Baa u nyimbe maliga?

1. Kii we u nôgda inyu maliga?

BAGWÉLÉL ba Yéhôva ba ngwés maliga ma yé ikété Bañga yé. Mu nyen hémle yés i umne. (Rôma 10:17) Di bi ba nkwoog nkaa le Yéhôva nyen a bi téé likoda li bikristen, le “li nit, li sôñôk maliga.” (1 Timôtéô 3:15) Di yé maséé i suhus bésbomede isi ‘i bôt ba ñéga bés’ mu kiki ba ntoñle bés maliga ma nlôl i Bibel, ba hôlga ki bés i niñ inoñnaga ni sômbôl i Nyambe.​—Lôk Héber 13:17.

2. Inoñnaga ni Yakôbô 5:​19, kii i nla pémél bés i mbus le di neebe maliga?

² I nla pam le di kee haa ni maliga, to ibale di bi neebe mo, di neebe ki le ntôñ u Yéhôva won u nlama éga bés. (Añ Yakôbô 5:19.) Satan a gwé ngôñ le di waa bôdôl Bibel ni ntôñ u Yéhôva ñem.​—Éfésô 4:14.

3. Inyuki di nlama téñbe maliga? (Éfésô 6:​13, 14)

³ Añ Éfésô 6:​13, 14. Ndék ngéda, Nsohop a ga gwélél bitembee bi ngui, inyu tinde biloñ gwobisôna i kolba Yéhôva. (Masoola 16:​13, 14) Di nyi ki le Satan a’ kônde yéñ manjel inyu yumus bagwélél ba Yéhôva. (Masoola 12:9) Jon i yé nseñ le di nigil i yi maselna ipôla maliga ni bitembee, di boñ ki biliya i nôgôl maliga. (Rôma 6:17; 1 Pétrô 1:22) Ibale di mboñ hala, di ga pei i njiiha ikeñi!

4. Kii di ga tehe munu yigil ini?

⁴ Munu yigil ini, di ga tehe bilem biba bi bi nla hôla bés i yimbe maliga ma ma nlôl i Bibel, ni i nôgôl maéba ntôñ u Nyambe u nti bés. I mbus di ga tehe mam maa di nlama boñ inyu téñbe i maliga.

BILEM BI BI NLA HÔLA BÉS I YIMBE MALIGA

5. Lelaa i kon Yéhôva woñi i nhôla bés i yimbe maliga?

⁵ I kon Yéhôva woñi. I ngéda di nkon Yéhôva woñi, di mpam i gwés nye ngandak kayéle di mboñ bé jam jo ki jo li li mbébél nye. Di nyamnda ni ngôñ i nigil maselna ma yé ipôla loñge ni béba, ipôla maliga ni bitembee, inyu pam i lémél Yéhôva. (Bingéngén 2:​3-6; Lôk Héber 5:14) Di nwahak bañ le woñi u mut binam u yémbél gwéha yés inyu Yéhôva, inyule i mam ma nlémél bôt ba binam, ma mbéna bébél Yéhôva.

