“A nla boñ le mam momasôna ma nkon bés ngôñ ma yon”

1. Kii mañge wanda a nla kit inyu niñ yé dilo di nlo, ndi inyuki a gwé bé ngôñ i bana nduña mahoñol? (Béñge titii i bibôdle.)

A BÉ boñge ba wanda, ni nyi le ilole mut a nke liké, njel pék i yé le a bôk ndugi a yén, a bôñha inyu yi i het a’ kee. Niñ i yé kiki i ke liké, loñge ngéda inyu téé het u ga kee, i yé ngeñ u yé mañge. I yé ntiik le, i téé mam ma, i nla ba jam li nlet. Ngonda hiada le Héter a nkal le: “Hala a yé jam li nkônha woñi. U nlama kit mam w’a boñ niñ yoñ yosôna.” Ndi, u kon bañ woñi. Yéhôva a nkal litén jé le: “U kon bañ woñi, inyule me yé ni we . . . M’a ba me nti we ngui. Hodo, m’a hôla. Hodo, m’a ba me nit we ni woo walôm u telepsép yem.”​—Yésaya 41:10.

2. Lelaa u nyi le Yéhôva a ngwés le u yoñ makidik ma ma ga lona we bilôl bilam?

² Yéhôva a mbéhe we le u yoñ bitelbene bi pék mu bilôl gwoñ. (Ñañal 12:1; Matéô 6:20) A gwé ngôñ le u ba maséé. Hala a nene ngéda u ntehe, u nok, u noode ki mam malam a bi hek. Béñge yak lelaa a ntôñ bés, a niigaga ki bés ntén niñ u nlôôha lam. Inyu bet ba ntjél maéba mé, Yéhôva a nkal le: “Ni boñ ndigi mam ma mbébél me, . . . Nuna-ki, minkol nwem nw’a kon maséé, ndi bé n’a kôs wonyu. Nuna-ki, minkol nwem nw’a sénk inyu mahak ma ñem.” (Yésaya 65:12-14) Yéhôva a nkôs lipém ngéda bagwélél bé ba nyoñ makidik malam.​—Bingéngén 27:11.

MAM U NLA KIT LE W’A BOÑ MA MA GA LONA WE MASÉÉ

3. Kii Yéhôva a mbat le u boñ?

³ Mambe makidik Yéhôva a mbat le u yoñ? Inyu boñ le bôt ba binam ba Yéhôva a bi hek ba ba maséé, ba nlama yi nye, ba gwélél ki nye. (Tjémbi 128:1; Matéô 5:3) Hala a nlôôha ba maselna ni binuga bi a hek, gwo bi gwé ndik le bi je, bi nyo, bi ti mbôda. Ndi inyu yoñ, Djob a gwé ngôñ le u yoñ ngim bitelbene bipe bi binuga bi ta bi yoñok bé inyu ba maséé. Nhek woñ a yé “Nyambe nu gwéha,” “Djob li maséé,” ni nu “a hek mut i ôngba yé nyemede.” (2 Korintô 13:11; 1 Timôtéô 1:11, MN; Bibôdle 1:27) U ga ba maséé ngeñ u nkôna Djob jés li gwéha. Baa u ma nôgda bé maliga ma bini bibuk bi Bibel le: “Ti i yé masoda iloo yoñ”? (Minson mi baôma 20:35) Hala a yé maliga ma bisu bisu inyu bôt ba binam. Jon, Yéhôva a gwé ngôñ le, bitelbene u yoñ bi bak bi umne i ngii gwéha u ñunda bôt bape, ni i ngii gwéha yoñ inyu Djob.​—Añ Matéô 22:36-39.

4, 5. Kii i bé kônha Yésu maséé?

