ma ma nhô minla, ni mahoñ momasôna ma ma édi ni minla, 9 yak ditam tjé tjo diba lôñni mahoñ ma ma yé i ngii yap, ma bak bebee ni bôbôk. I ngéda a ga héya ditam,+ a ga héya ki lihoñ li li yé i ngii libaa. 10 A ga héya minlélém mi gwom ba nhéya mu nlôm nyaga nu sesema+ inyu kôp nsañ. I mbus, prisi i ga ligis i gwom bi i ngii juu li bisesema bi ntul i hié.

11 “‘Ndi koo yé ni minsôn nwé nwominsôna lôñni ño wé, ni makôô* mé, ni gwom gwé bi kété, lôñni tjibi+ tjé, 12 hala wee nlôm nyaga nyensôna, a ga boñ le ba pamna nye nyoo i mbus liyééne li litén, i homa nu tôbôtôbô* i het ba nlébél libu,* a ga ligis lém mu ngii tjéé di di nloñ mu hié.+ Ba nlama ligis yo i homa ba nlébél libu.

13 “‘Nano ni, ibale ntôñ u Israel wonsôna u mboñ béba, u boñ béba ngi kôôba,+ ndi ntôñ* u yi bé le ba mboñ jam Yéhôva a bi kal le ba nlama bé boñ,+ 14 ndi béba yap i yiba i mbus ngéda, ntôñ u nlama lona man nlôm nyaga inyu ti nye kiki sesema inyu béba, ntôñ u kena ki nye i bisu bi ndap libadô i likoda. 15 Mimañ mi litén li Israel mi ga bii moo map i ngii ño u nlôm nyaga i bisu bi Yéhôva, ba ga nol ki nlôm nyaga i bisu bi Yéhôva.

16 “‘I mbus, prisi keñi i ga yoñ ndék matjél ma nlôm nyaga, a jôbna mo i ndap libadô i likoda. 17 Ha nyen prisi i ga tjak hinoo hié i matjél, a nwes ki mo ngélé isaambok i bisu bi Yéhôva, i bisu bi libadô.+ 18 I mbus, a ga ha ki ndék matjél mu bitoñ bi juu li bisesema,+ li li yé i bisu bi Yéhôva ikété ndap libadô i likoda; a kôp ki mana matjél momasôna ma ma nyégle isi juu li bisesema bi ntul i hié, li li yé i lijubul li ndap libadô i likoda.+ 19 A ga héya mahoñ momasôna, a ligis ki mo mu ngii juu li bisesema.+ 20 A nlama boñ i nlôm nyaga nunu nlélém kiki a bi boñ i nyaga a bi ti kiki sesema inyu béba. Hala nyen prisi i ga boñ inyu héya* béba+ i litén, ha nyen Nyambe a ga nwéhél bo. 21 Prisi i ga boñ le ba pamna nlôm nyaga nyoo i mbus liyééne li litén, a ligis ki nye kiki a bi ligis nlôm nyaga+ nu bisu. Hala a yé sesema inyu béba i ntôñ+ u bon ba Israel wonsôna.

22 “‘I ngéda ñane+ wada a mboñ béba ngi kôôba, ndi a boñ jam jada mu mam momasôna Yéhôva Nyambe wé a bi kal le mut a nlama bé boñ, nyemede a yik le a mboñ béba, 23 tole ibale ba nyis nye le a mboñ béba hala kiki a mbôk mbén, a nlama lona man nlôm kembee* nu a gwé bé lem yo ki yo, kiki likébla jé. 24 A ga bii woo wé i ngii ño u man nlôm kembee,* a ga nol ki nye i homa ba nôlôl bisesema bi ntul i hié i bisu bi Yéhôva.+ Hala a yé sesema inyu béba. 25 Ni hinoo hié, prisi i ga yoñ ndék matjél mu matjél ma sesema inyu béba, a hoo mo mu bitoñ+ bi juu li bisesema bi ntul i hié, a kôp ki mana matjél ma ma nyégle isi juu li bisesema+ bi ntul i hié. 26 A ga ligis mahoñ momasôna mu ngii juu li bisesema, nlélém kiki a nligis mahoñ ma sesema inyu kôp nsañ;+ prisi i ga bat ki le Nyambe a kobol nye mu* béba yé, ha nyen Nyambe a ga nwéhél nye.

27 “‘Ibale mut* wada ikété bôt ba loñ a mboñ béba ngi kôôba, nyemede a yik le a mboñ béba, kiki a mboñ jam jada mu mam momasôna Yéhôva a bi kal le mut a nlama bé boñ,+ 28 tole ibale ba nyis nye béba a mboñ, a nlama lona ñin man kembee nu a gwé bé lem yo ki yo, kiki likébla jé inyu béba a mboñ. 29 A ga bii woo wé i ngii ño u sesema inyu béba, a ga nol ki lém i sesema inyu béba i homa ba nôlôl bisesema bi ntul i hié.+ 30 Prisi i ga yoñ ndék matjél mu ni hinoo hié, a hoo mo mu bitoñ bi juu li bisesema bi ntul i hié, a kôp ki mana matjél momasôna ma ma nyégle isi juu li bisesema.+ 31 A ga héya mahoñ+ momasôna, nlélém kiki ba nhéya mahoñ ma sesema inyu kôp nsañ;+ prisi i ga ligis mo i ngii juu li bisesema. Hala a yé sesema i hié i i numb loñge njiñ* inyu Yéhôva; prisi i ga bat ki le Nyambe a kobol nye mu* béba yé, ha nyen Nyambe a ga nwéhél nye.

32 “‘Ndi ibale a nsômbôl ti man ntômba kiki sesema inyu béba, a nlama lona ñin man ntômba nu a gwé bé lem yo ki yo. 33 A ga bii woo wé i ngii ño u lém i sesema inyu béba, a nol ki yo le i ba sesema inyu béba, i homa ba nôlôl+ bisesema bi ntul i hié. 34 Ni hinoo hié, prisi i ga yoñ ndék matjél mu matjél ma sesema inyu béba, a hoo mo mu bitoñ bi juu li bisesema bi ntul i hié,+ a kôp ki mana matjél momasôna ma ma nyégle isi juu li bisesema. 35 A ga héya mahoñ momasôna, nlélém kiki ba nhéya mahoñ ma man nlôm ntômba nu sesema inyu kôp nsañ; prisi i ga ligis mo i ngii juu li bisesema, i ngii bisesema bi hié+ ba nti inyu Yéhôva; prisi i ga bat ki le Nyambe a kobol nye mu* béba a bi boñ, ha nyen Nyambe a ga nwéhél nye.+

5 “‘Ibale mut* a yé mbôgi i ngim jam, tole a ntehe jam, tole a nok ba mpot jo, a nok ki nlegla le ba nyéñ mut nu a ga bok mbôgi*+ inyu jam li, ndi a yelel bé i jam a nyi, wee a mboñ béba; a ga saa ki inyu hihôha hié.

2 “‘Tole ibale mut* a ntihba to kinje yom nyega, to mim u nuga bikai i i yé nyega, to mim u lém i i yé nyega, to mim u isisii nuga+ i i yé nyega, wee i mut nu a yé nyega; a nkwo ki mbén, to ibale a nyi bé hala. 3 Tole ibale mut a ntihba yom nyega+ i mut binam ibabé le a yi hala, hala wee a tihba to kinje yom i i nla yilha nye nyega, ndi a sôk yi hala, wee a nkwo mbén.

4 “‘Tole ibale mut* a nkum soñ, ibabé le a hek pék, le a ga boñ ngim jam, to li yé lilam to li yé libe, to kinje jam a mpot yaga; ndi i mbus, a nôgda le a nkum soñ ibabé i hek pék, wee a nkwo mbén.*+

5 “‘Ibale a nkwo mbén inyu jam jada munu mam mana, to imbe béba a mboñ, a nlama pahal+ yo. 6 Inyu béba a bi boñ, a ga lona i sesema ini inyu Yéhôva, inyu hô hihôha+ hié: ñin lém u u nlôl mu bémba, hala wee ñin man ntômba tole ñin man kembee; hala a yé sesema inyu béba. I mbus, prisi i ga bat le Nyambe a sañgla ni i mut nu inyu* béba a bi boñ.

7 “‘Ibale a nla bé somb man ntômba, a nlama lona bakukuu iba tole bon ba dibeñ+ iba inyu Yéhôva, le bi ba sesema inyu hô hihôha hié, inyu béba a bi boñ; hibeñ hiada hi ga ba sesema inyu béba, hini hibeñ hipe hi bak sesema i ntul i hié.+ 8 A ga lona dibeñ yak prisi; prisi i ga yoñ ndugi hibeñ hi hi yé sesema inyu béba; prisi i ga kit hio ngodol, ndi a see bañ hio joo jolisôna. 9 A ga nwes ndék matjél ma sesema inyu béba mu pes yada i juu li bisesema, ndi a ga kôp mana matjél momasôna ma ma nyégle isi juu li bisesema.+ Hala a yé sesema inyu béba. 10 Prisi i ga boñ hii hibeñ hipe kiki ba mboñ ni sesema i ntul i hié, kiki mbén+ i nkal. Prisi i ga bat ki le Nyambe a sañgla ni i mut nu inyu* béba a bi boñ; ha nyen Nyambe a ga nwéhél+ nye.

11 “‘Nano ni, ibale a nla bé somb bakukuu iba tole bon ba dibeñ iba, a nlama lona kiki likébla inyu béba yé, kilô yada ni jam*+ i flawa ilam, le i ba sesema inyu béba. A nlama bé kônde môô mu, to ha nunumba mu ngii; inyule hala a yé sesema inyu béba. 12 A ga lona yo yak prisi; prisi i ga hôgôô woo wada mu, kiki yimbne i likébla jolisôna,* prisi i ligis ki jo i ngii juu li bisesema, i ngii bisesema bi hié ba nti inyu Yéhôva. Hala a yé sesema inyu béba. 13 Prisi i ga bat le Nyambe a sañgla ni i mut nu inyu* béba a bi boñ, hala wee béba yada mu bibéba ba mbôk sima, ha nyen Nyambe a ga nwéhél+ nye. I yom i nyégle mu likébla i ga ba inyu prisi,+ nlélém kiki hala a mbôña ni makébla ma bijek.’”+

14 Yéhôva a kônde pôdôs Môsi, a kal nye le: 15 “Ibale mut* a ndogbene Nyambe ndi a boñ béba ngi kôôba, a bôk mbén Yéhôva+ a bi ti inyu gwom gwé bipubhaga; a ga lona inyu Yéhôva: nlôm ntômba mu bémba nu a gwé bé lem yo ki yo, kiki sesema+ inyu hô hihôha hié. Ndamba yé i ga héga ni sékel i silba, inoñnaga ni sékel* i homa mpubhaga.*+ 16 A ga saa ki inyu béba a bi boñ ikolba homa mpubhaga, a kônde ki jôga jada ikété môga matan mu.+ A ga ti gwo prisi, inyu boñ le prisi i bat le Nyambe a sañgla+ ni i mut nu, hala kiki a nti nlôm ntômba kiki sesema inyu hô hihôha; ha nyen Nyambe a ga nwéhél nye.+

17 “Ibale mut* a mboñ béba, ndi a boñ jam jada mu mam Yéhôva a bi kal le mut a nlama bé boñ, to ibale a nyi bé le a mboñ béba, wee a nkwo mbén, a ga saa ki inyu hihôha+ hié. 18 A nlama yoñ nlôm ntômba mu bémba, nu a gwé bé lem yo ki yo, a lona nye yak prisi, kiki sesema inyu hô hihôha;+ ndamba i nlôm ntômba i nlama ba inoñnaga ni ndamba mbén i ntéé. I mut a bi boñ hihôha ngi kôôba, ndi nyemede a yi bé to hala, prisi i ga bat le Nyambe a sañgla ni nye; ha nyen Nyambe a ga nwéhél nye. 19 Hala a yé sesema inyu hô hihôha. Ibabé pééna, i mut nu a nkwo mbén, a nkolba ki Yéhôva.”

6 Yéhôva a kal ki Môsi le: 2 “Ibale mut* a mboñ béba, ndi a ndogbene Yéhôva,+ a teembene ki mut wé libôk inyu yom ba bi ti nye le a tééda,+ tole inyu yom ba bi ti nye kiki bibep, tole ibale a nip yom, tole a yoñ yom i mut wé libôk ni malôga, 3 tole ibale a nléba yom i i nimil, ndi a tembee le a nléba bé yo, ibale a mboñ to kinje béba i i yé kiki bibéba bini, ndi a kum soñ i bitembee,+ lana nyen a nlama boñ: 4 Ibale a bi boñ béba, a kwo ki mbén, a nlama timbis i yom a bi nip tole i yom a bi kadal ni malôga, tole i yom ba bi ti nye le a tééda, tole i yom i bi nimil ndi a léba yo, 5 to kinje yom a bi kum soñ i bitembee, a nlama saa i yom i yosôna,+ a kônde ki jôga jada ikété môga matan mu. A ga timbis i yom i, i moo ma nwet yom i kel béba yé i ga yiba. 6 Inyu hô hihôha hié, a ga lona sesema yé inyu Yéhôva yak prisi, hala wee nlôm ntômba mu bémba nu a gwé bé lem yo ki yo; inyu sesema inyu hô hihôha,+ ndamba i nlôm ntômba i ga ba inoñnaga ni ndamba mbén i ntéé. 7 Prisi i ga ti sesema inyu hô béba i mut nu i bisu bi Yéhôva; ha nyen Nyambe a ga nwéhél+ nye inyu to imbe béba a bi boñ.”

8 Yéhôva a kônde pôdôs Môsi, a kal nye le: 9 “Ti Arôn ni bon bé bôlôm i oda ini: ‘Mbén inyu sesema i ntul i hié+ ini: sesema i ntul hié i ga ba i ngii juu li bisesema u wonsôna letee ni bikegla, ba ga boñ ki le hié hi lém bañ mu ngii juu li bisesema. 10 Prisi i ga haba mbot yé prisi i i yé ni loñge bôñgô,*+ a ga haba ki minkanda mi mi yé ni loñge bôñgô*+ inyu hô nso wé. I mbus, a ga héya libu*+ li bisesema bi ntul i hié, bi hié hi mal ligis mu ngii juu li bisesema, a bii jo ipañ juu. 11 I mbus ha, a ga héya mambot+ mé, a haba mape, a kena ki libu nyoo i mbus liyééne li litén, i homa nu tôbôtôbô.*+ 12 Ba ga koda ki hié le hi loñ mu ngii juu li bisesema. Hi nlama bé lém. Prisi i ga koda hié+ mu ngii hiki kegla, a bii ki sesema i ntul i hié mu ngii, a ligis yak mahoñ ma bisesema inyu kôp nsañ mu ngii hié.+ 13 Ba ga boñ le hié hi loñ mu ngii juu li bisesema ngéda yosôna. Hi nlama bé lém.

14 “‘Nano ni, mbén inyu likébla li bijek+ ini: bon ba Arôn ba ga lona jo i bisu bi Yéhôva, i bisu bi juu li bisesema. 15 Wada wap a ga hôgôô woo wada u flawa ilam ba mbôô ni ndék môô, lôñni nunumba yosôna i i yé mu ngii likébla li bijek, a ligis jo i ngii juu li bisesema; hala a yé sesema i i numb loñge njiñ,* i bak kiki yimbne i likébla jôlisôna* inyu Yéhôva.+ 16 Arôn ni bon bé bôlôm ba ga je i yom i ga yégle.+ Ba ga je yo i homa mpubhaga, i bak kiki bret bi ngi-séñha. Ba ga je yo mu kotoo i ndap libadô i likoda.+ 17 Ba nlama bé boñ yo ni séñha.+ Me mal ti bo yo kiki ngaba yap mu bisesema gwem bi hié.+ I yé yom i nlôôha pubhaga,+ nlélém kiki sesema inyu béba, ni kiki sesema inyu hô hihôha. 18 Hiki man munlôm mu mbôda Arôn a ga je+ yo. Hala a yé ngaba yap i boga ni boga mu tjai tjap tjodisôna, ngaba yap mu bisesema bi hié+ bi Yéhôva. Hiki yom i i ga tihba i bisesema bini i ga yila pubhaga.’”

19 Yéhôva a kal ki Môsi le: 20 “I likébla lini jon Arôn ni bon bé bôlôm ba ga lona inyu Yéhôva, i kel ba ga yilha+ Arôn prisi keñi: kilô yada ni jam*+ i flawa ilam. Hala a yé likébla li bijek+ li ngéda yosôna, pes yada bikegla, ini pes ipe bikôkôa. 21 Ba ga bôô jo ni môô, ba wañ jo ikété flapan.+ Ñ, u ga bôô jo loñge ni môô, u lona likébla li bijek li li yé bikét bikét, li bak mbômôk; hala a yé sesema i i numb loñge njiñ* inyu Yéhôva. 22 I man wé munlôm nu a ga yoñ tel+ yé i prisi keñi a ga boñ nlélém. I litéak lini li ga nom ngéda yosôna: ba ga ligis jolisôna le li ba likébla inyu Yéhôva. 23 Hiki likébla li bijek prisi i nti, ba nlama ligis jolisôna. Ba nlama bé je jo.”

24 Yéhôva a kônde pôdôs Môsi, a kal nye le: 25 “Kal Arôn ni bon bé bôlôm le: ‘Mbén i sesema inyu béba+ ini: i homa ba nôlôl+ bisesema bi ntul i hié, ha nyen ba nlama ki nôlôl sesema inyu béba, i bisu bi Yéhôva. I yé yom i nlôôha pubhaga. 26 I prisi i nti sesema i béba i ga je ngaba yé.+ A ga je yo i homa mpubhaga, mu kotoo i ndap libadô i likoda.+

27 “‘Hiki yom i ntihba minsôn mi sesema i ga yila pubhaga, yak i ngéda mut a ga nwes ndék matjél ma sesema mu mbot yé, u nlama jôwa yo i homa mpubhaga, u boñ nlélém ni yom yosôna i nhooba matjél. 28 Ba nlama bol hibee hi biték i het ba nlémbél sesema. Ndi ibale ba nlémbél yo i hibee hi mamuna, ba nlama se hibee, ba jôwa ki hio ni malép.

29 “‘Hiki mut* nu a yé prisi a ga je yé ngaba i likébla.+ I yé yom i nlôôha pubhaga.+ 30 Ndi ba je bañ sesema inyu béba, ibale ba nyoñ ndék matjél mu, ba kena mo i ndap libadô i likoda inyu hô hihôha i homa mpubhaga.+ Ba nlama ligis yo.

7 “‘Mbén i sesema inyu hô hihôha+ ini: I yé yom i nlôôha pubhaga. 2 Ba ga nol sesema inyu hô hihôha i homa ba nôlôl bisesema bi ntul i hié, ba nlama ki nwes matjél+ mé mu bipes gwobisôna bi juu li bisesema.+ 3 Prisi i ga lona mahoñ+ mé momasôna, hala wee nwel u u gwé mahoñ, mahoñ ma ma nhô minla, 4 ni ditam tjé tjo diba lôñni mahoñ map, ma ma yé bebee ni bôbôk. I ngéda a ga héya ditam,+ a ga héya ki lihoñ li li yé i ngii libaa. 5 Prisi i ga ligis i gwom bi i ngii juu li bisesema le bi ba sesema i hié inyu Yéhôva.+ Hala a yé sesema inyu hô hihôha. 6 Hiki munlôm nu a yé prisi a ga je yo,+ ndi i nlama jéba i homa mpubhaga. I yé yom i nlôôha pubhaga.+ 7 Sesema inyu béba ni sesema inyu hô hihôha bi gwé nlélém mbén: minsôn mi lém ba nti kiki sesema mi ga ba inyu prisi i i nti yo inyu hô béba.*+

8 “‘I ngéda ngim mut i ga ti prisi lém le i lona yo kiki sesema i ntul i hié, koo+ i lém ini i ga ba inyu prisi.

9 “‘Hiki likébla li bijek li ba mbôm i juu, tole li ba nwañ i saspan tole i flapan,+ li ga ba inyu prisi i i nlona jo i bisu bi Nyambe. Ñ, li ga ba jé.+ 10 Ndi makébla ma bijek momasôna ma ma yé mbôôk ni môô,+ tole ma ma yé nnumuk,+ ma ga ba inyu bon bôlôm ba Arôn bobasôna; hiki wada wap a ga bana nlélém ngaba.