6. Lelaa i kon mut binam woñi i bi tinde jôm li bôt ba mbep i kôde maliga?

⁶ Ibale di nkon bôt ba binam woñi iloo Nyambe, di nla ke haa ni maliga. Di yoñ hihéga hi 12 baane ba ba bi ke i pôôbe nkoñ Yéhôva a bi bôn bon ba Israel. Inyu jôm li bôt ba mbep mu ikété yap, i woñi ba bé kon bon ba Kanaan, u bé loo i woñi ba bééna inyu Yéhôva. Ba bi kal bana bon ba Israel bape le: “Di nla bé jôs bôt ba loñ i, inyule ba gwé ngui iloo bés.” (Ñañga bôt 13:​27-31) I litehge li bôt ba binam, bôt ba Kanaan ba bééna ngui iloo bôt ba Israel. Ndi i mut a bé hoñol le bon ba Israel ba bé bé le ba yémbél baoo bap, a bé yi toi bé njee a yé Yéhôva. I jôm li bôt ba mbep bana ba bé lama bok mahoñol map i jam Yéhôva a bééna ngôñ le bon ba Israel ba boñ. Ba bé lama ki ôt pék i ngii i mam Yéhôva a bi bôñôl bo hala a bé ndik ndék ngéda. I mbus, ba bé le ba nôgda le Yéhôva a gwé ngui iloo bon ba Kanaan huum! Maselna ni i jôm li bôt ba mbep bana, Yôsua bo Kaleb ba bé yéñ lémél Yéhôva. Ba bi kal bôt ba litén le: “Ibale Yéhôva a nkônôl bés maséé, a ga jôbna bés mu loñ i, a ti ki bés yo.”​—Ñañga bôt 14:​6-9.

7. Kii di yé le di boñ inyu boñ le woñi di gwé inyu Yéhôva i kônde nañ? (Béñge yak titii.)

⁷ Inyu kônde ke ni bisu i kon Yéhôva woñi, hiki ngéda di nsômbôl yoñ makidik, di nlama badba le: Kii i nlémél Yéhôva? (Tjémbi 16:8) I ngéda di ñañ ngim ñañ u Bibel, di badba le, ‘Ibale me ba ha i kel i, ki me bi boñ lelaa?’ Kiki hihéga, hégda le u bé mu litén li Israel i ngéda i jôm li bôt ba mbep bana ba bé kal litén le ba nla bé yoñ i loñ i. Baa ki yak we u bi kon woñi, u hémle bo, tole gwéha yoñ inyu Yéhôva ni ngôñ ikeñi i lémél nye i bé le i hôla we i yémbél woñi i mut binam? Ngoo le bon ba Israel bobasôna ba ba bé niñ ha i ngéda i, ba bi yimbe bé le Yôsua bo Kaleb bon ba bé pot maliga. Mam ma bi sôk lelaa? Yéhôva a bi neebe bé le ba jôp i Hisi hi likak.​—Ñañga bôt 14:​10, 22, 23.

8. Imbe lem di nlama boñ biliya bi ngui i hôlôs, inyuki?

⁸ Suhulnyuu. I bôt ba yé suhulnyuu bon Yéhôva a nyeelene maliga. (Matéô 11:25) Ni suhulnyuu, di bi neebe le ba niiga bés maliga. (Minson mi baôma 8:​30, 31) Di nlama yoñ yihe le di yila bañ ngôk. Inyule ngôk u nla tinde bés i noñ ndik mahoñol més, iloole di noñ matiñ ma Bibel ni maéba ma ntôñ.

9. Kii di nla boñ inyu tééda libak li suhulnyuu?

⁹ Inyu tééda libak jés li suhulnyuu, di nlama bigda le di nlôôha ba batitigi i bisu bi Yéhôva. (Tjémbi 8:​3, 4) Di nlama soohe Yéhôva le a hôla bés i ba bebee i neebe le ba niiga bés. Ha ngéda i, a ga boñ le i ba bés jam li ntomb i nwas le Bañga yé ni maéba ma ntôñ mon ma éga bés, he mahoñol més bé. I ngéda u ñañ Bibel, yéñ mam ma ma ñunda le Yéhôva a ngwés suhulnyuu, a ook ngôk ni lipamal. U yoñ ki yihe bañga liyoñok ibale u ntip kôs minson mi tôbôtôbô mi mi mboñ le bôt ba ti we lipém ngandak.

LELAA DI NLA TÉÑBE NI MALIGA?

