Yésu a njés dikôô di bôt

I nwii 32 N.Y., ngand Pasa i bak bebee, baôma ba bé lôl hônd likalô. Ba bé nwaak, jon Yésu a bi yoñ bo, ba bet i môñgô, ba ke i Bétsaida, inyu noi. Ngéda môñgô u bé bebee ni ngwañ lép, Yésu a tehe le dikôô di bôt di yé noñ bo nyoo. To hala kiki Yésu a bééna ngôñ i yégle ni baôma bé botama, a bi leege bôt loñge. A mbuubaha bet ba bé kon, a bôdôl niiga bo. A bi yoñ ngim kel inyu niiga bo mam ma ntihba Ane Djob. Kiki kôkôa i nkwo, baôma ba kal nye le: ‘I nene le njal i gwé bôt. Kal bo le ba huu mambai map, i yéñ yom ba nje.’

Ndi Yésu a timbhe bo le: ‘I nsômbla bé le ba témb. Bébomede ni ti bo bijek hana.’ Baôma ba bat le: ‘Baa u gwé ngôñ le di kee sômbôl bo bijek? Wada ikété baôma le Filipô, a kal le: ‘To ibale di ban-ga ngandak moni, di ta bé le di la sômbôl i bôt bana bobasôna bijek bi bi ga kola bo.’

Ha nyen Yésu a bi bat bo le: ‘Limbe libim li bijek ni gwé hana?’ Andréa a timbhe le: ‘Di gwé hana, bikoga bitan ni bon ba tjobi diba. Bi nla bé kola bo to ndék.’ Ndi Yésu a kal le: ‘Lonana gwo hana.’ A yis bôt biti biti, i ngii bayôôma, bana 50, bape 100. Yésu a yoñ bikoga ni tjobi, a paa mis i ngii, a soohe. I mbus, a ti baôma bijek, le ba kébél gwo bôt. 5 000 di bôt, bôlôm, bôda, lôñni boñge; ba je, bobasôna ba nuu. Kiki ba bi mal je, baôma ba kot bijek bi bi yégle, le yom to yada i nimil bañ. Ba bi yônôs 12 bisel! Baa hala a bé bé manyaga ma hélha?

Bôt ba bi hel ngandak kayéle ba sômbôl téé Yésu kiñe. Ndi Yésu a bé yi le ngéda i yé ngi kola le Yéhôva a téé nye kiñe. Jon a bi huuha limut, a kal baôma bé le ba ke uu ngwañ u tuye Galiléa. I ngéda ba bi jôp ikété môñgô, Yésu a bet i ngii hikôa inyu ba nyetama. Inyuki? Inyule a bé sômbôl tégbaha ngim ngéda inyu soohe Isañ. To ibale Yésu a bééna ngandak mam i boñ, a bé béna yoñ ngéda i soohe.