⁴ Yésu Kristô a bi yigle boñge ba wanda ndémbél ilam i nya yôni. Ngéda a bé mañge, ibabé pééna a bé tuk, a nolok. Bañga i Djob i nkal le ngim “ngéda i [yé inyu] nol hiol. . . ni ngéda i sak.” (Ñañal 3:4) Yésu a kôôge ki Yéhôva bebee ni njel yigil Bitilna. Ngéda a bééna 12 nwii, baniiga i témpel ba bé nhelek ni “yi yé ni ndimbhe yé” i mam ma mbuu.​—Lukas 2:42, 46, 47.

⁵ Yésu a bi nañ, a yila nhôôlak mut u u bé maséé. Kii i bé kônha nye maséé? A bé yi le, ikété mam momasôna Djob a bé bémél nye, a bé gwés le a “añle diyeyeba miñañ minlam . . . ni le bôt ba ndim ba tehna.” (Lukas 4: 18) I boñ mam Djob a bat nye, i bi ti nye maséé. Kaat Tjémbi 40:9 i ntoñol jam a bé nôgda: “A Nyambe wem, me nkon maséé i boñ sômbôl yoñ.” Yésu a kon maséé i niiga bôt inyu Isañ nu a yé ngii. (Añ Lukas 10:21.) Lisañ jada, mbus a mal niiga muda wada inyu bañga bibégés, Yésu a kal banigil bé le: “Bijek gwem bi yé i boñ sômbôl i nu a bi om me, ni i yônôs nson wé.” (Yôhanes 4:31-34) Mu kii a bé gwés Djob ni bôt bape ki, Yésu a bi nok maséé. I boñ nlélém jam i nla boñ le yak we, u ba maséé.

6. Inyuki hala a yé loñge i kwel ni minhôôlak mi bikristen, mu mam u nkit le w’a boñ dilo di nlo?

⁶ Ngandak bikristen i bi yoñ bôlô nsañal bo boñge, hala a bi lona bo maséé. Inyuki u nla bé kwel ni bape ikété yap inyu mam u nkit le w’a boñ i dilo di nlo? “Homa likoda li ta bé, mahoñol ma nkwo tua, ndi ma ntééba ni ngandak batipék.” (Bingéngén 15:22) Minhôôlak mi lôk kéé mi i pes mbuu, mi nla kal we le bôlô nsañal i ga ti we biniigana bi bi ga hôla we niñ yoñ yosôna. Yésu a bi nigil ngandak mam i pañ Isañ ngéda a bé ngii, i mbus Yésu a bi ke ni bisu i nigil ngéda a bé gwel nson hana isi. Kiki hihéga, a bi nôgda maséé ma yé i tihba miñem mi bôt ni ñañ nlam, a bi nôgda ki maséé ma yé i tééda ndéñbe yé ikété manoodana. (Añ Yésaya 50:4; Lôk Héber 5:8; 12:2) Nano di béñge ngim mam ma nson u nsañal ma ma yé le ma kônha we maséé.

INYUKI I YILHA BÔT BANIGIL I YÉ BAÑGA NSON

7. inyuki ngandak boñge ba wanda ba ngwés nson u yilha bôt banigil?

⁷ Yésu a kal le: “Jon kenana, yilhana biloñ gwobisôna banigil . . . ni niigaga bo.” (Matéô 28:19, 20) Ibale u nhek le u nyila mboñbanigil, wee w’a pohol nson u ga ti we ngandak maséé, u u nti Djob lipém. Kiki bibôlô gwobisôna, i nsômbla we ngéda inyu tibil yi nson u. Masañ mana, mankéé wada le Timôtéô, nu a bi yoñ nson u nsañal nye mañge wanda, a kal le: “Me ngwés gwélél Yéhôva kiki nsañal, inyule ni i njel nyen me ñéba gwéha yem inyu yé. Bibôdle, me bé la bé bôdôl yigil Bibel to yada, ndi mbus ngéda, me ke téé likalô libôga lipe, inyu ngim nsôñ, me bi bôdôl tégbaha ngandak gwigil. Mut wada nu a bé nigil ni me, a bi bôdôl lo i ndap Ane. Mbus ngéda, me bi ke i suklu ntôñ ba nsébél ni hop pulasi le École pour frères célibataires,a ba bi om me homa mpe, het me bi bôdôl gwigil bi-na. Me ngwés me niiga bôt, me tehge kiki mbuu mpubi i ntinde bo i boñ mahéñha.”​—1 Tésalônika 2:19.

