YIGIL 15
Inyuki u nlama kena yigil yoñ Bibel ni bisu?
1. Bimbe bisai u ga kôhna ibale u nkena yigil yoñ Bibel ni bisu?
Ibabé nkaa, biniigana bi Bibel bi man kaat nunu bi nlédés gwéha yoñ inyu Yéhôva. Ndi, u nlama sal inyu hôlôs gwéha i. (1 Pétrô 2:2) Ngéda w’a kôôge Djob bebe ni njel yigil Bibel, w’a ke bana botñem i niñ boga ni boga.—Añ Yôhanes 17:3; Yuda 21.
Kii u ga tibil yi Djob, hala nyen u ga lédés hémle yoñ. Hémle yoñ i ga hôla we i lémél Djob. (Lôk Héber 11:1, 6) Hémle yoñ i ga tinde ki we i hielel ñem woñ wonsô ni i boñ mahéñha ma ga ba we nseñ i lémés niñ yoñ.—Añ Minson mi baôma 3:19.
2. Lelaa u nla gwélél yi yoñ i Djob inyu hôla bôt bape?
U nla jôp ikété maada ma tôbôtôbô ni Yéhôva
Yi yoñ i Djob i ga nyuge we i pôdôl bôt bape yom u nigil. Bés bobasô di yé masé i añal miñañ minlam. Ibale u nkena yigil yoñ i Bibel ni bisu, u ga nigil i gwélél Bibel inyu toñol hémle u gwé inyu Yéhôva ni inyu ñañ nlam.—Añ Rôma 10:13-15.
Ngandak bôt i mbôdôl añal ñañ nlam i bisu bi mawanda map, tole bi bôt bap ba lihaa. Ndi, u babaa bañ miñem ñwap. U kéés bañ bo, ndi pôdôl bo mimbônga mi Djob, ndi bomede ba kwo nkaa inoñnaga ni yom Bibel i kal inyu base yap. Bigda le, yom i nlôôha tihba miñem mi bôt i yé maboñog moñ malam iloo bipôdôl gwoñ.—Añ 2 Timôtéô 2:24, 25.
3. Mambe maada malam u nla bana ni Djob?
Yigil i Bibel i ga hôla we le u bana mahol ikété mam ma mbuu. Ni ngéda, u ga jôp ikété maada ma tôbôtôbô ni Yéhôva. U nla toi ba wada ikété lihaa jé.—Añ 2 Korintô 6:18.
4. Lelaa u nla kônde hôlôs maada moñ ni Yéhôva?
U nla bana mahol ikété mam ma mbuu ngéda u nkena yigil i Bibel ni bisu. (Lôk Héber 5:13, 14) Bat mbôgi Yéhôva yada le a hôla we i nigil Bibel ni njel ini kaat le Kii Bibel i niiga bés? Kii u ga kena yigil yoñ i Djob ni bisu, hala nyen u ga lémés niñ yoñ.—Añ Tjémbi 1:1-3; 73:27, 28.
Miñañ minlam mi nlôl ni Djob li masé le Yéhôva. U nla kôôge bebe ni nye ibale u ntiige bagwélél bé pañ. (Lôk Héber 10:24, 25) Kii w’a boñ biliya i lémél Djob, u mba u nkil i njel niñ boga. Likôôge bebe ni Djob li yé toi loñge jam. Yom ipe i nlee yo i ta bé.—Añ 1 Timôtéô 1:11; 6:19.