Ane i Djob i mbôdôl énél!

1. Kii di nyi, inyuki?

BAA mandutu ma nkoñ ’isi unu ma mboñ we le u lehel ñem? Mahaa ma nôgla ha bé, bôt ba nlôôha gwés bisañ, ba ntôñ ndik bomede. Bun bé le ba bôdôl baane ñem. Ndi i mam mana momasôna ma nla ti bés botñem. Inyuki? Inyule Bibel i bi bôk i pôdôl maboñok bôt ba ga bana “dilo di nsôk.” (2 Timôtéô 3:1-5) Maboñok ma mon bôt ba gwé i len ini. Kiki i mbañ ini i yé yon bôt ba tehge, hala a ñéba le Yésu Kristô Kiñe Ane i Djob a bi bôdôl énél. Ndi u héya i mbañ ini, ngandak mbañ ipe i yé i i mbéñge Ane i Djob. Ibale di nwan i mbañ i nyon masañ mana, hala a ga lédés hémle yés.

2. Kii di ga tehe munu i yigil ini, inyuki? (Toñol titii i lipep li bisu.)

² Munu i yigil ini, di ga tehe (1) mbañ i i ñéba bés imbe ngéda Ane i Djob i bi tééba, (2) mbañ i i ñéba le Yésu Kiñe Ane i Djob a bi bôdôl énél, ni (3) mbañ ipe i i ñéba lelaa baoo ba Djob ba ga tjiba. Di ga tehe le i mbañ ini yosôna i nkiha, i ga hôla bés i tehe le i ngéda Yéhôva a bi téé i nkôôge bebee.

KII I NLA HÔLA BÉS I YI IMBE NGÉDA ANE I DJOB I BI TÉÉBA

3. Kii kaat i Daniel 7:13, 14 i ñunda bés inyu Kiñe i Ane i Djob?

³ Mbañ i Daniel 7:13, 14 i ñunda bés le Yésu Kristô a ga ba loñge Kiñe. Bôt ba matén momasôna ba ga ba maséé i gwélél nye, kiñe ipe i ga ba bé i mbus yé. Mbañ ipe i kaat Daniel i ñéba le Yésu a ga yila Kiñe i mbus ngéda isaambok. Imbe ngéda i mbañ i i bi yon?

4. Lelaa kaat i Daniel 4:10-17, i nhôla bés i nok imbe ngéda Kristô a bi yila Kiñe i Ane i Djob? (Béñge buk isi lipe.)

⁴ Añ Daniel 4:10-17. “Ngéda isaambok” i yé 2 520 nwii. I ngéda i, i bi bôdôl i nwii 607 B.N.Y. i ngéda bôt ba Babilôn ba bi héya kiñe i nsôk i Yéhôva a bi téé i Yérusalem. I bi mal i nwii 1914 N.Y. i ngéda Yéhôva a bi téé Yésu “nu a yé kunde i pémés mbagi,” Kiñe i Ane i Djob.b—Ézékiel 21:30-32.

5. Lelaa mbañ i “ngéda isaambok” i nla hôla bés?

⁵ Lelaa i mbañ ini i nla hôla bés? Mbañ i “ngéda isaambok” i ñunda bés le Yéhôva a nyônôs mimbônga nwé i loñge ngéda. Kiki a bi téé Ane yé i ngéda a bi téé le a ga boñ hala, hala nyen a ga boñ le mini mimbônga nwé mimpe mi yon i loñge ngéda. Mimbônga mi Yéhôva ‘mi ga yon.’—Habakuk 2:3.

KII I ÑUNDA LE KRISTÔ KIÑE I ANE I DJOB A MBÔDÔL ÉNÉL

6. (a) Kii i ñéba le Kristô a bi bôdôl énél i ngii? (b) Lelaa kaat Masoola 6:2-8 i nhôla bés i nok i jam li?

⁶ Bebee ni mamélél ma nson wé hana ’isi, Yésu a bi kal banigil bé ngim mam i y’a unda le a mbôdôl énél i ngii. A bi pôdôl gwom kiki bo gwét, njal ikeñi ni nyeñg disi. A pôdôl yak makon tole dimala “bahoma bahoma.” Mu makon ma di yé le di sima himala hi COVID-19. I mam mana mon Bibel i nsébél le “yimbne” le Kristô a yé ha. (Matéô 24:3, 7; Lukas 21:7, 10, 11) Iloo 60 nwii i mbus le Kristô a bi wo, a tuge, a bet i ngii, a bi tiimba kal ñôma Yôhanes mam mape ma ma bé éba le i mam a bi bôk a pot ma ga yon. (Añ Masoola 6:2-8.) I mam mana momasôna ma mbôña ibôdôl nu Yésu a bi yila Kiñe i nwii 1914.

