Ngéda u gwé béba kon

“Ngéda ba bi léba le me gwé pos i bisaha ni i nla, me bi hoñol le me bé bebee ni nyemb. Ndi ngéda me bi nyodi i dokta, me ntémb i ndap, me kal le: ‘Loñge, me bemek bé kon unu, ndi kiki wo u, me nlama yaa hônba wo.’”—Linda, 71 nwii.

“Me gwé kon u minkañ u u bi nol me pes i su yada. Ngim mangéda, njôghe i kon u i yé i boñ me le me modop. Ngandak ngélé me bi nôgda binyuu, me ban-ga ki ngôñ i nitba.”—Élisa, 49 nwii.

Munlôm wada a yii i yééne ba ntinde, a konok, bôt bé ba lihaa ba ma kéña nye

IBALE ba bi léba we tole mut woñ lihaa béba kon i i nla kena i nyemb, hala a nla lôôha tééñga we. U héya kon womede, u nlama ki kolba mahoñol mabe. Ndutu i léba biloñge bi matibla, ndééñga i bee, ni i ke i dokta hiki ngéda bi nla kéñbaha woñi woñ yak nduña yoñ ki. Ndutu i ñem lôñni béba kon bi ntééñgana ngandak.

Hee homa di nla kuhul mahôla? Ngandak bôt i bi kôhna bañga hogbe ni njel masoohe ni lisoñgol li minlôñ mi Bibel mi mi nhôgbaha. Mahôla mape ma nla lôl bo i gwéha ni i nit lihaa jap ni mawanda map ba nit bo.

LELAA NGIM BÔT I BI HÔNBA

Robert nu a gwé 58 nwii, a nti maéba le: “I hémle u nhémle Djob i nla hôla we i hônba kon woñ, inyule a ga ti we ngui. Soohe Yéhôva. Toñle nye nduña yoñ. Bat nye le a ti we mbuu mpubi. Bat nye le a ti we ni lihaa joñ ngui ni le a hôla we i tégbaha kon u ikété lipém jolisôna.”

Robert a nkal le: “Ngéda lihaa joñ li nit we, hala a nlédhana ngandak inyule ba yé ha inyu yoñ. Ba nsébél me i nsiñga hiki kel, ndigi inyu bat me le: ‘I nke laa?’ Yak mawanda mem momasôna ma nti me makénd. Ba nti toi me ngui ni ngôñ i kônde ke ni bisu.”

Ibale wen u nke i yuuga liwanda joñ li li nkon, yimbe i yom Linda a nkal: “Ibabé pééna nkokon a gwé ngôñ i niñ kiki hiki mut, ndi a gwé bé ngôñ le kon wé won u ba ndigi ño nkwel inan. Jon ni kwélél i mam ni mbéna pôdôl.”

Ngui i Djob, hogbe i Bañga yé i nti, mahôla ma bôt bés ba lihaa ni ma mawanda més, bi nla kwés bés nkaa le niñ i ngi gwé mahee to ibale di gwé béba kon.

Minlôñ mi Bibel mi mi nla hôla we

Nigbene Nyambe.

‘Me bi yéñ Yéhôva, a timbhe ki me, a sôñ ki me inyu hiki jam li woñi. Hiyeyeba hini hi bi lond, ndi Yéhôva a [emble] hio.’—Tjémbi 34:5, 7.

Linda, a nkal le: “Me mah soohe bé le ‘a Djob mélés kon wem,’ ndigi le ‘a Djob lédés me, u hôla ki me i hônba kon wem.’”

Yéñ hogbe i i nlôl i Bañga i Djob.

“Mut nye ki nye a nyééne mu nkoñ u a’ kal bé le: ‘Me nkon.’”—Yésaya 33:24.

Niñne mahoñol moñ mu botñem Nyambe a nti, u soñda ki mimbônga mi Djob inyu bilôl.

Neebe mahôla ma lihaa joñ ni ma mawanda moñ.

“Liwanda li ngwés ngéda yosôna; manyañ a ngwééne ikété ndutu.”— Bingéngén 17:17.

Élisa nu di mbôk di sima a nti maéba le: “U yén bañ wetama, nwas le mawanda moñ ma hôla we. Ngim mangéda u yé le u nôgda binyuu, u hoñlak ki le Djob a ñemble bé masoohe moñ, ndi u yén bañ wetama.”