Bot liwanda ni bôt ba ba ta bé kiki we

Hee ndutu i nla lôl

Ibale di nkeñgle i bôt ba matén ba di ngwés bé, hala a mboñ le di kee ni bisu i todol bôt. Ibale di mbot ndik mawanda ni bôt ba ba yé kiki bés, d’a tiga hoñol le ndik mahoñol més ni maboñok més mon ma yé malam.

Maéba ma Bibel

“Yiblana yaga miñem minan.”​—2 KORINTÔ 6:13.

Kii hala a nkobla? “Ñem” wés u nla ba yimbne i mam di nôgda ni mahoñol més ma kétékété. Ibale di ngwés ndik bôt ba yé kiki bés, di ga yip miñem nwés. Inyu boñ le di yip bañ miñem nwés, di nlama bot mawanda ni bôt ba ba ta bé kiki bés.

Lelaa i bot mawanda ni bôt ba ba ta bé kiki we i nla hôla we?

I ngéda w’a yi bôt bape loñge, ha nyen w’a nok inyuki maboñok map ma yé maselna ni moñ. Kiki di mba di nkôôge bo bebee, di mba di ntehe ha bé le ba yé maselna ni bés. Ha nyen di ga bôdôl ti bo lipém. Maséé map ni mandutu map ma ga yila més.

Béñge hihéga hi Nazaré. I bibôdle, a bé todol bakén ba bôt. A ntoñol kii i bi hôla nye, a nkal le: “Me bé tégbaha ngéda ni bo, me salak ni bo. Me bi boma ngim bôt i i bé maselna ni yom ba bi añle me inyu litén jap. I ngéda u nyila liwanda ni bôt ba ba nlôl matén mape, w’a tehe le bobasôna ba ta bé nlélém, gwéha yoñ inyu yap y’a keñep. W’a tehe le hiki wada wap a gwé gwé bilem.”

Kii u nla boñ

Yéñ manjel i kwel ni bôt ba ba nlôl i matén mape, i biloñ bipe, ba podok dilémb dipe. Noode le jam lini

• Kal le ba añle we bonjee ba yé.

• Naña bo i je.

• I ngéda ba mpot emble bo, u yéñék i yi kii i yé nseñ inyu yap.

Ibale u nyéñ yi i mam ma bi pémél bo mu niñ yap, w’a nok inyuki ba gwé ngim bilem. W’a bôdôl gwés bo, u gwés ki bôt ba yé mu litén jap.