11 “‘I mbén ini yon i mut a nlona Yéhôva sesema inyu kôp nsañ+ a nlama noñ: 12 ibale a nlona yo inyu ti mayéga,+ wee sesema inyu kôp nsañ i ga ba sesema inyu ti mayéga. A ga lona yo ni ngiiña bret bi ngi-séñha bi bi yé mbôôk ni môô, ni mimbamba mi biôlô mi ngi-séñha nhook ni môô, lôñni ngiiña bret ba mboñ ni flawa ilam ba mpôdna loñge, i mbus ba bôô yo ni môô. 13 A ga lona likébla jé, ni ngiiña bret bi bi gwé séñha, lôñni sesema inyu kôp nsañ i i yé inyu ti mayéga. 14 Mu likébla li, a ga yoñ bret yada yada mu mintén mi bret mi nwominsôna, le hala a ba ngaba pubhaga inyu Yéhôva; i ngaba ini i ga ba inyu prisi i i nwes matjél ma bisesema inyu kôp nsañ.+ 15 Minsôn mi sesema inyu ti mayéga mi ga jéba i kel a nti yo. A nlama bé tééda yom yo ki yo mu letee ni bikegla.+

16 “‘Ibale sesema i likébla jé i yé likak+ a bi ti tole i yé likébla ñem wé u ntinde nye i ti,+ i ga jéba i kel a nti sesema yé; i yom i ga yégle mu, i ga jéba i kel i noñ ha. 17 Ndi i yom yosôna i ga yégle mu minsôn mi sesema, ba nlama ligis yo+ i hilo hi nyônôs aa. 18 Ndi ibale mut* a nje minsôn mi sesema inyu kôp nsañ i hilo hi nyônôs aa, i mut a nlona yo a ga lémél bé Nyambe. Sesema yé i ga lona bé nye bisai; i yé yom nyega, yak i mut a nje yo a ga saa inyu hihôha+ hié. 19 I minsôn mi ga tihba yom nyega mi ga jéba bé, ba nlama ligis nwo i hié. Hiki mut nu a yé mpubhaga nyen a ga la je minsôn mi mpôp.

20 “‘Nu ni nu* a yé nyega, ndi a je minsôn mi sesema inyu kôp nsañ, i i yé inyu Yéhôva, a nlama nôla.*+ 21 Ibale mut* a ntihba to imbe yom i i yé nyega, hala wee yom nyega i mut binam,+ tole nuga+ i i yé nyega, to imbe yom+ ipe i i yé nyega; ndi a je minsôn mi sesema inyu kôp nsañ, i i yé inyu Yéhôva, i mut nu a nlama nôla.’”*

22 Yéhôva a pôdôs ki Môsi, a kal nye le: 23 “Kal bon ba Israel le: ‘Ni nlama bé je mahoñ+ mo ki mo, to ma nlôm nyaga, to ma man nlôm ntômba, to ma kembee. 24 mahoñ ma nuga i ba nkoba le i nwo, ni mahoñ ma nuga le nuga ipe i nol, ma nla gwéélana inyu mam mape, ndi kekikel ni jek bañ mo.+ 25 Inyule nu ni nu a nje mahoñ ma lém a nti kiki sesema i hié inyu Yéhôva, i mut nu a nlama nôla.*

26 “‘Ni jek bañ matjél+ mo ki mo mu bahoma bobasôna ni nyééne, to matjél ma hinuni, to ma nuga. 27 Nu ni nu* a nje to mambe matjél, a nlama nôla.’”*+

28 Yéhôva a kônde pôdôs Môsi, a kal nye le: 29 “Kal bon ba Israel le: ‘Nu ni nu a nlona Yéhôva sesema yé inyu kôp nsañ, a ga yoñ ndék yom mu, a ti yo Yéhôva+ kiki likébla. 30 A ga lona mahoñ+ ni tôl mu moo mé, a ti gwo kiki sesema i hié inyu Yéhôva, a ga ndéñgés gwo le bi ba likébla ba ndéñgés+ i bisu bi Yéhôva. 31 Prisi i ga ligis mahoñ mu ngii juu li bisesema,+ ndi tôl i ga ba inyu Arôn ni bon bé bôlôm.+

32 “‘Mu bisesema binan inyu kôp nsañ,+ ni ga ti prisi bel walôm le u ba ngaba pubhaga. 33 I man munlôm nu Arôn, nu a ga lona matjél ma bisesema inyu kôp nsañ ni mahoñ mé, nyen ba ga ti bel walôm kiki ngaba+ yé. 34 Inyule mu bisesema inyu kôp nsañ bi bon ba Israel,+ me nyoñ tôl ba nlona kiki likébla ba ndéñgés, ni bel ba nlona kiki ngaba pubhaga, me ti gwo prisi le Arôn ni bon bé bôlôm; i litéak lini li ga nom ngéda yosôna.

35 “‘Hala a bé ngaba i bisesema bi hié inyu Yéhôva, ngaba ba bé bii ipañ inyu biprisi, hala wee inyu Arôn ni bon bé bôlôm, i kel ba bi lona bo le ba gwel nson u prisi inyu Yéhôva.+ 36 Yéhôva a bi ti oda le ba ti bo ngaba ini mu bisesema bi bon ba Israel, i kel ba bi hoo bo.+ I litéak lini li ga nom i boga ni boga mu tjai tjap tjodisôna.’”

37 Hala a yé mbén i sesema i ntul i hié,+ i likébla li bijek,+ i sesema inyu béba,+ i sesema inyu hô hihôha,+ i sesema ba nti inyu téé mut le a gwel nson,+ ni i sesema inyu kôp nsañ,+ 38 kiki Yéhôva a bi kal Môsi i hikôa Sinai+ i kel a bi ti bon ba Israel oda le ba lona Yéhôva makébla map i ñoñ Sinai.+

8 Yéhôva a kônde pôdôs Môsi, a kal nye le: 2 “Yoñ Arôn ni bon bé bôlôm,+ ni mambot+ map, ni môô mapubhaga,+ ni nlôm nyaga nu sesema inyu béba, ni balôm ba mintômba iba, ni sel i bret bi ngi-séñha,+ 3 u kot ki ntôñ wonsôna i lijubul li ndap libadô i likoda.”

4 Môsi a boñ kiki Yéhôva a bi kal, ntôñ wonsôna u kodba i lijubul li ndap libadô i likoda. 5 I mbus, Môsi a kal ntôñ wonsôna le: “Lana nyen Yéhôva a bi kal bés le di boñ.” 6 Ha nyen Môsi a bi tiigaha Arôn ni bon bé, a yoñ ki malép, a nugus bo.+ 7 I mbus ha, a ha Arôn mbôñgô mbot,+ a téñ nye libadô+ i bôbôk, a ha nye mbôñgô mbot umpe u u gwé bé binam,+ a ha ki nye éfôd,*+ a téñ nye mbagak ngôli*+ u éfôd inyu nit yo. 8 A ha ki nye hultôl,+ a bii yak Urim ni Tumim*+ ikété hultôl. 9 I mbus, a téñ nye yañsi+ mu ño wé; mu ngii yañsi, a bii hibambha hi gôl hi hi mbai, hibambha hi gôl hipubhaga,*+ kiki Yéhôva a bi kal Môsi.

10 Môsi a yoñ ni môô mapubhaga, a hoo mo mu lap, ni mu gwom gwobisôna bi bé mu,+ inyu yilha gwo bipubhaga. 11 I mbus, a yoñ ndék môô mu, a nwes mo ngélé isaambok mu juu li bisesema, a hoo juu li bisesema môô, ni bisélél gwé gwobisôna, ni bômbôô pan lôñni tééne yé, inyu yilha gwo bipubhaga. 12 I mbus, a kôp ndék môô mapubhaga mu ño Arôn, a hoo ki nye inyu yilha nye+ mpubhaga.

13 Môsi a tiigaha yak bon bôlôm ba Arôn, a ha bo mimbôñgô mi mambot, a téñ bo mabadô i bôbôk, a ha ki bo+ dikôtô, kiki Yéhôva a bi kal nye.

14 I mbus ha, a tiigaha nlôm nyaga wada, le a ba sesema inyu béba; ha nyen Arôn ni bon bé bôlôm ba bi bii moo map i ngii ño u nlôm nyaga nu sesema i béba.+ 15 Môsi a nol nlôm nyaga, a yoñ matjél+ ni hinoo hié, a ha mo mu bitoñ gwobisôna bi juu li bisesema, a yilha juu li bisesema lipubhaga, ndi a kôp mana matjél momasôna ma nyégle i ngii juu li bisesema, inyu yilha jo lipubhaga, kayéle mu ngii juu nyen ba bôñôl bisesema inyu hô hihôha. 16 I mbus ha, Môsi a yoñ mahoñ momasôna ma ma bé mu minla, lihoñ li li yé i ngii libaa, ni ditam tjé tjo diba lôñni mahoñ map, a ligis gwo i ngii juu li bisesema.+ 17 A yoñ i bipes bi nlôm nyaga bi bi yégle, hala wee koo yé, ni minsôn nwé, ni tjibi tjé, a ligis gwo ni hié nyoo i mbus liyééne+ li litén, kiki Yéhôva a bi kal Môsi.

18 Nano ni, a tiigaha nlôm ntômba nu sesema i ntul hié, Arôn ni bon bé bôlôm ba bii moo map i ngii ño u nlôm ntômba.+ 19 Môsi a nol nlôm ntômba, a nwes ki matjél mu bipes gwobisôna bi juu li bisesema. 20 Môsi a kit nlôm ntômba; i mbus, a yoñ ño, ni bipes gwé, ni mahoñ ma ma nkéña ditam, a ligis gwo. 21 Môsi a jôwa minla ni makôô* ma lém, a ligis nlôm ntômba nyensôna mu ngii juu li bisesema. Hala a bé sesema i ntul i hié i i numb loñge njiñ.* Hala a bé sesema i hié inyu Yéhôva, kiki Yéhôva a bi kal Môsi.

22 A témb a tiigaha nlôm ntômba nu yônôs iba, nlôm ntômba ba ngwélél inyu téé bo le ba gwel nson prisi,+ Arôn ni bon bé bôlôm ba bii moo map i ngii ño+ u nlôm ntômba. 23 Môsi a nol nlôm ntômba, a yoñ ndék matjél mu matjél mé, a ha mo i hipét hi ôô walôm u Arôn, ni i nlôm hinoo nu woo wé walôm, ni i nlôm hinoo nu kôô wé walôm. 24 Môsi a tiigaha bon bôlôm ba Arôn, a ha ndék matjél i hipét hi ôô wap walôm ni i nlôm hinoo nu woo wap walôm, ni i nlôm hinoo nu kôô wap walôm; Môsi a nwes ki mana matjél ma nyégle mu bipes gwobisôna bi juu li bisesema.+

25 I mbus, a yoñ mahoñ ma nlôm ntômba, hala wee mahoñ ma nwel, ni mahoñ momasôna ma ma nhô minla, ni lihoñ li li yé i ngii libaa, yak ditam tjé tjo diba lôñni mahoñ map, ni bel walôm.+ 26 Mu sel i bret bi ngi-séñha i i bé i bisu bi Yéhôva, a yoñ ngiiña bret yada i ngi-séñha,+ ni ngiiña bret yada ba mbôô ni môô,+ ni mbamba ôlô wada. A bii gwo i ngii mahoñ ni i ngii bel walôm. 27 I mbus ha, a ha gwobisôna i moo ma Arôn ni i moo ma bon bé bôlôm, a kahal ndéñgés gwo le bi ba likébla ba ndéñgés i bisu bi Yéhôva. 28 Ha nyen Môsi a bi héya gwo i moo map, a ligis gwo mu ngii juu li bisesema, hala wee i ngii sesema i ntul i hié. Hala a bé sesema ba nti inyu téé bo le ba gwel nson, i numbuk loñge njiñ.* Hala a bé sesema i hié inyu Yéhôva.

29 Môsi a yoñ ki tôl i nlôm ntômba, a ndéñgés yo le i ba likébla ba ndéñgés i bisu bi Yéhôva.+ I ngaba ba nyôñôl mu nlôm ntômba ba ngwélél inyu téé bo le ba gwel nson u prisi, yon i bé ngaba i Môsi,+ kiki Yéhôva a bi kal nye.

30 I mbus ha, Môsi a yoñ ndék môô mapubhaga+ ni ndék matjél ma ma bé mu juu li bisesema, a nwes mo i ngii Arôn ni mambot mé, yak i ngii bon bé bôlôm lôñni mambot map. Hala nyen a bi pubus Arôn ni mambot mé, yak bon bé bôlôm+ ni mambot+ map.

31 Ha nyen Môsi a bi kal Arôn ni bon bé bôlôm le: “Ni lamb+ minsôn i lijubul li ndap libadô i likoda, ha nyen ni ga je nwo, lôñni bret i i yé mu sel ba ngwélél inyu téé bé le ni gwel nson u prisi, kiki Nyambe a bi kal me le: ‘Arôn ni bon bé bôlôm bon ba ga je nwo.’+ 32 I gwom bi nyégle mu minsôn ni mu bret, ni ga ligis+ gwo. 33 Dilo disaambok, ni nlama bé ke haa ni lijubul li ndap libadô i likoda, letee dilo inyu téé bé mu nson nan prisi, di tagbe; inyule i mbéda dilo disaambok inyu téé bé mu nson nan u prisi.*+ 34 Yéhôva a bi ti oda le di boñ i mam di mboñ len, le ndi a sañgla ni bé.*+ 35 Ni ga yén i lijubul li ndap libadô i likoda dilo disaambok,+ juu ni njamuha, n’a yônôs ki nson nan inyu Yéhôva,+ le ndi ni wo bañ; inyule hala nyen Nyambe a bi kal me.”

36 Arôn ni bon bé bôlôm ba bi boñ i mam momasôna Yéhôva a bi kal bo le ba boñ ni njel Môsi.

9 I hilo hi nyônôs juem,+ Môsi a sébél Arôn ni bon bé bôlôm lôñni mimañ mi Israel. 2 A kal Arôn le: “Yoñ man nyaga le a ba sesema inyu béba,+ ni nlôm ntômba inyu sesema i ntul i hié, bi bana bañ lem yo ki yo; lona gwo i bisu bi Yéhôva. 3 Ndi u ga kal bon ba Israel le: ‘Yoña nlôm kembee* le a ba sesema inyu béba, yoña ki man nyaga lôñni man nlôm ntômba inyu sesema i ntul i hié, hiki lém i nlama bana nwii wada, i bana bañ lem yo ki yo, 4 yak nlôm nyaga ni nlôm ntômba inyu bisesema inyu kôp nsañ,+ kayéle ni ti gwo le bi ba sesema i bisu bi Yéhôva, lôñni likébla li bijek+ li li yé mbôôk ni môô, inyule i len ini, Yéhôva a ga pémél bé.’”+

5 Jon ba bi yoñ i gwom Môsi a bi kal bo, ba lona gwo i bisu bi ndap libadô i likoda. Ha nyen likoda jolisôna li bi tiige bebee, li telep i bisu bi Yéhôva. 6 Môsi a kal ni le: “Lana nyen Yéhôva a nkal le ni boñ, le ndi Yéhôva a unda bé+ lipém jé.” 7 I mbus, Môsi a kal Arôn le: “Tiige bebee ni juu li bisesema, u ti sesema yoñ inyu béba+ ni sesema yoñ i ntul i hié, u ti ki sesema inyu hô bibéba gwoñ wemede+ ni bi lihaa joñ;* I mbus ha, u ti likébla li litén,+ u ti ki sesema inyu hô bibéba gwap,+ kiki Yéhôva a bi kal.”

8 Kunda yada, Arôn a tiige bebee ni juu li bisesema, a nol man nyaga nu sesema inyu béba, nu a bé inyu yé nyemede.+ 9 Ha nyen bon bôlôm ba Arôn ba bi lona nye matjél,+ a tjak hinoo hié mu matjél, a ha mo mu bitoñ bi juu li bisesema, a kôp ki mana matjél momasôna ma nyégle isi juu li bisesema.+ 10 A yoñ mahoñ, ni ditam lôñni lihoñ li yé i ngii libaa i sesema inyu béba, a ligis gwo mu ngii juu li bisesema, kiki Yéhôva a bi kal Môsi.+ 11 Ndi a ligis minsôn ni koo i mbus liyééne+ li litén.

12 I mbus, Arôn a nol lém i sesema i ntul i hié; bon bé bôlôm ba lôôs nye matjél, a nwes mo mu bipes gwobisôna bi juu li bisesema.+ 13 Ba lôôs ki nye bipes bi lém i sesema i ntul i hié lôñni ño u lém, a ligis gwo mu ngii juu li bisesema. 14 I mbus, a jôwa minla ni makôô* ma lém, a ligis gwo i ngii sesema i ntul i hié, mu ngii juu li bisesema.

15 I mbus ha, a lona likébla inyu béba i litén, a yoñ nlôm kembee,* sesema inyu béba i i bé inyu litén, a nol nye, a gwélél nye le a ba sesema inyu béba, kiki a bi boñ ni lém bisu. 16 A lona ki lém i sesema i ntul i hié, a boñ kiki mbén i bé kal.+

17 Handugi sesema i ntul i hié i bikegla,+ a lona ki likébla li bijek:+ a hôgôô woo wada mu, a ligis jo mu ngii juu li bisesema.

18 I mbus mam mana, Arôn a nol nlôm nyaga ni nlôm ntômba, bi bi bé sesema inyu kôp nsañ i i bé inyu litén. Ha nyen bon bé bôlôm ba bi lôôs nye matjél ma bilém, a nwes mo mu bipes gwobisôna bi juu li bisesema.+ 19 Ba yoñ ki mahoñ ma nlôm nyaga,+ ni mahoñ ma nwel u nlôm ntômba, ni mahoñ ma ma nhô gwom bi kété, ni ditam, ni lihoñ li li yé i ngii libaa,+ 20 ba bii i mahoñ mana momasôna i ngii tôl i bilém; i mbus, a ligis i mahoñ mana mu ngii juu li bisesema.+ 21 Ndi Arôn a ndéñgés tôl ni bel walôm le bi ba likébla li ba ndéñgés i bisu bi Yéhôva, kiki Môsi a bi kal.+

22 Ha ni nyen Arôn a bi nun litén, a pa moo i ngii, a sayap ki jo;+ kiki a bi mal ti sesema inyu béba, sesema i ntul i hié, ni bisesema inyu kôp nsañ, a sôs. 23 Sôk i nsôk, Môsi bo Arôn ba jôp i ndap libadô i likoda; i mbus, ba pam, ba sayap ki litén.+

Ha nyen Yéhôva a bi unda litén+ jolisôna lipém jé, 24 yak hié hi lôl yak Yéhôva,+ hi bôdôl ligis lém i sesema i ntul i hié, ni mahoñ ma ma bé mu ngii juu li bisesema. I ngéda bôt bobasôna ba litén ba bi tehe hala, ba kahal lond, ba ôm maboñ ’isi, ba ôm ki mbom ’isi.+

10 I mbus ngéda, bon bôlôm ba Arôn le Nadab ni Abihu,+ hiki wada wap a yoñ yé yé beglene i hié, ba ha hié mu, ba ha yak binjinjiñ+ mu. I mbus, ba kuye hié+ ba bééna bé kunde i kuye i bisu bi Yéhôva, hi a bi kal bé bo le ba kuye. 2 Ha nyen hié hi bi lôl yak Yéhôva, hi ligis bo,+ ba wo i bisu bi Yéhôva.+ 3 Môsi a kal ni Arôn le: “Lana nyen Yéhôva a bi kal: ‘I bôt ba nlo i bisu gwem+ ba nlama bigda le me yé mpubi, m’a kôhna ki lipém i bisu bi litén jolisôna.’” Arôn a yén nwee.

4 Ha nyen Môsi a bi sébél Misael bo Élizafan, bon bôlôm ba Uziel,+ manyañ isañ Arôn, a kal bo le: “Lona hana, ni begee lôkisoñ nan, ni kena bo nyoo i mbus liyééne li litén, haa ni homa mpubhaga.” 5 Jon ba bi tiige bebee, ba begee i bôlôm bana, ba bak ba ngi hééba mambot map ma prisi, ba kena bo i ngim homa a bé i mbus liyééne li litén, kiki Môsi a bi kal bo.

6 I mbus, Môsi a pôdôs Arôn ni bana bon bé bôlôm bape, hala wee Éléazar bo Itamar, a kal bo le: “Ni nwas bañ le tjôñ dinan di put, ni pat bañ to mambot+ manan, le ndi ni wo bañ, ni le Nyambe a unbene bañ ntôñ wonsôna. Lôkisoñ nan munu litén li Israel jolisôna yon i ga ee i bôt Yéhôva a nol ni hié. 7 Ni nlama bé ke haa ni lijubul li ndap libadô i likoda, tiga le ni wo, inyule môô mapubhaga* ma Yéhôva ma yé i ngii nan.”+ Jon ba bi boñ kiki Môsi a bi kal.

