Di tihba miñem mi bôt ba ngwés bé mam ma base

1. Mambe mahéñha ngim biloñ i bi bana munu mangéda ma nsôk mana?

I NENE le hala a yé dikôô di nwii le libim li bôt i nkoñ ’isi li yé i ngim bibase. Ndi nwii mini, mam ma nhéñha. I ngim biloñ, ngandak bôt i nkal le i ta bé i base yo ki yo. Nsoñgi wap u nwaa bé keñep.b​—Matéô 24:12.

2. Kii i mboñ le ngandak bôt i ngwés ha bé mam ma base?

² Inyuki ngandak bôt i nkal le i ngwés bé mam ma base?c I nla ba le bahogi ba ntégbaha ngéda yap yosôna i tuk niñ, tole bape ba nlôôha tjelel inyu mandutu ba mboma. (Lukas 8:14) Bahogi ba nhémle ha bé le Djob a yé. Bape ki ba nhémle yaga Nyambe, ndi ba nkal le base i ntagbe ngéda, le i gwé ha bé mahee, i nkiha bé ki to ni njoñ yi. Ba mbéna nok mawanda map, balét bap, tole balegel manwin ba nkal le niñ i bi lo ni yomede, ndi bun bé le ba nok bôt ba mpôdôl manjom ma nlama tinde bo i hémle Djob. Bape ba nok njôô ngéda ba ntehe lelaa baéga base ba nhép nkus, ba yéñék ki lipém. I ngim biloñ, ngomin a yé a tééne bibase minwaa.

3. Kii di ga nigil munu yigil ini?

³ Yésu a bi ti bés oda le di ‘yilha bôt ba biloñ gwobisôna banigil.’ (Matéô 28:19) Jon di nla badba le, lelaa di nla hôla bôt ba gwé bé ngim base i yila banigil ba Kristô? Di nlama yi le binéñél bi mut bi nla boñ le a leege bés tole a tjél. Kiki hihéga, i bet ba néñél i Érôpa ba nleege bé ñañ nlam nlélém kiki i bet ba nañ i Asia. Inyuki? I Érôpa, ngandak bôt i nyi ngim mam i Bibel, kiki bo le Nyambe a hek gwom gwobisôna. Ndi ki le i Asia, libim li bôt li nyi ndik ndék mam i Bibel, bape ba nyi yaga bé jam mu, bebek ba nhémle bé to le Nhek a yé. I yigil ini y’a hôla bés i tis miñem mi ba bobasôna di mboma likalô, ibabé i béñge i het ba nlôl to i mam ba nhémle.

KEE NI BISU I TEHE BÔT KIKI DJOB A NTEHE BO

4. Inyuki di nlama ke ni bisu i tehe bôt kiki Djob a ntehe bo?

⁴ Tehe bôt kiki Djob a ntehe bo. Hiki nwii, ngandak bôt i i gwé bé ngim base i nyila Mbôgi Yéhôva. Bahogi ikété yap ba bééna bihiumul bilam ilole ba nyi maliga, jon bihéñba bi bibase bi bé lôôha ti bo njôô. Ndi bape ba bé niñ ikété mpuñgu, ngandak i ban-ga bilem bibe bi ba bé lama tjôô. Ni mahôla ma Yéhôva, di nla ba nkwoog nkaa le di ga léba bôt ‘ba gwé libak lilam inyu kôhna niñ boga.’​—Minson mi baôma 13:48; 1 Timôtéô 2:3, 4.

5. Kii i mbéna tinde bôt i emble bés?

⁵ Kwélés bôt ni minyaô, u babaa bañ bo. Ngim mangéda, bôt ba nleege ñañ nlam, he bé inyu jam di nkal bo, ndi inyule di yé minyaô. Ba ngwés ngéda di nkwélés bo ni loñgeñem, ngéda di ntôñ bo ni ñem wés wonsôna, ni ngéda di nyoñ yihe le di babaa bañ bo. Di nyégsa bé bo i neebe i yom di nkal. Ndi di noode nok mahoñol ba gwé inyu base. Kiki hihéga, di nyimbe le bahogi ba ngwés bé kwélél mam ma base ni nkén mut. Bape ba nhoñol le i ta bé loñge i bat mut mahoñol mé inyu Djob. Bape ki ba nwo nyuu i añ Bibel i ti bôt, téntén ni Mbôgi Yéhôva. To kii leñek, di noode nôgda i yom ba nôgda.​—2 Timôtéô 2:24.

