Yésu nye mañge

Yôsep bo Maria ba bé niñ i Nasaret, lôñni Yésu, ni bon bap bape, bôlôm ni bôda. Yôsep a bé sal bôlô i kapinda inyu tééda ndap yé lihaa, a niigaga ki bo i yi Yéhôva ni mambén mé. Lihaa jé li bééna lem i ke i ndap bibégés i tison, ni i Yérusalem, hiki nwii, inyu lôôs ngand Pasa.

Ngéda Yésu a bééna 12 nwii, lihaa jé li bi ke i Yérusalem kiki lem. Tison i bé nyonok ni bôt ba ba bi lo i lôôs ngand Pasa. I mbus ngand, Yôsep bo Maria ba kahal témb, ba hoñol le Yésu a yé ntôñ ni bo. Ndi ngéda ba bi yéñ nye ipôla bôt ba lihaa, ba bi la bé léba nye.

Ba bi témb i Yérusalem, ba yéñ lok yap dilo daa. Sôk i nsôk, ba ke béñge nye i témpel. Nyoo nyen Yésu a bé a yii, ipôla baniiga Mbén, a emblege bo loñge, a badak ki bo bañga mambadga. Yésu a bi hélés baniigana ba, kayéle ba bôdôl bat nye mambadga. Ndi mandimbhe mé, ma bé lémél bo, ba tehe le a nok toi Mbén i Yéhôva.

Yôsep bo Maria ba bi bana nduña ikeñi. Maria a kal le: ‘A man, di nyéñ we homa nyensôna! Hee u bak?’ Ndi Yésu a timbhe nye le: ‘Baa ni yik bé le me nlama ba hana i ndap Tata?’

Yésu a témb ni bagwal bé i Nasaret. Yôsep a bi niiga Yésu bôlô yé i kapinda. Baa u nhoñol le Yésu a bi yila umbe ntén mañge wanda? Kiki a bé nañak, Yésu a kônde bana pék, a lémlak Djob ni bôt.