8 Ha nyen Yéhôva a bi kal Arôn le: 9 “Ilole we ni bon boñ bôlôm ni njôp i ndap libadô i likoda,+ ni nyok bañ wai, to maok mo ki mo, le ndi ni wo bañ. I litéak lini li ga nom i boga ni boga mu tjai dinan tjodisôna. 10 Hala a yé inyu boñ maselna ipôla yom ipubhaga ni yom i ta bé pubhaga, ipôla yom i yé nyega ni yom i yé pubi,+ 11 ni inyu niiga Lôk Israel matiñ momasôna Yéhôva a bi kal bo ni njel Môsi.”+

12 Môsi a pôdôs Arôn, lôñni Éléazar bo Itamar, bon bé bôlôm ba ba bi yégle, a kal bo le: “Yoña i yom i nyégle mu likébla li bijek li bisesema bi hié ba nti inyu Yéhôva, ni boñ bret bi ngi-séñha, ni je gwo ipañ juu li bisesema,+ inyule hala a yé yom i nlôôha pubhaga.+ 13 Ni nlama je i likébla lini i homa a yé mpubhaga,+ inyule ngaba yoñ i, i yé ki ngaba i bon boñ bôlôm, i i nlôl mu sesema i hié ba nti inyu Yéhôva; i oda ini yon Nyambe a bi ti me. 14 We ni bon boñ bôlôm lôñni bon boñ bôda, ni ga je lém i likébla ba ndéñgés, ni je ki bel u ngaba pubhaga+ i homa nu a yé tôbôtôbô; inyule ngaba yoñ i, i yé ki ngaba i bon boñ bôlôm,+ i i nlôl mu bisesema inyu kôp nsañ bi bon ba Israel. 15 Ba ga yoñ bel u ngaba pubhaga lôñni tôl i likébla ba ndéñgés, ba lona gwo lôñni mahoñ ma bilém ba nti mu bisesema bi hié, inyu boñ le ba ndéñgés likébla ba ndéñgés i bisu bi Yéhôva; hala a ga yila ngaba yoñ, hala a yé ki ngaba i bon boñ bôlôm+ i boga ni boga, kiki Yéhôva a bi kal.”

16 I mbus, Môsi a yéñ le a yi i yom ba bi boñ ni kembee i sesema inyu béba,+ ndi a léba le ba mal ligis yo. Ha nyen a bi unbene Éléazar ni Itamar, bon bôlôm ba Arôn ba ba bi yégle, a kal bo le: 17 “Inyuki ni nje bé lém i sesema inyu béba i homa mpubhaga?+ Ngo i yé yom i nlôôha pubhaga, ba bi ti ki bé yo le ni begee hihôha hi ntôñ wonsôna, inyu hô hihôha hiap* i bisu bi Yéhôva. 18 Ndi nuna-ki! Mut to wada a njôbna bé matjél ma sesema i homa mpubhaga,+ ni lamga yaga jél yo i homa mpubhaga, kiki Nyambe a bi kal me.” 19 Arôn a timbhe Môsi le: “Emble: i len ini, ba nlona sesema yap inyu béba, ni sesema yap i ntul i hié i bisu bi Yéhôva.+ Kiki i mam mana ma bak ma kwél me, ibale me je sesema inyu béba len, baa ki hala a nlémél Yéhôva?” 20 I ngéda Môsi a bi nok hala, ndimbhe yé i lémél nye.

11 I mbus, Yéhôva a kal Môsi bo Arôn le: 2 “Kal bon ba Israel le: ‘Ikété binuga* bi bi niñ hana ’isi, bini binuga gwon ni nla je:+ 3 hiki nuga i i gwé pal yosôna nkanak, i tiimbaga nyambaa bijek, yon i nla jéba.

4 “‘Ndi ikété binuga bi bi ntiimba nyambaa bijek, tole bi bi gwé nkanak pal, bini binuga gwon ni nlama bé je: kamél, inyule to hala kiki hi ntiimba nyambaa bijek, hi gwé bé nkanak pal; jon i yé nyega inyu nan.+ 5 Ni je bañ to yogi,+ inyule to hala kiki i ntiimba nyambaa bijek, i gwé bé nkanak pal; jon i yé nyega inyu nan. 6 Ni je bañ to hiséé hi bakana, inyule to hala kiki i ntiimba nyambaa bijek, i gwé bé nkanak pal; jon hi yé nyega inyu nan. 7 Ni je bañ to ngôi,+ inyule to hala kiki pal yé yosôna i yé nkanak, i ntiimba bé nyambaa bijek; jon i yé nyega inyu nan. 8 Ni nlama bé je minsôn nwap, to tihba mim nwap. Bi yé nyega inyu nan.+

9 “‘Ikété gwom gwobisôna bi niñil ikété malép, bini gwon ni nla je: hiki yom* i i gwé mapabi ni maloi,* to i yé ikété batuye, to ikété balom, ni nla je+ yo. 10 Ndi ikété disisii di binuga, ni ikété binuga bipe gwobisôna bi bi niñ ikété malép, hiki yom i i gwé bé mapabi, to maloi,* i niñik ikété batuye tole balom, i yé yom nyega inyu nan. 11 Ñ, bi yé nyega inyu nan, ni je bañ minsôn+ nwap, ni tihba bañ to mim nwap. 12 Hiki yom i i gwé bé mapabi to maloi,* i niñik ikété batuye tole balom, i yé yom nyega inyu nan.

13 “‘I bihégél bini bi mpuue gwon bi ga ba nyega inyu nan; bi nlama bé jéba, inyule bi yé nyega: nyôgôl,+ ndôi, hinda yuñ,+ 14 hibam, ntén pôndôl wonsôna, 15 ntén boboñ wonsôna, 16 njok hinuni, ngañ-njok, lolo tuye, ntén kukumba wonsôna, 17 likuñ, kôp lép, likuñ li li gwé mimbôñgô mi maôô, 18 libaléñ, lolo lom, yuñ, 19 nyodol lom, ntén nyodol wonsôna, beñ-kôi, ni nleem. 20 Hiki tandi* i i nke ni makôô ma-na i yé yom nyega inyu nan.

21 “‘Ikété bitandi* bi bi nke ni makôô ma-na, ni nla ndik je bi bi gwé makôô ima ma ma yé mimbôñgô iloo mana mape, ma hôlga ki bo i pind munu ’isi. 22 Bini gwon ni nla je: ntén tandi wonsôna, ntén nkôlô+ wonsôna, ni ntén ndééñga wonsôna. 23 Ndi bitandi* bipe gwobisôna bi bi gwé makôô ma-na, bi yé yom nyega inyu nan. 24 I gwom bi gwon bi ga yilha bé nyega. Nu ni nu a ga tihba mim nwap a ga ba nyega letee ni bikôkôa.+ 25 Tonjee a mbegee mim nwap a nlama jôwa mambot+ mé; a ga ba nyega letee ni bikôkôa.

26 “‘Hiki nuga i i gwé nkanak pal, ndi pal yé i bak bé nkanak yosôna, nuga i i ntiimba bé ki to nyambaa bijek, i yé nyega inyu nan. Nu ni nu a ga tihba yo a ga ba nyega.+ 27 Ikété binuga gwobisôna bi nke ni makôô ma-na, hiki nuga i i gwé mabo i yé nyega inyu nan. I mut a ntihba mim nwap a ga ba nyega letee ni bikôkôa. 28 I mut a mbegee mim nwap a nlama jôwa mambot+ mé, a ga ba ki nyega letee ni bikôkôa.+ I binuga bi, bi yé nyega inyu nan.

29 “‘Ikété disisii di binuga hana ’isi, dini tjon di yé nyega inyu nan: ndimpô, tôlô,+ ntén ngôdô wonsôna, 30 njéé libap, ngômb, bamkogoo, nsoboñgo, yôñgôô. 31 I disisii di binuga di tjon di yé nyega inyu nan.+ I mut a ga tihba mim nwap a ga ba nyega letee ni bikôkôa.+

32 “‘Nano ni, ibale mim nwap mi nkwél ngim yom, to sélél i i yé ni kék, to mbot, to koo, to nsugut, wee i yom i, i ga ba nyega. Ibale i nkwél to imbe sélél mut a ngwélél, ba nlama ha i sélél i ikété malép, i ga ba nyega letee ni bikôkôa; i mbus ha nyen i ga pôp. 33 Ibale mim nwap mi nkwél hibee hi biték, ni ga nyugut hio, yak i gwom gwobisôna bi yé mukété bi ga ba nyega.+ 34 I bijek gwobisôna bi ntihba malép ma ma nlôl mu hibee hi, bi ga ba nyega; yak i yom yosôna mut a nyo i i yé mu hibee hi, i ga ba nyega. 35 I yom yosôna mim nwap mi nkwél, i ga ba nyega. To ibale juu li, tole judga,* ba nlama nyugut jo. Bi yé nyega, bi ga ba ki nyega inyu nan. 36 Ndik lingen ni bee malép gwon bi ga yégle bipubi ibale mim nwap mi nkwo mu, ndi nu ni nu a ga tihba mim nwap a ga ba nyega. 37 Ibale mim nwap mi nkwél mbôô ba nlama bel, wee mbôô ini i yé pubi. 38 Ibale ba nkôp malép mu mbôô, ndi mim nwap mi tihba* yo, wee mbôô ini i yé nyega inyu nan.

39 “‘Nano ni, ibale nuga ni nla nje i nwo, i mut a ntihba mim wé, a ga ba nyega letee ni bikôkôa.+ 40 I mut a ga je yom mu mim wé, a nlama jôwa mambot mé, a ga ba ki nyega letee ni bikôkôa.+ I mut a ga begee mim wé, a nlama jôwa mambot mé, a ga ba ki nyega letee ni bikôkôa. 41 Disisii di binuga tjodisôna di di mbôl hana ’isi, di yé gwom bi nyega;+ di nlama bé jéba. 42 Ni nlama bé je nuga yo ki yo i i ñôdba ’isi, to nuga yo ki yo i i nke ni makôô ma-na, to isisii nuga yo ki yo i i mbôl hana ’isi, i ban-ga ngandak makôô, inyule bi yé gwom bi nyega.+ 43 Isisii nuga yo ki yo i yilha bañ bé* nyega, i hindis bañ to bé, le i yilha bé nyega.+ 44 Inyule men me yé Yéhôva Nyambe+ nan, ni nlama pubus bébomede, le ndi ni ba bapubhaga,+ inyule memede me yé Numpubi.+ Jon disisii di binuga tjodisôna di di ñond munu ’isi, bi nlama bé yilha bé nyega. 45 Inyule men me yé Yéhôva, men me bi nyodna bé i loñ Égiptô inyu unda bé le men me yé Nyambe;+ ni nlama ba bapubhaga+ inyule me yé Numpubi.+

46 “‘I mbén ini yon i yé inyu binuga bi bi gwé makôô ma-na, bihégél bi bi mpuue, ni hiki nuga i i niñil ikété malép, lôñni hiki isisii nuga i i mbôl munu ’isi, 47 inyu boñ maselna ipôla yom i yé nyega ni yom i yé pubi, ipôla binuga bi nla jéba ni bi bi nlama bé jéba.’”+

12 Yéhôva a kal ki Môsi le: 2 “Kal bon ba Israel le: ‘Ibale muda a yé jém,* ndi a gwal man munlôm, a ga ba nyega dilo disaambok, nlélém kiki a yé nyega i ngéda a nkon sôñ.+ 3 I hilo hi nyônôs juem nyen ba ga kwee+ man. 4 Mu 33 dilo di di noñ ha, muda a ga ke ni bisu i pubus nyemede inyu matjél a nimis. A nlama bé tihba yom ipubhaga yo ki yo, a nlama bé to jôp i homa mpubhaga, letee a mélés dilo tjé inyu ba mapubi i bisu bi Nyambe.

5 “Ibale a ngwal man muda, a ga ba nyega 14 dilo, nlélém kiki a yé nyega i ngéda a nkon sôñ. Mu 66 dilo di di noñ ha, muda a ga ke ni bisu i pubus nyemede inyu matjél a nimis. 6 To man munlôm, to man muda nyen a ngwal, i ngéda dilo tjé inyu ba mapubi i bisu bi Nyambe di ga tagbe,+ a ga yoñ man nlôm ntômba nu a ngi yii mu nwii wé u bisu kiki sesema i ntul i hié; a ga yoñ ki man hibeñ tole kukuu wada kiki sesema inyu béba, a lona gwo prisi, i lijubul li ndap libadô i likoda. 7 Prisi i ga lona gwo i bisu bi Yéhôva, a pubus* muda i bisu bi Nyambe, ha nyen a ga pubhana inyu matjél a nimis. I mbén ini yon muda a ngwal man munlôm tole man muda a nlama noñ. 8 Ndi ibale a nla bé somb man ntômba, a ga lona bakukuu iba tole bon ba dibeñ iba,+ wada inyu sesema i ntul i hié, nuu numpe a bak sesema inyu béba; i mbus, prisi i ga pubus* muda i bisu bi Nyambe, ha nyen a ga ba mpubhaga.’”

13 Yéhôva a kônde pôdôs Môsi bo Arôn, a kal bo le: 2 “Ibale mut a gwé libibi mu kôgôô yé,* mbaage, tole libéi, ni le hala a nla yila lô*+ mu kôgôô yé, ba nlama kena nye yak prisi le Arôn, tole yak man wé munlôm wada mukété biprisi.+ 3 Prisi i ga béñge homa a nta mu kôgôô yé. Ibale mahuu ma ma yé ha homa a nta ma nyila bipuba, yak homa a nta a mpidbe* mu kôgôô, wee lô i. Prisi i ga béñge i homa nu, a kal le i mut nu a yé nyega. 4 Ibale libéi li yé puba, ndi li mpidbe bé mu kôgôô, yak mahuu ma yila bé bipuba, prisi i ga bii i mut nu i kat dilo disaambok.+ 5 Prisi i ga béñge nye i hilo hi nyônôs isaambok: ibale a ntehe le homa a nhéñha bé, to nyandla a nyandla bé mu kôgôô, prisi i ga témb i bii nye i kat dilo dipe disaambok.

6 “Prisi i ga tiimba béñge nye i hilo hi nyônôs isaambok: ibale homa a nta a nkahal mal, to nyandla a nyandla bé mu kôgôô, prisi i ga kal le a yé mpubhaga;+ wee mbaage ndik i. I mut nu a ga jôwa mambot mé, ha nyen a ga yila mpubhaga. 7 Ibale prisi i mal kal le a yé mpubhaga, ndi mbaage* i yiga nyandla mu kôgôô yé, wee a ga témb* yak prisi. 8 Prisi i ga béñge mbaage: ibale i nyandla mu kôgôô yé, prisi i ga kal le i mut nu a yé nyega; wee lô+ i.

9 “Ibale mut a nkon lô, ba nlama kena nye yak prisi. 10 Prisi i ga béñge nye:+ ibale libibi mu kôgôô yé li yé puba, li boñ ki le mahuu mé ma yila puba, yak poo+ i nene ha homa libibi, 11 hala a yé lô i i mal bé* mu kôgôô yé; prisi i ga kal le i mut nu a yé nyega. Nseñ u ta ha bé le a bii nye i kat,+ inyule a yé nyega. 12 Ibale lô i mpam mut mu kôgôô yé yosôna, ibôdôl i ño ipam i makôô, inoñnaga ni yom prisi i nla tehe; 13 i ngéda prisi i mbéñge, ndi a tehe le lô i nhô kôgôô yé yosôna, ha nyen prisi i ga kal le i mut nu a yé mpubhaga.* Kiki kôgôô yé yosôna i ntémb i yila puba, wee a yé mpubhaga. 14 Ndi ibale poo i nene mu kôgôô yé, a ga ba nyega. 15 I ngéda prisi i ga tehe poo, a ga kal le i mut nu a yé nyega.+ Poo i yé nyega; lô+ i. 16 Ndi ibale poo i ntémb i yila puba, i mut nu a ga témb yak prisi. 17 Prisi i ga béñge nye:+ ibale homa a nta a nyila puba, prisi i ga kal le i mut nu a yé mpubhaga. Ñ, a yé mpubhaga.

18 “Ibale jot li mpam mut mu nyuu* yé, ndi i mbus, li mal, 19 ndi ha homa jot li bak, libibi tole libéi li pam, li bak puba, li kôibak, i mut nu a nlama ke yak prisi. 20 Prisi i ga béñge libéi:+ ibale li mpidbe mu kôgôô, yak mahuu ma yila puba, ha nyen prisi i ga kal le i mut nu a yé nyega; wee lô i yon i mpémél mu jot. 21 Ibale prisi i mbéñge libéi, ndi a tehe le i homa nu a gwé bé bipuba bi mahuu, a mpidbe bé to mu kôgôô, ndi homa a nkahal mal; ha nyen prisi i ga bii i mut nu i kat dilo disaambok.+ 22 Ndi ibale libéi li nyandla yaga mu kôgôô, prisi i ga kal le i mut nu a yé nyega; wee lô i. 23 Ndi ibale libéi li nhéñha bé, to nyandla li nyandla bé, wee jot li jon li mpam; ha nyen prisi i ga kal le i mut nu a yé mpubhaga.+

24 “Tole ibale mut a gwé ndôndôô inyule hié hi bi ligis nye, ni le minsôn mi mi yé ha ndôndôô mi nyila libéi li li yé puba, li kôibak ki, tole li bak ndik puba; 25 prisi i ga béñge jo. Ibale mahuu ma ma yé mu libéi ma nyila puba, ni le libéi li mpidbe ki mu kôgôô, wee lô i yon i mpémél mu ndôndôô. Prisi i ga kal le i mut nu a yé nyega; lô i. 26 Ibale prisi i mbéñge libéi, ndi a tehe le i mahuu ma yé mu libéi ma ta bé bipuba, ni le libéi li mpidbe bé to mu kôgôô ndi li yé bebee ni mal, ha nyen prisi i ga bii i mut nu i kat dilo disaambok.+ 27 Prisi i ga tiimba béñge nye i hilo hi nyônôs isaambok; ibale libéi li nyandla mu kôgôô, ha nyen prisi i ga kal le i mut nu a yé nyega; wee lô i. 28 Ndi ibale libéi li nhéñha bé, to nyandla li nyandla bé mu kôgôô, ndi li yé bebee ni mal, wee hala a yé ndik libibi mu ndôndôô. Prisi i ga kal le i mut nu a yé mpubhaga, inyule ndôndôô yon i mbet* ha homa nu.

29 “Ibale yom i nta munlôm tole muda i ño tole i jas, 30 prisi i ga béñge homa a nta:+ ibale a mpidbe mu kôgôô, ni le mahuu ma ma yé ha homa nu ma yé maô-maô, ma bak ndék, prisi i ga kal le i mut nu a yé nyega; wee hikumla hi.* Hala a yé lô i ño, tole lô i jas. 31 Ndi ibale prisi i ntehe le i homa a nta a mpidbe bé to mu kôgôô, a gwé bé to mahuu ma ma nhénd, prisi i nlama bii i mut nu i kat dilo disaambok.+ 32 Prisi i ga tiimba béñge i homa a nta i hilo hi nyônôs isaambok: ibale homa a nta a nyandla bé, to mahuu ma ma yé maô-maô ma bak bé mu, ni le a mpidbe bé to mu kôgôô, 33 i mut nu a nlama homb ño wé tole jas jé, ndi a ga homb bé homa a nta. I mbus, prisi i ga bii i mut nu i kat dilo disaambok.

34 “Prisi i ga tiimba béñge homa a nta i hilo hi nyônôs isaambok: ibale homa nu ño a nta, tole nu jas a nyandla bé mu kôgôô, a mpidbe bé ki to mu kôgôô, prisi i ga kal le i mut nu a yé mpubhaga; i mut nu a nlama jôwa mambot mé, ha nyen a ga ba mpubhaga. 35 Ndi ibale homa a nta a nyandla mu kôgôô, i ngéda ba mal kal le i mut nu a yé mpubhaga, 36 prisi i ga béñge nye, ibale homa a nta a nyandla mu kôgôô, nseñ u ta ha bé le prisi i yéñ mahuu ma ma yé maô-maô; i mut nu a yé nyega. 37 Ibale a mbéñge ndi a léba le homa a nta a nyandla bé, ni le mahuu ma ma nhénd ma mpam ha homa nu, wee homa a nta a mal. I mut nu a yé mpubhaga, yak prisi i ga kal le a yé mpubhaga.+

38 “Ibale mabéi ma nyandla mu kôgôô i munlôm tole i muda,* ni le i mabéi mana ma yé puba, 39 prisi i ga béñge mo:+ ibale mabéi ma ma yé mu kôgôô ma nkahal mal, ma bak bipuba, wee kôgôô ndik yon i nkumbi. I mut nu a yé mpubhaga.

40 “Ibale mut a gwé ha bé tjôñ mu ño, ndi a bana liseha, a yé mpubhaga. 41 Ibale a gwé ha bé tjôñ i mbom ni i mapañ ma mbom, ndi a bana mahai, a yé mpubhaga. 42 Ndi ibale a gwé poo mu liseha, tole mu mahai, wee lô i yon i mpam mu ño wé tole mu mahai mé. 43 Prisi i ga béñge nye, ndi ibale libibi li li yé puba, li kôibak, li mpam mu liseha jé tole mu mahai mé, li bak kiki lô mu kôgôô yé, 44 wee a yé mut lô. A yé nyega, prisi i nlama kal le a yé nyega inyule lô i yé mu ño wé. 45 Mambot ma mut a nkon lô ma nlama ba bipéda bi mambot, yak tjôñ tjé di nlama ba mpuduk; a nlama hô nyo wé,* a londok le: ‘Me yé nyega, me yé nyega!’ 46 A ga ba nyega ntel wonsôna a gwé i kon u. Kiki a yé nyega, a ga niñ haa ni bana bôt bape. A ga yén i mbus liyééne+ li litén.