10. Bonjee Yéhôva a bi gwélél inyu niiga ni inyu éga litén jé?

¹⁰ Kee ni bisu i bôdôl ntôñ u Yéhôva ñem. I nlômbi Israel, Yéhôva a bi gwélél Môsi bo Yôsua inyu niiga litén jé. (Yôsua 1:​16, 17) I ngéda Lôk Israel i bé tehe i bôt bana kiki bôt le Yéhôva a bi téé, a bé sayap bo. Ngandak nwii i mbus, i ngéda likoda li bikristen li bi gwéé, 12 baôma bon ba bé éga jo. (Minson mi baôma 8:​14, 15) I mbus, mimañ mi Yérusalem mi bi kôndba mu nsoñgi u baôma. I ngéda bôt bobasôna ba bé nôgôl i bôt ba hémle bana, ‘makoda ma bé kônde bana ngui ikété hémle, yak nsoñgi wap u bé bet hiki kel.’ (Minson mi baôma 16:​4, 5) Yak i len ini, i ngéda di nôgôl maéba ntôñ Yéhôva u nti bés, di nkôhna ngandak bisai. Ndi kii Yéhôva a ga nôgda ibale di ntjél nôgôl i bet a bi téé? Ibale di nhoñol i jam li bi pémél bon ba Israel i ngéda ba bé ke i Hisi hi likak, di ga kôhna ndimbhe i mbadga ini.

11. I nlômbi Israel kii i bi pémél i bet ba bi kolba Môsi nu a bé ñéga Yéhôva a bi téé? (Béñge yak titii.)

¹¹ I bi pam ngim ngéda mu kiki bon ba Israel ba bé ke i Hisi hi likak, le ngim mintôô mi bôt i kolba Môsi, ni nson Yéhôva a bi bééga nye. Ba kal le: “Bôt bobasôna ikété litén [ndik Môsi bé] ba yé bapubhaga, Yéhôva a yé ni bo.” (Ñañga bôt 16:​1-3) To hala kiki i bé maliga le i mis ma Yéhôva, “bôt ba litén bobasôna” ba bé bapubhaga, Yéhôva a bi pohol Môsi inyu éga litén jé. (Ñañga bôt 16:28) I ngéda bôt ba litén ba bé yahal Môsi, i maliga, Yéhôva nyen ba bé yahal. Ba bi bok bé mahoñol i yom Yéhôva a bé sômbôl; ndi i yom bomede ba bé sômbôl, le ba kônde bo kunde ni lipém. Nyambe a bi tjé i bet ba bé éga bôt ba ndok ni ba bobasôna ba bé nit bo. Iloo dikôô di bôt. (Ñañga bôt 16:​30-35, 41, 49) I len ini, di nla ba nkwoog nkaa le Yéhôva a ta bé maséé ni i bet ba nyan bitelbene bi ntôñ.

12. Inyuki di nlama ke ni bisu i bôdôl ntôñ u Yéhôva ñem?

¹² Di nla ke ni bisu i bôdôl ntôñ u Yéhôva ñem. I ngéda i mbéda le ngim mahéñha i bôña mu i nogna yés i maliga, tole i ntjega i nson wés, i bet ba ñéga ba mpala lona mahéñha ma mbéda. (Bingéngén 4:18) Ba mboñ hala inyule i jam li nlôôha nseñ i mis map, li yé le ba ngwés lémél Yéhôva. Ba mboñ ki biliya gwobisôna le makidik ba nyoñ ma ba ma umne i Bibel, ndémbél i bibañga bi maliga di nlama noñ.

13. Kii i yé “ndémbél i bibañga bi maliga,” kii di nlama boñ ni yo?

¹³ “Téñbe yaga ni ndémbél i bibañga bi maliga.” (2 Timôtéô 1:13) “Ndémbél i bibañga bi maliga” i yé biniigana bi Bibel. (Yôhanes 17:17) Biniigana bi bi yé hikuu hi hémle yés. Ntôñ u Yéhôva u niiga bés le di téñbe ni bibañga bi. Ibale di mboñ hala, di ga kôhna bisai.

