PES 24
Paul a ntilna mintôñ
Bikaat Paul a ntilna mintôñ mi bikristen bi nti bo ngui
NTÔÑ bikristen u ntip tééba u yé nseñ ngandak i biyônhene bi ngôôba i Yéhôva. Ndi bikristen bi bisu bi bi pala boma ngolba. Baa ba ga tiñip ni telepsép yap i bisu bi Djob to hala kii ndéénga i nlôl bo ni bôt ba mbédgé, dipa di pémlak ki bo ikété ntôñ? Bitilna bi kristen ni hop u Grikia bi gwé 21 maléda inyu ti bikristen maéba ni maként ma bé sômbla.
Ñôma Paul a bi tila jôm li maléda ni mana, bôdôl ni kaat Rôma i pam kaat Lôk Héber. Bini bikaat bi gwé môl ma bôt a bé ômle gwo. Ngim mangéda Paul a bé a tilna mut wada, mangéda mape a bé a tilna bôt ba ngim ntôñ. Di béñge le ndég gwom ikété maléda ma Paul.
Maéba inyu bana bilem ni mabo ñog malam. Bôt ba ndéñg, bôt ba manyaa ni baboñ mam mabe mape “b’a kôdôl bé ane Nyambe.” (Galatia 5:19-21; 1 Korintô 6:9-11) Bagwélél ba Djob ba nlama yén ni adna ibabé mbagla biloñ. (Rôma 2:11; Efésô 4:1-6) Ba nlama kon masé ngéda ba hôla bikristen bipe bi nyep. (2 Korintô 9:7) Paul a ti bo maként, a kal le: “Ni nwas bañ i soohe.” Bikristen bi nlama yaga yibil miñem nwap i bisu bi Yéhôva hiki ngéda ba nsoohe. (1 Tésalônika 5:17; 2 Tésalônika 3:1; Filipi 4:6, 7) Ibale bikristen bi nsômbôl le Djob a emble masoohe map, ba nlama soohe ba hémlege le Djob a nok.—Lôk Héber 11:6.
Kii nla hôla mahaa le ma yémbél mandutu? Balôm ba nlama gwés baa bap wengoñle manyu map bomede. Bôdaa ki ba nlama ti balôm bap ngandak lipém. Yak boñge ba nlama nôgôl bagwal bap, inyule hala a nlémél Djob. Bagwal ba nlama gwélél matiñ ma Djob i éga ni niiga bon bap ni gwéha.—Efésô 5:22–6:4; Kôlôsé 3:18-21.
Bikristen bi nkôhna mahôla i soñda ngôôba i Djob. Ngandak matiñ ma Mbén Môsé ma bé inyu tééda ni éga Lôk Israél letee ni malo ma Kristô. (Galatia 3:24) Ndi bikristen bi ta bé nyégsaga i noñ Mbén Môsé inyu gwélél Djob. Lôk Héber ba bé Lôk Yuda ba ba yila bikristen. Ngéda Paul a tilna bo, a tibil toñol inyuki Mbén Môsé i bi tiba, ni lelaa ngôôba Djob i bé lama yon ni njel Kristô. Paul a toñol le ngandak matéak ma Mbén ma bé titii mam ma bé lama lo. Kiki héga, sesema i binuga i bé titii nyemb Yésu. Sesema i niñ Yésu yon i yé toi nseñ inyu kôhna nwéhél i bibéba. (Lôk Héber 10:1-4) Ni njel nyemb Yésu nyen Djob a bi mélés malômbla ma Mbén Môsé inyule ma bé ha bé nseñ.—Kôlôsé 2:13-17; Lôk Hébér 8:13.
Maéba inyu tjek mam loñge ikété ntôñ. Bôt ba gwé ngôñ i bana minson ikété ntôñ ba nlama ba bôt ba ntibil noñ matiñ ma Djob, ba banga ki bilem Bibel i ntôp. (1 Timôtéô 3:1-10, 12, 13; Titô 1:5-9) Bagwélél ba Yéhôva Djob ba nlama béna kodba ni bikristen bipe i lédhana nyu. (Lôk Héber 10:24, 25) Makoda i bégés Yéhôva ma nlama hôlôs bikristen, ma nlama ki ti bo biniigana.—1 Korintô 14:26, 31.
Ñôma Paul a ba a ma témb i Rôma ngéda a tilna Timôtéô léda li nyônôs ima; a bé bémél minkaa ndap mog. Ndég bôt yon i bi kon bé woñi i peple nye. Paul a bé yi le nyemb yé i yé bebe. Ni nye a kal le: “Me mal jo sañ lam, me sugus pééna ngwéé, me tééda ki hémle.” (2 Timôtéô 4:7) I nene le ndég dilo mbus hala nyen ñôma Paul a bi nôla inyu hémle yé. Ndi bikaat a tila bi nkônde éga bañga bagwélél ba Djob letee ni ngéda yés.
—Biniigana bini bi nyôñna i bikaat bi Rôma; 1 Korintô; 2 Korintô; Galatia; Efésô; Filipi; Kôlôsé; 1 Tésalônika; 2 Tésalônika; 1 Timôtéô; 2 Timôtéô; Titô; Filémô; Lôk Héber.