47 “Ibale mbot i gwé lô, to i yé mbot i mahuu ma ntômba tole mu mbot i loñge bôñgô,* 48 ibale lô i yé mu tiñil libadô, to i dikôô di nke bikékéndi di loñge bôñgô,* to i mahuu ma ntômba, to lô i yé mu koo nuga, to mu yom yosôna i yé ni koo nuga, 49 ibale kon u mboñ le libéi li ba kwem kwem, li bak maô-maô, tole li kôibak ndi li tihba mbot, koo nuga, tiñil libadô, dikôô di nke bikékéndi, tole yom ipe yosôna i i yé ni koo nuga, wee i yom ini i gwé lô, ba nlama unda yo prisi. 50 Prisi i ga béñge i libéi li, a nlama ki bii i yom i gwé libéi i kat dilo disaambok.+ 51 I ngéda a mba a mbéñge libéi i hilo hi nyônôs isaambok ndi a tehe le li nyandla mu mbot, mu tiñil libadô, mu dikôô di nke bikékéndi, tole mu koo nuga (ibabé i béñge i yom ba ngwélél yo), wee béba lô* yon i nti i libéi li; i yom i, i yé nyega.+ 52 A ga ligis mbot, tole tiñil libadô, tole dikôô di nke bikékéndi, tole mahuu ma ntômba, tole loñge bôñgô,* tole yom yosôna i i yé ni koo nuga i het libéi li mpam, inyule i yé béba lô.* Ba ga ligis i yom ini.

53 “Ndi ibale prisi i mbéñge libéi, ndi a léba le li nyandla bé mu mbot, to mu tiñil libadô, to mu dikôô di nke bikékéndi, to mu yom yosôna i i yé ni koo nuga, 54 prisi i ga ti oda le ba jôwa i yom i gwé kon; i mbus, i ga témb i bii yo i kat dilo dipe disaambok. 55 I ngéda ba ga mal jôwa i yom i, prisi i ga tiimba béñge yo: ibale libéi li nhéñha bé, to nyandla li nyandla bé; wee i yom ini i yé nyega. U ga ligis yo i hié inyule kon u nje yo isi, tole i ngii.*

56 “Ndi ibale prisi i mbéñge libéi, ndi a léba le li nkahal séhi i ngéda ba mal jôwa jo, ha nyen a’ héya homa a gwé libéi mu mbot, tole mu koo nuga, tole mu tiñil libadô, tole mu dikôô di nke bikékéndi. 57 Ndi ibale libéi li ntémb li pam homa numpe mu mbot, tole mu tiñil libadô, tole mu dikôô di nke bikékéndi, tole mu yom ipe yosôna i i yé ni koo nuga, wee libéi li yé i nyandla; ha nyen u ga ligis hiki yom i i gwé libéi i hié.+ 58 Ibale u njôwa mbot, tole tiñil libadô, tole dikôô di nke bikékéndi, tole yom ipe yosôna i i yé ni koo nuga, ndi libéi li nyodi mu fet, u ga tiimba jôwa i yom i; ha nyen i ga pôp.

59 “I mbén ini yon i yé inyu lô i i yé mu mbot i mahuu ma ntômba tole mbot i loñge bôñgô,* ibale lô i yé mu tiñil libadô tole i dikôô di nke bikékéndi, tole mu yom ipe yosôna i i yé ni koo nuga, inyu kal too yom i mpôp tole i yé nyega.”

14 Yéhôva a kônde pôdôs Môsi, a kal nye le: 2 “I mbén ini yon mut lô a nlama noñ i kel i ga kéla le a mpubhana, i ngéda ba ga kena nye yak prisi.+ 3 Prisi i ga pam i mbus liyééne li litén, i béñge nye: ibale lô yé i mal, 4 prisi i ga kal nye le, inyu pubhana,+ a lona dinuni dipubi diba, di bak yômi, ni kék sidar, ni bôñgô i i nkôyôp tjôôm, ni tjai di hisôp.* 5 Prisi i ga ti oda le ba nol hinuni hiada ikété hibee hi biték, hi hi gwé malép ba nyôñôl i lép.* 6 Ndi a nlama yoñ hinuni hi hi yé yômi, ni kék sidar, ni bôñgô i i nkôyôp tjôôm, ni tjai di hisôp, a yube gwobisôna ikété matjél ma hinuni hi nôla i ngii hibee hi biték, hi hi gwé malép ba nyôñôl i lép. 7 I mbus, a ga yoñ i matjél ma, a nwes mo ngélé isaambok i ngii mut a yé i pubhana inyu lô yé; ha nyen prisi i ga kal le a yé mpubhaga, a ga nwas ki hinuni hi hi ngi yii yômi le hi kee i bikai.+

8 “I mut a yé i pubhana a nlama jôwa mambot mé, a homb ño wé, a homb yak nyuu yé yosôna, a nogop ki ikété malép; ha nyen a ga ba mpubhaga. I mbus ha, a ga la jôp i homa litén li nyééne, ndi a ga jôp bé i ndap yé libadô inyu dilo disaambok. 9 I hilo hi nyônôs isaambok, a nlama homb tjôñ tjé di ño tjodisôna, ni liyéé jé, ni gwii gwé bi mis. I ngéda a ga mal homb tjôñ tjé tjodisôna, a ga jôwa mambot mé, a yoñ malép, a nogop; ha nyen a ga ba mpubhaga.

10 “I hilo hi nyônôs juem, a ga yoñ bon ba balôm ba mintômba iba ba ba gwé bé lem yo ki yo, ni ñin man ntômba+ nu a gwé bé lem yo ki yo, a bak a ngi yii mu nwii wé u bisu, a yoñ ki jam kiki bo kilô ina* i flawa ilam i i yé mbôôk ni môô, le bi ba likébla li bijek,+ ni hihéga hiada hi lôg* i môô.+ 11 I prisi i nkal le i mut nu a yé mpubhaga, yon i ga kena i mut a yé i pubhana ni i makébla mana i bisu bi Yéhôva, i lijubul li ndap libadô i likoda. 12 Prisi i ga yoñ man nlôm ntômba wada, a ti nye lôñni hihéga hiada hi lôg i môô kiki sesema inyu hô hihôha;+ a ga ndéñgés ki gwo le bi ba likébla ba ndéñgés i bisu bi Yéhôva.+ 13 I mbus, prisi i ga nol man nlôm ntômba i homa ba mbéna nôlôl+ sesema inyu béba ni sesema i ntul i hié, i homa wada mu homa mpubhaga, inyule kiki sesema inyu béba, yak sesema inyu hô hihôha i yé inyu prisi.+ I yé yom i nlôôha pubhaga.+

14 “Ha nyen prisi i ga yoñ ndék matjél mu sesema inyu hô hihôha, a ha mo i hipét hi ôô walôm u mut a yé i pubhana, a ha ki mo i nlôm hinoo nu woo wé walôm, ni i nlôm hinoo nu kôô wé walôm. 15 Prisi i ga yoñ ki ndék môô+ mu hihéga hiada hi lôg, a kôp mo mu libai li woo wé waé. 16 I mbus, prisi i ga tjak hinoo hié mu môô ma yé nye i libai li woo wé waé, a nwes ki ndék môô ni hinoo hié ngélé isaambok i bisu bi Yéhôva. 17 Prisi i ga yoñ ki ndék môô mu môô ma nyégle i libai jé li woo, a ha mo i hipét hi ôô walôm u mut a yé i pubhana, a ha ki mo i nlôm hinoo nu woo wé walôm, ni i nlôm hinoo nu kôô wé walôm, hala wee i bahoma a mbôk a ha matjél ma sesema inyu hô hihôha. 18 Prisi i ga yoñ i môô ma nyégle i libai jé li woo, a ha mo mu ño u mut a yé i pubhana; hala nyen prisi i ga boñ le ndi i mut nu a kôhna nwéhél* i bisu bi Yéhôva.+

19 “Prisi i ga ti sesema inyu béba,+ a bat ki nwéhél* inyu mut nu a yé i pubhana inyu nyega yé; i mbus ha, a ga nol sesema i ntul i hié. 20 Prisi i ga ti sesema i ntul i hié ni likébla li bijek+ mu juu li bisesema, a bat ki nwéhél inyu béba* i mut+ nu; ha nyen a ga ba mpubhaga.+

21 “Ibale i mut nu a nyep, a ban-ga bé gwom bi mbéda, a ga yoñ man nlôm ntômba kiki sesema inyu hô hihôha le a ba likébla li ba ndéñgés, le ndi nyemede a sañgla ni Nyambe; a ga lona gwo lôñni kilô yada ni jam* i flawa ilam i i yé mbôôk ni môô, le bi ba likébla li bijek, a lona ki hihéga hiada hi lôg i môô, 22 ni bakukuu iba tole bon ba dibeñ iba, inoñnaga ni i yom a gwé. Hibeñ hiada hi ga ba inyu sesema inyu béba, hii hipe hi bak inyu sesema i ntul i hié.+ 23 I hilo hi nyônôs juem,+ inyu boñ le a pubhana, a ga lona i gwom bini yak prisi i lijubul li ndap libadô i likoda i bisu bi Yéhôva.+

24 “Prisi i ga yoñ man nlôm ntômba nu sesema inyu hô hihôha,+ lôñni hihéga hiada hi lôg i môô; prisi i ga ndéñgés ki gwo le bi ba likébla ba ndéñgés i bisu bi Yéhôva.+ 25 I mbus, prisi i ga nol man nlôm ntômba nu sesema inyu hô hihôha, a ga yoñ ki ndék matjél ma sesema inyu hô hihôha, a ha mo i hipét hi ôô walôm u mut a yé i pubhana, a ha ki mo i nlôm hinoo nu woo wé walôm, ni i nlôm hinoo nu kôô wé walôm.+ 26 Prisi i ga kôp ndék môô mu libai li woo wé waé,+ 27 prisi i ga tjak ki hinoo hi woo wé walôm mu môô ma yé nye i libai li woo wé waé, a nwes ndék môô ni hinoo hi woo wé walôm ngélé isaambok i bisu bi Yéhôva. 28 Prisi i ga yoñ ki ndék môô mu môô ma yé i libai jé li woo, a ha mo i hipét hi ôô walôm u mut a yé i pubhana, a ha ki mo i nlôm hinoo nu woo wé walôm, ni i nlôm hinoo nu kôô wé walôm, hala wee i minlélém mi bahoma a mbôk a ha matjél ma sesema inyu hô hihôha. 29 I mbus, prisi i ga yoñ i môô ma nyégle i libai jé li woo, a ha mo mu ño u mut a yé i pubhana, le ndi i mut nu a kôhna nwéhél* i bisu bi Yéhôva.

30 “A ga lona bakukuu iba tole bon ba dibeñ iba, inoñnaga ni i yom a gwé;+ 31 mu dinuni a nla bana, hiada hi ga ba sesema inyu béba, hii hipe hi bak inyu sesema i ntul i hié+ lôñni likébla li bijek; hala nyen prisi i ga boñ le ndi i mut nu a yé i pubhana a kôhna nwéhél* i bisu bi Yéhôva.+

32 “I mut a bé kon lô, ndi a bana bé i gwom bi mbéda i hilo ba nkal le a mpubhana, i mbén ini yon a nlama noñ.”

33 Yéhôva a kal ki Môsi bo Arôn le: 34 “I ngéda ni ga jôp i loñ Kanaan,+ loñ me ga ti bé kiki ngababum,+ ndi me nwas le lô*+ i ba ikété ndap yada mu loñ nan, 35 nwet ndap a nlama ke yak prisi, a kal nye le: ‘Me ntehe yom mu ndap yem, i mpôna lô.’ 36 Ilole prisi i nke i béñge lô mukété ndap, a ga ti oda le ba pémés gwom bi ndap gwobisôna, tiga le a kal le gwom bi ndap gwobisôna bi yé nyega; i mbus nyen prisi i ga jôp i ndap inyu béñge yo. 37 A ga béñge i homa a gwé kon, ibale mabap ma ndap ma gwé mabéi ma ma yé maô-maô ni kwem-kwem, tole ma kôibak, ma nen-ge wengoñle ma mpidbe ikété libap, 38 ha nyen prisi i ga pam i ndap, a telep i lijubul li ndap, a kwés ki yo inyu dilo disaambok.+

39 “I hilo hi nyônôs isaambok, prisi i ga tiimba béñge ndap: ibale kon u nyandla mu mabap ma ndap, 40 prisi i ga ti oda le ba bôk ngok i gwé kon mu libap li ndap, ba pamna yo mu tison, ba leñ yo i homa a yé nyega. 41 I mbus, prisi i ga boñ le ba homb kété ndap yosôna. Ba ga yoñ biték bi litebel, ba pamna gwo mu tison, ba leñ gwo i homa a yé nyega. 42 Ba ga ha ngok ipe i homa ba nhéya ngok bisu, ha nyen a ga gwélél biték bi litebel bipe, a boñ le ba séñ gwo mu ndap.

43 “Ndi ibale kon u ntémb u lo, u nene mu ndap ki le ba mal héya ngok mu, ba homb yo, ba séñ ki yo, 44 ha nyen prisi i ga jôp mu ndap, i béñge ki yo: ibale kon u nyandla mukété ndap, wee béba lô*+ yon i yé mu ndap; i ndap ini i yé nyega. 45 A ga boñ ni le ba bôk ndap, hala wee ngok yé, bikék gwé, ni biték bi litebel gwobisôna; ba pamna gwo mu tison, ba leñ gwo i homa+ a yé nyega. 46 Ndi nu ni nu a ga jôp mu ndap i, ntel wonsôna prisi i nkwés+ yo, a ga ba nyega letee ni bikôkôa.+ 47 Nu ni nu ki a nañal mu ndap, a ga jôwa mambot mé; yak nu ni nu a ga jél mu ndap, a ga jôwa mambot mé.

48 “Ibale prisi i nke, ndi i tehe le kon u nyandla bé mu ndap ba ma mal séñ yo, prisi i ga kal le ndap i mpôp, inyule i kon u bak mu ndap u mal. 49 Inyu pubus ndap,* a ga yoñ dinuni diba, kék sidar, bôñgô i i nkôyôp tjôôm, ni tjai di hisôp.+ 50 Prisi i ga ti oda le ba nol hinuni hiada ikété hibee hi biték, hi hi gwé malép ba nyôñôl i lép.* 51 I mbus, a ga yoñ kék sidar, ni tjai di hisôp, ni bôñgô i i nkôyôp tjôôm, ni hinuni hi hi yé yômi, a yube gwo ikété matjél ma hinuni hi hi nôla, ni ikété malép ba nyôñôl i lép; ha nyen a ga nwes mo mu ndap ngélé isaambok.+ 52 Hala nyen a ga pubus ndap* ni matjél ma hinuni, ni malép ba nyôñôl i lép, ni hinuni hi hi yé yômi, ni kék sidar, ni tjai di hisôp, yak ni bôñgô i i nkôyôp tjôôm. 53 I mbus, a ga pamna hinuni hi hi ngi yii yômi mu tison, a nwas hio le hi kee i bikai. Hala nyen a ga héya nyega mukété* ndap, ha ngéda i nyen ndap i ga pôp.

54 “I mbén ini yon mut a nlama noñ inyu mintén mi lô nwominsôna, inyu lô i ño tole lô i jas,+ 55 inyu lô i mbot+ tole lô i ndap,+ 56 inyu mabibi, mbaage, tole mabéi,+ 57 inyu yi too yom i yé nyega tole i mpôp.+ I mbén i yon i yé inyu lô.”+

15 Yéhôva a kônde pôdôs Môsi bo Arôn, a kal le: 2 “Ni pôdôs bon ba Israel, ni kal bo le: ‘Ibale gwom bi mbôô bi* munlôm bi nyoo, wee kiki a nyoo, a yé nyega.+ 3 A yé nyega inyule a nyoo; to ibale gwom gwé bi mbôô bi ngi yook, to ibale bi nla ha bé yoo, a ngi yii nyega.

4 “‘Hiki nañi munlôm a nyoo a nañlene i ga ba nyega, yak hiki yom a nyééne i ga ba nyega. 5 Nu ni nu a ntihba nañi i mut nu, a nlama jôwa mambot mé, a nogop ki; a ga ba nyega letee ni bikôkôa.+ 6 Nu ni nu a nyééne i yom munlôm a nyoo a bak a yiine, a nlama jôwa mambot mé, a nogop ki; a ga ba nyega letee ni bikôkôa. 7 Nu ni nu a ntihba munlôm a nyoo, a nlama jôwa mambot mé, a nogop ki; a ga ba nyega letee ni bikôkôa. 8 Ibale munlôm a nyoo a ntjôle mut a yé mpubhaga matai, i mut ba ntjôle matai a nlama jôwa mambot mé, a nogop ki; a ga ba nyega letee ni bikôkôa. 9 Ibale munlôm a nyoo a nyén i ngii nuga, wee homa a bak a yiine a ga ba nyega. 10 Nu ni nu a ntihba yom yosôna munlôm a nyoo a bak a yiine, a ga ba nyega letee ni bikôkôa; yak nu ni nu a ga begee i gwom bi, a ga jôwa mambot mé, a nogop ki ikété malép; a ga ba nyega letee ni bikôkôa. 11 Ibale munlôm a nyoo+ a njôwa bé moo mé ni malép, ndi a tihba mut numpe, i mut ba ntihba a nlama jôwa mambot mé, a nogop ki; a ga ba nyega letee ni bikôkôa. 12 I hibee hi biték munlôm a nyoo a ntihba, ba ga nyugut hio; yak hiki ébél i bikék munlôm a nyoo a ntihba, ba nlama jôwa yo ni malép.+

13 “‘Ibale i mut nu a nyoo ha bé, a ga bem* dilo disaambok; i mbus dilo disaambok di, a ga pubhana; ha nyen a nlama jôwa mambot mé, a nogop ki ni malép ba nyôñôl i lép;* ha nyen a ga ba mpubhaga.+ 14 I hilo hi nyônôs juem, a nlama yoñ bakukuu iba tole bon ba dibeñ+ iba, a kee i bisu bi Yéhôva i lijubul li ndap libadô i likoda, a ti prisi i dinuni di. 15 Prisi i ga yoñ tjo, a ti hiada le hi ba sesema inyu béba, a ti ki hii hipe le hi ba inyu sesema i ntul i hié, ha nyen prisi i ga pubus nye* i bisu bi Yéhôva kiki a bak nyega inyule a yook.

16 “‘Ibale manôi* ma mpam mut, a nlama nogop nyensôna; a ga ba nyega letee ni bikôkôa.+ 17 Ibale manôi* ma ntihba ngim mbot tole ngim yom i i yé ni koo nuga, a nlama jôwa yo ni malép; i gwom bini bi ga ba nyega letee ni bikôkôa.

18 “‘Ibale munlôm a nlal ni muda, ndi manôi* ma pam nye, bo iba ba nlama nogop; ba ga ba nyega letee ni bikôkôa.+

19 “‘Ibale muda a nyoo matjél inyule a nkon sôñ, a ga ke ni bisu i ba nyega dilo disaambok+ inyule a nkon sôñ. Nu ni nu a ntihba nye a ga ba nyega letee ni bikôkôa.+ 20 Ntel wonsôna a nkon sôñ, hiki yom i muda nu a nañlene i ga ba nyega; yak hiki yom a nyééne i ga ba nyega.+ 21 Nu ni nu a ntihba nañi yé, a nlama jôwa mambot mé, a nogop ki; a ga ba nyega letee ni bikôkôa. 22 Nu ni nu a ntihba to imbe yom i muda nu a bak a yiine, a nlama jôwa mambot mé, a nogop ki; a ga ba nyega letee ni bikôkôa. 23 Nu ni nu a ntihba nañi, tole yom ipe i muda nu a bak a yiine, a ga ba nyega letee ni bikôkôa.+ 24 Ibale munlôm a nlal ni i muda nu, ndi matjél ma kon wé sôñ ma tihba nye,+ wee munlôm a ga ba nyega dilo disaambok; yak hiki nañi munlôm a nañlene i ga ba nyega.

25 “‘Ibale muda a nyoo matjél ngandak dilo,+ ki le ngéda i kon wé sôñ+ bé i, tole ibale kon wé sôñ u nom iloo kiki u mbéna nom, a ga ba nyega mu dilo tjodisôna a nyoo matjél, nlélém kiki a yé nyega i ngéda kon wé sôñ. 26 Hiki nañi muda a nañlene mu dilo tjodisôna a nyoo matjél, i ga ba nyega+ kiki nañi a nañlene i yé nyega i ngéda a nkon sôñ; yak hiki yom a nyééne i ga ba nyega, nlélém kiki i yé nyega i ngéda a nkon sôñ. 27 Nu ni nu a ntihba i gwom bi, a ga ba nyega, a nlama jôwa mambot mé, a nogop ki ikété malép; a ga ba nyega letee ni bikôkôa.+

28 “‘Ndi i ngéda muda a ga yoo ha bé matjél, a ga bem* dilo disaambok; i mbus dilo disaambok di, a ga ba mpubhaga.+ 29 I hilo hi nyônôs juem, muda a nlama yoñ bakukuu iba tole bon ba dibeñ+ iba, a kee i lijubul li ndap libadô i likoda,+ a ti prisi i dinuni di. 30 Prisi i ga ti hibeñ hiada le hi ba sesema inyu béba, a ti ki hii hipe le hi ba inyu sesema i ntul i hié; ha nyen prisi i ga pubus* muda i bisu bi Yéhôva kiki a bak nyega inyule a yook matjél.+

31 “‘Hala nyen ni nlama hôla* bon ba Israel le ba ba bañ nyega, ni le ba wo bañ ikété nyega yap ibale ba nhindis lap yem, i i yé i ñemkété+ wap.

