Ni nla niñ boga ni boga hana isi
KINJE BOTÑEM I MBUMA ÑAÑ! Nhek wés a bi bôn le a ga ti bés niñ boga hana isi. Ndi ngandak bôt i nhémle bé la. Ba nkal le: ‘Hiki mut a ga wo kel yada.’ Ba nkal ki le: ‘Hala nyen niñ i yé, mut a ngwéé, a niñ, a sôk a wo ki.’ Bape ba nkal le di nla niñ mba ni mba, ndi he hana isi bé. Bape ki ba nkal le ngéda mut a nwo, a nke i ngii, ha nyen a nla niñ mba ni mba. We, u nhoñol lelaa?
Ilole u nti ndimbhe yoñ, u nlama ndugi bôk béñge lelaa Bibel i ntimbhe mambadga mana mo maa: Baa ni libak li tôbôtôbô mut binam a bi héga, hala a ñunda le a bé lama nom dilo tjañen hana isi? Lelaa bitééne bi Djob bi bé inyu hisi ni bôt ba binam i bibôdle? Lelaa nyemb i bi lo?
LIBAK LI TÔBÔTÔBÔ LI MUT BINAM
Ikété biniñ gwobisôna Djob a bi hek hana isi, bôt ba binam ba yé tôbôtôbô. Lelaa? Bibel i nkal le ndik bôt ba binam bon ba bi héga i “ôñgba” ni i “pôna” i Djob. (Bibôdle 1:26, 27) Kii hala a nkobla? Hala a nkobla le bôt ba binam ba bi héga ni libak, ni bilem bilam i pôna i Djob kiki bo lem i gwéha ni lem i telepsép.
Di nkônde ki le, bôt ba binam ba bi héga ni kunde i yi boñ maselna ipôla jam lilam ni jam libe, ni ngôñ i bana maada ni Djob. Jon mam kiki bo ngiinda ni bikeñi gwé, ni bihélha bi mam kiki bo ôô gwom, tuk nsik, ni ntuba tjémbi dilam bi lémél bés. Jam li nlôôha ba lilam li yé le bôt ba binam ba bi héga ni kunde i bégés Nhek wap. Mam ma momasôna mut a nyi, a boñok ki, mon ma ñunda maselna ipôla bôt ba binam ni bini bihégél bipe bi bi yé hana isi.
Jon di badba le: Baa Djob a bé le a ti mut binam bilem bi tôbôtôbô, ni ngap i ke ni bisu i hôlôs ni i lémés gwo, ibale a bé gwés le mut a niñ ndigi inyu ndék ngéda? Maliga ma yé le Djob a bi ti bôt ba binam botama bilem bilam bi, ni ngap i, le niñ i tibil nél bo hana isi i boga ni boga.
BITÉÉNE BI DJOB I BIBÔDLE
Bape ba mbéna kal le, Djob a mah gwés bé le bôt ba binam ba niñ i boga ni boga hana isi. Ba nit mana mahoñol le di ntagbe ndigi ntagbege munu isi; hisi hi yéne ndigi bés homa makégse inyu yi too di kôli ke i niñ ni Djob i ngii i boga ni boga. Ndi ibale hala a yé maliga, baa ki wee Djob bé nyen a yé nwet mandutu ni mam mabe ma yé nyonok munu isi? Ndi hala a nkiha ha bé ni libak li Djob. Bibel i nkal inyu yé le: “Manjel mé momasôna ma téé sép. Nyambe nu maliga ni nu liboñok libe li ta bé i nyeni; a yé sép, a kôdi bé.”—Ndiimba Mbén 32:4.
Bibel i nyelel bitééne bi bisu bi Djob inyu hisi ngéda i nkal le: “Ngii i yé i Yéhôva, ndi hisi a ti hio bon ba bôt.” (Tjémbi 115:16) Ñ, Djob a bi hek hisi le hi ba loñge liyééne inyu bôt ba binam, a yônôs ki hio ni gwom bilam gwobisôna bi bi nla kon bés ngôñ inyu boñ le niñ i lôôha nél bés i boga ni boga.—Bibôdle 2:8, 9.
