4 Nwéhél

KII HALA A NKOBLA

Nwéhél i nkobla le u nhôya i béba ba bi boñ we, u tjél ki tééda hiun i ñem. Ndi nwéhél i nsômbôl bé kal le u nyan béba jam ba mboñ we, tole u nsas yo i boña woñ.

LITIÑ LI BIBEL: “Ni hônbanaga bé ni bé, ni nwéhlaga ki bé ni bé, to ibale mut a ntogha inyu maasañ.”​—Kôlôsé 3:13.

“Ngéda u ngwés mut, u béñge bañ ndigi libak jé li kwéha, ndi béñge biliya a mboñ inyu héñha libak jé.”​—Arôn.

INYUKI HALA A YÉ NSEÑ

Ibale u ntééda hiun ikété ñem, u ga tééñga mbôô woñ ni mahoñol moñ​—u nla ki ôbôs libii joñ.

“Kel yada, nlô wem a bi bat me nwéhél inyu ngim jam i i bi unbaha me. Hala a bé lédél me ngandak inyu nwéhél nye, ndi me bi sôk me nwéhél nye. Jon me ntam inyuki me bi pala bé boñ hala, inyule hala a bi tééñga maada més ngandak.”​—Yulia.

JAM U NLA BOÑ

TIBIL WANBA

Mu dilo ti di nlo, ibale sobiina woñ a mboñ tole a nkal we jam li li mbabal we, badba le:

• ‘Baa me nhoo unup?’

• ‘Baa hihôha hi, hi yé yaga hikeñi kayéle me ngwé ngôñ ni nwéhél? Tole me nla yan hio?’

KWEL NI SOBIINA WOÑ

• Baa di yé di hoo tole di yé di tiñha nwéhél?

• Kii di nlama boñ inyu pala sañgal mindañ?

NDÉK MAÉBA

• Ibale jam li ñunbaha we, u ôm bañ sobiina woñ nsohi.

• Noode nwéhél hihôha hi sobiina woñ, u hégda ki le “bés bobasôna di mbaage ngandak.”​—Yakôbô 3:2.

“Ibale bé bo iba ni bi boñ hihôha, hala a ntomb inyu nwéhél, ndi ngéda wada nyen a ñunbaha nuu, nwéhél i nlet. Ibale di mbat nwéhél ndi yak bés di nwéhlak bape, hala a ñunda le di gwé bañga suhulnyu.”​—Kimberli.

LITIÑ LI BIBEL: ‘U pala sañgal mindañ.’ ​—Matéô 5:25, MN.