Baa u yik hala?

I hiai bisu, lelaa biprisi bi bi bé sal i témpel bi bé boñ ni matjél ma binuga ba bé nol i juu li bisesema?

I NGÉDA kôba, i loñ Israel, biprisi bi bé sémél Nyambe ngandak binuga i juu li bisesema li témpel hiki nwii. Ntila miñañ wada le Josèphe, nu a bi niñ i hiai bisu, a nkal le i kel Pasa, ba bé nol iloo 250 000 bon ba mintômba inyu sémél Nyambe bisesema, hala a nkobla le matjél ma bé ma nsôbi nsôbak, i bé béda le ba pémés mo. (Lôk Lévi 1:​10, 11; Ñañga bôt 28:​16, 19) Lelaa ba bé boñ?

Bahun ’isi ba bi tém ’isi ipañ témpel Hérôdé a bi oñ, i ba bi gwélél letee ni i ngéda i bi tjiba i nwii 70 N.Y. Ba bi tehe bahoma matjél ma bé pémél i ngéda ba bé ba sop mo nyoo i témpel.

Di béñge mam ima ba bé boñ ha ngéda i, inyu boñ le juu li bisesema li ba mapubi.

• Mapondo ma bé isi juu li bisesema:Nlômbi kaat wada ba bi tila i mbus nwii 200 N.Y., u u mpôdôl mambén ma Lôk Yuda ni bilem gwap, u nkal le mapondo ma bé ima isi juu li bisesema. I kaat i, i nkal le matjél ma binuga ni malép ba bé jôôna juu li bisesema ma bé lôô mu mapondo ma, ma kenek letee ma sôbi i nsôsôgô u Kidrôn.

  Kaat i ngéda yés i i mpôdôl ñañ u Lôk Yuda i ntoñol le bahun ’isi ba bi léba nlélém jam. Yak bo ba nkal le i nene le mapondo ma bé i het matjél ma bé lôô i ngéda ba bé sop mo i juu li bisesema.

• Malép ma bé ngandak: I bé béda ngandak malép inyu boñ le biprisi bi jôwa juu li bisesema ni le matjél ma kuli mu lipondo ibabé ndutu yo ki yo. Biprisi bi bééna malép ma bé béda bo mu tison. Bahoma ba bé i het malép ma bé lôô inyu pam mu tison, bahoma bape ba bak ki i het ba bé ba ha i malép ma. Nhun ’isi wada le Joseph Patrich a nkal le: “I nene le témpel ipe yo ki yo ha ngéda i, i bééna bé likeñge lilam hala inyu lona malép i témpel ni i pémés malép ma ma yé mahindi.”