Ngéda mbuge jam i nkwél we

“I bisu bi ngéda, di bi lehel ñem inyule hundul i liboo i bi tjé gwom gwobisôna di bééna.”—Andréa, Siéra Léon.

“Mbus mbuk mbebi, di bi témb i mbai yés. To yom i bi yégle bé. To hop di bé la bé. Ngond yem i bi ôm maboñ isi, i bôô maéya.”—David, Iles Vierges.

IBALE kel yada u bi pei mbuge jam, ki u nla nok i yom bôt bape ba bi nôgda ngéda yak bo ba bi pei mbuge jam: Njôghe, yimil, mahel, nduña, bieem bibe. Ngandak bôt i i ma pei mbuge mam, i yé i nimis makénd map, i tomb ki inyule ngui yap i yé i yila hisisii.

Ibale mbuge jam i bi boñ le u nimis gwom gwoñ gwobisôna, yak we u nla nôgda le ngui yoñ i nsôs. U nla yak ki nôgda le niñ yoñ i gwé ha bé nseñ wo ki wo. Ndi, Bibel i ntoñol le niñ yoñ i gwé mahee, ni le u nla bana bikwo bi nkaa le bilôl bilam bi mbem we.

YIGIL I BIBEL I NHÔLA BÉS I DIIHE NIÑ

Kaat Ñañal 7:8 i nkal le: “Lisuk li jam li yé loñge iloo bibôdle gwé.” Ngéda nyuu i yé i témb i bôdôl let we ngéda mbuge jam i ntagbe, u yé u tehe le niñ yoñ i gwé ha bé nseñ. Ndi, ibale ni wongut, u témb u bôdôl bok niñ yoñ, mam ma nla ke loñge.

Bibel i bi kal le kel yada “Mut a’ nok ha bé kiñ maéya . . . to kiñ minlénd.” (Yésaya 65:19) Hala nyen i ga ba ngéda hisi hi ga hielba paradis i si Ane i Djob. (Tjémbi 37:11, 29) Mbuge mam i ga ba mam ma behee. Mandutu di ntégbaha ni ma ma nke ni bisu i tét bés nyuu ni mahoñol, ma ga mélhana i mba ni mba inyule Nyambe Bayemlikok a bôn le: “B’a hoñol ha bé bi bi bôk [mam ma behee], to bigda gwo miñem.”—Yésaya 65:17.

Hoñol le ndék: Nheg a mbôñha le a “ti [we] botñem inyu lisuk [joñ].”—niñ ikété nsañ ni nwee i si énél i Ane i Djob i i yé peles. (Yérémia 29:11) Baa i yi maliga ma i nla yaga unda we le niñ yoñ i gwé mahee? Salli nu di bi sima i yigil i bisu, a nkal le: “I hoñol biloñge bi mam Ane i Djob i ga bôñôl bés mu dilo ti di nlo, i nla hôla bés i hôya mam ma behee ni i jo nsañ inyu yémbél mandutu ma len.”

Inyuki u ta bé le u yéñ i yi kii Ane Djob i ga boñ inyu bôt ba binam ndék ngéda? I boñ hala i nla lédés we, to ibale mbuge jam i bi kwél we, niñ yoñ i ga bana mahee ibôdôl nano inyule ni wongut u mbem bilôl bi bi gwé bé mbuge mam. Ilole hala a mbôña, Bibel i nti bés maéba ma ma nla toi hôla bés i yémbél bikuu bi mbuge mam i nlona. Di yoñ le ndék dihéga.

Minlôñ mi Bibel mi mi nla hôla we

Yoñ ngéda inyu noi.

“Woo wada nyonok ni ñem nwee u yé loñge iloo moo ima nyonok ni ngéba ni linoñ mbebi.”—Ñañal 4:6.

Bôt ba miyiña ba nkal le mbus le jam li ntét we mahoñol inyu ngim ngéda, “u nla nimis hilo . . . hala a nla lôôha tééñga we mahoñol kayéle hala a yilna we jam li ndutu i tééda mbôô ikété mahoñol moñ.” Jon i mbéda le u noi ngandak.

Kal bape i yom u nôgda.

“Nduña i ñem mut i mboñ wo le u bandbe, ndi loñge bañga i nkônha wo maséé.”—Bingéngén 12:25.

Kwel ni mut woñ lihaa wada tole ni liwanda joñ li ñem nyuu. Ba ga emble ndigi bé we, ndi ba ga ti we maéba ma ma ga ti we makénd, ma hôla ki we.a

Bok mis moñ i mam ma yé we i bisu.

“Ndi kingéda likak [li Djob], bés di mbem ngii yondo ni hisi hi yondo, mu nyen telepsép i nyééne.”—2 Pétrô 3:13.

a Mut nu mahoñol mabe ma nlôôha tééñga tole nu a gwé kon u mahoñol, a nla bana ngôñ ni matibla ma ngim dokta.