7. Inyuki ndutu i yé nnayak hana ’isi i bôdôl nu Yésu a bi bôdôl énél?

⁷ Inyuki mam ma bi kônde bep munu i nkoñ ’isi unu i ngéda Yésu a bi yila Kiñe? Kaat Masoola 6:2 i ñéba le i ngéda Yésu a bi yila Kiñe, bôlô yé i bisu i bé le a joo gwét. Njee a bé jôs? A bé jôs Satan ni mimbuu mimbe. Kaat Masoola pes 12 i ñéba le Satan ni mimbuu mimbe ba bi biba ba léña hana ’isi. Hala a bi lona ‘ngoo hana ’isi’ inyule kiki Satan a bé ñunbak a bi kahal tééñga bôt ba binam hana ’isi.—Masoola 12:7-12.

8. Kiki di ntehe mbañ i Bibel i nyon, kii hala a nlona bés?

⁸ Lelaa i mbañ ini i nla hôla bés? I mam ma mbôña i nkoñ ’isi, ni maboñok ma bôt di ntehe i len ini, ma ñéba bés le Yésu a mbôdôl énél nyoo i ngii. Jon i ngéda di ntehe bôt ba ntôñ ndigi bomede, ba ook bôt bape, hala a nlama bé tééñga bés, di hôya bañ le mbañ i Bibel yon i yé yon. Ane i Djob i mbôdôl énél! (Tjémbi 37:1) Kiki gwét bi Armagédôn bi ntiige bebee, hala nyen mam ma nkônde bep munu nkoñ ’isi unu. (Markô 13:8; 2 Timôtéô 3:13) Baa di ta bé maséé kiki Yéhôva a nhôla bés i nok inyuki mam mabe ma yé nnayak munu i ngéda yés?

LELAA BAOO BA DJOB BA GA TJIBA?

9. Kaat i Daniel 2:28, 31-35 i ñunda le ane i nsôk i yé lelaa, imbe ngéda i bi bôdôl énél?

⁹ Añ Daniel 2:28, 31-35. I mbañ ini i yé yon munu i ngéda yés. Eem i Nébukadnézar i ñéba kii i ga bôña “dilo di nsôk,” Kristô a ma bôdôl énél. I eem i, i ñéba le ane i nsôk Bibel i mpôdôl i yé “makôô ni ték lima” i i yé mu baoo ba Yésu. I ane i, i bi bôdôl énél. I bi gwéé i Gwét bi Ntôla I, i ngéda ane i Ngisi ni i Amérika i bi bôdôl sal. Eem i Nébukadnézar i ñéba le i ane i, i gwé mam ima ma ma yé le bini biane bipe bi bééna bé.

10. (a) Lelaa mbañ i Daniel i mpôdôl maada ma Ngisi ni ma Amérika? (b) Kii di nlama yi? (Béñge minkéñék mi matila mini le: “Ni yoñ yihe ni ték lima!”)

¹⁰ Pog, ane i Ngisi ni i Amérika i ta bé kiki bini biana bipe bi bi bé ni bisélél bi ngui, kiki bo gôl ni silba. Yo i yé kei ni ték lima. Ték lima i yé yimbne i “mbôda i bôt ba binam,” hala wee bôt ba binam bobasôna. (Daniel 2:43) Kiki di ntehe i len ini, bôt ba yé sum sum i vote, i kaa kunde ni i kolba baane. Hala a mboñ le baane ba nla bé sal bôlô yap kiki ba ngwés.

11. Inyuki di yé le di kal le ane i Ngisi ni i Amérika i nkwés bés nkaa le di yé dilo di nsôk?

¹¹ Iba, ane i Ngisi ni i Amérika i i yé makôô mu i titii i mbañ i Daniel, yon i yé ane i nsôk ikété biane Bibel i mpôdôl. Ane ipe i ga énél ha bé i mbus yé. I ga tjiba i Armagédôn i ngéda Ane i Djob i ga tjé bini biane gwobisôna.c—Masoola 16:13, 14, 16; 19:19, 20.

12. Kii ipe i nlédés bés mu i mbañ Daniel?

¹² Lelaa i mbañ ini i nla hôla bés. Mbañ Daniel i mpôdôl jam lipe li li ñéba le di yé dilo di nsôk. Hala a yé iloo 2 500 nwii le Daniel a bi kal le i mbus Babilôn, biane bina bipe bi ga bana maada ni bagwélél ba Djob. A bi kal ki le ane i Ngisi ni i Amérika yon i ga ba ane i nsôk mu biane bi. Hala a nlédés botñem yés i yi le ndék ngéda, Ane i Djob i ga tjé biane gwobisôna, i bôdôl énél ’isi.—Daniel 2:44.

