Lelaa gwéha i Yéhôva i nhôla bés i ngéda di nkon woñi

1. Kii i nla kônha bés woñi?

DI BÉÑGE le dihéga dini: Nestor bona nwaa wé Maria ba bééna ngôñ i ke hôla i het bôlô i yé ngandak.b Inyu pam i boñ hala, i bé béda le ba héñha ngim mam mu niñ yap. Ndi ba bé hoñol le ibale ba gwé ha bé moni ngandak, ba ga niñ bé loñge. Biniam a bi yila Mbôgi Yéhôva a bak i loñ yada i het bôt ba nkolba nson wés, a bé yi le kiki a yé Mbôgi Yéhôva, a yé le a kôs ndééñga. Hala a bi kônha nye woñi. Ndi a bé kon ki woñi ngandak inyule a bé yi bé lelaa bôt bé ba lihaa ba bé le ba tehe nye, mu kiki a nyila Mbôgi Yéhôva. Ba bi léba Valérie pos, hala a bé nye ndutu i léba dokta i i bé le i kan nye ibabé i ha nye matjél. Hala a bi boñ le a kahal kon woñi. Inyule a bé hoñol le a yé le a wo.

2. Inyuki di nlama jo sañ inyu yémbél woñi?

² Baa yak we u ma kon woñi hala? Ngandak ikété yés hala a ma pémél bo. Ibale di nyoñ bé yihe, woñi u yé le u tinde bés i yoñ makidik ma ma nla ôbôs maada més ni Yéhôva. Hala nyen Satan a ngwés. A nla ki boñ le woñi u tinde bés i bôk mambén ma Yéhôva, kiki bo mbén i i nkal le di añal ñañ nlam. (Masoola 12:17) Satan a yé béba, a nkona bé ngoo, a gwé ki ngui ngandak. Ndi, di nla kolba nye. Lelaa?

3. Lelaa di nla yémbél woñi?

³ I ngéda di nyi le Yéhôva a ngwés bés, ni le a yé ni bés, Satan a ta bé le a kônha bés woñi. (Tjémbi 118:6) Kiki hihéga, i nwet a bi tila kaat Tjémbi 118 a bééna ngandak mandutu. Baoo bé ba bé ngandak, bape ba bééna yak bitel bikeñi (minlôñ 9, 10). Ngim mangéda, mandutu ma bé ma yuu nye (nlôñ 13). Yéhôva a bi kogse yak nye bañga likogsege (nlôñ 18). Ndi a bi kal mu hiémbi hié le: “M’a kon bé me woñi.” Inyuki a bé kon bé woñi? A bé yi le tolakii Yéhôva a bi kogse nye, a bé gwés nye ngandak. Ntôp tjémbi nu a bé yi le to imbe ndutu a mboma, Yéhôva a ga hôla nye.​—Tjémbi 118:29.

4. I ngéda di nyi le Yéhôva a ngwés bés, kii di nkon bé woñi?

⁴ Di pééna bañ le Yéhôva a ngwés bés. I ngéda di nyi le Yéhôva a yé ni bés, di nkon bé mana mam maa woñi: (1) Di nkon bé woñi le d’a la bé tééda lihaa jés, (2) di nkon bé mut binam woñi, (3) di nkon bé nyemb woñi. I bôt di mpôdôl bibôdle bi yigil ini, ba bi pam i yémbél woñi inyule ba bé yi le Nyambe a ngwés bo.

I NGÉDA DI NKON WOÑI LE D’A LA BÉ TÉÉDA LIHAA JÉS

5. Kii i nla kônha isañ mbai woñi? (Béñge titii i lipep li bisu.)

⁵ Isañ mbai nu a yé kristen a njôha bé ni mbegee a gwé i tééda lihaa jé. (1 Timôtéô 5:8) Ibale u yé isañ mbai, bebek munu himala hi COVID-19, u bé kon woñi le w’a nimis bôlô yoñ. Bebek le u bé badba lelaa w’a pam i jés bôt boñ, u saa ki ndap. Bebek u bé kon yak woñi le ibale bôlô i mal we, w’a la ha bé kôs bôlô ipe. Tole kiki Nestor bo Maria ba di mbôk di pôdôl, u bé kon woñi le ibale u gwé ndik ndék moni, w’a la bé pamba. Satan a ma kwés ngandak bôt inyule ba nkon woñi.