8. Lelaa boñge ba wanda bahogi ba bi yoñ ngaba i nya yôni i boñ banigil?

⁸ Ngim boñge ba wanda ba bi nigil hilémb hipe. Kiki hihéga, Yakôb, nu a yé Amérika ñombok, a ntila le: “Ngéda me bééna nwii minsaambok, ngandak mawanda mem ma suklu ma bé bôt ba loñ Vietnam. Me bé sômbôl niiga bo njee a yé Yéhôva, jon mbus ngim ngéda, me bi yoñ bitelbene i nigil hop wap. Inyu nigil hop u, me bééna lem i hégha Nkum Ntat nu hop Ngisi ni nu hop u Vietnam. Me bi bana ki mawanda likoda li hilémb hi. Ngéda me bi bana 18 nwii, me bi bôdôl nson nsañal. Mbus ngéda, me ke i suklu ba nsébél ni hop pulasi le École pour frères célibataires. Hala a bi hôla me i pamba i het ba bi ep me, me bé mpom mañ u éga man juu u batéé likalô u hop Vietnam. Ngandak bôt i loñ Vietnam i yé nhelek i tehe le, me bi nigil hilémb hiap. Ba bé ba leege me loñge, me bôdôl yak yigil Bibel ni bo. Bahogi ba bi hol ipam i sôble.”​—Hégha ni Minson mi baôma 2:7, 8.

9. Lelaa nson i yilha bôt banigil u niiga bés?

⁹ Nson u yilha bôt banigil u yé loñge suklu i i niiga bés i bana bilem bilam, i yi kwel ni bôt, i ba mut ba mbôdôl ñem, i niiga ki bés i pôdôs bôt ibabé i babaa bo. (Bingéngén 21:5; 2 Timôtéô 2:24) Ndi nson u, u nti ki maséé téntén inyule u nhôla we i meya ni biniigana bi bisu bi hémle yoñ. U nigil ki i sal lôñ yada ni Yéhôva.​—1 Korintô 3:9.

10. Lelaa di nla kabna maséé i yilha bôt banigil, to ibale bôt ba nhol bé libôga jés?

¹⁰ U nla nok maséé i yilha bôt banigil to ibale ndék bôt yon i neebe ñañ nlam libôga joñ. Yilha bôt banigil i ta bé bôlô i mut wada. Likoda jolisôna jon li nyéñ bôt ba ndiihe maliga. Tolakii mankéé nu muda tole nu munlôm wada nyen a nla léba mut nu a’ yila nnigil, bobasôna ba yoñ ngaba i yéñ, ba nla ki kabna maséé ma. Kiki hihéga, Brandon a bi nom nwii 9 i ngim libôga het bôt ba bé neebe bé maliga. A nkal le: “Me ngwés añal ñañ nlam, inyule won u yé nson u Yéhôva a mbat bés le di boñ. Me bi bôdôl nson nsañal ndék ngéda mbus me bi mal suklu. Me ngwés me nti lôk kéé i bôlôm i i yé boñge ba wanda makénd i likoda jés, ni tehe mahol map i pes mbuu. Ngéda me bi pam i suklu ntôñ di mbôk sima, ba bi om me i sal homa mpe kiki nsañal. I yé maliga le, me yé ngi léba mut libôga li, nu a nla hol ipam i sôble, ndi lôk kéé ipe i ma léba. Me yé maséé i yi le, me bi yoñ bitelbene i sal ni lôk kéé nya i yôni mu nson u yilha bôt banigil.”​—Ñañal 11:6.

