Ba ngwel Yésu

Hala a bé i mbus kosi juu, ki sôñ i ma yon libôñ. Yésu ni baôma ba bi tagbene i nsôsôgô u Kidrôn inyu ke i hikôa Ôlivé. I ngéda ba bi bol i wom Gétsémané, Yésu a kal bo le: “Bé yéna hana, ni yén péé.” I mbus, Yésu a yoñ man njel ikété wom, a ôm maboñ isi. Ikété nduña keñi, a soohe Yéhôva, a kal le: “Sômbôl yoñ i bôña.” Ha nyen Yéhôva a om añgel yada inyu lédés Yésu. Ngéda Yésu a bi témb i béñge baôma bé, a ada le ba yé ke ’ilo. A kal bo le: ‘Tôdnana! Ngéda ’ilo bé ini! Ngeñ i nkola le baoo bem ba gwel me.’

I bé yii bañ, Yuda a tihil ni ngandak bôt, ba ban-ga paminsoñ ni bikék. Yuda a bé yi hee homa a nla lébna Yésu, inyule ba bééna lem i ke nyoo u wom u. A añle bisônda le nyen a ga unda bo Yésu. A ke ngélé yada, a telep bisu bi Yésu, a kal le: ‘A Lét, me nyéga,’ ndi a sos nye limañ. Yésu a kal le: ‘A Yuda, baa u nsos me limañ inyu liibana me?’

Yésu a telep bo bisu, a bat bo le: “Ni nyéñ njee?” Ba kal le: “Yésu mut Nasaret.” Kiki Yésu a timbhe: “Me nunu,” ba témb ni mbus, ba kwo isi. Yésu a kônde bat bo le: “Ni nyéñ njee?” Ba tiimba kal le: “Yésu mut Nasaret.” Yésu a timbhe bo le: ‘Me nkal bé le me nunu. Nwaha baningil bem le ba kenek.’

I ngéda Pétrô a bi nok jam li yé bôña, a sodol pansoñ yé, a kit ôô u Malkus, nkol prisi keñi. Ndi, Yésu a yoñ ôô wé, a témb a ad wo. A kal Pétrô le: ‘Timbis pansoñ yoñ. Ibale u njo ni pansoñ, u ga wo ni pansoñ.’ Bisônda bi gwel Yésu, bi kañ nye moo; banigil bé ba ôt ngwéé. I mbus, limut li kena nye yak Ana, ñane biprisi. Kii Ana a mal bat nye mambadga, a om nye yak prisi keñi, le Kaifa. Ndi kii i bi pémél baôma?