Lelaa u nla gwélél mapep inyu bôdôl minkwel

Ibôdôl i sôñ Kondoñ i nwii 2018, lipep li bisu li Kaat i niñ yés ni nson wés u bikristen li bi bôdôl bana dihéga di minkwel. Ba bi ti bés makénd i bôdôl minkwel ni bôt iloole di ti bo mimbamble. Inyu hôla bés i tibil nok hala, bividéô di dihéga di minkwel bi ñunda lelaa batéé likalô ba nla bôdôl minkwel ba gwéélak ndik Bibel. Baa hala a nkobla le di nlama bé gwélél mimbamble ngéda di ntéé likalô i mandap ni mandap? To! Kii hihéga, mapep ma yé loñge inyu bôdôl minkwel. Di nla gwélél likeñge lini ngéda di ngwélél mapep:

1. Isi lipep li bisu, bat mbadga i i nti pôla i pohol ndimbhe yada ikété mandimbhe maa.

2. Unda nye ndimbhe i i yé mu nlôñ tole minlôñ mi Bibel i lipep li nyônôs iba. Ibale pôla i yé, ni nla añ ni kwélél ki ngim mam ma yé mu ikété tract.

3. Ti nwet ndap lipep, u ti nye makénd i mélés lisoñgol.

4. Ilole u nke, unda nye mbadga i yé i homa nunu le “Hoñol le.” Ni nôgla inyu tehe ndimbhe i Bibel lisañ lipe.

Ngéda w’a témb i nyeni, unda nye ndimbhe i Bibel, u yék ki nye mbadga ipe i n’a kwélél hilo hipe. U nla pohol i yék ngim mbadga i yé mu site internet yés, tole ngim mbadga u nyoñ mu kaat ba ñunda i lipep li nsôk. I loñge ngéda, ti nye man kaat nunu le Miñañ minlam mi nlôl ni Djob! Tole kaat ipe mu Nkuu wés bisélél inyu niiga.