Baa u yik hala?

Baa banuñul binuga i témpel Yérusalem ba bé le ba séblana toi le “bôt ba wip”?

INOÑNAGA ni ñañ u Matéô ikété kaat yé, “ni Yésu a jôp témpel, a luhul bôt bobasôna ba ba nuñul ni ba ba ba somp mu témpel, a bôs bitéblé bi bahéñha moni, ni biyééne bi banuñul dibeñ. A kal bo le: ‘l yé ntilbaga le, “Ndap yem y’a séblana le ndap masoohe,” ndi bé ni nyilha yo hôk bôt ba ngadla [bôt ba wip, MN].’”​—Matéô 21:12, 13.

Bikaat bi miñañ mi bon ba Lôk Yuda mi ñunda le banuñul i témpel ba bé nibil bet ba bé somb ni ini njel le ba bé nuñul gwom gwap diye. Kiki héga, ngim nlômbi kaat i Lôk Yuda le Mishna i nkal le bebee ni nwii 50 mbus Yésu, mut a bé lama sal 25 dilo inyu boñ le a somb dibeñ diba. Ndi nano, mut a nlama ndik sal ngeñ aa inyu somb dibeñ diba. Dibeñ di bé sesema inyu diyeyeba; ndi, ndamba i dinuni ti i bi bet iloo héga. (Lôk Lévi 1:14; 5:7; 12:6-8) Niiga mbén wada le Siméôn ben Gamaliel, nu a bi unup inyu jam li, a bi suhus nsoñgi u bisesema bôt ba bé nyégsaga i ti, kayéle ndamba i diben diba i bi sôs ngandak.

Ndoñi i, i ñunda le, yésu a bé pot maliga ngéda a sébél banuñul i témpel le “bôt ba ngadla [tole ba wip]” inyule ba bé nibil bôt, ba ban-ga hép nkus.