32 “‘I mbén ini yon i bôt bana ba nlama noñ: i munlôm a nyoo, i mut a yé nyega inyule manôi* ma mpam+ nye, 33 i muda a yé nyega inyule a nkon sôñ,+ i munlôm tole muda nu a nyoo,+ ni i munlôm a nlal ni muda nu a yé nyega.’”

16 Yéhôva+ a pôdôs Môsi i mbus nyemb i bon bôlôm iba ba Arôn, ba ba bi wo inyule ba bi kôôge bebee ni Yéhôva i nya i bé bé i kôli. 2 Yéhôva a kal Môsi le: “Kal manyuñ Arôn le a nlama bé jôp to imbe ngéda i homa a nlôôha mpubhaga+ i mbus libadô,+ a nlama bé to telep i bisu bi ngudul i i yé mu ngii Nkuu, tiga le a wo;+ inyule m’a pémél mu ngii ngudul+ ikété ond.+

3 “I gwom bini gwon Arôn a’ lona i homa mpubhaga: man nlôm nyaga le a ba sesema inyu béba,+ a lona ki nlôm ntômba inyu sesema i ntul i hié.+ 4 A ga haba mbôñgô mbot u u yé mpubhaga,+ u bak ni loñge bôñgô;+ a haba ki minkanda inyu hô nyuu yé,* mi bak ni loñge bôñgô,* a téñ ki libadô+ li li yé ni loñge bôñgô i bôbôk, a téñ yak yañsi+ i i yé ni loñge bôñgô mu ño. I mambot mana ma yé mapubhaga.+ A ga nogop; i mbus, a haba i mambot ma.+

5 “Ntôñ u bon ba Israel+ u ga ti nye bon ba balôm ba kembee* iba kiki sesema inyu béba, ni nlôm ntômba wada inyu sesema i ntul i hié.

6 “I mbus, Arôn a ga lona nlôm nyaga nu sesema inyu béba, nu a yé inyu yé nyemede,+ a ti nye inyu bat le Nyambe a sañgla ni nye lôñni lihaa jé.*

7 “A ga lona ki balôm ba kembee iba, a bii bo i bisu bi Yéhôva i lijubul li ndap libadô i likoda. 8 Arôn a ga leñ mbam inyu kembee ini yo iba, mbam yada inyu Yéhôva, ini mbam ipe inyu Azazel.* 9 Arôn a ga lona nlôm kembee,* nu mbam+ i nkwél le a yé inyu Yéhôva, a ti nye le a ba sesema inyu béba. 10 Ndi a ga yoñ nlôm kembee,* nu mbam i nkwél le a yé inyu Azazel, a lona nye yômi i bisu bi Yéhôva le ndi a ep nye i ñoñ+ inyu Azazel, inyu boñ le litén li kôhna nwéhél i bibéba.

11 “Arôn a ga lona nlôm nyaga nu sesema inyu béba, nu a yé inyu yé nyemede, a bat Nyambe le a sañgla ni nye lôñni lihaa jé;* i mbus ha, a ga nol nlôm nyaga nu sesema inyu béba, nu a yé inyu yé nyemede.+

12 “Ha nyen a ga yoñ beglene+ i hié i i yé nyonok ni makalak, ma lôlak i juu li bisesema+ li li yé i bisu bi Yéhôva; a ga hôgôô ki moo ima ma biloñge bi binjinjiñ,+ a kena gwo i mbus libadô.+ 13 A ga ha ki binjinjiñ mu hié hi hi yé i bisu bi Yéhôva,+ ha nyen hiida hi binjinjiñ hi ga hô ngudul+ i i yé mu ngii nkuu Mbôgi,+ le ndi a wo bañ.

14 “A ga yoñ ndék matjél mu matjél+ ma nlôm nyaga, a nwes mo ni hinoo hié i bisu bi ngudul i pes likôl; a ga yoñ ki ndék matjél mu, a nwes mo ni hinoo hié ngélé isaambok i bisu bi ngudul.+

15 “I mbus, a ga nol nlôm kembee,* sesema inyu béba i i yé inyu litén,+ a lona ki matjél mé i mbus libadô,+ a boñ nlélém jam ni matjél mé kiki a mboñ ni matjél+ ma nlôm nyaga: a ga nwes mo i ngii ngudul ni i bisu bi ngudul.

16 “A ga pubus homa a nlôôha mpubhaga inyu maboñok ma nyega ma bon ba Israel, inyu maboñok map mabe ni inyu bibéba+ gwap; a ga boñ ki nlélém jam inyu ndap libadô i likoda i i yé ipôla yap, i bak i ñemkété bôt ba ba mboñ mam ma nyega.

17 “Ibôdôl i ngéda a ga jôp ikété homa a nlôôha mpubhaga inyu bat le Nyambe a sañgla ni litén letee ni i ngéda a ga pam, mut to wada a nlama bé ba mu ndap libadô i likoda. A ga bat le Nyambe a sañgla ni nye lôñni lihaa+ jé,* a sañgla ki ni ntôñ wonsôna u bon ba Israel.+

18 “I mbus, a ga pam, a kee i juu li bisesema+ li li yé i bisu bi Yéhôva, a pubus jo, a yoñ ki ndék matjél ma nlôm nyaga ni ndék matjél ma nlôm kembee,* a ha mo mu bitoñ gwobisôna bi juu li bisesema. 19 A ga nwes ki ndék matjél ni hinoo hié ngélé isaambok mu ngii juu li bisesema, a pubus jo inyu maboñok ma nyega ma bon ba Israel, a yilha ki jo lipubhaga.

20 “I ngéda a ga mal pubus+ homa a nlôôha mpubhaga, ni ndap libadô i likoda, lôñni juu li bisesema;+ ha nyen a ga lona yak nlôm kembee*+ nu a ngi yii yômi. 21 Arôn a ga bii moo mé mo ima mu ngii ño u nlôm kembee nu a ngi yii yômi, a pahal ki mahôha momasôna ma bon ba Israel, maboñok map mabe momasôna, ni bibéba gwap gwobisôna; i mbus, a ga bii gwo mu ño u nlôm kembee,+ a ep ki nye i ñoñ i moo ma mut ba mpohol inyu boñ hala.* 22 Nlôm kembee a ga begee mahôha+ momasôna ma bon ba Israel, a kena mo nyoo i ñoñ;+ ñ, i mut nu a ga ep nlôm kembee i ñoñ.+

23 “Ha nyen Arôn a ga jôp i ndap libadô i likoda, a héya mambot ma ma yé ni loñge bôñgô,* ma a bi haba i ngéda a bé jôp i homa a nlôôha mpubhaga, a bii ki mo ha. 24 A ga yoñ malép, a nogop*+ i homa a yé mpubhaga, a haba ki mambot+ mé; i mbus ha, a ga ke, a ti sesema yé i ntul i hié,+ a ti ki sesema i ntul i hié i litén;+ ha nyen a ga bat Nyambe le a sañgla ni nyemede, a sañgla ki ni litén.+ 25 A ga ligis mahoñ ma sesema inyu béba mu ngii juu li bisesema.

26 “I mut a bi kena nlôm kembee inyu Azazel,+ a ga jôwa mambot mé, a yoñ ki malép, a nogop; i mbus hala nyen a ga la ki jôp i homa litén li nyééne.

27 “Ba ga yoñ nlôm nyaga nu sesema inyu béba, ni nlôm kembee nu sesema inyu béba, bi ba bi kena matjél map i homa a nlôôha mpubhaga inyu bat le Nyambe a sañgla ni litén, ba kena bo i mbus liyééne li litén; ba ga yoñ bikoo gwap, ni minsôn nwap lôñni tjibi tjap, ba ligis+ gwo nyoo. 28 I mut a ga ligis gwo, a ga jôwa mambot mé, a yoñ ki malép, a nogop; i mbus hala nyen a ga la ki jôp i homa litén li nyééne.

29 “Ni ga noñ i litéak lini i boga ni boga: i hilo hi nyônôs jôm hi sôñ i nyônôs isaambok, ni ga modop* inyu bibéba binan, ni ga boñ bé bôlô+ yo ki yo, to ibale mut a ngwééne mu loñ, to ibale a yé nkén mut nu a nyééne i bééni. 30 I hilo hi nyen Nyambe a ga sañgla+ ni bé, le ndi i kéla le ni yé bapubhaga. I mis ma Yéhôva,+ ni ga pubhana inyu bibéba binan gwobisôna. 31 I hilo hi, hi yé sabat i bañga noi inyu nan; ni ga modop+ inyu bibéba binan. I litéak lini li ga nom i boga ni boga.

32 “I prisi ba ga hoo,+ i ba ga téé*+ le i yoñ tel* i isañ,+ yon i ga bat le Nyambe a sañgla ni litén; a ga haba mambot+ ma ma yé ni loñge bôñgô,* hala wee mambot mapubhaga.+ 33 A ga pubus* homa a nlôôha mpubhaga,+ ni ndap libadô i likoda,+ lôñni juu li bisesema;+ i mbus, a ga bat le Nyambe a sañgla ni biprisi lôñni bôt bobasôna+ ba litén.* 34 Ni ga noñ i litéak+ lini i boga ni boga, inyu bat ngélé yada hiki nwii+ le Nyambe a sañgla ni bon ba Israel, inyu bibéba gwap gwobisôna.”

Jon Arôn a bi boñ yaga kiki Yéhôva a bi kal Môsi.

17 Yéhôva a pôdôs ki Môsi, a kal nye le: 2 “Pôdôs Arôn ni bon bé bôlôm, lôñni bon ba Israel bobasôna, u kal bo le: ‘Lana nyen Yéhôva a nkal:

3 “‘“Ibale man Israel a nol nlôm nyaga, man nlôm ntômba, tole kembee mu homa litén li nyééne, tole haa ni homa litén li nyééne, 4 ndi a lona bé nye i lijubul li ndap libadô i likoda inyu ti nye Yéhôva kiki likébla i bisu bi lap i Yéhôva, wee i mut nu a gwé pil matjél. A nkôp yaga matjél; i mut nu a nlama nôla.* 5 Hala a nlama bôña, le ndi i bisesema bon ba Israel ba ngi tinak nyoo i bikai, ba lona gwo yak prisi i bisu bi ndap libadô, inyu ti gwo Yéhôva. Ba nlama ti gwo Yéhôva+ le bi ba bisesema inyu kôp nsañ. 6 Prisi i ga nwes i matjél ma i ngii juu li bisesema li Yéhôva i lijubul li ndap libadô i likoda, a ligis ki mahoñ le ma numb loñge njiñ* inyu Yéhôva.+ 7 Ndi bon ba Israel ba nlama ha bé ti bisesema i bisu bi banyambe ba ba mpôna balôm ba kembee,*+ banyambe bon ba Israel ba mbégés.*+ I litéak lini li ga nom i boga ni boga inyu nan mu tjai dinan tjodisôna.”’

8 “U ga kal bo le: ‘Ibale man Israel, tole nkén mut nu a nyén ni bé, a nti sesema i ntul i hié tole sesema ipe, 9 ndi a lona bé yo i lijubul li ndap libadô i likoda inyu ti yo Yéhôva, i mut nu a nlama nôla.*+

10 “‘Ibale mut* wada nu litén li Israel, tole nkén mut nu a nyén ni bé, a nje to mambe matjél;+ ibabé pééna, m’a kolba i mut a nje matjél, m’a nol ki nye.* 11 Inyule niñ i hiki hégél* i yéne mu matjél+ mé, me bi ti ki mo inyu nan le ndi ni nwes mo i ngii juu li bisesema+ inyu boñ le me sañgla+ ni bé, inyule kiki niñ* i yéne mu matjél, wee ni nla kôhna nwéhél i bibéba binan ni njel matjél. 12 Inyu hala nyen me bi kal bon ba Israel le: “Mut* to wada ipôla+ nan a jek bañ matjél, to nkén mut yaga nu a nyén ni bé a jek bañ matjél.”+

13 “‘Ibale man Israel, tole nkén mut nu a nyén ni bé, a nol nuga bikai i nsômbi tole a nol hinuni, a nlama kôp matjél+ mé, a hô ki mo ni biték. 14 Inyule niñ i hiki hégél* i yéne mu matjél mé, ñ, niñ i yéne mu matjél. Inyu hala nyen me bi kal bon ba Israel le: “Ni jek bañ matjél ma hégél* yo ki yo inyule niñ* i hiki hégél i yéne mu matjél mé. I mut a nje mo a ga nôla.”*+ 15 Ibale man* Israel tole nkén mut a nléba nuga i i nwo, tole nuga le nuga bikai+ i mpat ndi i mut nu a je yo, a nlama jôwa mambot mé, a nogop, a ba ki nyega letee ni bikôkôa;+ i mbus hala, a ga ba mpubhaga. 16 Ndi ibale a njôwa bé mambot mé, to nogop a nogop bé,* a ga saa inyu hihôha hié.’”+

18 Yéhôva a pôdôs ki Môsi, a kal nye le: 2 “Pôdôs bon ba Israel, kal bo le: ‘Men me yé Yéhôva Nyambe+ nan. 3 Ni boñ bañ kiki bôt ba mboñ i loñ Égiptô, i homa ni bé yééne; ni boñ bañ to kiki bôt ba mboñ i loñ Kanaan, i homa me yé i kena bé.+ Ni nigle bañ bilem gwap. 4 Ni noñ matéak mem, ni tééda matiñ mem, ni nôgôl ki mo.+ Men me yé Yéhôva Nyambe nan. 5 Ni tééda matiñ mem ni matéak mem; i mut a mboñ i mam mana a’ niñ ni njel yap.+ Men me yé Yéhôva.

6 “‘Mut nye ki nye i bééni a tiige bañ bebee ni mut wé lihaa inyu lal+ ni nye.* Men me yé Yéhôva. 7 U lal bañ ni isoñ, u lal bañ to ni nyuñ. Nyuñ nu; u nlama bé lal ni nye.

8 “‘U lalna bañ nwaa isoñ.+ Hala a ga wéha isoñ nyuu.*

9 “‘U lalna bañ manyuñ nu muda, to a yé ngond isoñ, to a yé ngond nyuñ; to a ngwééne i nlélém ndap lihaa ni we, to a ngwééne bé i nlélém ndap lihaa ni we.+

10 “‘U lalna bañ ngond i man woñ nu munlôm, u lalna bañ to ngond i man woñ nu muda, tiga le hala a lona we wonyuu.

11 “‘U lalna bañ ngond i nwaa isoñ, nu a yé ngond isoñ, inyule a yé manyuñ nu muda.

12 “‘U lalna bañ manyañ isoñ nu muda. A yé yaga mut lihaa+ li isoñ.*

13 “‘U lalna bañ manyañ nyuñ nu muda, inyule a yé mut lihaa li nyuñ.

14 “‘U lalna bañ nwaa manyañ isoñ nu munlôm, tiga le u wéha nye nyuu. A yé nwaa manyañ isoñ.*+

15 “‘U lalna bañ nkiya woñ. A yé nwaa man woñ nu munlôm,+ u nlama bé lalna nye.

16 “‘U lalna bañ nwaa manyuñ,+ tiga le hala a wéha manyuñ nyuu.*

17 “‘U lalna bañ muda ni ngond+ yé. U yoñ bañ ngond i man wé nu munlôm, u yoñ bañ to ngond i man wé nu muda inyu lalna nye. Ba yé yaga bôt bé ba lihaa. Hala a yé liboñok libe kiyaga.*

18 “‘U bii bañ manyañ nwaa woñ inyu lalna nye, tiga le a yila mbala+ i manyañ.

19 “‘U tiige bañ bebee ni muda inyu lalna nye i ngéda a yé nyega inyule a nkon sôñ.+

20 “‘U lalna bañ nwaa mut woñ libôk,* tiga le hala a yilha we nyega.+

21 “‘U neebe bañ le ba sem* mut to wada mu mbôda yoñ yak Môlek;*+ tiga le u hindis jôl li Nyambe+ woñ. Men me yé Yéhôva.

22 “‘U lalna bañ munlôm kiki ba nlalna muda.+ Hala a yé liboñok libe.

23 “‘Munlôm a lalna bañ nuga; tiga le hala a yilha nye nyega. To muda a telep bañ i bisu bi nuga inyu lal ni yo.+ Hala bé nyen Nyambe a bi téé mam.

24 “‘Jam jo ki jo munu mam mana ma yilha bañ bé nyega, inyule i mam mana momasôna mon ma bi yilha i biloñ me bi luhul i bisu binan nyega.+ 25 Inyu hala nyen loñ i yé nyega, m’a kogse ki bôt ba loñ inyu hihôha hiap; yak i bôt ba nyééne mu loñ, ba ga luhul+ bo.* 26 Ndi bé ni tééda matiñ mem ni matéak+ mem; ni boñ bañ jam libe jo ki jo mu mam ma, to mut a yé man Israel, to a yé nkén mut nu a nyééne i bééni.+ 27 Inyule i bôt ba bi yééne mu loñ ilole ni nlo,+ ba bé boñ i mam mabe ma momasôna; nano ni, loñ i yé nyega. 28 Ndi ba ga luhul bé bé mu loñ* le ni hindis yo, kiki ba bi luhul bôt ba loñ ba ba bi yééne mu ilole ni nlo. 29 I bôt* bobasôna ba mboñ jam jada mu mam mabe mana, ba nlama nôla.* 30 Ni tibil yaga tééda i mam me nkal bé, kayéle ni boñ bañ jam libe jo ki jo mu mam mabe ma bi bôña ilole ni nlo,+ le ma yilha bañ bé nyega. Men me yé Yéhôva Nyambe nan.’”

19 Yéhôva a pôdôs ki Môsi, a kal nye le: 2 “Pôdôs ntôñ u Israel wonsôna, u kal bo le: ‘Ni nlama ba bapubhaga inyule me Yéhôva Nyambe nan, me yé numpubi.+

3 “‘Hiki wada nan a nlama ti isañ+ bo nyañ lipém,* ni tééda ki dilo tjem di sabat.+ Men me yé Yéhôva Nyambe nan. 4 Ni bégés bañ banyambe ba ba gwé bé nseñ,+ ni ôô bañ to banyambe.+ Men me yé Yéhôva Nyambe nan.

5 “‘Ibale ni nti Yéhôva+ sesema inyu kôp nsañ, ni ga ti nye yo inyu boñ le ni lémél+ nye. 6 I sesema ini i ga jéba i kel ba nti yo, ni i kel i noñ ha; ndi i yom i ga yégle i hilo hi nyônôs aa, ba ga ligis+ yo. 7 Ndi i hilo hi nyônôs aa, ibale mut a nje yom mu, hala a yé yom nyega i i ga lémél bé Nyambe. 8 I mut a nje yom mu, a ga saa inyu hihôha hié inyule a nhindis yom ipubhaga i Yéhôva; i mut nu a nlama nôla.*

9 “‘I ngéda ni mba ni mbumbul mu loñ nan, u bumbul bañ bijek gwobisôna bi bi yé mu mapañ ma wom woñ, u bada bañ to bijek bi bi nyégle* i mbus libumbul+ joñ. 10 U bada bañ matam ma ma nyégle mu wom woñ u minkôô mi wai, u bada bañ to matam ma wom woñ u minkôô mi wai ma ma nkwo. U ga yék mo inyu hiyeyeba*+ ni nkén mut. Men me yé Yéhôva Nyambe nan.

11 “‘Ni nlama bé nip,+ ni nlama bé tembee,+ ni lôgna bañ to bé ni bé. 12 Ni nlama bé kum soñ i bitembee i jôl+ jem, tiga le ni hindis jôl li Nyambe nan. Men me yé Yéhôva. 13 U nlama bé yoñ yom i mut+ woñ libôk ni njel malôga, u nlama bé to kadal+ yom yé. Nsaa u mut woñ bôlô u lalak bañ i weeni letee ni kegla.+

14 “‘U nlama bé tiihe* mut ndok, u nlama bé to biine mut ndim+ yom i njel inyu kwéha nye, u nlama kon Nyambe+ woñ woñi. Men me yé Yéhôva.

15 “‘Ni nlama bé kéés bôt i nya i téé bé sép. U nlama bé todol hiyeyeba, u nlama bé to yoñ pes i ngwañ mut.+ U ga kéés mut woñ libôk i nya i téé sép.

16 “‘U nlama bé hiôm mu litén+ joñ, u kenek, u sogok bôt. U nlama bé to boñ ngim yom i i nla boñ le mut+ woñ libôk a nimis niñ yé.* Men me yé Yéhôva.

17 “‘U nlama bé oo maasoñ mu ñem+ woñ. U nlama boñ kii yosôna i mbéda inyu kodol mut+ woñ libôk, le ndi u begee bañ béba kiki nye.

18 “‘U nlama bé pun+ wemede, to téédana bon ba litén joñ hiun;* u nlama gwés mut woñ libôk kiki wemede.+ Men me yé Yéhôva.

