I jam ngim bôt i nhémle

Base i Indu

i nkal le mandutu mut a nla bana ma nla ba ngim kogse inyu mam mabe a bi boñ mu niñ yé, tole inyu mam mabe a bi boñ i niñ ipe. Base i Indu i nhoñol le mandutu ma mut ma mal ndigi ngéda a mpam i moksha tole ngéda a ga tiimba ha bé gwé.

Base i bausa

i nkal le mandutu mut a nla bana ma yé kogse, ma nla ki ba manoodana inyu hémle. Dokta Sayyid Syeed nu a yé ñéga i Societé Islamique de l’Amérique du Nord a nkal le bikuu bi nkwél mut inyu hôñlaha nye le “a nlama téñbe i ti Djob mayéga inyu bisai a nkôhna ni le a nlama hôla bôt bape.”

Base i Lôk Yuda

i nkal le mandutu mut a nla bana ma yé nsaa u bibéba gwé. Bahogi mu base i Lôk Yuda ba nhoñol le ngéda bitugne, Djob a ga kogse bôt bobasôna ba bi tééñga biloñge bi bôt. Ngéda mut a nwo, i mbus a tiimba gwé homa numpe, tole ni nyuu ipe, a gwé pôla i kôhna nwéhél i bibéba gwé.

Base i Bouddha

i nkal le manutdu mut a nla boma mu niñ yé, ma nlôl mu ngandak mintén mi niñ a bi bana, i nla ki ba le a bi wo ngandak ngélé i mbus a tiimba gwé. Mandutu mé ma ga mal ndigi ngéda ngôñ yé ibe, maboñok mé mabe ni mahoñol mé mabe ma ga mal. Mut a nla pam i nirvana, hala wee i paradis het mandutu momasôna ma mal ngéda a niñ a ôdôk pék, ngéda a mbôñôl bôt bape loñge yak ngéda a nhôlôs hôtnyuu.

Base i Conficius

i kaat ba nsébél ni hop pulasi le Dictionnaire comparatif des religions i nkal le libim li mandutu li nlôl i “mahôha ma bôt ba binam.” Base i Conficius i neebe le mandutu ma nla hoi ngéda di mbôñôl bôt bape loñge, ndi i niiga ki le “bihégél bi mbuu bi bi nloo bôt ba binam ngui gwon bi nlona mandutu ma. Ha ngéda i, mut binam a yé nyégsaga i neebe makidik ma hégél mbuu i.”

Base i basôgôlsôgôl

i nkal le mimbuu mimbe nwon mi mboñ le bôt ba bana mandutu mu niñ yap. Bôt ba base i, ba nhémle le bôt ba makañ ba nla ti mut bisai tole ba nla lona nye bikuu. Ndi bikuu bi, bi nla sôs ngéda bôt ba neebe noñ ngim bilem bi mbok ni ngim bikila. Ngéda mut a nkon, bôt ba makañ ba ngwélél matibla ma tôbôtôbô inyu mélés kon u.

Bikristen

inoñnaga ni yom kaat Bibôdle i nkal, bikristen bi nhémle le mandutu ma bôt ba binam ma nlôl i béba Adam bo Éva ba bi boñ. Ndi ngandak bibase i bi kônde map mahoñol inyu toñol biniigana bi. Kiki hihéga, base Lôk pada i nkal le mut a nla yoñ mandutu mé a ‘ti mo Djob kiki sesema’ inyu boñ le Djob a gwélél mandutu ma inyu sayap base tole inyu tohol mut numpe.