6. Lelaa ñôma Paul a unda le a bé héñha majubul mé ma nkwel inoñnaga ni mut a bé nye bisu, lelaa di nla kôna nye?

⁶ Ibale di mboma mut a ngwés bé le di gwélél bibuk kiki bo “Bibel,” “bihégél,” “Nyambe,” tole “base,” kii di nla boñ? Di nla nigle ñôma Paul nu a bé héñha majubul mé ma nkwel inoñnaga ni mut a bé nye bisu. I bisu bi bon ba Lôk Yuda, Paul a bé gwélél Bibel inyu tinde bo i hek pék. Ndi ngéda a bé kwel ni bayimam ba loñ Grikia i Aréôpagô, a bé unda bé bo le Bibel yon a bé sima. (Minson mi baôma 17:2, 3, 22-31) Lelaa di nla noñ ndémbél i Paul? Ibale u mboma mut a nhémle bé Bibel, u unda ndugi bañ nye le Bibel yon u yé sima. Ibale u nôgda le mut a nwo nyuu le bôt ba tehe nye a ñañ Bibel, u nla unda nye minlôñ mi Bibel i tafel tole i téléfôn yoñ i nya i yé le bôt ba yimbe bañ le Bibel yon a yé añ.

7. Kii di nlama boñ inyu nigle likeñge li Paul kaat 1 Korintô 9:20-23 i mpôdôl?

⁷ Yéñ yi mahoñol ma bôt, u emblege ki bo. Di nlama nok kii i ntinde bôt di mboma i bana ngim mahoñol. (Bingéngén 20:5) Di témb di yoñ hihéga hi Paul. A bi nañ ipôla bon ba Lôk Yuda. A bé lama boñ mahéñha ngéda a bé tééne bôt ba matén mape likalô inyule ba bé yi bé ngandak mam inyu Yéhôva to Bitilna. Inyu pam i nok mahoñol ma bôt ba libôga jés ni i kwélés bo ni minyaô, di nla boñ nyiña tole di bat minhôôlak mi lôk kéé mahôla.​—Añ 1 Korintô 9:20-23.

8. Sima njel yada di nla gwélél inyu bôdôl nkwel u Bibel ni mut?

⁸ Ngôñ yés i yé le di yéñ bôt ba “kôli.” (Matéô 10:11) Inyu boñ le likalô jés li num matam malam, di nlama bat bôt i yom ba nhoñol, di emble ki ndimbhe yap. Mankéé wada i loñ Ngisi a yé a mbat bôt ba libôga jé kii i nla lona maséé i ndap libii, lelaa bagwal ba nla néñés bon bap, tole lelaa mut a yé le a hônba ngitelepsép. I ngéda a ñemble mut, a mbat nye le: “Lelaa u ntehe mana maéba ma bi tilba nano a yé bebee le 2 000 di nwii?” I mbus, ibabé i sima buk le “Bibel,” a ñunda bo nlôñ u Bitilna ikété téléfôn yé.

DI TIHBA MIÑEM MI BÔT

9. Lelaa di nla hôla bôt ba ngwés bé minkwel mi Bibel?

⁹ Di nla tis miñem mi bôt ba ba ngwés bé minkwel mi Bibel, ibale di mbôdle nkwel ni ngim jam ba ntehe hiki kel. Kiki hihéga, mam ma yé i ngiinda yosôna ma nhélés ngandak bôt. Jon di nla kal nya mut i le: “Wemede u nyi ntiik le gwom bi bôt ba njoñ yi ba mbañ masañ mana, ba niglene gwo i gwom nkéña bés. Kiki hihéga, i bôt bi bañ micrô ba bi nigle ndik ôô, bet ba bi bañ udul i fôtô (kaméra) ba nigle jis. I ngéda i bôt bana ba nigle likeñge li ôô ni li jis, kii i nlo we mahoñol; njee ba yé i nigle ha ngéda i? Baa u nhoñol le ngim ngui ikeñi tole ngim mut yon i bi boñ le jis ni ôô bi ba i bibôdlene?” I ngéda u mal emble nye, u nla kônde le: “Nlômbi ntôp tjémbi wada a bi tila ngim jam i i bi hélés me; a kal le: ‘Nu a bañ ôô, baa a’ noga bé? Nu a uñgus jis, baa a’ tehna bé? . . . Nu yaga a niiga mut yi?’ Ngim bôt ba njoñ yi i nhémle bibañga bini, i hémlege ki le ngim mut i bi hek gwom gwobisôna.” (Tjémbi 94:9, 10) Ha nyen di nla unda bo vidéô i jw.org^®, (Kee i homa le PUBLICATIONS > VIDEOS.), isi homa le “Interviews et témoignages,” mbus kee i homa le “Points de vue sur l’origine de la vie.” Tole di nla ti bo i bon ba bikaat bana le La vie a-t-elle été créée? tole Cinq questions à se poser sur l’origine de la vie.