HEE MAM U NKIT LE W’A BOÑ MA NLA KENA WE

11. Imbe njel ipe i bibégés bipubi ngandak boñge ba wanda ba ngwés?

¹¹ Ngandak manjel i yé inyu gwélél Yéhôva. Kiki hihéga, ngandak boñge ba wanda i nti bomede inyu nit nson maoñ ibabé i kôs nsaa. Di ngi gwé ngôñ i oñ bibôgôl bi mandap ma Ane. Maoñ ma, ma yé ikété bibégés bipubi bi nti Djob lipém, ma nla ki boñ le u ba maséé. Kiki ikété manjel ma bibégés bipe, i ba lôñ ni lôk kéé yés i yé ngim njom i ba maséé. Nson maoñ ma ntôñ u niiga we bôlô, u nhôla ki we i yi le u nlama yoñ matat inyu keñgle mpuhge jam ngéda u nsal, i ba mut bôlô nu a noñ ngéda, ni i suhul wemede i si bet ba ñéga nson.

12. Lelaa bôlô nsañal i nla yiblene we manjel mape?

¹² Mankéé wada le Kévin, a nkal le: “Ibôdôl me mañge ntitigi, me bééna ngôñ i gwélél Yéhôva kiki nsañal kel yada. Sôk bi sôk, me bi bôdôl bôlô nsañal ni 19 nwii. Me bé sal pes ngéda inyu bana likala li kel, ni mankéé wada nu a bé oñ mandap. Me bi nigil i bii minyôl, i bii biwinda, ni makôga. Mbus, me bi tégbaha nwii ima ni hikip hi nti bôt mahôla mbus mbuk mbebi a ntagbe ngim homa, hi hi bé tiimba oñ mandap ma Ane ni mandap ma bilôk bikéé. Ngéda me bi nok le ngôñ i baoñ i bé i Afrika nwelmbok, me bi yônôs lipep, mbus, ba sébél me i ke hôla. Nyono Afrika, me nke ndap Ane mbus ndap Ane, mbus ndék sonde. Hikip hiem hi maoñ hi yéne me kiki lihaa. Di niñ ntôñ, di nigil ntôñ, di nsal ki ntôñ. Me nok ki maséé i añal ñañ nlam ni lôk kéé i libôga hiki sonde. Bitelbene me yoñ me mañge, bi bi hôla me i ba maséé i nya i me bé hégda bé.”

13. Lelaa nson u Bétel u mboñ le boñge ba wanda ba ba maséé?

¹³ Bahogi ba ba bi yoñ bitelbene inyu gwélél Yéhôva nson u tôbôtôbô, ba nsal nano i Bétel. Nson u Bétel u yé bañga njel maséé ikété niñ inyule kii yosôna u mboñ nyoo i yé inyu Yéhôva. Lihaa li Bétel li nti bijek bi mbuu. Mankéé wada nu a nsal i Bétel le Dustin, a nkal le: “Ibôdôl me nwii 9, me bi kit le m’a yila nsañal, jon me bi yoñ bôlô nsañal mbus me mal suklu. Mbus nwii wada ni pes, ba bi sébél me i Bétel, het me bi nigil i gwélél mashin ma mpémés bikaat, mbus me nigil ki gwélél nkuu biyi. I Bétel, me bé gwés ba ipôla bôt ba bisu i emble manwin ma mahol ma nson u yilha bôt banigil i nkoñ isi wonsôna. Me ngwés nsal i Bétel inyule bôlô di nsal nyono i nhôla bôt i kôôge bebee ni Yéhôva.”

MAMBE MAM U GWÉ NGÔÑ I YÔNÔS DILO DI NLO?