19 “‘Ni nlama tééda matéak mem: u nlama bé neebe le mintén mi bilém gwoñ ima mi neba.* U nlama bé nwes mintén mi mbôô+ ima mu wom woñ, u nlama bé to haba mbot i ba mboñ ni mintén mi dikôô ima.+

20 “‘Ibale munlôm a nlalna muda, ki le i muda nu a yé nkol ba mbôn mut numpe i libii, ndi le ba yé ngi kobol muda, ba yé ngi to ti nye kunde, wee ba nlama kogse bo. Ndi ba nlama bé nol bo inyule muda a yé ngi bana kunde. 21 Munlôm a nlama lona Yéhôva sesema yé inyu hô hihôha i lijubul li ndap libadô i likoda, hala wee a ga lona nlôm ntômba le a ba sesema inyu hô hihôha.+ 22 Prisi i ga yoñ nlôm ntômba nu sesema inyu hô hihôha, a lona nye i bisu bi Yéhôva inyu bat le a sañgla ni i mut nu inyu béba a bi boñ; ha nyen Nyambe a ga nwéhél nye inyu béba a bi boñ.

23 “‘I ngéda ni ga jôp mu loñ, ni bel ki mintén mi bie nwominsôna inyu je, ni nlama tehe matam map kiki yom i i yé nyega, ni i i yé kila.* I bie bini bi ta bé bé kunde* nwii maa. Mut to wada a nlama bé je matam mé. 24 Ndi i nwii mi nyônôs mina, matam map momasôna ma ga ba likébla lipubhaga inyu kon maséé i bisu bi Yéhôva.+ 25 Ndi i nwii mi nyônôs mintan, ni ga la je matam map, ni kônde ki mo mu libumbul linan. Men me yé Yéhôva Nyambe nan.

26 “‘Ni nlama bé je yom yo ki yo i i gwé matjél.+

“‘Ni nlama bé bo ngambi, to boñ makañ.+

27 “‘Ni nlama bé homb* tjôñ di mapañ ma ño,* u bep bañ to kit mapañ ma liyéé+ joñ.

28 “‘Ni nlama bé tand bikwéé mu manyuu manan* inyu mut nu a nwo,+ ni nlama bé to bana bikun* mu manyuu manan. Men me yé Yéhôva.

29 “‘U wéha bañ ngond yoñ nyuu inyule u nyilha nye muda libambe,+ tiga le libambe li nai ikété loñ, ni le loñ i yon ni maboñok mabe.+

30 “‘Ni nlama tééda dilo tjem di sabat,+ ni diihege ki homa wem mpubhaga bañga lidiihege.* Men me yé Yéhôva.

31 “‘Ni ke bañ i tehe ba ba nkwel ni mimbuu mimbe,+ ni ke bañ to i tehe bôt ba mis ma-na;+ tiga le hala a yilha bé nyega. Men me yé Yéhôva Nyambe nan.

32 “‘U ga telep+ i bisu bi mut ño mbu, u nlama ti mimañ mi bôt+ lipém, u nlama ki kon Nyambe woñ woñi.+ Men me yé Yéhôva.

33 “‘Ibale nkén mut a nyééne mu loñ nan, ni nlama bé tééñga+ nye. 34 I nkén mut a nyééne i bééni+ a ga yila inyu nan kiki mut nu a ngwéé man Israel; u nlama gwés nye kiki wemede, inyule yak bé ni bé bakén ba bôt i loñ Égiptô.+ Men me yé Yéhôva Nyambe nan.

35 “‘I ngéda ni nhek lelaa gwom bi ñap, ni i ngéda ni nhek kilô yap, tole bikeñi+ gwap, ni nlama bé ba bôt ba malôga. 36 Ni nlama gwélél kilô i téé, matam ma kilô ma téé, hégél kôn i i téé,* ni hibôi+ hi malép hi hi téé.* Men me yé Yéhôva Nyambe nan, nu a bi nyodna bé i loñ Égiptô. 37 Jon ni nlama tééda matiñ mem ni matéak mem momasôna, ni nlama ki noñ+ mo. Men me yé Yéhôva.’”

20 Yéhôva a pôdôs ki Môsi, a kal nye le: 2 “U ga kal bon ba Israel le: ‘Hiki man Israel tole nkén mut nu a nti Môlek man wada mu mbôda yé, a nlama yaga nôla.+ Bôt ba loñ ba ga ôm nye ngok. 3 Memede m’a kolba i mut nu, m’a nol ki nye,* inyule a nti Môlek man wada mu mbôda yé, a hindis yak homa wem mpubhaga,+ a ñôbôs ki jôl jem lipubi. 4 Ibale i mut nu a nti Môlek man wada mu mbôda yé, ndi bôt ba litén ba sude mis* mu jam a mboñ, ba nol+ bé to nye, 5 ha nyen memede m’a kolba yaga i mut nu ni lihaa+ jé. M’a nol nye* ni ba bobasôna ba ñadba ni nye inyu bégés Môlek.*

6 “‘I mut* a nke i kwel ni bawoga+ ni bôt ba mis ma-na,+ kayéle a kahal bégés banyambe bape* inyule a mbôdôl bo ñem, m’a kolba yaga i mut nu, me nol+ ki nye.*

7 “‘Ni nlama pubus bébomede le ni yila bapubhaga,+ inyule men me yé Yéhôva Nyambe nan. 8 Ni nlama noñ matéak mem, ni nôgôl+ ki mo. Men me yé Yéhôva, nu a nyilha bé bapubhaga.+

9 “‘Ibale mut a ntiihe* isañ tole nyañ, a nlama yaga nôla.+ Kiki a ntiihe isañ tole nyañ, nyemede nyen a nyéñ nyemb yé.*

10 “‘Ibale munlôm a nke i ndéñg ni nwaa munlôm numpe, i munlôm a nke i ndéñg ni nwaa mut wé libôk a nlama yaga nôla, i munlôm bo muda ba nke i ndéñg+ ba nlama yaga nôla. 11 I munlôm a nlalna nwaa isañ a nwéha isañ nyuu.*+ I bôt ba bo iba ba nlama nôla. Bomede bon ba nyéñ nyemb yap.* 12 Ibale munlôm a nlalna nkiya wé, i bôt ba bo iba ba nlama yaga nôla. Ba mbôk i mam Nyambe a ntéé. Bomede bon ba nyéñ nyemb+ yap.

13 “‘Ibale munlôm a nlalna munlôm kiki munlôm a nlalna muda, i bôt ba bo iba ba mboñ jam li nyega.+ Ba nlama nôla. Bomede bon ba nyéñ nyemb yap.

14 “‘Ibale munlôm a nlalna muda, a lalna yak nyañ muda nu, hala a yé liboñok libe*+ kiyaga. Ba nlama ligis+ nye lôñni bo, inyu boñ le liboñok libe li ba bañ i bééni.

15 “‘Ibale mut a nlalna lém, a nlama yaga nôla, ni ga nol ki lém.+ 16 Ibale muda a ntiige lém bebee inyu lal ni yo,+ u nlama nol i muda nu ni i lém i. Ba nlama yaga nôla. Bomede bon ba nyéñ nyemb yap.

17 “‘Ibale munlôm a nlalna manyañ nu muda, nu a yé ngond isañ tole ngond nyañ, ndi munlôm a tehe nso wé, yak muda a tehe nso u munlôm, hala a yé jam li nwéha nyuu.+ Ba nlama nôla* i bisu bi bôt ba litén; i munlôm nu, a nwéha manyañ nu muda nyuu.* A nlama saa inyu hihôha hié.

18 “‘Ibale mut a nañal ni muda a nkon sôñ, ndi a lalna nye, bo iba ba ñunda le ba nyan matjél+ mé.* Bo iba ba nlama nôla.*

19 “‘U nlama bé lalna manyañ nyuñ nu muda, to manyañ isoñ nu muda,* inyule hala a ga wéha mut woñ lihaa nyuu.+ Ba ga saa inyu hihôha hiap. 20 I munlôm a nlalna nwaa manyañ isañ a nwéha manyañ isañ nyuu.*+ Ba ga saa inyu béba yap. Ba ga wo ngi man. 21 Ibale munlôm a nkadal nwaa manyañ, hala a yé jam li nyega.+ A nwéha manyañ nyuu.* Ba ga wo ngi man.

22 “‘Ni nlama tééda matiñ mem ni matéak+ mem, ni noñ+ ki mo inyu boñ le ba luhul+ bañ bé mu loñ i het me bi lona bé le ni yééne. 23 Ni nlama bé noñ bilem bi biloñ me nluhul+ i bisu binan, inyule bi bé boñ i mam mana momasôna; jon me bi unbene+ gwo. 24 Inyu hala nyen me bi kal bé le: “Ni ga yoñ loñ yap, m’a ti ki bé yo, loñ i i nkuli milik ni wéi.+ Men me yé Yéhôva Nyambe nan, nu a bi bagal bé ni biloñ+ bipe.” 25 Ni nlama boñ maselna ipôla nuga i i yé mapubi ni nuga i i yé nyega, ni ipôla hinuni hi hi yé nyega ni hinuni hi hi yé mapubi;+ nuga yo ki yo i yilha bañ bé* nyega, to hinuni, to yom yo ki yo i i ñôdba munu ’isi, hala wee i gwom me bi bagal le bi ba nyega+ inyu nan. 26 I mis mem,* ni nlama ba bapubhaga+ inyule me Yéhôva, me yé Numpubi. Me bi bagal ki bé ni biloñ bipe inyu boñ le ni ba bôt bem.+

27 “‘Munlôm to muda nu a yé mut makañ, to mut mis ma-na,* a nlama yaga nôla.+ Bôt ba litén ba nlama ôm nye ngok letee a wo. Bomede bon ba nyéñ nyemb yap.’”

21 Yéhôva a kal ki Môsi le: “Pôdôs biprisi, hala wee bon ba Arôn, kal bo le: ‘Mut to wada ipôla nan a nlama bé hindis nyemede inyule a ntiige bebee ni mim* u mut mu litén+ jé. 2 Ndi a nla boñ hala inyu mut wada ikété ndap yé lihaa, hala wee inyu nyañ, inyu isañ, inyu man wé nu munlôm, inyu man wé nu muda, inyu manyañ wé nu munlôm; 3 a nla ki hindis nyemede inyu manyañ nu muda nu a yé ngond ngi yi munlôm, nu a yé bebee ni nye, ni nu a yé ngi biiba. 4 A nla bé hindis nyemede, to yilha nyemede nyega inyu muda nu a yé mbiibaga ni munlôm wada mu litén jé. 5 Biprisi bi nlama bé homb ño,+ to mapañ ma liyéé, to tand bikwéé mu manyuu+ map. 6 Ba nlama ba bapubhaga inyu Nyambe+ wap, ba nlama bé to hindis jôl li Nyambe+ wap, inyule ba yé ba nlona Yéhôva bisesema bi hié, hala wee bret* bi Nyambe; jon ba nlama ba bapubhaga.+ 7 Ba nlama bé bii muda libambe,+ muda nu a ta ha bé konji,* to muda nu a mbos ni nlô wé,+ inyule prisi i yé mpubhaga inyu Nyambe wé. 8 U nlama yilha nye mpubhaga,+ inyule nyen a nti bijek bi Nyambe woñ. A nlama ba mpubhaga, inyule me Yéhôva, nu a nyilha bé bapubhaga, me yé Numpubi.+

9 “‘Ibale ngond prisi i nhindis nyemede inyule a nyila muda libambe, a nwéha isañ nyuu. Ba nlama ligis+ nye.

10 “‘Prisi keñi, hala wee wada ipôla biprisi,* nu ba nkôp+ môô mapubhaga* i ngii ño, nu ba ntéé ki mu nson wé* le a haba mbot i prisi+ keñi, a nlama bé nwas le tjôñ tjé di put, a nlama bé to pat mambot+ mé. 11 A nlama bé tiige mim+ u mut binam* wo ki wo bebee ; a nla bé to hindis nyemede, to inyu isañ, to inyu nyañ. 12 A nlama bé ke haa ni homa mpubhaga, a nlama bé to hindis homa mpubhaga nu Nyambe+ wé, inyule yimbne le a nti nyemede nkikip, hala wee môô mapubhaga ma Nyambe+ wé, ma yé i ngii yé. Men me yé Yéhôva.

13 “‘Prisi keñi i nlama bii muda nu a yé ngond ngi yi munlôm.*+ 14 A ga biiba bé ni muda nu a yé yik muda, to muda nu a mbos ni nlô wé, to muda nu a ta ha bé konji, to muda libambe; ndi a nlama biiba ni ngond ngi yi munlôm, i lôlak mu litén jé. 15 A nlama bé wéha mbôda yé nyuu* i i yé mu litén+ jé, inyule men me yé Yéhôva, nu a nyilha nye mpubhaga.’”

16 Yéhôva a kônde pôdôs Môsi, a kal nye le: 17 “Kal Arôn le: ‘Mu tjai dinan tjodisôna, mut to wada mu mbôda* yoñ nu a gwé lem, a nlama bé tiige bebee ni juu li bisesema inyu lona bret yak Nyambe wé. 18 Ibale mut a gwé lem, a nlama bé tiige bebee ni juu li bisesema, to mut ndim, to bôk mut, to mut a gwé nwodok su,* to mut a gwé jô nyuu yada i i nlôôha ap, 19 to mut a gwé buga kôô tole buga woo, 20 to mut a gwé hikula hi mbus* tole ngege mut,* to mut a nkon i mis, to mut a nkon minyañ, to mut a gwé nyuu i nkumbi, to mut a gwé mimbôak+ mi mañ mi mbind. 21 Mut nye ki nye mu mbôda* i prisi le Arôn, nu a gwé lem, a nlama bé tiige bebee ni juu li bisesema inyu lona Yéhôva bisesema bi hié. Inyule a gwé lem, a nlama bé tiige bebee ni juu li bisesema inyu lona bret bi Nyambe wé. 22 A nla je bret bi Nyambe wé, bi bi nlôl mu gwom bi nlôôha ba bipubhaga+ ni mu gwom bi yé bipubhaga.+ 23 Ndi a nlama bé tiige bebee ni libadô,+ to tiige bebee ni juu li bisesema,+ inyule a gwé lem; a nlama bé hindis homa wem mpubhaga,+ inyule men me yé Yéhôva, nu a nyilha bo bapubhaga.’”+

24 Hala nyen Môsi a bi kal Arôn ni bon bé bôlôm, lôñni bon ba Israel bobasôna.

22 Yéhôva a kônde pôdôs Môsi, a kal nye le: 2 “Kal Arôn ni bon bé bôlôm le ba nlama yoñ yihe ni lelaa ba ngwélél* gwom bipubhaga bon ba Israel ba nyilha bipubhaga+ inyu yem, le ndi ba hindis bañ jôl+ jem lipubi. Men me yé Yéhôva. 3 Kal bo le: ‘Mu tjai dinan tjodisôna, to numbe mut mu mbôda nan nu a yé nyega, ndi a tiige bebee ni gwom bipubhaga bon ba Israel ba nyilha bipubhaga inyu Yéhôva, i mut nu a nlama nôla*+ le a telep ha bañ i bisu gwem. Men me yé Yéhôva. 4 Ibale mut wada mu mbôda Arôn a nkon lô,+ tole gwom bi mbôô bi nyoo+ nye, a nla bé je gwom bipubhaga letee a yila mpubhaga,+ to mut nu a ntihba mut numpe nu a nyila nyega inyule a ntihba nwok mut,*+ to mut nu manôi*+ ma mpam, 5 to mut nu a ntihba isisii nuga i i yé nyega+ tole a ntihba mut nu a yé nyega inyu to imbe njom, a bak mut nu a nla yilha nye nyega.+ 6 I mut* a ntihba i gwom bi, a ga ba nyega letee ni bikôkôa; a nlama bé to je gwom bipubhaga, ndi a nlama yoñ malép,+ a nogop. 7 I ngéda hiañgaa hi ga nañal, a ga ba mpubhaga; ha ngéda i nyen a ga la je gwom bipubhaga inyule bijek+ gwé bi. 8 Handugi hala, a nlama bé je nuga yo ki yo i i nwo tole yom yo ki yo nuga bikai i mpat, tiga le i yilha nye nyega.+ Men me yé Yéhôva.

9 “‘Ba nlama yaga tééda i mam me nkal bo, le ndi ba boñ bañ béba, ni le ba wo bañ inyule ba nhindis gwom bipubhaga. Men me yé Yéhôva, nu a nyilha bo bapubhaga.

10 “‘Mut nye ki nye nu a kôli bé,* a nlama bé je yom ipubhaga,+ to nkén mut nu a nyééne yak prisi, to mut wé bôlô; ba nlama bé je yom yo ki yo i i yé pubhaga. 11 Ndi ibale prisi i nsomb mut* ni moni nwé, i mut nu a nla je yom ipubhaga. I minkol mi ngwééne i ndap yé, yak nwo mi nla je bijek+ gwé. 12 Ibale ngond prisi i mbiiba ni munlôm nu a ta bé prisi,* i ngond ini i ga la ha bé je mu likébla ba nyôñôl i gwom bipubhaga. 13 Ndi ibale ngond prisi i nyila yik muda tole a mbos, a bana bé mbôda, ibale a ntémb yak isañ, a ga la je bijek+ bi isañ kiki a bé je gwo i ngéda a bé a ngi yii ngond. Ndi mut nye ki nye nu a kôli bé,* a ga la bé je gwo.

14 “‘Ndi ibale mut a nhôs, ndi a je yom ipubhaga, a nlama ti prisi+ likébla lipubhaga, a kônde ki jôga jada ikété môga matan mu. 15 Jon biprisi bi nlama bé hindis gwom bipubhaga bon ba Israel ba nti Yéhôva+ kiki makébla, 16 tiga le kogse i kwél bo inyule ba mboñ jam libe mu kiki ba nje gwom bipubhaga; inyule men me yé Yéhôva, nu a nyilha bo bapubhaga.’”

17 Yéhôva a kônde pôdôs Môsi, a kal nye le: 18 “Pôdôs Arôn ni bon bé bôlôm, lôñni bon ba Israel bobasôna, u kal bo le: ‘I ngéda man Israel tole nkén mut a nlona Yéhôva sesema i ntul i hié+ inyu yônôs mimbônga nwé, tole inyu ti ngim likébla ñem u ntinde nye i ti;+ 19 ibale a nyéñ lémél Nyambe, a nlama lona nlôm lém+ nu a gwé bé lem yo ki yo, a lôlak mu liuñ li nyaga, mu bon ba mintômba tole mu kembee. 20 Ni nlama bé lona yom yo ki yo i i gwé lem,+ tiga le ni lémél bé Nyambe.

21 “‘Ibale mut a nlona Yéhôva sesema+ inyu kôp nsañ, inyu yônôs mbônga wé tole inyu ti ngim likébla ñem wé u ntinde nye i ti; ibale a nyéñ lémél Nyambe, a nlama lona lém i i gwé bé lem yo ki yo, i lôlak mu liuñ li nyaga, tole mu bémba i mintômba. Lém i nlama bé bana lem yo ki yo. 22 Ba nlama bé ti lém i i yé ndim kiki sesema, to i i yé bôk, to i i gwé bikwéé, to i i nkon minyañ, to i i gwé mbaage, to lém i i gwé nyuu i nkumbi; ni nlama bé lona Yéhôva lém yo ki yo munu bilém bini, ni nlama bé to sémél Yéhôva ntén likébla unu i juu li bisesema. 23 Inyu likébla ñem nan u ntinde bé i ti, ni nla lona nlôm nyaga tole man ntômba nu a gwé kôô u nlôôha ap, tole kôô u nlôôha kidik; ndi Nyambe a’ neebe bé yo ibale ni ngwélél yo kiki likébla inyu yônôs mbônga. 24 Ni nlama bé lona Yéhôva lém i i gwé mañ mi mbind mi mi yé mbôak, to mi mi yé nyugdak, to lém i ba nak; ni nlama bé to ti i nya bilém i kiki likébla mu loñ nan. 25 Ni nlama bé to yoñ lém to yada munu bilém bini i moo ma nkén mut, inyu lona gwo le bi ba bret bi Nyambe nan, inyule bi gwé hies tole lem. Bi ga lémél bé Nyambe.’”

26 Yéhôva a pôdôs ki Môsi, a kal nye le: 27 “I ngéda man nlôm nyaga a ngwéé, tole man nlôm ntômba, tole man kembee, a ga yén ni nyañ dilo disaambok.+ Ndi ibôdôl i hilo hi nyônôs juem nyen Nyambe a ga neebe le ni ti nye kiki likébla, hala wee kiki sesema i hié inyu Yéhôva. 28 Ni nlama bé nol nyaga ni man wé, to ntômba ni man wé, i nlélém kel.+

29 “Ibale ni nti Yéhôva+ sesema inyu ti mayéga, ni nlama ti nye yo inyu boñ le ni lémél nye. 30 I nlama jéba i nlélém kel. Ni nlama bé yék yom yo ki yo mu letee ni kegla.+ Men me yé Yéhôva.

31 “Ni nlama tééda mambén mem, ni nôgôl+ ki mo. Men me yé Yéhôva. 32 Ni nlama bé hindis jôl+ jem lipubi, yak bon ba Israel+ ba nlama neebe le me yé Numpubi. Men me yé Yéhôva, nu a nyilha bé bapubhaga,+ 33 nu a bi nyodna bé i loñ Égiptô inyu unda bé le men me yé Nyambe.+ Men me yé Yéhôva.”