10. Lelaa di nla bôdôl nkwel ni mut a ngwés bé minkwel mi Bibel?

¹⁰ Ngandak bôt i gwé ngôñ i bana niñ ilam dilo di nlo. Ndi, ngandak i nkon woñi le hisi hi ga tjiba, tole bôt b’a yén ha bé mu. I Norwégia, ngwélél makiiña wada a nkal le i bôt ba ngwés bé minkwel mi Bibel ba yé bebee i kwel mam ma mbôña i nkoñ ’isi. Jon, i mbus a nyéga mut, a nkal le: “Baa u nhoñol le di ga bana niñ i mbomboo dilo di nlo? Baa botñem yés i niñne i moo ma bôt ba m’bô, ma bôt ba njoñ yi, tole i moo ma mut numpe?” Mbus a ntibil emble ndimbhe yap, a ñañ tole a nsima minlôñ mi bikaat mi mi ñunda le di ga bana niñ mbomboo dilo di nlo. Hala a yé a hélés bahogi i nok le Bibel i mbôn le hisi hi ga nom i mba ni mba, ni le bôt ba téé sép b’a niñ mu i boga ni boga.​—Tjémbi 37:29; Ñañal 1:4.

11. Inyuki di nlama noode héñha majubul més ma nkwel, lelaa di nla kôna ndémbél i Paul i i mpémél i kaat Rôma 1:14-16?

¹¹ Di nlama héñha majubul més ma nkwel inoñnaga ni bôt di mboma. Inyuki? Inyule bôt ba ta bé minlélém. I yom i nlémél ngim mut, i nla bébél numpe. Bôt bahogi ba yé bebee i pôdôl Bibel tole Djob, ndi ki le bape ba yé bebee i pôdôl mam mape. To ibale kii, di nlama gwélél pôla di gwé i kwélés mintén mi bôt nwominsôna. (Añ Rôma 1:14-16.) Di hôya bañ le Yéhôva nyen a nhôlôs maliga mu miñem mi bôt ba gwé libak lilam.​—1 Korintô 3:6, 7.

LELAA DI NLA AÑLE BÔT BA BILOÑ BI ASIA ÑAÑ NLAM

12. Kii di nla boñ inyu tihba miñem mi bôt ba bi biloñ bi Asia ba ba mah hégda bé le Nhek a yé?

¹² Ikété nkoñ ’isi, ngandak batéé likalô i yé i mboma bôt ba biloñ bi Asia, yak i bet ba nlôl biloñ bipe i het ngomin a nsôña mam ma base. I ngim biloñ bi Asia, ngandak i mah bé yoñ ngéda i badba too Nhek a yé tole heni. Bahogi ikété yap ba yé bebee i neebe yigil Bibel inyule ba nsômbôl yi kii i nkéla mu, ndi bape ba nkon woñi i nigil mam ma mondo. Lelaa di nla hôla bo? Ngim minhôôlak i batéé likalô i mpam i tihba i nya bôt i ngéda ba nlôô i yañga nkwel, ngéda ba ndiihe bo, ni i ngéda ba ñunda bo lelaa niñ yap i bi héñha ngéda ba bi bôdôl bii ngim matiñ ma tôbôtôbô ma Bibel bisélél.

13. Kii i nla tinde bôt i nigil Bibel ni bés? (Béñge titii i lipep li bisu.)

¹³ I pék i nlôl i Bibel yon i ñôt ngandak bôt. (Ñañal 7:12) I New York, mankéé nu muda wada nu a bé yuuga bôt ba mpot hop u Mandarin a nkal le: “Me noode unda bôt le me ndiihe bo, me ñemble ki bo. Ibale me nyimbe bôt ba ntip lo munu loñ yés, me nla bat bo le: ‘Baa ni mpamba? Baa ni ma léba bôlô? Me nhoñol le bôt ba ntééñga bé bé?’” Ngim mangéda, hala a nti me pôla i kwélés bo mam ma Bibel. Ibale pôla i nene, sita a yé a kônde le: “Inyu yoñ, kii mut a nla boñ inyu nôgla ni bôt bape? Baa me nla unda we ngén yada i Bibel? I nkal le: ‘Bibôdle bi ndañ bi yé kiki mut le a nyibil [soso nkoñ malép]; jon [nyodi], bisañ gwo ngi bôdôl.’ Baa u nhoñol le maéba ma, ma nla hôla bés i nôgla ni bôt bape?” (Bingéngén 17:14) Nya minkwel i, i nla hôla bés i léba i bet ba yé le ba neebe nigil ni bés.

