Ni nwas bañ le Satan a yoña mahoñol manan

Tolakii bikristen gwobisôna bi bé yi bé hala, ñôma Paul nye a bé tibil yi le, bitembee Satan a nhôñôs bi nla boñ bikristen béba. Kii héga, i nene le bikristen bihogi bi tison i Korintô bi bé lôôha bôdôl bomede ñem, ba nhoñlak le ba yé minhôôlak ngandak ikété maliga ni le ba nla bé kwo. (1 Korintô 10:12) Inyu hala nyen Paul a bi ti bo mana mabéhna: “Ndi me nkon woñi, i tiga le i ba le, kikii nyoo i lôk Eva ni dipa tjé, hala nyen ba ôbôs mahoñol manan, ndi ni nwas longeñem ni mapubi i pes Kristô.”​—2 Korintô 11:3.

Mabéhna ma Paul ma ñunda le di nlama bé jôha ni jam li. Inyu tjél le Satan a ôbôs mahoñol moñ, u nlama neebe le bitembee a nhôñôs bi nla boñ we béba, u ke ki gwo ngwéé.

INYUKI MANWIN MA NHÔÑÔS MAM MA YÉ BÉBA HIANDI?

Kii i yé manwin ma nhôñôs mam? Hana, di yé pôdôl manwin bôt ba nlegel inyu tembeene bape kayéle ba yoña mahoñol map inyu tinde bo i boñ ngim mam. Kaat yada ni hop Ngisi le Propaganda and Persuasion i ntoñol le manwin mana ma yé ndiki “bitembee, malôga, mam ma kôdi, mam ma nyoña mahoñol ma bôt, mam ma nje bôt boña.” Kaat i nkônde ki le “liboñok lini li yé libe, li mboñ bôt béba, li téé bé to sép.”

Inyuki manwin ma nhôñôs mam ma yé béba hiandi? Inyule u mpala bé tehe i béba i yé mu, ndi mo ma njôp we ikété mahoñol. Ma yé kiki mbebi i i nene bé i mis, i gwé bé njiñ, ndi i nola. Nyimam wada le Vance Packard, nu a nigil maboñok ma bôt ba binam, a bi kal le ngandak yés i nyan manwin ma, jon ma ñôbôs mahoñol més iloo kiki di nla hégda, ma tindge ki bés i boñ ngim mam. Nyimam numpe a nkal ikété kaat yé ni hop i Ngisi le Easily Led​—A History of Propaganda, le ngéda manwin ma ma njôp mut ikété mahoñol, to a yé munlôm, to a yé muda, ma yé ma yilha nye kii isii mañge. Ma nla yak tinde nye i bana maboñok mabe kiki mut nu ño u téé ha bé. Maboñok kiki bo ‘gwét inyu tjé ngim litén, gwét ipôla biloñ, ôa inyu bôt ba gwé kôgôô ipe, ôa inyu base ipe ni mam mabe mape.’

Ibale yañga mut binam i nla gwélél manwin inyu tembene bés, bôô ni ngélé yañen ni Satan? Ibôdôl ngéda mut nu bisu a héga, Satan a nigil i tibil yi bés. “Nkoñ isi wonsôna” u yé isi énél yé. A nla gwélél to limbe jam hana nkoñ isi inyu tjam bitembee gwé. (1 Yôhanes 5:19; Yôhanes 8:44) Satan a nyila toi malét inyu ‘kwés mahoñol ma bôt ndim’ kayéle i len ini a ‘nyumus nkoñ isi wonsôna.’ (2 Korintô 4:4; Masoola 12:9) Lelaa u nla jôs bitembee gwé ?

KÔÔBA BIJÔL GWOÑ BI GWÉT

Yésu a bi ti litiñ li li nhôla i yémbél manwin ma bitembee ma Satan. A kal le: “N’a yi maliga, ndi maliga m’a yilha bé ngwélés.” (Yôhanes 8:31, 32) Ngéda gwét, yom bisu bôt ba mbéna sôô i yé maliga. Jon, kiki sônda i i yé i gwét, u gwé ngôñ ni homa u nla yôñôl manwin ma u nla bôdôl ñem, kayéle ñoo woñ a tuk bañ ni mahoñol moñ. Yéhôva a nti bés nya homa i. Ikété Bañga yé le Bibel, u nla léba mam momasôna u gwé ngôñ inyu kolba manwin ma bitembee ma Satan.​—2 Timôtéô 3:16, 17.