23 Yéhôva a pôdôs ki Môsi, a kal nye le: 2 “Pôdôs bon ba Israel, u kal bo le: ‘I mangand+ ma Yéhôva ni nlama añal,+ ma yé makoda mapubhaga. Mangand mem mana:

3 “‘Bôlô i nlama séla dilo disamal, ndi hilo hi nyônôs isaambok hi yé sabat i bañga noi,+ hala wee hilo hi likoda lipubhaga. Ni nlama bé sal bôlô yo ki yo. I hilo hini hi ga ba sabat inyu Yéhôva, to hee homa ni nyééne.+

4 “‘I mangand ma Yéhôva mana mon ma yé makoda mapubhaga ni nlama añal i ntéak wap ngéda: 5 i hilo 14 hi sôñ+ bisu, i ngéda hiañgaa hi nañal* nyen Pasa+ i Yéhôva i mbôdôl.

6 “‘I hilo hi nyônôs 15 mu nlélém sôñ nyen ngand Bret bi ngi-séñha inyu Yéhôva+ i mbôdôl. Dilo disaambok, ni ga je Bret bi ngi-séñha.+ 7 I hilo hi bisu, ni ga bana likoda lipubhaga.+ Ni nlama bé sal bôlô ngui yo ki yo. 8 Ndi ni ga lona Yéhôva sesema i hié dilo disaambok. Likoda lipubhaga li ga ba i hilo hi nyônôs isaambok. Ni ga sal bé bôlô ngui yo ki yo.’”

9 Yéhôva a kônde pôdôs Môsi, a kal nye le: 10 “Pôdôs bon ba Israel, u kal bo le: ‘I ngéda ni ga jôp i loñ me nti bé, ni i ngéda ni ga bumbul nwom minan, ni nlama lona mbom u matam ma bisu+ ma libumbul linan yak prisi.+ 11 Ha nyen prisi i ga ndéñgés i mbom unu i bisu bi Yéhôva inyu boñ le ni lémél nye. Prisi i nlama ndéñgés wo i kel i noñ sabat. 12 I kel ni ga ndéñgés mbom, ni nlama ti man nlôm ntômba nu a ngi yii mu nwii wé u bisu, nu a gwé bé lem yo ki yo kiki sesema i ntul i hié inyu Yéhôva. 13 Likébla li bijek ni ga kônde mu, li ga ba kilô iba ni pes* i flawa ilam i i yé mbôôk ni môô, le i ba sesema i hié inyu Yéhôva, i i numb loñge njiñ.* Yak likébla li wai ni ga kônde mu, li ga ba lita wai yada.* 14 Ni nlama bé je bret, to nwañak kôn,* to kôn bisu i libumbul letee ni i kel i, hala wee i kel ni ga lona likébla li Nyambe nan. Hala a yé litéak li li ga nom mu tjai dinan tjodisôna, mu bahoma bobasôna ni nyééne.

15 “‘Ni ga soñgol sabat isaambok i kel i noñ sabat, hala wee ibôdôl i kel ni ga lona mbom u likébla ba ndéñgés.+ Ni nlama soñgol dilo tjodisôna di hiki sonde. 16 Ni ga soñgol 50 ma dilo+ letee ni i kel i noñ sabat i nyônôs isaambok, ha nyen ni ga lona likébla li bijek bi bisu bi libumbul yak Yéhôva.+ 17 Ni ga yoñ bret biba mu bahoma ni nyééne, ni lona gwo le bi ba likébla ba ndéñgés. Bi nlama ba mboñok ni kilô iba ni pes* i flawa ilam. Ba ga lamb gwo ni séñha,+ gwon bi yé matam ma bisu ma libumbul inyu Yéhôva.+ 18 Handugi bret, ni ga lona ki bon ba mintômba basaambok ba ba gwé bé lem yo ki yo, hiki lém i ban-ga nwii wada; ni lona ki man nlôm nyaga lôñni balôm ba mintômba+ iba. I bilém bini bi ga ba sesema i ntul i hié inyu Yéhôva, i i ga tiba i nlélém ngéda ni likébla li bijek lôñni likébla li wai, bi bi yé sesema i hié i i numb loñge njiñ* inyu Yéhôva. 19 Ni nlama ki ti man nlôm kembee* le a ba sesema inyu béba,+ ni bon ba mintômba iba, hiki wada a ban-ga nwii wada, le ba ba sesema inyu kôp nsañ.+ 20 Prisi i ga ndéñgés bon ba mintômba iba lôñni bret bi matam ma bisu ma libumbul, le gwobisôna bi ba likébla ba ndéñgés i bisu bi Yéhôva. Bi nlama ba yom ipubhaga inyu Yéhôva, bi ba ki inyu prisi.+ 21 I kel i, ni ga naña+ likoda lipubhaga inyu nan. Ni ga sal bé bôlô ngui yo ki yo. Hala a yé litéak li li ga nom i boga ni boga mu tjai dinan tjodisôna, mu bahoma bobasôna ni nyééne.

22 “‘I ngéda ni mba ni mbumbul mu loñ nan, u nlama bé bumbul kôn yosôna i i yé mu mapañ ma wom woñ, u bada bañ to kôn i i nyégle* i mbus libumbul+ joñ. U ga yék yo inyu hiyeyeba*+ ni nkén mut.+ Men me yé Yéhôva Nyambe nan.’”

23 Yéhôva a pôdôs ki Môsi, a kal nye le: 24 “Kal bon ba Israel le: ‘Hilo hi bisu hi sôñ i nyônôs isaambok hi ga ba hilo hi bañga noi, ñ, hilo ba nhem sép inyu legel le hi yé hilo hi mbigda,+ hala wee hilo hi likoda lipubhaga. 25 Ni nlama bé sal bôlô ngui yo ki yo; ni ga lona sesema i hié inyu Yéhôva.’”

26 Yéhôva a kônde pôdôs Môsi, a kal nye le: 27 “Ndi hilo hi nyônôs jôm hi sôñ i nyônôs isaambok, hi yé hilo inyu Sañgla*+ ni Nyambe. Ni ga bana likoda lipubhaga; ni nlama modop*+ inyu bibéba binan, ni lona ki Yéhôva sesema i hié. 28 Ni nlama bé sal bôlô ngui yo ki yo mu hilo hi tôbôtôbô hi, inyule hi yé hilo inyu sañgla+ ni Nyambe, le ndi ni kôhna nwéhél i bisu bi Yéhôva Nyambe nan. 29 I hilo hi, nu ni nu a ga modop bé* inyu bibéba gwé a ga nôla.*+ 30 Nu ni nu* a ga sal to umbe ntén bôlô i kel i, m’a tjé nye mu litén jé. 31 Ni nlama bé sal bôlô ngui yo ki yo. Hala a yé litéak li li ga nom i boga ni boga mu tjai dinan tjodisôna, mu bahoma bobasôna ni nyééne. 32 I kel i, i yé sabat i bañga noi inyu nan; kôkôa i hilo hi nyônôs bôô mu sôñ i, ni ga modop+ inyu bibéba binan. Ni nlama tééda sabat nan ibôdôl i kôkôa i, letee ni i kôkôa i hilo hi noñ.”

33 Yéhôva a pôdôs ki Môsi, a kal nye le: 34 “Kal bon ba Israel le: ‘I hilo hi nyônôs 15 hi sôñ i nyônôs 7 nyen ngand Bilap* i ga bôdôl, i ga nom dilo disaambok inyu ti Yéhôva+ lipém. 35 Likoda lipubhaga li ga ba i hilo hi bisu, ni nlama bé sal bôlô ngui yo ki yo. 36 Ni nlama lona Yéhôva sesema i hié dilo disaambok. I hilo hi nyônôs juem, ni ga bana likoda lipubhaga;+ ni ga lona ki sesema i hié inyu Yéhôva. Hala a ga ba likoda li tôbôtôbô. Ni nlama bé sal bôlô ngui yo ki yo.

37 “‘I mangand+ ma Yéhôva mana mon ni nlama naña le ma ba makoda mapubhaga,+ inyu lona Yéhôva sesema i hié: hala wee sesema i ntul i hié,+ ni likébla li bijek+ li sesema, lôñni makébla ma wai,+ inoñnaga ni i gwom bi mbéda hiki kel. 38 I makébla mana ma nkôndba mu makébla ni mbéna ti i dilo di sabat+ di Yéhôva, ni mu makébla+ manan, ni mu makébla inyu yônôs mimbônga+ minan, ni mu makébla ni nti ni ñem+ nan wonsôna, hala wee makébla ni nlama ti Yéhôva. 39 Ndi i hilo hi nyônôs 15 hi sôñ i nyônôs 7, i ngéda ni ga mal bumbul bijek mu loñ, ni ga tégbaha ngand Yéhôva dilo disaambok.+ Hilo hi bisu hi ga ba hilo hi bañga noi, yak hilo hi nyônôs juem hi ga ba hilo hi bañga noi.+ 40 I hilo hi bisu, ni ga yoñ matam ma bie bikeñi, masee ma maén,+ mintjep mi bie bi bi gwé ngandak tjai, ni bie bi nsôsôgô;* ni kon ki maséé+ i bisu bi Yéhôva dilo disaambok.+ 41 Ni ga tégbaha yo kiki ngand Yéhôva dilo disaambok hiki nwii.+ Ni ga tégbaha yo i sôñ i nyônôs isaambok; hala a yé litéak li li ga nom i boga ni boga mu tjai dinan tjodisôna. 42 Ni ga yééne i bilap dilo disaambok.+ Bon ba Israel bobasôna i ligwéak ba ga yééne i bilap, 43 inyu boñ le tjai dinan di yi le me bi yis+ bon ba Israel mu bilap i ngéda me bi nyodna bo i loñ Égiptô.+ Men me yé Yéhôva Nyambe nan.’”

44 Hala nyen Môsi a bi toñle bon ba Israel mangand ma Yéhôva.

24 Yéhôva a kônde pôdôs Môsi, a kal nye le: 2 “Inyu bana mapubi, kal bon ba Israel le ba lona we môô malam ma ôlivé,* inyu boñ le bilambe bi loñ ngéda yosôna.+ 3 Arôn a ga boñ le i bilambe bi téé i bisu bi libadô li li nsôô nkuu Mbôgi mu ndap libadô i likoda, bi loñ ngéda yosôna i bisu bi Yéhôva. I litéak lini li ga nom i boga ni boga mu tjai dinan tjodisôna. 4 A ga bii bilambe mu tééne bilambe+ i bañga gôl, i bisu bi Yéhôva ngéda yosôna.

5 “U ga yoñ flawa ilam, u boñ 12 ngiiña bret; hiki bret i bak mboñok ni kilô iba ni pes* i flawa ilam. 6 U ga tek minlôñ mi bret ima i ngii téblé i bañga gôl, i bisu bi Yéhôva;+ hiki nlôñ+ u ban-ga bret bisamal. 7 U nlama ha bañga nunumba i ngii hiki nlôñ u bret, yon i ga ba kiki yimbne i bret gwobisôna.* Hala a yé sesema i hié+ inyu Yéhôva. 8 Hiki kel sabat, a nlama bii bret i bisu bi Yéhôva+ ngéda yosôna. Hala a yé malômbla ipôla me ni bon ba Israel inyu ntandaa ngéda. 9 I bret ini i ga ba inyu Arôn ni bon bé bôlôm,+ ba ga je yo i homa a yé mpubhaga,+ inyule i yé yom i nlôôha pubhaga inyu prisi, i lôlak mu bisesema bi hié inyu Yéhôva. I litéak lini li ga nom ngéda yosôna.”

10 Ndi mut wada a bé mukété bon ba Israel, nyañ a bé ngond Lôk Israel, isañ a bak man Égiptô;+ a bôdôl jo sañ ni man Israel numpe mu homa litén li nyééne. 11 Man ngond Lôk Israel a kahal sol Jôl+ li Nyambe,* a tiihege* jo. Jon ba bi kena nye yak Môsi.+ Nyañ mut nu, jôl jé li bé le Sélômit, a bé ngond Dibri, mut litén li Dan. 12 Ba tééda yaga i mut nu letee ba sôk yi+ makidik ma Yéhôva.

13 Yéhôva a kal ki Môsi le: 14 “I mut a bi tiihe jôl jem, pémés nye mu homa litén li nyééne, yak i bôt bobasôna ba bi nok nye a ntiihe jôl jem ba nlama bii moo map i ngii ño wé; i mbus, ntôñ wonsôna u nlama ôm nye ngok.+ 15 U ga kal bon ba Israel le: ‘Ibale mut a ntiihe Nyambe wé, a ga saa inyu béba a mboñ. 16 Jon i mut a ñôbôs jôl li Yéhôva a nlama nôla,+ ntôñ wonsôna u nlama yaga ôm nye ngok. Nu ni nu a nsol jôl li Nyambe a nlama nôla, to a yé nkén mut, to a yé man Israel.

17 “‘Ibale mut a nol mut numpe,* a nlama nôla+ ibabé set. 18 Nu ni nu a mbép lém kayéle i wo, a nlama saa yo, a ga saa* niñ ni niñ. 19 Ibale mut a mbabaa mut wé libôk, ba ga boñ nye nlélém.+ 20 A ga saa buga inyu buga, jis inyu jis, lisoñ inyu lisoñ; nlélém kiki a mbabaa mut numpe, hala nyen ba ga babaa+ nye. 21 I mut a mbép nuga kayéle i wo, a nlama saa+ yo; ndi i mut a mbép mut numpe kayéle a wo, a nlama nôla.+

22 “‘Nlélém litiñ won ni ga noñ, to mut a yé nkén mut, to a yé man+ Israel, inyule men me yé Yéhôva Nyambe nan.’”

23 Ha nyen Môsi a bi pôdôs bon ba Israel, ba yoñ i mut a bi tiihe jôl li Nyambe, ba pémés nye mu homa litén li nyééne, ba ôm ki nye ngok.+ Bon ba Israel ba boñ toi kiki Yéhôva a bi kal Môsi.

25 Yéhôva a kônde pôdôs Môsi i hikôa Sinai, a kal nye le: 2 “Pôdôs bon ba Israel, u kal bo le: ‘I ngéda ni ga jôp i loñ me nti bé,+ hisi hi ga tééda sabat inyu Yéhôva.+ 3 U ga nwes mbôô mu wom woñ nwii minsamal, u tibil wom woñ u minkôô mi wai nwii minsamal, u bumbul+ ki bijek mu loñ. 4 Ndi nwii mi nyônôs minsaambok mi ga ba sabat i bañga noi inyu hisi, sabat inyu Yéhôva. U nlama bé nwes mbôô mu wom woñ, to tibil wom woñ u minkôô mi wai. 5 U nlama bé bumbul bijek bi bi nyik o* i mbus libumbul, u nlama bé to ket matam ma minkôô mi wai u bi tibil bé. I nwii u, u ga ba sabat i bañga noi inyu hisi. 6 Ndi u nla je bijek hisi hi ga ti mu ngéda sabat yé; we, ni minkol nwoñ mi bôda ni mi bôlôm, ni mut woñ bôlô, yak bakén ba bôt ba ba nyééne i weeni ba ga la je gwo, 7 ni bilém, ni binuga bi bikai bi bi yé mu loñ yoñ. Gwom gwobisôna hisi hi ga ti, bi nla jéba.

8 “‘U ga soñgol nwii mi sabat minsaambok,* hala wee nwii minsaambok ngélé isaambok, hala nyen nwii mi sabat minsaambok mi ga ti 49 nwii. 9 I hilo hi nyônôs jôm hi sôñ i nyônôs isaambok, u ga hem hioñ makeñi; i hilo inyu Sañgla+ ni Nyambe* nyen u nlama hem hioñ le kiñ yé i nôga mu loñ yosôna. 10 Nwii mi nyônôs 50, ni nlama yilha wo mpubhaga, ni añle ki bôt ba loñ+ bobasôna le ba nkôhna kunde. I nwii u, u ga ba nwii u Kunde inyu nan, hiki mut a ga témb a yoñ hisi hié hi ba bi nuñul, yak i mut ba bi nuñul kiki nkol, a ga témb i ndap yé lihaa.+ 11 Nwii mi nyônôs 50 mi ga yila nwii u Kunde inyu nan. Ni ga nwes bé mbôô, to bumbul bijek bi bi nyik o* i mbus libumbul, ni ga ket bé to matam ma minkôô mi wai+ ni bi tibil bé. 12 Inyule i nwii u, u yé nwii u Kunde; u* nlama ba mpubhaga inyu nan. N’a je ndigi bijek hisi hiomede+ hi ga ti.

13 “‘Munu nwii u Kunde unu, hiki mut a ga témb a yoñ hisi+ hié. 14 Ibale u nuñle mut woñ libôk ngim yom, tole u nsomb ngim yom i nyeni, ni pôhna bañ bé ni bé.+ 15 I ngéda u ga somb hisi hi mut woñ libôk, ndamba yé i ga ba inoñnaga ni nwii mi mi mal tagbe i mbus nwii u Kunde; yak nye a ga nuñle we hio inoñnaga ni nwii mi libumbul mi mi ngi yii.+ 16 Ibale nwii mi yii ngandak, a nla bédés ndamba; ndi ibale nwii mi yii ndik ndék, a ga suhus ndamba inyule i yom a yé i nuñle we, i yé nsoñgi u bijek hisi hi ga ti. 17 Mut nye ki nye i bééni a nlama bé pôh mut+ wé libôk, ni nlama ki kon Nyambe+ nan woñi, inyule men me yé Yéhôva Nyambe+ nan. 18 Ibale ni nôgôl matéak mem, ni tééda ki matiñ mem, ha nyen ni ga niñ mu loñ+ ibabé woñi. 19 Hisi hi ga ti bijek,+ ni ga je, ni nuu, ni niñ ki mu loñ ibabé woñi.+

20 “‘Ndi ibale ni mbadba le: “Kii di ga je i nwii mi nyônôs minsaambok ibale di nsal bé wom, di tééda bé to bijek bi libumbul+ jés?” 21 Yina le m’a kôp bisai gwem i ngii nan mu nwii mi nyônôs minsamal, ha nyen hisi hi ga ti ngandak bijek bi bi ga kola inyu nwii+ maa. 22 I ngéda ni ga nwes mbôô i nwii mi nyônôs juem, ni mba ni ngi jek bijek bi ni bi bumbul i nwii mi nyônôs minsamal.* I bijek bi gwon n’a ba ni nje letee ni bumbul i nwii mi nyônôs bôô.*

23 “‘Hisi hi ga nuñlana bé nuñla yosôna,+ inyule hisi hi yé hiem.+ Inyu yem, ni yé bakén ba bôt ni biyoyo.+ 24 Mu disi tjodisôna di loñ nan, i mut a nuñul hisi hié a ga bana kunde i tiimba somb hio.

25 “‘Ibale maasoñ a nkwo liyep, ndi i pam le a nlama nuñul pes yé ’isi, ha nyen nkôdôlbum nu a yé mut wé lihaa a nlama lo, a tiimba ki somb hisi maasañ a bi nuñul.+ 26 Ndi ibale mut a gwé bé nkôdôlbum, ndi a kwo ngwañ, a bana ki bigwel moo i tiimba somb hio, 27 a nlama tamb ndamba yé inoñnaga ni nwii mi mal tagbe ibôdôl i ngéda a bi nuñul hio; i moni mi nyégle, a ga timbhe nwo i mut a bi nuñle hisi. Ha nyen a ga témb a yoñ hisi+ hié.

28 “‘Ndi ibale a mbana bé bigwel moo i tiimba somb hio yak mut nu, wee hisi a bi nuñul hi ga ba hisi hi mut a bi somb hio letee ni i nwii+ u Kunde; hisi hi ga témb hi yila hisi hié i nwii u Kunde, ha nyen hisi+ hi ga témb hié.

29 “‘Ibale mut a nuñul ndap i yé ikété tison i i gwé lipénd, a gwé kunde i tiimba somb yo ibôdôl i hilo a bi nuñul ndap yé letee ni i lisuk li nwii; kunde yé i tiimba somb+ yo i ga nom ngim nwii. 30 Ndi ibale ngim nwii i ntagbe ndi ba tiimba bé somb yo, i ndap i yé ikété tison i gwé lipénd i ga yégle ngéda yosôna i moo ma nwet a nsomb yo, yak ni tjai tjé tjodisôna. Ba nlama bé timbis yo i nwii u Kunde. 31 Ndi ibale mut a nuñul ndap i i ta bé ikété lipénd, i bak nyoo i mbai, ba nla tiimba somb yo to imbe ngéda nlélém kiki ba mboñ ni wom. I nwii u Kunde, ba nlama timbhe yo nwet wé nu bisu.

32 “‘Ndi inyu mandap ma Lôk Lévi ma ma yé ikété bitison gwap, Lôk Lévi i ga bana kunde i tiimba somb mo to imbe ngéda. 33 Ibale man Lôk Lévi a ntiimba bé somb ndap yé i i yé ikété tison yap, wee ba nlama timbhe nye yo i nwii u Kunde,+ inyule mandap ma ma yé ikété bitison bi Lôk Lévi, ma yé ngababum yap ikété bon ba Israel.+ 34 Handugi hala, ba nlama bé nuñul nwom*+ mi nkéña bitison gwap, inyule mi yé disi tjap ngéda yosôna.