14. Lelaa mankéé wada nu a yé i pes likôl i Asia a mbéna hôla bôt ba nkal le ba nhémle bé le Djob a yé?

¹⁴ Kii di nla añle i bôt ba nkal le ba nhémle bé le Djob a yé? Mankéé wada i pes likôl i Asia, nu a ntééne bôt ba ngwés bé mam ma base likalô ibôdôl behee, a ntoñol le: “Nyono i bésni, ngéda mut a nkal le, ‘me nhémle bé le Djob a yé,’ wee a mpôdôl mop bôt ba mbok yés ba mbégés. Jon me mbéna nit mahoñol map le banyambe bôt ba mbañ len ba yé kwéha. Me mbéna éñél bo kaat Yérémia 16:20: ‘Baa mut a yé le a hégél nyemede banyambe, ki le ba ta bé banyambe?’ Mbus me mbat bo le: ‘U nhoñol le mahéñha ma yé hee ipôla ngim bañga djob ni mop bôt ba mbañ?’ Me ñemble nye loñge, mbus me soñgol Yésaya 41:23: ‘Kala ni mam m’a yik lo mbus, le di laa yi le bé bon ni yé banyambe.’ Mbus me nti nye hihéga hiada hi hi ñunda lelaa ngim mbañ Yéhôva a bi legel i bi yon.”

15. Kii ndémbél i mankéé wada i pes likôl i Asia i niiga bés?

¹⁵ Mankéé wada i pes likôl i Asia a ngwélél mana majubul ma nkwel ngéda a ntémb i peple bôt. A nkal le: “Me nti bo dihéga di ñunda pék i maéba ma Bibel, dihéga di binyônôl bi mbañ i Bibel, ni i het Bibel i mpôdôl ngiinda, tjôdôt, ni hisi. I mbus me ñunda bo lelaa mam ma momasôna ma nit le Nhek a yé, ni le a gwé pék. Ngéda ba neebe le Nyambe a nla ba, me ñunda bo i yom Bibel i nkal inyu Yéhôva.”

16. Inoñnaga ni kaat Lôk Héber 11:6, inyuki banigil Bibel ba nlama hémle le Bibel i yé Bañga i Djob, ni le Nyambe a yé toi, lelaa di nla hôla bo i bana yo?

¹⁶ Ngeñ di nigil ni bôt ba bi nañ i het ba ngwés bé mam ma base, di nlama ke ni bisu i hôlôs i hémle ba gwé le Nyambe a yé toi. (Añ Lôk Héber 11:6.) Di nlama yak hôla bo i kéñbaha i hémle ba gwé le Bibel i yé Bañga i Djob. Hala a nla bat le di tiimba wan ngim biniigana ni bo. Hiki ngéda di nigil, di nlama unda bo inyuki Bibel i yé Bañga i Djob. Kiki hihéga, di nla unda bo ngim mbañ i Bibel i i bi yon, minlôñ mi Bibel mi mi nkiha ni njoñ yi, i mam ma ñunda le miñañ Bibel i mpôdôl mi bi bôña toi, tole dihéga di di ñunda le Bibel i yé nyonok ni pék.

17. Lelaa i gwéha di ñunda bôt i nla tihba bo?

¹⁷ Di nhôla bôt i yila banigil ba Kristô ngéda di ñunda bo gwéha, to ba ngwés mam ma base tole to. (1 Korintô 13:1) Ngéda di niiga bo, di unda bo le Djob a ngwés bés, a gwé ki ngôñ le di gwés nye. Hiki nwii, dikôô di bôt di di bé diihe bé mam ma base, to di di bé gwés bé mo tjagda, di nyoñ sôble inyule di nigil i gwés Djob. Jon di tehe i bôt ba kiki Djob a ntehe bo, di unda ki bôt bobasôna le di ntôñ bo ni gwéha. Di emble bo. Di noode nok bo. Di gwélél ki ndémbél yés inyu niiga bo kii i yé i yila banigil ba Kristô.