6. Satan a nsômbôl le di hoñol le kii?

⁶ Satan a nsômbôl le di hoñol le Yéhôva a ntôñ bé bés, ni le a ga hôla bé bés i tééda lihaa jés. Hala a nla tinde bés i hoñol le di nlama bé nwas bôlô yés, to ibale i nkiha bé ni sômbôl i Yéhôva.

7. Kii Yésu a nkal bés?

⁷ Yésu nu a nyi Isañ iloo bôt bobasôna a nkal bés le Nyambe wés “a nyi mam ma yé bé[s] nseñ iloo yaga le [di] mbat nye mo.” (Matéô 6:8) Yésu a nyi le Yéhôva a yé bebee i ti bés mam ma mbéda bés. Kiki di yé bikristen, di yé ikété lihaa jé. Yéhôva a yé Isañ mbai, jon a ga boñ i jam a bi kal basañ mbai le ba boñ hana i kaat 1 Timôtéô 5:8.

8. (a) Kii i nla hôla bés ibale di nkon woñi le d’a la bé tééda lihaa jés? (Matéô 6:31-33) (b) Kiki di ntehe mu titii, lelaa di nla nigle babiina ba yé kébél sita yada bijek?

⁸ I ngéda di nyi le Yéhôva a ngwés bés ni lihaa jés, di ntôñ bé jam jo ki jo. (Añ Matéô 6:31-33.) Yéhôva a yé bebee i tééda bés, a ngwés bés, a nti ki bés mam momasôna ma mbéda bés! I ngéda a bi hek hisi, a bi ti ndik bé bés mam ma mbéda bés inyu niñ. A bi hek ngandak mam malam hana ’isi inyu boñ le di kon maséé. (Bibôdle 2:9) To ibale ngim mangéda di gwé ndik ndék gwom, di nlama ti mayéga le di nkôs to i ndék i. Yéhôva nyen a nti bés i ndék gwom i. (Matéô 6:11) Di hôya bañ le bisesema gwobisôna di mboñ nano, bi mbol bé bisai gwobisôna Yéhôva a nti bés ibôdôl nano letee ni dilo di nlo. Nestor bo Maria ba bi tehe i jam li.​—Yésaya 65:21, 22.

9. Kii ndémbél i Nestor bo Maria i niiga bés?

⁹ Nestor bo Maria ba bééna niñ ilam i Kolombia. Ba nkal le: “Di bé sômbôl nwas libim li nkus wés inyu kônde sélél Yéhôva. Ndi di bé kon woñi le ibale di gwé ha bé ngandak moni, niñ yés y’a ba bé ilam.” Kii i bi hôla bo? Ba bi hoñol mam momasôna Yéhôva a bé a ma bôñol bo. Kiki ba bé yi le Yéhôva a ga tjôô bé bo kekikel, ba bi nwas bibôlô bi bi bé ti bo ngandak moni. Ba nuñul ndap yap, ba ke ngim homa mu loñ yap i het ngôñ baañal ñañ nlam i bé ngandak. Kii ba nhoñol mu makidik ba bi yoñ? Nestor a nkal le: “Di bi tehe toi le kaat Matéô 6:33 i mpot maliga. Yom yo ki yo i mah héñél bé bés. Niñ yés i nkônde ki lama.”

I NGÉDA DI NKON MUT BINAM WOÑI

10. Inyuki bôt bahogi ba nkon bôt bape woñi?

¹⁰ Ibôdôl behee, bôt ba binam ba mboñ bôt bape béba. (Ñañal 8:9) Kiki hihéga, baane bahogi ba ntét bôt ba yé isi énél yap, mintonba mi nkand bikuu, baudu ba ba gwé bilem bibe ba nsol bana baudu bape, ba tééñgaga bo, bôt bahogi ba ntét bôt bap ba lihaa. Inyu hala nyen ngim bôt i nkon bôt ba binam woñi! Lelaa Satan a noode boñ bés béba i ngéda di nkon woñi?

11-12. Lelaa Satan a mboñ bés béba i ngéda di nkon mut binam woñi?

