Kii i yé bôlô i bahôla nson?

Bibel i mpôdôl mintén mi bikristen ima, mi mi ngwel nson u tôbôtôbô ikété likoda: batééda ntôñ, ni bahôla nson (bahogi ba nsébél ki le bidiakôn.) (Filipi 1:1) Hiki likoda li mbéna bana libim li bilôk bikéé bi bôlôm li ngwel nson u. Imbe bôlô bahôla nson ba nsal inyu nseñ wés?

Ba nhôla juu li mimañ. Bahôla nson ba gwé maada makeñi ni Yéhôva. Ba yé bôt le di nla bôdôl ñem, ba nti bomede i nson. Bahogi ba yé boñge ba wanda, bape ba bak mimañ mi bôt. Ba mbéna sal bibôlô bi moo ni bi ngui bi bi nlama bôña ikété likoda. Hala a nhôyôs nson mimañ, le ba téñbe i niiga ni yuuga bilôk bikéé.

Ba ngwel nson u yé nseñ. Bahogi ba nleege bôt ba nlo likoda. Bape ba nsal i nkuu mahop, i nson u kap bikaat, i ba kindak inyu makébla ma njômbi nlam, tole i kap mabôga ma likalô. Ba nhôla ki inyu bôñgôl Ndap Ane. Batééda ntôñ ba nla ki bat bo le ba hôla mimañ mi bôt mi likoda. Bahôla nson ba nkon maséé i gwel to umbe nson mimañ mi nti bo i boñ. Jon di kôli ti bo lipém.​—1 Timôtéô 3:13.

Ba yé bikristen bi nti ndémbél lam. Inyu tep bahôla nson, mimañ mi mbéñge bilem bikristen bi bi gwé. Ngéda ba nti ngim minkwel i likoda, ba nlédés hémle yés. Kiki ba nyoñ ño i bôlô i añal ñañ nlam, ba nkônde bés makénd mu nson u. Kiki ba nsal ikété adna ni juu li mimañ, jon maséé ni maada ma yé ikété likoda. (Efésô 4:16)) Mbus ngéda, yak bo b’a la hol inyu yila mimañ.

• Bimbe bilem bahôla nson ba nlama bana?

• Imbe bôlô bahôla nson ba nsal?