35 “‘Ibale maasoñ nu a nyén bebee ni we, a nkwo liyep, a la ha bé to bana likala li kel, u nlama hôla nye+ kiki u yé le u hôla nkén mut ni yoyo,+ le ndi a wo bañ, a kônde niñ ni bé. 36 U yoñ bañ nye yéñe, u je bañ to nye nseñ.*+ U nlama kon Nyambe+ woñ woñi, le ndi maasoñ a wo bañ, a kônde niñ ni bé. 37 U nlama bé pôôs nye moni ni nseñ,+ to ti nye bijek inyu kôhna yéñe mu. 38 Men me yé Yéhôva Nyambe nan, nu a bi nyodna bé i loñ Égiptô+ inyu ti bé loñ Kanaan, ni inyu unda bé le men me yé Nyambe+ nan.

39 “‘Ibale maasoñ nu a nyén bebee ni we, a nkwo liyep, ndi i pam le a nlama nuñle we+ nyemede, u nlama bé nyégsa nye i sal bôlô i nkol.+ 40 U nlama yoñ nye kiki u nyoñ mut bôlô,+ tole yoyo. A ga sélél we letee ni i nwii u Kunde. 41 Ha ngéda i, a ga yék we, nye ni bon* bé, a témb i lihaa jé. A ga tiimba yoñ hisi hi basôgôlsôgôl+ bé. 42 Inyule ba yé minkol nwem mi me bi nyodna i loñ Égiptô.+ Ba nlama bé nuñul bomede kiki ba nuñul nkol. 43 U nlama bé tét+ nye, u nlama kon Nyambe+ woñ woñi. 44 U nlama yôñôl minkol nwoñ mi bôlôm ni mi bôda mu biloñ bi yé bé ipañ, mu biloñ bi nyen u nla somb nkol munlôm tole nkol muda. 45 U nla ki somb minkol mu bakén ba bôt ba nyééne i bééni,+ yak mu bon bap ba ba ngwééne mu loñ nan; ba ga yila banan. 46 U nla yigle bo bon boñ bôlôm, le ba yik yila ngababum yap ngéda yosôna. U nla yilha bo bôt boñ ba bôlô, ndi u nlama bé tét+ lôkisoñ i i yé bon ba Israel.

47 “‘Ibale nkén mut tole yoyo nu a nyééne i bééni a nkwo ngwañ, ndi maasoñ nu a yé bebee ni nye a nkwo liyep, i pam le a nuñul nyemede yak nkén mut tole yoyo nu a nyééne i bééni, tole yak mut lihaa nu nkén mut, 48 yak i ngéda a mal nuñul nyemede, ba ngi gwé ki kunde i tiimba somb nye. Mut wada ikété lôkisañ a nla tiimba somb+ nye, 49 to manyañ isañ, to man manyañ isañ a nla tiimba somb nye, to numbe mut a yé mut wé lihaa,* hala wee mut wada mu lihaa jé a nla tiimba somb nye.

“‘Ndi ibale nyemede a nkwo ngwañ, a nla tiimba somb+ nyemede. 50 Nye ni i mut a bi somb nye ba nlama soñgol ngéda, ibôdôl i kel a bi nuñul nyemede letee ni i nwii u Kunde;+ ndamba ba ga ti inyu tiimba somb nye i ga ba inoñnaga ni i nwii+ mi. Ndamba i dilo tjé di bôlô mu ngéda i, i ga soñglana inoñnaga ni nsaa mut bôlô+ a nkôhna hiki kel. 51 Ibale nwii mi ngi yii ngandak ilole nwii u Kunde u nkola, ndamba a ga saa inyu tiimba somb nyemede i ga ba inoñnaga ni i nwii mi ngi yii. 52 Ndi ibale ndék nwii ndigi yon i ngi yii ilole nwii u Kunde u nkola, a ga ôt nsoñgi, a saa ki ndamba inyu tiimba somb nyemede inoñnaga ni i nwii mi ngi yii. 53 Nwii ndi nwii, a ga ke ni bisu i ba mut wé bôlô; u béñgege le nwet wé bôlô a tét+ bañ nye. 54 Ndi ibale a nla bé somb nyemede ni i manjel mana, wee nye ni bon* bé ba ga kôhna kunde i nwii u Kunde.+

55 “‘Inyule bon ba Israel ba yé minkol nwem. Ba yé minkol nwem, mi me bi nyodna i loñ Égiptô.+ Men me yé Yéhôva Nyambe nan.

26 “‘Ni bôñôl bañ bébomede+ banyambe ba ba gwé bé nseñ, ni téé bañ sat,+ to jél lipubhaga, ni téé bañ to ôñgba ngok+ mu loñ nan kayéle ni ôôp i bisu gwé,+ inyule men me yé Yéhôva Nyambe nan. 2 Ni nlama tééda dilo tjem di sabat, ni diihege ki juu jem li bisesema.* Men me yé Yéhôva.

3 “‘Ibale ni nke ni bisu i noñ matéak mem, ni tééda yak mambén mem, ni nôglak+ ki mo, 4 m’a ti bé banop i loñge ngéda,+ hisi hi ga ti bijek, yak bie bi wom bi ga num+ matam. 5 Ngéda i litidil li blé i ga nom letee ni ngéda libumbul li matam ma nkôô wai, yak libumbul li matam ma nkôô wai li ga nom letee ni i ngéda ba nwes mbôô; ni ga je bijek* binan letee ni nuu, ni yén ki mu loñ+ nan ibabé woñi. 6 M’a boñ le nsañ u ba mu loñ,+ ni ga nañal ibabé le mut nye ki nye a kônha bé woñi;+ m’a héya ki binuga bi bikai mu loñ, to pansoñ i ga tagbene bé* mu loñ nan. 7 Ni ga noñ yaga baoo banan, ni ga nol ki bo ni pansoñ. 8 Bôt batan ikété nan ba ga noñ 100, yak 100 bôt ikété nan i ga noñ 10 000; ni ga nol ki baoo banan ni pansoñ.+

9 “‘M’a kôp bé bisai,* me boñ ki le ni gwal, ni bôl;+ m’a yônôs yak malômbla+ me bi boñ ni bé. 10 I ngéda ni mba ni ngi jek libumbul li nwii u ntagbe, i ga béda le ni lep nlômbi libumbul inyu yék pôla inyu libumbul li mondo. 11 M’a* bii ki lap yem ipôla+ nan, to tjôô m’a tjôô bé me bé. 12 M’a kiha ni bé, me ba ki Nyambe+ nan, yak bé n’a ba litén+ jem. 13 Men me yé Yéhôva Nyambe nan, nu a bi nyodna bé i loñ Égiptô inyu boñ le ni ba ha bañ minkol nwap; me bi bôk kop nan nson, me boñ ki le ni kenek ibabé le ni kon woñi.*

14 “‘Ndi ibale ni ñemble bé me, to tééda ni tééda bé i mambén+ mana momasôna, 15 ibale ni ntjél matéak+ mem, ni oo ki matiñ mem kayéle ni tééda bé to mambén mem momasôna, ni sagal yak malômbla+ mem, 16 wee i mam mana mon m’a boñ bé: m’a kogse bé ni ndutu, lôñni mbak ni lihep likeñi, gwon bi ga boñ le ni tehna ha bañ loñge, bi mélés ki ngui nan. N’a nwes mbôô yañga, inyule baoo banan bon ba ga je+ libumbul linan. 17 M’a tjôô bé,* yak baoo+ banan ba yémbél bé; i bôt ba ñoo bé ba ga tét+ bé, n’a ke ki ngwéé ibabé le mut nye ki nye a noñ+ bé.

18 “‘Ibale to hala, ni ñemble bé me, i ga béda le me kogse bé ngélé isaambok iloo i ngéda bisu inyu bibéba binan. 19 M’a nyugut ngandak nan ngôk, me yilha ki ngii nan kiki kei,*+ yak hisi hinan kiki mamuna. 20 Ni ga tumbba yañga, inyule hisi hinan hi ga ti bé bijek,+ to bie bi bi yé mu loñ bi ga num bé matam.

21 “‘Ndi ibale ni nke ni bisu i kolba me, ni gwés bé to emble me, m’a kogse bé ngélé isaambok iloo i ngéda bisu, inoñnaga ni bibéba binan. 22 M’a om binuga bi bikai i bééni,+ gwon bi ga mélés bon+ banan, bi tjé ki bilém binan, bi suhus yak nsoñgi nan u bôt, ha nyen minloñ minan mi ga ba hôlô.+

23 “‘Ibale to hala, ni neebe bé bikodlene+ gwem, ndi ni nai ndigi le ni nke ni bisu i kolba me, 24 ha nyen yak me m’a kolba bé, me kogse ki bé ngélé isaambok inyu bibéba binan. 25 M’a lona pansoñ mapuna i ngii nan, inyule ni mal sagal malômbla+ mem ni bé. Ibale ni nkodba mu bitison binan, m’a om kon i ñemkété+ nan, ba ga ti ki bé i moo ma ñoo.+ 26 I ngéda m’a mal tjé i homa ni ntééda bijek* binan, jôm li bôda li ga gwélél ndigi juu jada inyu bôm bret,+ ba hek ki gwo i kilô+ inyu kébha bé gwo; ni ga je, ndi ni ga nuu+ bé.

27 “‘Ibale to hala, ni ñemble bé me, ndi ni nai ndigi le ni nke ni bisu i kolba me, 28 m’a kônde kolba+ bé, memede m’a nôgôs ki bé ngélé isaambok inyu bibéba binan. 29 Ha nyen ni ga je minsôn mi bon bôlôm banan, ni je ki minsôn mi bon bôda+ banan. 30 Bahoma banan bapubhaga+ ba ba nyôgi, m’a nyugut bo, me bôk ki muu manan ma binjinjiñ; m’a leñ mim minan i ngii mim mi bisat binan bi nyega,*+ m’a* kôm ki bé mbus inyule ni nsuñgaha+ me ñem. 31 M’a tjé bitison binan ni pansoñ,+ me bôk ki bahoma banan bapubhaga, to loñge njiñ* i bisesema binan i ga lémél bé me. 32 Memede m’a tjé+ loñ, yak baoo banan ba ba nyééne mu loñ ba ga hel ngandak i ngéda ba ga tehe i jam li.+ 33 M’a sand bé mu loñ,+ m’a sodol ki pansoñ inyu noñ+ bé; loñ nan i ga tjiba,+ yak bitison binan bi ga yégle hôlô.

34 “‘Ha ngéda i nyen hisi hi ga saa sabat yé mu dilo tjodisôna hi ga yégle hôlô, i ngéda bé ni ga ba i loñ i baoo banan. Ha ngéda i, hisi hi ga noi* inyule hi nlama saa sabat+ yé yosôna. 35 Hisi hi ga noi mu dilo tjodisôna hi ga yégle hôlô, inyule hi bi noi bé mu mangéda manan ma sabat, i ngéda ni bé ni yiine mu.

36 “‘I bôt ba ga pei,+ ba ba nyééne mu biloñ bi baoo bap, m’a yônôs miñem nwap ni ngandak woñi, kayéle mbimba i hiai le mbebi i mbegee i ga kiha bo ngwéé, ba ga ke ngwéé kiki mut a nke pansoñ ngwéé, ba ga kwo ki ibabé le mut nye ki nye a noñ+ bo. 37 Ba ga kumlana bo ni bo, bana ba kwok i ngii baa bape, kiki bôt ba nke pansoñ ngwéé ibabé le mut nye ki nye a noñ bo. Ni ga la bé kolba baoo+ banan. 38 Ni ga wél nyoo i biloñ+ bipe, loñ i baoo banan i ga mil bé. 39 I bôt banan ba ba ga yégle, ba ga bol mu biloñ bi baoo+ banan inyu hihôha hinan. Ñ, ba ga bol inyu mahôha ma basañ+ bap. 40 Ha nyen ba ga pahal hihôha+ hiap bomede, ba pahal ki hihôha hi basañ bap lôñni ndok yap, ba neebe ki le ba bi ba ndok i ngéda ba bi kolba+ me. 41 Ha nyen yak me, me bi kolba+ bo i ngéda me bi kena bo nyoo i loñ i baoo+ bap.

“‘Bebek le ha nyen ñem wap u u yé ndok* u ga suhus+ womede, ba saa ki inyu hihôha hiap. 42 Ha nyen m’a bigda malômbla mem ni Yakôb,+ yak malômbla mem ni Isak,+ m’a bigda malômbla mem ni Abraham,+ me bigda ki loñ. 43 Mu ngéda ba ga tjôô loñ, hisi hi ga saa sabat+ yé yosôna, hi yégle ki hôlô, ibabé le ba yééne mu; ba ga saa ki inyu hihôha hiap, inyule ba bi tjél matiñ mem, ba* oo ki matéak+ mem. 44 Ndi to hala, i ngéda ba ga ba nyoo i loñ i baoo bap, m’a tjôô+ bé bo tjagda, m’a oo bé bo kayéle me tjé bo hies, tiga le hala a sagal malômbla+ mem ni bo, inyule men me yé Yéhôva Nyambe wap. 45 Inyu yap nyen m’a bigda malômbla me bi boñ ni basôgôlsôgôl+ bap, ba me bi nyodna i loñ Égiptô, biloñ+ bipe bi tehge, inyu boñ le me unda bo le men me yé Nyambe wap. Men me yé Yéhôva.’”

46 I matiñ, ni matéak, ni mambén mana mon Yéhôva a bi ti bon ba Israel ni njel Môsi+ i hikôa Sinai.

27 Yéhôva a pôdôs ki Môsi, a kal nye le: 2 “Pôdôs bon ba Israel, u kal bo le: ‘Ibale mut a nti Yéhôva likak li tôbôtôbô+ le a nti nye ndamba moni i mbéda inyu ngim mut,* 3 wee ndamba i munlôm nu a yé ipôla 20 ma nwii ni 60 ma nwii i ga ba 50 ma sékel* i silba, inoñnaga ni sékel i homa mpubhaga.* 4 Ndi ibale a yé muda, ndamba yé i ga ba 30 ma sékel. 5 Ibale a yé mut nu a yé ipôla nwii 5 ni 20 ma nwii, a bak man munlôm, ndamba yé i ga ba 20 ma sékel; ndi ibale a yé man muda, ndamba yé i ga ba 10 li sékel. 6 Ibale a yé man nu a yé ipôla sôñ yada ni nwii mintan, a bak man munlôm, ndamba yé i ga ba sékel i silba itan; ndi ibale a yé man muda, ndamba yé i ga ba sékel i silba aa.

7 “‘Ibale a yé mut nu a gwé 60 ma nwii tole iloo ha, a bak munlôm, ndamba yé i ga ba 15 sékel; ndi ibale a yé muda, ndamba yé i ga ba 10 li sékel. 8 Ndi ibale i mut a nti likak a nlôôha ba liyep inyu saa ndamba i mbéda,+ wee i mut nu a ga telep i bisu bi prisi, ha nyen prisi i ga ti ndamba i mut nu. Prisi i ga ti ndamba inoñnaga ni i yom mut a nti likak a nla bana.+

9 “‘Ibale mut a nti likak le a ga ti Yéhôva lém i i yé loñge inyu sesema, wee i lém i, i ga ba yom ipubhaga inyu Yéhôva. 10 A nla bé luga to héñha i lém ini, loñge yom inyu béba yom, tole béba yom inyu loñge yom. Ndi ibale a nhéñha i lém ini ni lém ipe, wee lém bisu ni lém ba nhéñha ni yo, hala wee bilém gwo biba, bi ga ba bi Nyambe.* 11 Ibale lém+ i yé nyega, i bak lém mut a kôli bé lona yak Yéhôva kiki likébla, a ga téé i lém ini i bisu bi prisi. 12 Prisi i ga ti ndamba i lém, inoñnaga ni kiki lém i yé loñge tole béba. I ndamba prisi i ga ti, yon i ga ba ndamba nsôk. 13 Ndi ibale i mut nu a nsômbôl tiimba somb lém, wee a nlama kônde jôga jada ikété môga matan mu ndamba+ i lém.

14 “‘Ibale mut a nti ndap yé le i ba yom ipubhaga inyu Yéhôva, prisi i ga ti ndamba i ndap inoñnaga ni kiki i yé loñge tole béba. Ndamba i ndap i ga ba inoñnaga ni i yom prisi i ga tamb.+ 15 Ibale mut a nyilha ndap yé le i ba yom ipubhaga, ndi a sômbôl tiimba somb yo, a nlama kônde jôga jada ikété môga matan mu ndamba i ndap, ha nyen ndap i ga témb i yila yé.

16 “‘Ibale mut a nyilha pes yé wom yada le i ba yom ipubhaga inyu Yéhôva, ndamba i pes wom i ga ba inoñnaga ni libim li mbôô ba ga gwélél inyu sal wo: hihéga hiada hi hômer* i kôn* hi ga ba 50 ma sékel i silba. 17 Ibale i nwii u Kunde+ nyen a nyilha wom wé le u ba yom ipubhaga, wee ndamba i wom i ga héñha bé. 18 Ibale i mbus nwii u Kunde nyen a nyilha wom wé le u ba yom ipubhaga, prisi i ga ôt nsoñgi u moni inoñnaga ni nwii mi ngi yii letee ni i nwii u Kunde u u nlo; ndi a ga suhus i ndamba+ i. 19 Ibale mut a nyilha wom wé le u ba yom ipubhaga, ndi a sômbôl tiimba somb wo, a nlama kônde jôga jada ikété môga matan mu ndamba i wom, ha nyen wom u ga témb u yila wé. 20 Ibale a ntiimba bé somb wom, ndi ba nuñlene wo mut numpe, wee to mut a nla ha bé tiimba somb i wom u. 21 I ngéda i mut a bi somb wom a ga timbis wo i nwii u Kunde, u ga yila yom ipubhaga inyu Yéhôva, kiki wom le ba nsémél* nye. I wom unu u ga yila yom i biprisi.+

22 “‘Ibale mut a bi somb wom u u ta bé mu ngababum+ yé, ndi a yilha wo le u ba yom ipubhaga inyu Yéhôva, 23 ha nyen prisi i ga ôt nsoñgi u moni inoñnaga ni nwii mi ngi yii letee ni i nwii u Kunde u u nlo, yak i mut nu a ga saa i moni mi i nlélém kel.+ Hala a yé yom ipubhaga inyu Yéhôva. 24 I nwii u Kunde, wom u ga témb i moo ma mut a bi nuñle nye wo, hala wee i mut a gwé i hisi+ hi.

25 “‘Ndamba yosôna i ga ba inoñnaga ni sékel i homa mpubhaga. Sékel yada i ga ba 20 ma géra.*

26 “‘Ndi mut to wada a yoñ bañ mbôkgwéé nu lém inyu yilha nye yom ipubhaga, inyule ba bi ti hiki mbôkgwéé inyu Yéhôva.+ To a yé nlôm nyaga, to a yé ntômba, ba mal ti gwo inyu Yéhôva.+ 27 Ibale mbôkgwéé nu lém a nlôl mu binuga bi bi yé nyega, ndi mut a kobol yo inoñnaga ni i ndamba i mbéda, a nlama kônde jôga jada ikété môga matan mu ndamba i.+ Ndi ibale mut a ntiimba bé somb i nuga ini, wee ba ga nuñul yo inoñnaga ni i ndamba i mbéda.

28 “‘Ibale mut a nyôñôl yom mu gwom gwé, ndi a ti yo le i ba kila, a sem yaga yo* inyu Yéhôva, wee ba nla ha bé nuñul i yom i, to tiimba somb yo, to i yé mut binam, to nuga, to wom wé. Hiki yom ba nti Nyambe le i ba kila, i yé yom i nlôôha pubhaga inyu Yéhôva.+ 29 Handugi hala, ba nla bé kobol+ mut nu a nkôhna mbagi kogse.* A nlama yaga nôla.+

30 “‘Hiki jôga jada ikété jôm+ li hisi, to li nlôl mu bijek bi wom tole mu matam ma bie, li yé inyu Yéhôva; li yé yom ipubhaga inyu Yéhôva. 31 Ibale mut a nsômbôl tiimba somb yom yada mu jôga jé jada ikété jôm, a ga kônde jôga jada ikété môga matan mu ndamba i. 32 Ba nlama ti Nyambe hiki jôga jada ikété jôm li liuñ li nyaga tole li bémba i mintômba. I ngéda ntééda bémba a nsoñgol bilém bi bémba yé,* a nlama bagal hiki lém* i nyônôs jôm le i ba yom ipubhaga inyu Yéhôva. 33 A ga béñge bé yo inyu yi too i yé loñge tole béba, a ga héñha bé to yo. Ndi ibale a noode héñha yo, wee lém bisu ni lém ba nhéñha ni yo, hala wee bilém gwo biba bi ga ba gwom bipubhaga+ inyu Nyambe. Ba nla ha bé tiimba somb gwo.’”

34 I mambén mana mon Yéhôva a bi ti Môsi inyu bon ba Israel i hikôa Sinai.+