14. Lelaa ngim bikristen i bi tjôô “ndémbél i bibañga bi maliga”?

¹⁴ Kii i nla pémél bés ibale di ntjôô ndémbél i “bibañga bi maliga”? Di yoñ hihéga hiada. I hiai hi bisu, i mpôna le nwin u bi tjama ipôla bikristen le, hilo hi Yéhôva hi mal lo. Ngim kaat bôt ba bé hoñol le ñôma Paul a ntila yon i bé kal hala. Ibabé i yoñ ngéda i wan i jam li, ngim bikristen i Tésalônika i bi hémle bitembee bi, i bôdôl yak tjam gwo. Ibale ba bigda i mam Paul a bi niiga bo i ngéda a bé a ngi yii ni bo, ki ba bi nwas bé le bitembee bi, bi yumus bo. (2 Tésalônika 2:​1-5) Paul a bi ti bilôk bikéé maéba le ba hémle bañ i mam momasôna ba nok. Inyu boñ le ba yoba ha bañ, Paul a bi mélés kaat i yônôs iba a bi tilna bôt ba Tésalônika ni bini bibuk le: “Me Paul, mayéga mem mana memede me ntila ni woo wem, mon ma yé yimbne i bikaat gwem gwobisôna; haana nyen me ntila.”​—2 Tésalônika 3:17.

15. Lelaa di nla tat bésbomede ni bitembee bi bi mpôna maliga? Ti hihéga. (Béñge yak bititii.)

¹⁵ Kii bibañga Paul a bi tilna bikristen bi Tésalônika bi niiga bés? Ibale di nok ngim jam i i nkiha bé ni biniigana bi Bibel, tole ngim jam bôt ba nhôñôs, di nlama gwélél ngap yés i yi bagal mam. I nlômbi Union Soviétique, baoo bés ba bi tjam ngim kaat, kal yap, i bé lôl i ño ntôñ. I kaat i, i bé ti lôk kéé makénd i bot wap ntôñ umpe. I kaat i, i bé nene wengoñle hikuu hikeñi hi Mbôgi Yéhôva hion hi ntila yo. Ndi i bi yumus bé i lôk kéé i bé i tiñi ni Yéhôva. Ba bi yimbe le biniigana bi bé mu i kaat i, bi bé kiha bé ni biniigana ba bi kôs. I len ini, baoo ba maliga ba ngwélél gwom kiki bo internet inyu noode yumus ni bagal bés. Iloole ‘di pala yôm ikété mahoñol més,’ di ga sôñ bésbomede ibale di nhégha i yom di nok tole di ñañ ni maliga di bi nigil.​—2 Tésalônika 2:2; 1 Yôhanes 4:1.

16. Inoñnaga ni Rôma 16:​17, 18, kii di nlama boñ ibale bôt bahogi ba nkahal ke haa ni maliga?

¹⁶ Téñbe ni i bet ba tiñi ni Yéhôva. Nyambe a nsômbôl le di bégés nye ikété adna. Di ga ke ni bisu i bégés Yéhôva ikété adna ibale di tiñi ni maliga. Nu ni nu a ntjam biniigana bi bi nkolba maliga, a nlona mbagla ikété likoda, jon Nyambe a mbéhe bés le di “keñgle bo.” Ibale hala bé, yak bés di nla kahal hémle mam ma ta bé maliga, di sôk di tjôô Yéhôva.​—Añ Rôma 16:​17, 18.

17. Bimbe bisai di nkôs i ngéda di nyimbe maliga, di téñbe ki ni mo?

¹⁷ I ngéda di nyimbe maliga, di téñbe ki ni mo, d’a tééda mbôô wés i pes mbuu. (Éfésô 4:​15, 16) Hala a ga sôñ bés ni bikwéha bi biniigana bi Satan ni bitembee a nhôñôs. Hala a ga boñ ki le i njiiha ikeñi, di ga ba isi bipapai bi Yéhôva. Ñ, di kee ni bisu i téñbe ni maliga, “ha nyen Nyambe nu nsañ a’ ba lôñni bé.”​—Filipi 4:​8, 9.