Satan nyemede, nu a yé lingen li manwin ma bitembee, a nyi hala. Inyu hala nyen a ngwélél nkoñ isi wé inyu boñ le bôt ba añ bañ Bibel to nigil yo. Ni kwo bañ ikété dipa tjé! (Efésô 6:11) Ni ‘tibil yi pôk, ni ntel, ni ndip, ni nkwañ’ u maliga ma Bibel. (Efésô 3:18) Hala a mbat le u boñ biliya bi ngui. Ndi u hôiga bañ mana maliga mut matila wada le Nôam Chomsky a kal: “Mut nye ki nye a nla bé ha maliga ikété ño woñ. Wemede nyen u nlama léba mo.” Jon “wan Bitilna hi kel” inyu boñ le ‘wemede nyen u léba maliga.’​—Minson mi baôma 17:11.

U hôiga bañ le Satan a ngwés bé le u nsélés boña tole u hek pék. Inyuki? Kaat yada ni hop Ngisi le Media and Society in the Twentieth Century, i ntoñol le “bitembee bôt ba nhôñôs gw’a bana ndigi ngui ibale limut li ntehe bé mahee i hek pék.” Jon, kekikel u ba bañ bebee i pala neebe to kinje jam u nok. (Bingéngén 14:15) Gwélél ngap i sélés boña Djob a nti we inyu lédés hémle yoñ.​—Bingéngén 2:10-15; Rôma 12:1, 2.

NI TÉÉDA ADNA NAN

Bakolba ba nla hôñôs bitembee inyu tômbôs moo ma bôt ba gwét ni kônha bo woñi. Ba nla yak tinde baoo bap i nolna bo ni bo, tole ba boñ le ngim bisônda i bagla ni ntôñ wap. I nene le sônda keñi yada i loñ Jaman i bi kal le njom yada i i bi boñ le loñ Jaman i nimis Gwét bi Ntôla bi bisu i yé le limut li “bi lôôha hémle bitembee bi baoo bap.” Satan a ngwélél minlélém mi dipa inyu bagal ni yémbél bés. Kii héga, a nla boñ le mindañ mi gwéé ipôla bikristen kayéle bihogi bi bagla ni ntôñ Yéhôva inyule bi nôgda wengoñle ba mbabaa bo, tole wengoñle ba mboñ bo jam li téé bé sép.

U kwo bañ mu hiandi hi! Nwas le Bañga i Djob i éga we. Kii héga, inyu hôla bés i tééda adna yés ni bilôk bikéé bi bôlôm ni bi bôda, Bibel i nti bés makénd i ke ni bisu i ‘nwéhlana bés ni bés,’ ni i ba bebee i pala sañgal mindañ. (Kôlôsé 3:13, 14; Matéô 5:23, 24) I nti bés mabéhna ma ngui le di bagla bañ ni likoda. (Bingéngén 18:1) Tibil kôôba wemede inyu jôs bitembee bi Satan. Badba le: ‘Mambe mahoñol me bi bana ngéda ba bi sôk babaa me? Baa me bééna mahoñol ma nkoñ isi tole ma Djob?’​—Galatia 5:16-26; Efésô 2:2, 3.

BÔDÔL YOÑ INYU YÉHÔVA I HOI BAÑ

Sônda i i mbôdôl ha bé ñéga wé ñem, i nla bé jo gwét loñge. Jon bahôñôs bitembee ba mboñ biliya i tinde bisônda i nimis bôdôl ba gwééne ñéga wap. Ba nla kal bo le: “Ni bôdôl bañ baéga banan ñem!” tole “ni nwas bañ le ba kena bé i tjiba!” Inyu kônde ha mahoñ mu mahoñol ma, ba nla yak kéñbaha hiki hihôha baéga ba nla boñ. Hala nyen yak Satan a mboñ. A nwaa bé yéñ manjel inyu boñ le di bôdôl ha bañ ntôñ u Yéhôva ñem le won u kôli éga bés.

Lelaa u nla sôñ wemede? Yoñ makidik i téñbe ni ntôñ u Yéhôva, ni i nit bôt a ngwélél inyu éga bés ibabé waa, to hala kii ba yé bikwéha bi bôt. (1 Tésalônika 5:12, 13) Ngéda bakolba maliga ni bôt bape ba mbot bitembee bi ngui i kolba ntôñ, ‘mahoñol moñ ma hoo bañ pingla.’ (2 Tésalônika 2:2; Titô 1:10) Noñ maéba mañge wanda le Timôtéô a bi kôs. Téñbe ni mam u bi nigil, u hoñlak bonjee ba bi niiga we mo. (2 Timôtéô 3:14, 15) I yé ntiik le, manjom ma yé ngandak ma ma ñunda le u nla bôdôl ntôñ u Yéhôva ñem, u a ngwélél nano iloo mbôgôl nwii i len ini inyu kena bés mu njel maliga.​—Matéô 24:45-47; Lôk Héber 13:7, 17.