14. Lelaa u nla tjek ngéda yoñ inyu yoñ bôlô i nsañal?

¹⁴ Lelaa u nla yoñ bitelbene inyu ba ngwelnson nu ngéda yosôna? Iloo mam momasôna, bilem bilam bi mbuu bi ga hôla we i ngwélél Yéhôva i nya yôni. Jon, yoñ ngéda ni yigil yoñ i Bañga i Djob, soñda yo bañga bañga, yéñ manjel inyu pahal hémle yoñ i makoda. Ngéda u ngi yii i suklu, u nla pam i hôlôs likeñge li ntéé likalô. Nigil i tôñ ni bôt, bat bo mahoñol map ibabé babaa bo, u emblege mandimbhe map. U nla ki nit likoda ikété mam kiki bo i sas ni bôñgôl ndap likoda. Yéhôva a yé maséé i gwélél bet ba gwé libak li suhulnyu, ni bet ba yé bebee i hôla. (Añ Tjémbi 110:3; Minson mi baôma 6:1-3) Ñôma Paul a bi naña Timôtéô i nson nsañal biloñ bipe inyule a bé “a gwé jôl lilam ikété lôktata.”​—Minson mi baôma 16:1-5.

15. Lelaa u nla kôôba inyu kôhna likala joñ li kel?

¹⁵ Bagwelnson ba ngéda yosôna, ba mbéna bana ngôñ i yéñ koga kel. (Minson mi baôma 18:2, 3) Bebek le i hoo nigil ngim likeñge li bôlô i suklu i nla hôla we i kôhna bôlô i pes ngéda homa u yéne. Mu kii u ga yoñ bitelbene, kwel ni ngwélél woñ makiiña ni basañal bape ba likiiña joñ. Bat bo imbe bôlô i yé loñge inyu nsañal. Ni le, kiki Bibel i nkal, “biine minson nwoñ yak Yéhôva, Ndi to le mahoñol moñ m’a lédhana.”​—Bingéngén 16:3; 20:18

16. Lelaa i sélél Yéhôva kiki ngwelnson nu ngéda yosôna ngeñ u yii mañge wanda, i nkôôba we i gwel nson nkeñi dilo di nlo?

¹⁶ U nla ba nkwoog nkaa le Yéhôva a gwé ngôñ le u “kôbda niñ moo” inyu bilôl bilam. (Añ 1 Timôtéô 6:18, 19.) Nson nsañal u ngéda yosôna u nla hôla we i sal lôñni bagwelnson ba tôbôtôbô bape, kayéle yak we, u pam i yila nhôôlak kristen. Ngandak i bi léba le, i sélél Yéhôva kiki ngwelnson nu ngéda yosôna ngeñ ba bé ba ngi yii boñge ba wanda, i bi hôla bo i bana libii lilam. Ngim mangéda, i bet ba bi ba basañal ilole ba mbii, ba bi la kena nson wap nsañal ni bisu, kiki nwaa bo nlôm, mbus libii jap.​—Rôma 16:3, 4.

17, 18. Ni imbe njel i yoñ makidik i boñ ngim mam i nlôl ñem?

¹⁷ Yoñ makidik i boñ ngim mam i nlôl ñem. Kaat Tjémbi 20:5 i nkal inyu Yéhôva le: “A kémhe we jam li nkon ñem woñ ngôñ, A yônôs ki pék yoñ yosôna.” Jon, tibil wan i jam u gwé ngôñ i boñ mu niñ yoñ. Béñge kii Yéhôva a yé boñ ngéda yés, ni kii u yé le u boñ mu nson wé. Mbus, téé mam u ga boñ inyu lémél nye.

¹⁸ I sélél Yéhôva kiki ngwelnson nu ngéda yosôna i ga lona we bañga maséé, inyule nya ntén niñ won u nti Djob lipém. Ñ, “Yéhôva a bane we lingoñoo, a’ ti we mam ma nkon we ngôñ.”​—Tjémbi 37:4.