Bilôp bi nsôk bi Yésu

Hiki nwii, hilo 14 hi sôñ Nisan, Lôk Yuda i bé tégbaha Ngand Pasa. Hala a bé hôñlaha bo lelaa Yéhôva a bi pémés bo minkôm mi Égiptô inyu kena bo i Hisi hi likak. I nwii 33 N.Y., ikété tuñ ngii i ndap yada i Yérusalem, Yésu ni baôma bé ba tégbaha Pasa. Kiki ba mal je, Yésu a kal bo le: ‘Wada ikété nan a ga liibana me.’ I jam a bi kal li bi tééñga baôma, ba bat nye le: ‘Kal bés, njee nu?’ Yésu a timbhe bo le: ‘A yé mut me nti ini bret.’ I mbus, a ti Yuda Iskariôt két bret. Kunda yada, Yuda a telep, a pam.

Yésu a soohe, a bek bret bikét bikét, a kap gwo baôma ba bi yégle. A kal le: ‘Jena bret ini. I yé yimbne i nyuu yem, i me ga ti inyu nan.’ A témb a soohe inyu wai, a ti yo baôma bé. A kal le: ‘Nyona i wai ini. I yé yimbne i matjél mem, ma me ga ti inyu nwéhél i bibéba. Me mbôn ki bé le, ni ga ba bikiñe lôñni me i ngii. Ni boñ hala hiki nwii, inyu hoñol me.’ Banigil ba Yésu ba nginda kodbaga hiki nwii hilo hi. Likoda li jon li nsébla len le, Bilôp bi Nwet.

I ngéda ba bi mal je, baôma ba kahal noñna inyu yi njee wada ikété yap a nloo bana bape. Ndi Yésu a añle bo le: ‘I nwet a yé nkeñi ikété nan, a yé nu a ntehe nyemede kiki isii mañge, hala wee nu a nsôk.

‘Ni yé mawanda mem. Me ñañle bé mam momasôna Tata a ngwés le me añle bé. Ndék ngéda, wee me ntémb i ngii, yak Tata. Bé ni ga yégle hana, ndi gwéha ni ga éba bé ni bé i ga unda bôt bape le ni yé banigil bem. Ni nlama gwéhna bé ni bé kiki me bi gwés bé.’

Kiki ba mal, Yésu a soohe, a bat Yéhôva le a tat banigil bé bobasôna. Ni le, Yéhôva a hôla bo i sal ikété adna ni nsañ. A soohe ki le jôl li Yéhôva li tééba lipubi. I mbus, Yésu lôñni banigil bé ba bôdôl bégés Yéhôva ni tjémbi, ba pam i mbédgé. Ngéda i bé bebee ni kola le Yésu a gwéla.