“Ngii i yé i Yéhôva, ndi hisi a ti hio bon ba bôt.”—Tjémbi 115:16
Bibel i ntibil yaga toñle bés bitééne bi Djob inyu bôt ba binam. A bi ti ki munlôm ni muda oda le ba “yônôs hisi, ni suhus ki hio; ni kahbe ngi . . . hiki hégél i gwé niñ ni i i ñond hisi.” (Bibôdle 1:28) Kinje nsima inyu yap le ba bôñgôl hisi, ba yilha ki hio Paradis! Jon, yom Djob a bi kôôbana Adam bo Éva ni mbôda yap, i bé niñ boga hana isi, ha i ngii bé.
INYUKI DI NWO?
Ndi inyuki di nwo ni? Bibel i nkal le hégél i mbuu i Djob yada, i i bi sôk séblana le Satan Nsohop, yon i bi liibana Djob i wom Éden. Kii Satan a bi boñ?
Satan a bi tinde bagwal bés ba bisu, Adam bo Éva, i adba ni nye inyu ndogbene Djob. Ngéda a bi tembene bo le Djob a nsôña bo jam lilam—kunde i kit ni bomede kii i yé loñge ni kii i yé béba—ba bi noñ Satan, ba kôm Djob mbus. Baa lisuk jap li bé lelaa? I mbus ngéda, ba bi wo, kiki Djob a bi kal. Ba bi nimis niñ boga ikété Paradis hana isi.—Bibôdle 2:17; 3:1-6; 5:5.
Ndok Adam bo Éva i bi tihba bôt ba binam bobasôna ibol i len ini. Bañga i Djob i nkal le: “Kiki béba i jôp nkoñ isi inyu mut wada [Adam], nyemb ki i lôl inyu béba, hala nyen nyemb i tôla bôt bobasôna, inyule bobasôna ba boñ béba.” (Rôma 5:12) Di nwo inyule di bi kôdôl béba ni nyemb ni njel bagwal bés ba bisu, he bé inyule i bé ntilbaga hala, tole inyu ngim ‘njom’ i Djob a bi téé i i yé le di nla bé yi.
NI NLA NIÑ BOGA NI BOGA HANA ISI
Béba i Adam bo Éva i wom Éden i bi la bé kéñ le bitééne bi Djob inyu bôt ba binam bi yon hana isi. Gwéha Nyambe ni telepsép yé bi bi tinde nye i yoñ bitelbene bipe inyu pémés bés minkôm mi béba ni mi nyemb. Ñôma Paul a bi toñol le: “Nsaa béba u yé nyemb, ndi likébla li karis li Nyambe li yé niñ boga i Kristô Yésu Nwet wés.” (Rôma 6:23) Masoda le Djob “a tine pombe yé Man [Yésu Kristô], le tonjee a nhémle nye a’ nimil bé, ndi a’ kôhna niñ boga.” (Yôhanes 3:16, MN.) Kiki a bi neebe i ti nyuu yé kiki binoñ, Yésu a bi kobol mam momasôna Adam a bi nimis.a
Ndék ngéda, mbônga Nyambe inyu yilha hisi paradis u ga yon. Yak we u nla kôdôl i mam malam ma, ibale u nôgôl maéba ma Yésu mana le: “Bé jublana nwemel ntitigi, inyule nwemel u yé nkeñi, njel ki i néhi, i nke yimil, ngandak yon i njubul mu. Inyule nwemel u yé ntitigi, njel ki i nke niñ i yé hipagda; ndék yon i nléba yo.” (Matéô 7:13, 14) Ni maliga, bilôl gwoñ bi yé i moo moñ. Lelaa w’a boñ?