13. Bonjee ba yé “kiñe i nyônôs juem” ni “jôm li bikiñe” kaat Masoola 17:9-12 i mpôdôl, lelaa i mbañ i i bi yon?

¹³ Añ Masoola 17:9-12. Kiki ngandak bôt i bi wo i Gwét bi Ntôla I, hala a bi boñ le mbañ ipe i i mbéñge dilo di nsôk i yon. Baane ba nkon ’isi ba bé sômbôl le nsañ u ba, jon ba bi bot Likoda li matén i sôñ Kondoñ nwii 1920, likoda li li bi yila Adna i biloñ i sôñ Biôôm nwii 1945. Adna i biloñ yon i yé “kiñe i nyônôs juem.” Ndi i ta bé ngim ane munu nkoñ ’isi unu. Biane bi nkoñ ’isi gwon bi nti nlôñ unu ngui. Bibel i nsébél biane bi le “jôm li bikiñe.”

14-15. (a) Kii kaat Masoola 17:3-5 i nkal bés inyu “Babilôn Nunkeñi”? (b) Kii i yé i pémél bikwéha bi bibase?

¹⁴ Añ Masoola 17:3-5. Ikété yiinda, ñôma Yôhanes a bi tehe muda libambe hala wee “Babilôn Nunkeñi” nu a yé bikwéha bi bibase gwobisôna bi nkoñ ’isi. Lelaa i yiinda i i bi yon? Bikwéha bi bibase bi bi sal ntôñ ni biane bi nkoñ ’isi bi nidik ki gwo. Ndi ndék ngéda, Yéhôva a ga ha i miñem mi baane ba nkoñ ’isi le “ba yônôs mahoñol mé.” Kii i ga bôña i mbus ngéda? Biane bi nkoñ ’isi hala wee “jôm li bikiñe” bi ga tjé bikwéha bi bibase gwobisôna.—Masoola 17:1, 2, 16, 17.

¹⁵ Kii i ñunda le tjiba i Babilôn Nunkeñi i yé bebee? Inyu timbhe i mbadga i, di bigda le i soso lép unu le lom Ufraté, a bé kéña nlômbi tison i Babilôn kiki lipénd. Kaat Masoola i nkal le i bôt ba nit Babilôn Nunkeñi, bi yé kiki “malép” ma ma nkéña nye. (Masoola 17:15) Ndi Bibel i ñunda ki le malép ma, ma ga ‘sa,’ hala a nkobla le ngandak bôt i ga pam mu bikwéha bi bibase bi. (Masoola 16:12) I mbañ i i yé yon i len ini, ngandak bôt i yé i pam bikwéha bi bibase inyu ke bahoma bape.

16. Ibale di ntibil nok mbañ i i mpôdôl Adna i biloñ ni tjiba i Babilôn Nunkeñi, kii hala a ga lona bés?

¹⁶ Lelaa i mbañ ini i nla hôla bés? I ngéda di ntehe Adna i biloñ, di tehge le bôt ba nkahal pam mu bikwéha bi bibase, hala a nkwés bés nkaa le di yé dilo di nsôk. I yé maliga le bôt ba yé i pam mu bikwéha bi bibase, ndi jam lipe jon li ga boñ le bikwéha bi bibase bi tjiba. Kiki di mbôk di tehe Yéhôva a ga ha i miñem mi “jôm li bikiñe,” hala wee biane bi nkoñ ’isi bi bi nit Adna i bilôñ, le bi “yônôs mahoñol mé.” Tjiba i bikwéha bi bibase i ga puhe bôt.d (Masoola 18:8-10) Tjiba i Babilôn Nunkeñi i ga tééñga ngandak bôt munu nkoñ ’isi. Ndi bagwélél ba Djob ba ga ba maséé i ndék yosôna inyu manjom ima. Bikwéha bi bibase bi bi yé baoo ba Yéhôva Djob bi ga tjiba. Jam lipe li yé ki le di ga pei tjiba i béba nkoñ ’isi ini!—Lukas 21:28.

DI KON BAÑ WOÑI INYU MAM MA GA BÔÑA DILO DI NLO

17-18. (a) Lelaa di nla kônde lédés hémle yés? (b) Kii di ga tehe i yigil i noñ ha?

¹⁷ Daniel a bi kal le “bañga yi i ga bôl,” i jam li jon di ntehe i len ini! Di ntibil nok mbañ i i yon munu i ngéda yés. (Daniel 12:4, 9, 10) Kiki di ntibil nok i mbañ ini, hala a mboñ le di kônde kon Yéhôva woñi, di gwés ki Bañga yé. (Yésaya 46:10; 55:11) Jon inyu lédés hémle yés, di kee ni bisu i nigil Bibel bañga liniglak, di hôla ki bôt bape i bana maada malam ni Yéhôva. A ga tohol ba bobasôna ba mbôdôl nye ñem, a ti ki bo “nsañ ngéda yosôna.”—Yésaya 26:3.

¹⁸ Mu i yigil i noñ ha, di ga pôdôl mbañ i i mbéñge ntôñ u Yéhôva munu dilo di nsôk. Di ga tehe le i mbañ i i nkiha ni ini mbañ ipe yosôna i i mpôdôl dilo nsôk. Di ga tehe ki mam mape ma ma ñéba le Yésu Kiñe i Ane i Djob a yé éga bagwélél ba Djob hana ’isi.