¹¹ I ngéda di nkon bôt ba binam woñi, Satan a noode boñ le di boñ béba tole di waa añal ñañ nlam. Satan a ntinde biane i sôñga nson wés ni tééñga bés. (Lukas 21:12; Masoola 2:10) Ngandak bôt munu i nkoñ ’isi u Satan i ñôbôs jôl li Mbôgi Yéhôva. I bôt ba ñemble i yom ba nkal ba yé le ba nol bés hiol tole ba bép bés. (Matéô 10:36) Baa maboñok ma Satan ma nhélés bés? To jam. Hala nyen a bé boñ yak ni bikristen bi hiai hi bisu.​—Minson mi baôma 5:27, 28, 40.

¹² Satan a ngwélél ndik bé biane inyu noode bés. Bôt bahogi ba nkon yak bôt bap ba lihaa woñi i ngéda ba nyila Mbôgi Yéhôva iloo yak ndôm. Kiki ba ngwés bôt bap ba lihaa, ngôñ yap i yé le yak bo ba gwélél Yéhôva. I ngéda bôt bap ba lihaa ba nyan Yéhôva ni bagwélél bé hala a ntééñga bo. Ndi i yé i pam ngim mangéda le i bôt ba nkolba bo, ba nsôk ba yila Mbôgi Yéhôva. Ndi ibale bôt bés ba lihaa ba nyôi bés inyule di nyila Mbôgi Yéhôva, kii di ga boñ?

13. I ngéda di nyi le Yéhôva a ngwés bés, lelaa hala a nla hôla bés ibale lihaa jés li nyôi bés? (Tjémbi 27:10)

¹³ Bibañga bi yé i kaat Tjémbi 27:10 bi nla lédés bés. (Añ.) I ngéda di nhoñol lelaa Yéhôva a ngwés bés, di nkon bé ngolba woñi. Di nyi le ibale di nhônba, a ga bom bés. Ndik Yéhôva nyetama nyen a nla ti bés i mam momasôna ma mbéda bés! Biniam nu di mbôk di pôdôl len a bi tehe i jam li.

14. Kii ndémbél i Biniam i niiga bés?

¹⁴ Biniam a bi yila Mbôgi Yéhôva a yik le a ga kôs ndééñga. Di béñge lelaa Biniam a bi yémbél woñi u bôt binam, inyule a bé yi le Yéhôva a yé ni nye. A nkal le: “Ndééñga i bi pam me i héya bitamb. Ndi me bé kon lihaa jem woñi iloo ndééñga i baane. Me bé kon woñi le kiki me nyila Mbôgi Yéhôva me ga wéha papa yem nyuu ni le lihaa jem li ga tehe me kiki hitégéé hi mut.” Ndi Biniam a bé yi le Yéhôva a ntjôô bé bagwélél bé. A nkal le: “Me bi hoñol lelaa Yéhôva a bi hôla i bôt bé yep, ni i bôt ba bi boma bagla ni ndééñga. Me bé yi le ibale me ntéñbe, Yéhôva a nsayap me. Ba bi gwel me ngandak ngélé, ba tééñga me, ndi me bi tehe lelaa Yéhôva a nhôla bôt ba ntéñbe ni nye.” Yéhôva a bi unda le a yé Isañ Biniam, yak lôk kéé i éba le i yé bôt bé ba lihaa.

I NGÉDA DI NKON NYEMB WOÑI

15. Inyuki di kôli kon nyemb woñi?

¹⁵ Bibel i ñunda le nyemb i yé ño wés. (1 Korintô 15:25, 26) I ngéda di nkon tole mut wés nyen a nkon ngandak, di yé le di kon nyemb woñi. Inyuki di nkon nyemb woñi? Inyule Yéhôva a bi hek bés le di niñ i boga ni boga. (Ñañal 3:11) I ngéda di nkon nyemb woñi, hala a nla boñ le di sôñ niñ yés. Kiki hihéga, hala a nla boñ le di yoñ makidik i je loñge, i hianda minsôn, i kee i dokta, i nyo bee i ngéda di nkon ni i keñgle mam ma ma nla lona bés bikuu.

16. Kiki Satan a nyi le di nkon nyemb woñi, kii a noode tinde bés i boñ?

¹⁶ Satan a nyi le di ngwés niñ, a nkal le di yé bebee i boñ to kii, di kôm yak Yéhôva mbus ndik inyule di nsômbôl bé wo. (Hiôb 2:4, 5) Ndi maliga bé ma! Kiki “Satan a yé nu a gwé ngui i nol,” a noode boñ le woñi u tinde bés i kôm Yéhôva mbus. (Lôk Héber 2:14, 15) Ngim mangéda bagwélél ba Satan ba nkal bagwélél ba Yéhôva le ibale ba nkôm bé Yéhôva mbus ba nol bo. Satan a nla noode tinde bés i bôk mbén Yéhôva i ngéda di nkon. Dokta tole bôt bés ba lihaa ba ba ta bé Mbôgi Yéhôva ba nla tinde bés i yoñ matjél. Tole mut a yé le a tinde bés i neebe matibla ma ma nkiha bé ni Bitilna.