NI NWAS BAÑ LE WOÑI U TÔMBÔS BÉ

U hôya bañ le, bitembee Satan a nhôñôs bi ta ndik bé ndutu i yimbe. Ngim mangéda, a ngwélél gwo inyu kônha yak bôt woñi​—‘nlômbi likeñge Satan a ngwélél inyu hôñôs bitembee.’ (Inoñnaga ni kaat ni hop Ngisi le Easily Led​—A History of Propaganda) Malét nkeñi wada i loñ ngisi le Filip M. Taylor a bi tila le: “Kii héga, Lôk Asiria i bé “pôdna lihôñôs bitembee ni woñi inyu yémbél biloñ bipe.” Satan a ga gwélél woñi u mut binam, woñi u ndééñga, woñi u nyemb, ni mintén mi woñi mimbe nwominsôna inyu noode bémbe we ni kéñ we njel i gwélél Yéhôva.​—Yésaya 8:12; Yérémia 42:11; Lôk Héber 2:15.

U nwas bañ Satan le a gwélél woñi inyu tômbôs we ni hôyôs ndéñbe yoñ i pañ Yéhôva. Yésu a kal le: “Ni kon bañ bôt ba nol nyuu woñi, ndi mbus ba nla bé boñ jam lipe.” (Lukas 12:4) Biine bôdôl yoñ yosôna yak Yéhôva nu a mbôn le a nti we “sôkbôk lipémba,” ni le a nhôla we i kolba dipa Satan a ngwélél inyu bémbe we.​—2 Korintô 4:7-9; 1 Pétrô 3:14.

I yé maliga le di nla boma mam ma nkônha woñi ni ma ma nla boñ le mut a nimis makénd mé. Ndi di hôya bañ bibuk Yéhôva a kal Yôsua inyu ti nye makénd le: “Ha ngui, u lédés ki ñem; u kon bañ woñi to sehla inyule Yéhôva Nyambe woñ a yé ni we to hee u ke.” (Yôsua 1:9) Ibale woñi u njôp we ñem, pala kôôge Yéhôva bebee ni njel masoohe inyu pahle nye nduña yoñ yosôna. U nla ba nkwoog nkaa le ‘nsañ Nyambe . . . w’a tat ñem woñ ni mahoñol moñ,’ kayéle u bana ngui i kolba bitembee gwobisôna Satan a nhôñôs.​—Filipi 4:6, 7, 13.

Baa u ngi hoñlak lelaa nkenwin nu lôk Asiria le Rabsaké a bi hôñôs bitembee inyu kônha bôt ba litén li Djob woñi? A bé kal le: ‘Jam jo ki jo li nla bé sôñ bé i moo ma Asiria. Yak Djob linan le Yéhôva li nla bé sôñ bé.’ A bi kônde ki le: ‘Yéhôva nyemede a nkal bés le di tjé nkoñ unu.’ Ndi kii Yéhôva a bi kal inyu lédés bo? A bi kal le: “U kon bañ bipôdôl u mal nok woñi bi . . . minlimil mi kiñe Asiria mi ñôbhene me jôl.” (2 Kiñe 18:22-25; 19:6) Yéhôva a bi ep añgel, i tjé 185 000 bisônda bi Asiria u wada!​—2 Kiñe 19:35.

NI BA BÔT BA PÉK​—EMBLANA YÉHÔVA HIKI NGÉDA

Baa ni ma béñge ngim sinima het ni tibil nga tehe le ba yé lugha mut i mboñ ngim jam? Baa ni bi bana ngôñ i nkal mut nu le: ‘U hémle bañ yom ba yé kal we! Ba yé lugha we!’ Hégdana ni le, nlélém jam won biañgel bi kal bé: “Satan a nlugha bañ bé ni bitembee gwé!”

Ni loñ maôô manan le ni emble bañ bitembee Satan a nhôñôs. (Bingéngén 26:24, 25) Emblana Yéhôva, bôdlana nye ñem ikété manjel manan momasôna. (Bingéngén 3:5-7) Ni neebe nsébla wé unu le: “A man wem, bana pék, u kônha ñem wem maséé.” (Bingéngén 27:11) Hala nyen n’a yémbél i sañ Satan a njôs bé inyu yoña mahoñol manan!