Ngéda sobiina woñ a nke ndéñg

“Me bé sômbôl wo ngéda nlô wem a bi tjôô me, a ke a yoñ njohok mañge muda iloo me. Me bi tehe hala kiki ngitelepsép, téntén ngéda me nhoñol i mam momasôna me bi bôñol nye.”—Maria, Paña.

“Ngéda nwaa wem a bi ke a yék me, me bi hoñol le pes nyuu yada i nwo me. Bieem gwés, botñem yés yak makak més momasôna ma bi kwo i lép. Dilo dipe, me bé me hoñol le me gwé bé kon u mahoñol, ha nyen me bé me léba le me yé nsôôbege mensôna ikété ngibotñem.”—Bil, Paña.

NDÉÑG ikété ndap libii i ntjéna iloo hihéga. I yé maliga le ngim babiina i bi léba le i nla nwéhél sobiina wap nu a bi hiel ñem, ba témb ba lédés libii jap.a Ndi too libii linan li ntémb li bôdle i tén too li ñôbi, i bet ba bi léba le sobiina wap a ntjañgbene bo, ba mbéna siida hiki ngéda. Lelaa i bôt ba, ba nla pam i lédés miñem nwap?

MINLÔÑ MI BIBEL MI MI NLA HÔLA WE

To ibale njôghe i yé bo ñem, basobiina ba ba yé nginsohi ba bi léba hogbe ikété Bibel. Ba bi nok le Djob a ntehe gwiiha gwap ni le a nok ndutu yap.—Malaki 2:13-16.

“Ngéda nduña i mahoñol mem i mbôl, hogbe yoñ i nkônha ñem wem maséé.”—Tjémbi 94:19.

Bill a nkal le: “Ngéda me bi añ nlôñ kaat unu, me bi hoñol le Yéhôva a ga hôgbaha ndutu yem, a kôhle ki me kiki isañ man nu gwéha.”

“Lôñni bakonangoo w’a unda wemede nkonangoo.”—Tjémbi 18:26.

Karmen nu nlô wé a bi tégbaha ngandak sôñ ikété ndéñg, a nkal le: “Nlô wem a bé mut ndéñg, ndi botñem yem i bééne ndigi i telepsép i Yéhôva. A bé bé le a nwas me le me kwoo.”

“Ni tôñ bañ inyu jam jo ki jo, ndi yiha Nyambe mam ni nsômbôl . . . ngéda ni nsoohe nye ni yemhe nye; ndi nsañ Nyambe u u nloo mahoñol momasôna w’a tat miñem minan ni mahoñol manan.”—Filipi 4:6, 7.

Sasha a nkal le: “Me bi añ nlôñ unu añ ni añ, kiki me bé yemhe ni masoohe, Nyambe a bi ti me nsañ ikété niñ yem.”

Ba bobasôna di ntip sima ba bi hoñol le ba bé bé ki le ba ke ni bisu. Ndi ba bi bôdôl Yéhôva Nyambe ñem, ba kôhna ki ngui i i nlôl i Lipôdôl jé. Bil a bi kal le: “Hémle yem i bi éga niñ yem ngéda me bé hoñol le me nimis mam momasôna. To ibale inyu ngim ngéda me bi tagbene ‘mu nsôsôgô u jiibe,’ Djob a bé ni me.”—Tjémbi 23:4.

a Inyu i yi too u nla nwéhél tole u nla bé, béñge minkwel mi mi yé i Reveillez-vous ! du 22 avril 1999, nu a gwé ño le: “L’infidélité conjugale”. L’infidélité : des conséquences tragiques, La réconciliation est-elle possible ? Quand on opte pour le divorce.

Lelaa ngim bôt i bi hônba

Soñda ngii Bitilna bi bi nhôgbaha.

Bil a nkal le: “Me bi soñgol kaat i Hiôb, mbus me soñgol kaat Tjémbi, me tandak hiki nlôñ u u bé kiha ni libak jem. Me bi sôk nok le i batila Bibel ba, ba bi nok i ndutu ni i ntén njôghe me bé nôgda.”

Yéñ hogbe ni njel nsik.

Karmen a nkal le: “Ngéda hilo hi bé hi héñél me juu, me bé me bôdôl emble nsik. Hala a bé hôgbaha me ngandak.” Daniel nye a nkal le: “Me bi bôdôl nigil kôt hiluñ, me sôk nok le i kôt minsik i bi hôla me i témbna nsañ ni nwee ikété yem.”

Kal bape i yom u nôgda.

Daniel a nkônde le: “Me bééna bé lem i kal bôt bape i yom me nôgda, ndi me bééna biloñge bi mawanda, me hiômôk ki ni bo hiki kel. Me bi yible bo ñem wem mu minkwel nwés, me tilnaga ki bo nduña yem. Hala a bi hôla toi me.” Yak Sasha a nkal le: “Lihaa jem li bi hôla me iloo hihéga. Mama yem a bé me ipañ hiki ngéda. A bé emble me hiki ngéda me bé sômbôl pot. Yak pua yem a bi tat me, a hôla ki me i boñ biliya i témbna ibabé le a nyéyéé me.”

Téñbe ni masoohe.

Karmen a nsôk kal le: “Me bé soohe hiki ngéda. Me bi nôgda le Nyambe a bé me ipañ, a emblege me, a hôlga ki me. Ikété béba ndutu i yosôna, me bi kôôge Djob bebee.”