Bôt iba ba nkôndba i Juu li bakena ntôñ
I NGWA NGÉÉ hilo 18, hi sôñ Kondoñ nwii 2023, nlegla u tôbôtôbô u bi pam i jw.org, u u bé kal le mankéé Gage Fleegle bona mankéé Jeffrey Winder ba nkôndba i nsoñgi u lôk kéé i Juu li bakena ntôñ u Mbôgi Yéhôva. I lôk kéé i yo iba, i ngwélél Yéhôva hala a yé ngandak nwii nano.
Gage Fleegle nye ni nwaa, Nadia
Mankéé Fleegle a bi néñél i pes hiôñk i Pennsylvania, i loñ Amérika, bagwal bé ba bé ba tiñi ni Yéhôva. I ngéda a bi yila njohok i mañge wanda, lihaa jé li bi ke i yééne i man mbai i het ngôñ i batéé likalô i bé ngandak. Ndék ngéda i mbus ha, mankéé Fleegle a kôs sôble i hilo 20 hi sôñ Maye sép nwii 1988.
Bagwal ba mankéé Fleegle ba bi waa bé ti nye makénd i yoñ nson u nsañal. Ba bééna lem i naña bagwélél ba makiiña ni lôk kéé i nsal i Bétel i ndap yap, mankéé Fleegle a bi pam i tehe lelaa i lôk kéé i bôlôm ni i bôda ini i yé maséé. Ndék ngéda i mbus sôble yé, a yoñ nson u nsañal nu ngéda yosôna i hilo hi bisu hi sôñ Dipos, nwii 1989. Nwii ima i mbus ha, a bi yônôs i jam a bi téé le a mboñ i pes mbuu a ban-ga 12 nwii, i ke sal i Bétel. A bi bôdôl sal i Bétel Brooklyn i sôñ Biôôm nwii 1991.
I Bétel, mankéé Fleegle a bé sal i homa ba ñat bikaat, a bi sal nwii juem nyoo, i mbus ba om nye i sal i man juu li nson i hikuu hi loñ. Mu i ngéda i, a bi tégbaha ndék nwii i likoda ni hop Ruslan. I nwii 2006 a biiba ni Nadia, ba kahal sal i Bétel. Bo iba ba bi sal i libôga li likalô li hop Potoki, ba tégbaha iloo jôm li nwii i libôga li likalô li hop Panya. I mbus le mankéé Fleegle a bi tégbaha ngandak nwii i man juu li nson i hikuu hi loñ, ba bi om nye i sal i man juu li biniigana. I mbus a ke i man juu li nson. I sôñ Matumb nwii 2022 ba bi téé nye nhôla i man juu li nson li Juu li bakena ntôñ.
Jeffrey Winder nye ni nwaa, Angela
Mankéé Winder a bi néñél i Murrieta, California, i loñ Amérika. Bagwal bé ba bi néñés nye i maliga, a sôblana i hilo 29 hi sôñ Matumb, nwii 1986. I sôñ i bé noñ ha, a yila nsañal nu pes ngéda. Nson u, u bi lôôha lémél nye, a bééna ngôñ i kena wo ni bisu. I mbus le a bi tégbaha ngandak sôñ kiki nsañal nu pes ngéda, a yoñ nson u nsañal nu ngéda yosôna hilo bisu hi sôñ Biôôm, nwii 1986.
Nye mañge wanda, mankéé Winder a bi yuuga lôknyañ i bôlôm i mañ iba i i bé sal i Bétel ha i ngéda i. Hala a bi ti nye ngôñ i yônôs lipep inyu ke i sal i Bétel i ngéda a bi nañ. I sôñ Mpuye nwii 1990, ba sébél nye i Bétel i Wallkill.
I Bétel, mankéé Winder a bi sal i ngandak bahoma, yak i burô i i mpubus Bétel, i burô i i ntjek nwom bijek, yak ni i burô li basal i Bétel. A bii Angela i nwii 1997, ibôdôl ha, bo iba ba yé ba salak i Bétel. I nwii 2014, Bétel i bi ke i Warwick, nyoo, mankéé Winder a bi hôla i maoñ ma hikuu hikeñi. I nwii 2016, mankéé Winder nye ni nwaa ba bi ke i hikuu hikeñi hi bisuklu bi ntôñ i Patterson, i het a bé sélél i Audiô Vidéô. Nwii mina i mbus, ba témb i Warwick, ba om mankéé Winder i sal i man juu li basal i Bétel. I sôñ Matumb nwii 2022, ba bi téé nye nhôla mu i man juu nu.
Di nsoohe le Yéhôva a kônde sayap i bôt bana ba ba yé “kiki makébla,” mu kiki ba nsal ni ngui inyu nit gwéñe bi Ane.—Éfésô 4:8.