17. Inoñnaga ni kaat Rôma 8:37-39, inyuki di nlama bé kon nyemb woñi?

¹⁷ Di ta bé maséé i wo, ndi di nyi le ibale di nwo, Yéhôva a’ waa bé gwés bés. (Añ Rôma 8:37-39.) I ngéda bagwélél ba Yéhôva ba nwo, a nhoñol bo wengoñle ba yii i niñ. (Lukas 20:37, 38) A gwé ngôñ i tugul bo. (Hiôb 14:15) Yéhôva a bi sem Man wé “inyu boñ . . . le di bana niñ boga.” (Yôhanes 3:16) Di nyi le Yéhôva a ngwés bés ngandak a ntôñ ki bés. Jon i ngéda di nkon tole i ngéda nyemb i yé bés bebee, di kôm bañ Yéhôva mbus, di bat nye mahôla, pék ni ngui. Hala nyen Valérie bo nlôm ba bi boñ.​—Tjémbi 41:4.

18. Kii ndémbél i Valérie i niiga bés?

¹⁸ Ba bi léba Valérie pos i ngéda a bééna 35 nwii. Di béñge lelaa a bi yémbél woñi u nyemb inyule a bé gwés Yéhôva. A nkal le: “I ngéda ba bi léba me i nkon u, hala a bi lôôha tééñga bés. Inyu boñ le me pamba, i bé béda le ba kan me. Me bi boma ngandak bidokta, ndi bobasôna ba bi tjél kan me ibabé le ba ha me matjél. Hala a bi kônha me woñi, ndi kiki me bé nyi mbén Djob, me bé mbén i neebe le ba ha me matjél! Me bi tehe gwéha i Yéhôva ngandak i niñ yem, i bé béda le yak me me éba nye le me ngwés nye. I ngéda bidokta bi bé bi legel me béba nwin, hala a bé ti me ngôñ i jo sañ inyu lémél Yéhôva ni i nwéha Satan nyuu. Ba bi sôk ba kan me ibabé le ba ha me matjél. Me ngi koñok, ndi Yéhôva a mah tjôô bé bés. Kiki hihéga, ilole ba nléba me pos, di bi ke likoda, di nigil i yigil ini le ‘Affrontons les difficultés de la vie avec courage.’c I yigil i i bi lédés bés ngandak, di bi añ yo di tiimba. I nya gwigil i, ni mam mape di bé boñ i ntôñ u Yéhôva bi bi hôgbaha me ni nlô wem, bi hôla ki bés i ke ni bisu i gwélél Yéhôva, ni i yoñ makidik malam.”

DI NLA YÉMBÉL WOÑI

19. Kii y’a bôña ndék ngéda?

¹⁹ I nkoñ ’isi wonsôna, bikristen bi pam i yémbél mandutu ni i kolba Nsohop ni mahôla ma Yéhôva. (1 Pétrô 5:8, 9) Yak we u nla boñ hala! Ndék ngéda, Yéhôva a ga om Yésu ni i bet ba ga énél ni nye i “tjé minson mi Nsohop.” (1 Yôhanes 3:8) I mbus, bagwélél ba Yéhôva, ba ba ga ba hana ’isi, ba ga “kon bé mut nye ki nye woñi, to yom yo ki yo i ga boñ bé bo le ba sehla.” (Yésaya 54:14; Mika 4:4) Ndi i nwaa le di mbol nyoo, di nlama jo sañ inyu yémbél woñi.

20. Kii i nla hôla bés i yémbél woñi?

²⁰ Di nlama kônde lédés hémle yés, di yik le Yéhôva a ngwés bés ni le a ntat bés. Inyu pam i boñ hala, di nlama hoñol kiki Yéhôva a bi tat bagwélél bé i ngéda kôba, di kwélél ki mu. Di hoñol ki lelaa a bi hôla bés i ngéda di bi boma mandutu. Ni mahôla ma Yéhôva di nla pam i yémbél woñi!​—Tjémbi 34:5.